Auai i le Galuega o le Faaolataga ma le Faaeaga—Savali Talu ai nei mai Perofeta, Aposetolo, ma Isi Taitai o le Ekalesia

Setema 2023

Ua Na’o Tusiga Faatekinolosi

Auai i le Galuega o le Faaolataga ma le Faaeaga—Savali Talu ai nei mai Perofeta, Aposetolo, ma Isi Taitai o le Ekalesia

Tagai i mea na aoao mai talu ai nei e taitai o le Ekalesia i luga o ala o faasalalauga faaagafesootai e uiga i le galuega o le faaolataga ma le faaeaga.

o le fafine ua pa’i atu i le pito o le ofu o le Faaola

“O le faamoemoega o aoaoga faavae ma aiaiga faavae a lenei Ekalesia toefuataiina,” na saunoa ai Peresitene Dallin H. Oaks, Fesoasoani Muamua i le Au Peresitene Sili, “o le saunia lea o fanau a le Atua mo le faaolataga i le malo selesitila ma mo le faaeaga i lona tikeri aupito maualuga.”¹ Tatou te talanoa soo e uiga i lenei galuega—le galuega o le faaolataga ma le faaeaga—ae o le a lona uiga?

“A tatou o mai ia Keriso ma fesoasoani atu i isi e faia lena lava mea e tasi, ua tatou auai i le faatinoina o le galuega a le Atua o le faaolataga ma le faaeaga. O lenei galuega o loo taialaina e poloaiga sili e lua ia alofa atu i le Atua ma alofa atu i o tatou tuaoi (tagai i leMataio 22:37–39). …

“O le galuega o le faaolataga ma le faaeaga e taulai atu i tiutetauave e fa na tofia mai le lagi. …

Ola i le talalelei a Iesu Keriso.
Tausia o i latou e le tagolima.
Valaaulia o tagata uma ia talia le talalelei.
Tuufaatasia o aiga mo le faavavau.”²

Tagai i mea na faasoa mai talu ai nei e taitai o le Ekalesia i luga o ala o faasalalauga faaagafesootai e uiga i le auala e mafai ona tatou ola ai, tausia, valaaulia, ma tuufaatasia.

Tatalo mo le Taitaiga e Fesoasoani ai ia i Latou e Le Tagolima

“I lenei Aso Faaleatunuu o Le Tatalo, sa ou mafaufau loloto ai i le uiga o le faatupulaia i lo tatou sosaiete o le fuaitau ‘mafaufauga ma tatalo.’ Mo le toatele, o se faailoaga faamaoni lava lea o le faamaisega ma le popole. Mo isi, e manatu i ai o le leai o se faatinoga ua vaaia i le feagai ai ma faalavelave.

“E i ai so’u talitonuga mausali o le tatalo mo i latou e manaomia le fesoasoani e fiafia i ai le Atua; o le mea moni, ua Ia poloaiina i tatou ia liliu atu ia te Ia ma tatalo mo isi! Peitai, o lo’u lava aafiaga patino pe a ou ole atu i le Atua i le tatalo mo le taitaiga i mea e mafai ona ou faia e fesoasoani ai e auauna atu, siitia, alofa, ma lagolago i latou e le tagolima, e tali mai o Ia i nei tatalo i mea patino ma faatauvaa e mafai ona ou faia e faamanuia ai se tasi o Ana fanau.

“Ou te valaaulia outou e mafaufau pe mafai faapefea ona avea ou mafaufauga ma tatalo ma se faatosinaga mo le Atua e musuia ma taitai atu ai oe i faatinoga o le agalelei, agaalofa, ma le agalelei. Vaai faalemafaufau i le tele o le lelei e mafai ona e faia i le lalolagi—ma i lou lava aiga, aoga, ma le fale faigaluega. A o tatou saili e avea ma Ona aao faamalolo ma aao fesoasoani, o le a mautinoa lava o le a tatou faaea le Alii.”

