Faamaloloina i totonu o le Malumalu

Saunia e Phumelele Mkhize, KwaZulu-Natal, Aferika i Saute

I totonu o le malumalu, sa ou lagonaina se faamautinoaga loloto e alofa le Alii ia te au ma e manatu mai i o’u tauiviga.

O le ma atalii muamua na oti ina ua fanau mai i le 2017. I le iva masina a o lei faapaiaina le Malumalu o Durban Aferika i Saute i le 2020, sa fanau mai ai le ma atalii lona lua ma oti foi.

I lena taimi, sa ou lagona le pei o Hana o le Feagaiga Tuai. Sa “tiga lona loto, ua ole atu ia Ieova, ma tagi tele” (1 Samuelu 1:10).

Sa ou lagona le leai o se faamoemoe ma le ita, ma sa ou i ai i se tiga matautia. Sa ou tauivi faalelagona, faaletino, ma faaleagaga. O le pipiimau pea i le ai uamea sa pei o loo pipiimau pea i se manoa lea na faasolosolo lava ina se’e ese mai o’u lima. Sa ou matuā mu lava i “le ogaumu o i ai le puapuaga” (Isaia 48:10).

Ou te matuā faafetai lava ona sa ou mauaina le fesoasoani ma le faamalologa mai lo’u aiga, tusitusiga paia, ma le tatalo. Sa ou mauaina foi le fesoasoani mai faufautua. Peitai, o le taualuga o lo’u faamalologa, na oo mai i totonu o le malumalu.

A o amata ona ou auauna atu i le malumalu, sa amata ona faatumulia au i le malamalama faateleina. Sa ou lagonaina iina le i ai i lo’u aiga. Sa ou lagonaina foi se faamautinoaga loloto e alofa le Alii ia te au ma e manatu mai i o’u tauiviga.

A o faaauau pea ona ou auauna atu i le maota o le Alii, sa amata ona ou vaavaai atu i suafa o o’u tuaa i se auala ese. Sa lē na o ni igoa. Sa ou iloaina, mo se faataitaiga, o se tasi o tuaa o se afafine, o se tina, o se tinamatua, o se uso o le tina, o se tuafafine, o se tei. Atonu na faigata lona maliu mo tagata o le aiga o loo soifua pea. Ae o faamanuiaga na ofoina atu i lenei tuaa i le malumalu e ala i sauniga sui paia, e aofia ai se olioli tele ma le matagofie lea e sili atu nai lo soo se tiga atonu na lagonaina e ona aiga o loo soifua i lona maliu.

O lenei malamalama ua faamanuiaina ai au a o ou mafaufau e uiga i la ma’ua fanau tama faapelepele, le natura e faavavau o ō tatou agaga, ma le ata o le faaolataga a le Tama Faalelagi. O le maliliu o le ma fanau tama na uunaia ai a’u e fai le mea sili ou te mafaia e ola ai i le talalelei.

O nisi aso e sili atu ona faigata nai lo isi. Ae o le pipiimau pea i a’u folafolaga o le feagaiga e faafaigofie ai na aso.

Ina ia nonō mai upu a Peresitene Russell M. Nelson, “Ua ma’ua matuā misia lava o ma’ua [atalii]. Peitai, ona o le talalelei toefuataiina a Iesu Keriso, ma te lē popole ai ia i la’ua. A faaauau pea ona ma faamamalu i a ma feagaiga ma le Atua, ma te ola ma tulimatai atu e toefaatasi ma i la’ua.”¹