“E Tt Fia Iloa Atili?,” Liahona, Setema 2023.
O Leo o le Au Paia o Aso e Gata Ai
E te Fia Iloa Atili?
O se tasi sa ma faleie faatasi sa ese mai isi fitafita, o lea sa ou fesili atu ai ia te ia pe aisea.
O le tusitala na papatisoina e Thomas Salisbury i le Vaituloto o Sông Bé, Viatename.
Atapu’e mai faaaloaloga a le tusitala
Sa ou auai i le Vaegaau a le Iunaite Setete mo se taimi e tolu tausaga ma taunuu ai i Viatename i Saute i lo’u aso fanau lona 20. Ina ua mavae le valu masina, sa tofia a’u i se iunite i matusisifo o Saigon. A o i ai iina, sa vave ona ou matauina o se tasi sa ma faleie, o Thomas Salisbury, sa ese mai isi tagata uma.
Sa matuai ofoofogia le eseesega lea na i’u ai ina ou fesili atu ia te ia, “Tom, aisea ua matuā ese ai oe mai isi tagata uma?”
“Ona o au o se Tagata o le Au Paia o Aso e Gata Ai,” sa ia tali mai ai.
“O le a le Au Paia o Aso e Gata Ai?” Sa ou fesili atu ai.
Sa ia faatulagaina ia matou feiloai ma Harold Lewis, o se faifeautalai ua mae’a le misiona o lē sa auauna atu o se fesoasoani i le failotu o le iunite. I le taimi o le matou feiloaiga muamua i se faleie sa avea o se tama’i falesa, sa ou ioe ai afai ou te talitonu moni lava i mea sa la’ua ta’u mai ia te au, o le a ou papatiso. Sa ou mauaina foi se kopi o le Tusi a Mamona, lea sa ou teuina i le taga pito i lalo o lo’u ofuvae ma faitau i soo se taimi lava ou te malolo ai.
Sa sosoo mai ai isi lesona ma na ou iloa ai o lesona taitasi na taliina ai fesili sa ia te a’u i la’u sailiga mo le upumoni. Ae ina ua fesili mai Tom ma Harold pe ou te fia papatiso, sa ou fai atu leai. Ou te lei iloa pe mafai faapefea ona ou tausia poloaiga uma sa la’ua aoaoina ai a’u.
Ina ua uma ona ou auai i se konafesi faale-itu i Saigon, sa ou alu i Ausetalia mo se vaiaso o malologa. A o i ai iina, sa amata ona ou iloa le taua o aoaoga o le talalelei ia te au. Ina ua ou toe foi atu i Viatename, sa vave ona ou faasilasila atu ia Tom ou te fia papatiso.
E le’i leva, ae papatisoina au e Tom i le Vaituloto o Sông Bé, na faamauina au e Harold o se tagata o le Ekalesia, ma o Timothy Hill, lo matou taitai vaega o le Ekalesia, na faauuina au o se tiakono.
Ina ua ou toe foi i le fale i le Iunaite Setete i le ono vaiaso mulimuli ane, sa ou faailoa atu le talalelei i la’u uo teine, lea na avea ma o’u toalua. Sa ia taliaina foi le sāvali faamoemoeina o le talalelei.
O le a faavavau pea ona ou faafetai ona sa fesili mai Tom ia te au pe ou te fia iloa atili. O lana faataitaiga ma le valaaulia na taliina ai lo’u naunau e saili le upumoni ma olioli i faamanuiaga o le talalelei.