Peresitene Russell M. Nelson, Facebook, 5 Me., 2022, facebook.com/russell.m.nelson

Faamagalo Atu i Isi ma Vaai ia i Latou o ni Uso ma Ni Tuafafine

“Lo’u Tama e, ia e faamagaloina atu ia te i latou; aua ua latou le iloa le mea ua latou faia.’ (Luka 23:34).

“O nei upu, na gagana mai e le Faaola o Iesu Keriso a o tautau o Ia i luga o le satauro, ua tuuina mai ai ia i tatou se mamanu e mulimuli ai i o tatou lava olaga. Sa Ia aoaoina i tatou ia alolofa i o tatou fili, ia faia mea lelei i e inoino mai ia i tatou, ma tatalo mo e e tuaifuaina i tatou.

“Pe a tatou filifili e faamagalo atu i isi, ua tatou faataga le Alii e aveese le oona mai o tatou agaga. Ua tatou faataga o Ia e faafilemu ma faamaluluina o tatou loto tatou te vaai atu ai i isi, aemaise e na faia ni mea sese ia i tatou, o ni fanau a le Atua, ma o tatou uso ma tuafafine.

“.… Ou te valaaulia outou ia mafaufau ma le agaga tatalo pe i ai se tasi e tatau ona e faamagalo atu i ai po o se tasi e tatau ona e ole atu e faamagalo ia te oe. Ou te folafola atu a e faamagalo atu, o le a aveesea e le Faaola lou ita, lē fiafia, ma le tiga. O le a aumaia e le Aloalii o le Filemu ia te oe le filemu.

“… Tau ina ia tatou liliu atu i le Alii toetu a o Ia fesoasoani mai ia i tatou ia lagonaina le olioli ma le vavega o le faamagalo atu.”

Peresitene Russell M. Nelson, Facebook, 2 Ape., 2023, facebook.com/russell.m.nelson

Faasoa Atu Lou Malamalama

“I le avea ai ma se talavou matua O Le Ekalesia a Iesu Keriso o le Au Paia o Aso e Gata Ai, atonu e te oo i ni taimi e te mafaufau ai po o le a se mea e mafai ona e faia e faia ai se eseesega i le lalolagi. I le amataga, sa ou aoao ai afai e te manao e sui le lalolagi, e tatau ona e suia muamua oe lava.

“Ou te fiafia i le aafiaga o Gordon B. Hinckley o se faifeautalai talavou ina ua ta’u atu e lona tama ia te ia, ‘Faagalo oe lava ae alu e galue.’ E manaomia e le lalolagi lou naunautaiga, lou malosi, lou faatuatua, lau molimau. E tele auala e mafai ona e faasoa atu ai lou malamalama ma faia le lalolagi o se nofoaga e sili atu ona lelei. …

“Po o le a lava le auala e te filifili ai e faasoa atu le malamalama o ia te oe, o le a manuia isi mai ou aafiaga. O le a e latalata atili atu i le Faaola pe a e auai i gaoioiga lelei ma auauna atu i isi. Ou te folafola atu o le a suia ai oe ma le lalolagi mo le lelei sili atu.”

Elder Dieter F. Uchtdorf, Facebook, 3 Fep., 2023, facebook.com/dieterf.uchtdorf.

Ia Nofouta i o Tatou Tiutetauave

“Sa faalua ona avea lo’u aiga ma tagata sulufai. O le taimi muamua sa na o le fa ou tausaga; o le taimi lona lua sa 11 o’u tausaga. Sa ou mafaufau i lenei mea ina ua ou maua le avanoa e lauga atu ai i aufailotu o le Au Paia o Aso e Gata Ai mai le lalolagi atoa. …

“Ua faatumulia lo’u loto i le faanoanoa pe a ou mafaufau i le solo mai o tagata sulufai ma aumalaga i le lalolagi atoa ma mafatiaga o le toatele o aiga ma fanau e lesala. O i latou o o tatou uso ma tuafafine. E tatau ona tatou mafaufau i o tatou tiutetauave o ni Kerisiano.

