O Kerisiano i Korinito

Saunia e Eric D. Huntsman

Polofesa o Tusitusiga Paia Anamua, Iunivesite a Polika Iaga

O le faatulagaga faaleaganuu i Korinito ua fesoasoani tatou te malamalama ai i nisi o apoapoaiga a Paulo lea atonu e foliga faigata i le aufaitau i ona po nei.¹

O Korinito i le seneturi muamua o le laumua olaola faaletamaoaiga ma faaupufai o le itumalo o Roma o Akaia. E faaopoopo i tagatanuu o Roma, sa tosina atu ai tagata Eleni, Suria, ma Iutaia. O filosofia faa-Eleni i aoga Platonic, Stoic, ma le Cynic sa foliga mai na tosinaina ai nisi o tagata aoaoina i Korinito—e aofia ai nisi o Kerisiano—i mataupu faaleagaga, faaletino, ma faaleagafesootai.

O le talaiga a Paulo na tosina atu ai ni nai tagata mauoa ma taualoa i Korinito faapea foi ma le toatele o tagata liliu mai e le tele le tulaga tau aoaoga po o le auai i tulaga faaleaganuu. O nei eseesega o se vaega o mafuaaga lea na taitai atu ai i le fevaevaeai ma le fefinauai i totonu o le Ekalesia i Korinito.

Atamai Faapitoa?

O vaega o tagata aoaoina i Korinito na latou aoina mai mai le tele o tu ma aga faafilosofia, se faaiuga e faapea ua ia i latou le atamai po o le malamalama faapitoa. Sa latou talitonu o lo latou malamalama faapitoa na aumaia ai se ola faaleagaga fou i lenei olaga. O lenei manatu na taitai atu ai i latou e faafitia le taua o le tino ma latou faia ai se faatatau e faapea o i latou ua i luga atu o le tulafono ma saoloto e faia e pei ona latou mananao ai. Sa faaaoga e nisi o Kerisiano nei manatu i lo latou liua atu i le faa-Kerisiano, ma uunaia ai le fouvale ma le loto i ai ma amioga le lelei.

Sa faafetaia’ia e Paulo lo latou talitonuga sese e faapea “ua tatau mea uma lava i le tulafono” (1 Korinito 6:12) ma finau atu e tatau i Kerisiano ona faia le amio pulea ma le mama: “Ia viia le Atua i o outou tino, ma o outou agaga” (tagai i le 1 Korinito 6:12–20).

Teuga Faaletagata Lava Ia

O tagata Iutaia, Eleni, ma Roma i Korinito sa eseese lo latou faatulafonoina i tulaga o le uumi o lauulu o alii ma tamaitai ma mo le ufiufiina o le ulu o se tasi, aemaise lava i le taimi o tapuaiga. O le faamoemoega lautele i aganuu uma e faapea o tamaitai ua faaipoipo e ufiufi o latou ulu. I le isi itu, o tamaloloa Iutaia, Eleni, ma Roma sa ese o latou faamoemoega e uiga i le ufiufiina o latou ulu, aemaise lava i le taimi e tatalo ai.

O nei faamoemoega faaleaganuu sa manino lava o se vaega o mafuaaga o le fautuaga a Paulo i le 1 Korinito 11. Ae atonu sa i ai se isi faafitauli: o amioga a le au Kerisiano maualuluga o e sa le amanaia tu ma aga fesootai, e aafia ai tagata lotu ese ma Kerisiano. I se siosiomaga lea e foliga mai na tetee ai nisi o Kerisiano i Korinito i tulaga faatonuina masani ona o le faamaualuga, sa fautuaina ai e Paulo le tauagafau ma le amio lelei, ina ia ogatusa ma faamoemoega faaleaganuu i Korinito.

Faaipoipoga ma le Nofofua

O le fautuaga a Paulo e uiga i le faaipoipoga ma le fia nofofua e aofia ai nisi o fuaitau e foliga faigata mo i tatou i aso nei. Ae sa talafeagai lava i le faatulagaga o se vaaiga faalelalolagi lea na ta’u faatauvaaina ai le taua o le tino.

I Korinito, o nisi sa talitonu e na o le matua faafiti lava e le tagata o ia lava, o le a fiafia ai le Atua. O la latou vaaiga le lelei e uiga i le faaipoipoga, faatasi ai ma isi mea, na taitai atu ai Paulo e talanoaina le faaipoipoga (tagai i le 1 Korinito 7:1–7) ma tuuina atu fautuaga i ē e lei faaipoipo, fafine ua oti a latou tane, o i latou o mafaufau e tatala faaipoipoga, ma i latou ua faaipoipo i e lē talitonu (tagai i le 1 Korinito 7:8–9, 39–40, 10–16). E mafai ona aoteleina lena fautuaga e faapea: “Ia tumau i le mama i fafo atu o le faaipoipoga ma ia faataunuu uiga militino lelei i totonu o le faaipoipoga.”

Ua fautuaina e Paulo i latou o e ua faaipoipo ina ia tumau i le faaipoipoina, e tusa lava pe i ai ni faigata. Ua ia fautuaina Kerisiano ua faaipoipo i e le talitonu ina ia tumau i le faaipoipoina, “aua o le tane le talitonu e faapaiaina e le ava, ma o le ava le talitonu ua faapaiaina e le tane” (1 Korinito 7:14).

O le fautuaga a Paulo ia i latou o e e lei faaipoipo ua ofoina atu ua na o sona manatu, ae le o aoaoga faavae (tagai i le 1 Korinito 7:7–9, 39–40). Ua ia moomoo maimau pe ana faapei tagata uma o ia lava ma fautuaina “o ē e lei faaipoipo ma fafine ua oti a latou tane” ia “tumau e pei lava o a’u.” E ui o le uiga tonu o lenei mea o le i ai o uiga militino lelei i totonu o le faaipoipoga ma le nofomama i fafo atu o le faaipoipoga,² o lenei fautuaga atonu na faatatau moni lava ia i latou o e ua maliliu taitoalua e ala i le oti, pe o se alii po o se tamaitai.³

Po o le a lava, o lana fautuaga e tutusa pea: “Ae afai e le mafai ona i ai [faaaoga le loto pulea], ia tuu atu ia i latou e faaipoipo: aua e sili atu le faaipoipo nai lo le mu [lea e mafai ona faauigaina o le “mu ma le faananau”].” Na tuuina atu e Iosefa Samita, “Ae afai e lē mafai ona latou tumau, ia tuu atu ia te i latou e faaipoipo; aua e sili atu le faaipoipo nai lo soo se tasi e faia le agasala” (Faaliliuga a Iosefa Samita, 1 Korinito 7:9 [i le 1 Korinito7:9, vaefaamatalaga a]).

Faatasia ia Iesu Keriso

O le tulaga faaleaganuu ma talafaasolopito i Korinito ua fesoasoani tatou te malamalama atili ai i le fautuaga a Paulo i laei, teuga, faaipoipoga, ma le fia nofofua. Sa ia faamalosi’au mai le faia faalelei, aloese mai le soona faia o amioga po o foliga vaaia. Ina ua fai mai tagata o le faapotopotoga o lo latou atamai faapitoa na faatagaina ai faatinoga fouvale, sa aoao manino atu Paulo e faapea “e le tatau ona tumau lo outou faatuatua i le poto o tagata, a o le mana o le Atua” (1 Korinito 2:5). O aso nei, e tatau foi ona faapena ona faatotonugalemu lo tatou faatuatua ia Iesu Keriso, ae le o tautinoga faapitoa o le malamalama po o le atamai i a tatou aganuu o i ai nei. Ona mafai lea ona tasi i tatou.