“E tatau ona usitaia tulafono o le atunuu, ma e tatau foi i tulafono ona atagia mai ai lo tatou naunautaiga o ni Kerisiano e fesoasoani i e matitiva ma e le tagolima, ia naunau e faanoanoa faatasi ma i latou, e faamafanafana i latou, ia tatalo faatasi ma i latou, ia faasoa atu ma le limafoai a tatou mea ma avanoa ia i latou, ma ia mautinoa lava e avea ma a latou uo.

“O le tuuina atu o i tatou lava i lenei ituaiga o auaunaga o le a sili ona faailoa atu ai le alofa mama o Keriso i o tatou uso a tagata -o alii ma tamaitai. O le agaalofa ma le agalelei faaKeriso mo o tatou uso a tagata -o alii ma tamaitai, o le a suia ai i tatou. O le a aumaia ai se suiga lelei i le lumanai o le lalolagi. O lo tatou manao ma la tatou faatinoga e fesoasoani i se tasi o ma’i, fiaai po i ai i faigata o le a aumaia le filemu i o tatou olaga patino. O lenei mea o le a faamanuiaina ai o outou nuu ma o le a aumaia ai le filemu o Keriso i atunuu o le lalolagi. O le mea lea, o aso uma e mafai ma e tatau ona avea o se aso o le amataga fou.”

Elder Dieter F. Uchtdorf, Facebook, 10 Oke., 2021, facebook.com/dieterf.uchtdorf.

Ia Avea le Alofa ma Ou Uunaiga

“Pe a oo mai i le faasoaina atu o le talalelei, o le mamanu faigofie o le ‘alofa, faasoa, ma le valaaulia’ e aumaia ai le taulaiga sili atu i vaega uma o le galuega a le Alii. E masani lava o le ola ai i nei mataupu faavae autu o le talalelei o le a mafai ai e i tatou ona fesoasoani i isi ia o mai ia Keriso e ala i le osia ma le tausia o feagaiga. Atonu tatou te le o iloaina o loo tatou faasoaina atu le talalelei, aua o le faasoa atu ma le valaaulia o se faailoaga masani lea o lo tatou alofa faamaoni mo isi. Ua na o se vaega o le tagata ua i ai i tatou!

“Ua fai mai tusitusiga paia ‘e onosai le alofa’ ma ‘onosai i mea uma’ (1 Korinito13:4, 7). E leai se taimi faatulagaina po o se aso e uma ai le alofa. A faaosofia la tatou faasoa ma le valaaulia e le alofa, e le uma lo tatou onosai. Tatou te taumafai pea, ma tatou faalagolago i le Alii a o tatou aapa atu i isi.”

Elder David A. Bednar, Facebook, 2 Aok., 2021, facebook.com/davida.bednar

Siitiaina O Le Fuafuaga o le Fiafia a le Tama

“O le toatele o outou o loo faitauina lenei mea o se vaega o le Tupulaga Z. Ua e ola ae ma se malamalama faalenatura e uiga i le initoneti, masini poto, ala o faasalalauga faaagafesootai, ma isi tekinolosi e faatatau i ai lea ua tatau ona faia e matou le augatupulaga matutua se taumafaiga e aoao. Mo oe, o le ‘fiafia,’ ‘faasoa atu,’ ma le ‘faaaliga tuusao’ e taatele e pei o le valaauina, tuitui atu, ma le tusiaina o se tusi, lea sa i ai mo augatupulaga na muamua atu ia te oe. Ae faatasi ai ma lou malamalama tele e uiga i le lalolagi faatekinolosi o loo siomia ai oe, ua ia te oe se mea e sili atu—ua ia te oe le faavae ia avea ai o se tupulaga aupito sili ona gafatia mo le siitiaina o le fuafuaga o le fiafia a lo tatou Tama Faalelagi i Ana fanau uma. Ma e matou te manaomia la outou fesoasoani.

“Ou te faasoa atu ia te outou se valaaulia … : Ia manatua e taua au filifiliga. A o e faia filifiliga i aso taitasi e mulimuli i le faataitaiga a Iesu Keriso, o le a e maua le manuia, fiafia, ma le faamoemoega o le a faamanuiaina ai lou olaga i ni auala e lei mafaufauina.”

Elder Quentin L. Cook, Facebook, 26 Ian., 2023,facebook.com/quentin.lcook

Saunia mo le Ulufale Atu i le Maota o le Alii

“O le fausiaina o [le Malumalu o Monrovia i Liperia] e lei amataina lava, ae sa ou faasoa atu i se faapotopotoga tele i Liperia e faapea, o le taimi mo sauniuniga a le tagata lava ia mo le malumalu ua amata nei.

“I aso ua mavae, o tagata taitoatasi o loo sauniuni mo tapuaiga i le maota o le Alii atonu na mafaufau po o le a le ituaiga o taulaga e tatau ona latou faia e ulufale atu ai i lenei maota paia.

“Peitai, i aso nei, o tagata o le Ekalesia i Liperia—faapea foi ma Au Paia o Aso e Gata Ai i le salafa o le lalolagi—e ao ona mulimuli i le faataitaiga a Iesu Keriso ma ofo atu se ‘loto momomo ma le agaga salamo’ (3 Nifae 9:20). O i tatou o e taulai atu i le sauniaina o i tatou lava i lenei ala o le a avea ma tagata e sili atu ona paia ao tatou maua le avanoa e auai ai i auaunaga i le malumalu.”

Elder D. Todd Christofferson, Facebook, 10 Mat., 2023, facebook.com/dtodd.christofferson.

Ia I Ai le Faatuatua Tele ma le Lototele

“Ua matua faagaeetia lava au i talavou matutua ma le autalavou ua ou feiloai i ai iinei [i Tokyo]. O Iapani o se atunuu e 125 miliona ona tagata. E na o le 1% o le faitau aofai o tagata o le atunuu o Kerisiano, ma e itiiti ifo ma le 10% o Kerisiano o tagata o le Ekalesia. E manaomia ai le faatuatua tele ma le lototele e ola ai i o latou olaga o ni soo o Iesu Keriso ma faasoa atu o latou faatuatua i isi.

“Sa ou talanoa atu ia i latou e uiga i le faasoa faasamasamanoa atu o loo latou talitonu ma mulimuli ia Iesu Keriso. Sa ou faailoa atu ia i latou le alofa o loo ia i tatou mo i latou ma ituaiga tagata o i ai i latou. Sa ou tau atu ia i latou e manaomia e le Alii i latou i le tausiga o soo tuuto o Iesu Keriso i totonu o lenei nuu matagofie tele ma tagata ofoofogia.”

Elder Neil L. Andersen, Facebook, 27 Me, 2022,facebook.com/neill.andersen

Alofa i le Atua

“O leIosua 22:5 ua faataatia mai ai ni laasaga iloga se fa e aoao ai i tatou i le ala e mafai ai ona tatou alolofa i le Atua, ma faataunuuina le poloaiga muamua ma le sili:

Savali i Ona ala uma. Tatou te savavali i Ona ala pe a tatou popole i mea e popole i ai o Ia. E popole o Ia ia te oe, aisea la o le a tatou le tausia ai foi Ana fanau?
Tausi Ana poloaiga. Na aoao mai Peresitene Russell M. Nelson, ‘O tulafono a le Atua e faaosofia atoa i Lona alofa e le iu mo i tatou ma Lona finagalo mo i tatou ia avea ma tagata uma e mafai ona avea ai i tatou’ (‘The Love and Laws of God’ [Brigham Young University devotional, Sept. 17, 2019], speeches.byu.edu).
Pipii Atu Ia te Ia. Pe a e pipii atu i le Atua, e te faalatalata atu ia te Ia ma mafai ona e lagona lelei o Ia.
Auauna atu ia te Ia ma lou loto atoa ma lou agaga atoa. O le auauna atu i lo’u aiga ma le Ekalesia o se tasi lea o faamanuiaga silisili i le mamanuina o le tagata ua avea ai a’u.

“Ia faia nei le tautinoga ia alofa i le Atua. Ou te folafola atu o le a pa’u tonu i luga o le laina ma fetaui mea uma pe afai e te faamuamua o Ia. O le alofa i le Atua o le ki lea i le fiafia ma o le a saunia ai oe e fetaiai ma soo se mea e oo mai.”

Elder Ronald A. Rasband, Facebook, 13 Fep., 2022, facebook.com/RonaldARasband

Ia Iloa o Loo Aofia Iesu Keriso i Lana Galuega

“O se tasi o mataupu faavae autu o le Toefuataiga o le talalelei a Iesu Keriso e faapea, o loo Ia auai ma le maelega i le galuega o le faaolataga.”

Elder Dale G. Renlund, Facebook, 2 Mat., 2021, facebook.com/DaleGRenlund

Ia o Atu Ma Agalelei Atu

“O le auala tatou te taulimaina ai tulaga manuia ma tulaga le manuia o se vaega o le suega o le olaga. O le a lē tele le faamasinoina o i tatou ia tatou tala e fai, ae o le auala tatou te taulimaina ai e manaomia le fesoasoani ma e pagatia. I le avea ai ma Au Paia o Aso e Gata Ai, tatou te saili e mulimuli i le faataitaiga a le Faaola, e o atu ma agalelei atu. Tatou te faaali tino atu lo tatou alolofa i lo tatou tuaoi e ala i le galulue ia mautinoa le amiosao o fanau uma a le Tama Faalelagi. A o tatou avea atili e faapei o le Faaola, tatou te atiina a’e atili le uiga alofa, o le malamalama, ma le alofa mama.”

Elder Dale G. Renlund, Facebook, 19 Iulai, 2021, facebook.com/DaleGRenlund

Avea ma se Sootaga Mau i Augatupulaga Faaleaiga

“E ala i lo tatou faatuatua ia Iesu Keriso, ia avea i tatou ma se sootaga mau i o tatou augatupulaga. Ia tatou fesootai ma o tatou tuaa ma faamanuia o tatou aiga o i ai nei ma le lumanai—o aiga ua tatou maua ma aiga tatou te mananao i ai.”

Elder Gerrit W. Gong, Facebook, 3 Mat., 2023, facebook.com/gerritw.gong.

Galue i Autafa o le Alii

“O le masina na te’a i le faigalotu i le lalolagi atoa, sa ou valaaulia ai outou ina ia avea ma ‘oe’ sili atu a o e galue i autafa o le Alii.

“I le avea ai ma soo o Iesu Keriso, o la tatou feagaiga o le auai ma le Atua faapea ma le tasi ma le isi, ua valaaulia ai i tatou ia lelei ma faia mea lelei. E pei ona outou silafia, e tuuina atu e la tatou Ekalesia fesoasoaniga alofa e aunoa ma se manatu i le lanu, aafiaga tau lotu, ma ituaiga. Tatou te galulue faapaaga ma faatuatuaga uma, pe le o ni faatuatuaga foi. Tatou te tali atu i manaoga faavavave ma manaoga mo taimi uumi. Tatou te lagonaina faamanuiaga a le lagi a o tatou faailoa atu lo tatou alolofa i le Atua e ala i le faia o mea uma e tatau ai mo o tatou uso ma tuafafine, o Ona atalii ma afafine, i soo se mea, i auala uma tatou te mafaia.

“Afai o loo e sailia ni auala e avea ai ma se ‘oe,’ e sili atu, mafaufau e sii mai le polokalama JustServe.org e maua ai avanoa e latalata atu ia te oe.”

Elder Gerrit W. Gong, Facebook, 12 Fep., 2021, facebook.com/gerritw.gong.

Iloa Pe O Ai Oe

“A o e saili ia iloa ma tuufaasolosolo ifo po o ai oe, ma po o fea ma o ai foi na e sau mai ai, o le a e iloa ai po o ai o Ia—lou Faaola o Iesu Keriso; ma ou te folafola atu ia te outou o le a outou maua le mama a’ia’i ma le filemu, vaaiga ma faamoemoega, ma o le a outou maua le mana ma le nofoaga i le aiga o le Atua.”

Elder Ulisses Soares, Facebook, 5 Mat., 2022, facebook.com/soares.u

Faasoa Atu Tala o le Aiga

“O a tala o le aiga e te maua mai ai le malosi? O a tu ma aga masani o loo e faaolaolaina pea? Afai e leai se mea e oo mai i le mafaufau, aua le lotovaivai. Matou te uunaia outou ia iloa; ma ia manatua, o talafaasolopito o aiga e lē faatatau uma i le taimi ua tuanai. O se tuufaatasiga o le taimi ua tuanai ma le taimi nei ua tulaga ese ai oe.”

Elder Ulisses Soares, Facebook, 2 Mat., 2022, facebook.com/soares.u

Ia fefautuaa’i faatasi e uiga i le Galuega o le Faaolataga ma le Faaeaga.

“E tatau ona avea le Aualofa ma se nofoaga saogalemu e mafai ai e tuafafine ona faasoa atu o latou aafiaga, fefautuaai faatasi, saofaga i aoaoga anoa o le talalelei, ma lagonaina le alofa o le Tama Faalelagi ma le Faaola. …

“Ua valaaulia tatou e le Tusitaulima Aoao e faaalu se taimi i fonotaga taitasi a le Aualofa e fefautuaai faatasi ai e uiga i autu e faatatau i le galuega o le faaolataga ma le faaeaga, lea e mafai ona aofia ai soo se mea mai le auauna faatasi i o tatou nuu, e oo atu i le malamalama ai i se autu o le talalelei pe feagai foi ma se luitau patino—e taulai atu pea i lo tatou Faaola.

“Matou te faamoemoe o le a filifili ma le agaga tatalo e au peresitene taitasi o le Aualofa i le lotoifale ni autu e manaomia mo tamaitai i la latou tausiga. O lenei taimi e mafai ona avea o se punaoa taua mo le aoaoina mai ma le auauna atu i le tasi ma le isi e pei ona faia e Iesu Keriso.”

Peresitene Camille N. Johnson, Facebook, 8 Ian., 2023, facebook.com/RSGeneralPresident.

Mauaina ma le Utuvai mai le Mana o le Perisitua

“Uso e, ua outou maua le avanoa i le mana o le perisitua! O faamanuiaga o le mana o le perisitua o loo avanoa mo tagata uma o le Ekalesia o e tausia a latou feagaiga—tamaitai, alii, ma tamaiti.

“Ua ou aoaoina ina ia mafai ona utuvai mai le mana o le perisitua, e tatau ona ou faia ni mea e sili atu nai lo le na o le usiusitai i poloaiga. E tatau ona ou faataatia ese mea o lenei lalolagi ma faapaiaina a’u taleni, taimi, ma punaoa i le Atua. O se ituaiga o tautinoga o le loto, manatu, mafaufau, ma le malosi i le galuega o le faaolataga ma le faaeaga—o le faapotopotoina o Isaraelu—lea e mafai ai ona ou utuvai mai i le mana o le perisitua lea ua faaeeina i ai a’u.

“Ua folafola mai Peresitene Russell M. Nelson ‘o i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana.’ (‘Oa Faaleagaga,’ konafesi aoao, Oke. 2019).

I le tali atu i lana folafolaga, sa ou galue ai e suesue lo’u olaga. Sa ou faia se lisi: ‘O le a se mea ou te faia i se aso/vaiaso/masina?’ Ona ou fesili ifo lea ia te au lava ia, ma se loto tatalo, ‘O le a se mea ua le toe agavaa mo lo’u taimi ma lo’u malosi?’ E pei lava ona fautuaina mai e le perofeta, o mea sa foliga mai sa taua i se tasi taimi na solomuli atu mai le faamuamua, ma o nisi o gaoioiga na kolosi ese faatasi mai la’u lisi, aua e pei e foliga mai e le afaina, ae o i latou o se mea faalavefau.

“O la’u iloiloga faaletagata lava ia sa le o se gaoioiga o se taimi e tasi. Ua ou aoaoina o se iloiloga loloto o lo’u taimi ma le malosi o se, e pei ona saunoa mai Peresitene Nelson, ‘faagasologa i le olaga atoa o le faapaiaina o le olaga i le Alii’ (‘O Oa Faaleagaga,’ konafesi aoao, Oke. 2019) ma ua suia ai lo’u malamalamaaga e uiga i mea e tatau ona ou faia e utuvai mai ai i le mana o le perisitua lea e mafai ona ou mauaina pe afai ou te tausia a’u feagaiga.

“Pe o le a outou aufaatasi ma a’u i le sailia o le mauaina ma le utuvai mai i le mana o le perisitua?”

Peresitene Camille N. Johnson, Facebook, 13 Nov., 2022, facebook.com/RSGeneralPresident.

Tatalo ma Faalogo.

“E faia e le Faaola Lana galuega e ala mai ia i tatou taitoatasi. O lea ia tatou tatalo mo le tasi ma le isi ma faalogo i le ala e finagalo o Ia tatou te faamanuia ai i latou o siomiaina i tatou. O le a Ia tali mai auā e alofa o Ia i lou loto lelei, ma e alofa o Ia ia i latou i lou ala. Tau ina ia e lagonaina Lona alofa mo oe a o e vaai atu ma faamanuia isi e pei ona Ia faia.”

Sister Kristin M. Yee, Facebook, 8 Fep., 2023, facebook.com/RS2ndCounselor.

Fesoasoani i Tamaiti e Auai i le Galuega o le Faaolataga ma le Faaeaga

“A o asiasi atu i vaega eseese o le Peraimeri i le salafa o le lalolagi, e musuia lava au i taimi uma i le naunau ma le gafatia o fanau e auai i le faatinoina o le galuega o le faaolataga ma le faaeaga. O tamaiti ua papatisoina o loo ola i a latou feagaiga o le papatisoga!

“O lo matou faamoemoega o se au peresitene, e mafai e tamaiti uma ona malamalama ma ola i feagaiga latou te osia i le papatisoga—faapea foi ma le saunia mo isi sauniga i luga o le ala o feagaiga a le Faaola.

“Ua matou fiafia lava e faasoa atu ni punaoa fou mo matua ma taitai o le Peraimeri e fesoasoani ai i tamaiti ma le autalavou ia malamalama i faamanuiaga ma avanoa o le osia ma le tausia o feagaiga paia. Ou te faamoemoe o le a e mauaina ma iloiloina nei punaoa i le tusi lesona o le Sau, Mulimuli Mai Ia Te A’u i luga o le polokalama o le Gospel Library po o ChurchofJesusChrist.org.”

Peresitene Susan H. Porter, Facebook, 28 Oke., 2022, facebook.com/PrimaryPresident

“Faauta O A Outou Fanau”

“Ina ua apoapoai atu le Faaola i tagata o Amerika anamua e ‘vaai [i o latou] tamaiti laiti’ (3 Nifae 17:23), sa Ia valaaulia i latou e le na ona vaai ia i latou ae ia vaai loloto ia i latou. Vaai i o latou mata ma iloaina lo latou taua paia, gafatia, ma le mafaia. O le valaaulia lava lea e tasi e faatatau i o tatou tamaiti laiti faapelepele ua tuuina mai ia i tatou i aso nei. Ua valaaulia a tatou fanau e se perofeta a le Atua e fesoasoani e faapotopoto Isaraelu. Ou te molimau atu ua ia i latou le gafatia e faia ai. Sa matuai musuia lava au e tamaiti sa ou feiloai i ai i le taimi o la’u asiasiga talu ai nei i Filipaina a o latou faasoa mai mea e mafai ona latou faia e fesoasoani ai e fausia le malo o le Atua.

“O faapefea ona e vaai i tamaiti o ola i le talalelei a Iesu Keriso, tausia i latou e le tagolima, valaaulia tagata uma ia talia le talalelei, ma tuufaatasia aiga mo le faavavau i totonu o lau li’o o tosinaga?”

Tuafafine Amy A. Wright, 18 Ian., 2023, facebook.com/Primary1stCounselor