“Faatoā Malamalama i le Uiga o le Alofagia e le Atua,” Liahona, Sete. 2023.
Autalavou Matutua
Faatoā Malamalama i le Uiga o le Alofagia e le Atua
Sa leiloa i la’u vaai le mana o le iloaina o lo’u faasinomaga paia.
Ata na tusia e Alecia Schubert
A o o’u talavou, sa siitia atu lo’u aiga mai Hanikeri i Siamani. Sa ou fiafia lava e siitia atu iina, ae na i’u ina avea ma tausaga aupito sili ona faigata e iva o lo’u olaga.
Sa ou tauivi e aoao le faa-Siamani, ma sa ou nofouta lava i taimi uma, o ia mea uma sa avea ai a’u ma taulaiga o le sauaina. Sa matuai pa’ū lava lo’u taua faaletagata lava ia. I le aluga o taimi sa ou lagonaina e pei sa lē alofagia a’u ma itiiti so’u faamoemoe mo le lumanai. Sa ou mafaufau pe faamata o le a sili atu le lelei o le lalolagi e aunoa ma au ma o nisi taimi sa i ai ni mafaufauga e pule i le ola.
Ae i se isi itu, e ala i mafatiaga uma, sa ou iloa ai sa tuuina mai ia te au lo’u ola mo se mafuaaga, e tusa lava pe ou te le’i malamalama atoatoa pe aisea. Sa ou iloa e mafai ona ou maua le malamalama o le Faaola e oo lava i taimi sili ona pogisa (tagai Eteru 12:4). Ina ua foliga mai ua faasagatau mai le lalolagi ia te au, sa ou iloa le mea e maua ai o Ia ma mea e mafai ona Ia faia mo au pe afai ou te sailia o Ia e ala i tusitusiga paia, tatalo, ma faia le mea sili e avea ai ma Ona soo. O le ola moni lava i Lana talalelei lea na tuuina mai ai ia te au soo se ituaiga o filemu ma fesoasoani ou te faaauau ai pea i lenei taimi matautia.
O se Upumoni sa Ou Lē Iloa Atu
Mulimuli ane, sa matou toe siitia atu ma lo’u aiga i Hanikeri. Sa ou faauu i le aoga maualuga, ma e ui ina sa uma o’u aso taufaamata’u, ae sa le’i i ai pea so’u manatu lelei ia te a’u lava ia. O aafiaga mai le leaga ona taulimaina sa matuā leaga lava le aafia ai o a’u, ma o nisi taimi ou te masalosalo lava i lo’u taua faaletagata lava ia.
Ma i le avea ai ma se talavou matua, sa ou matua’i manao lava ia ou mautinoa i le faia o faaiuga tetele o le olaga ma filifili mea sa ou manao e ausia i le olaga.
A o o’u tauivi ai ma lenei mea, sa uunaia a’u e auai i se konafesi mo talavou nofofua matutua i Europa i sasae. Sa ou manaomia sina taitaiga faaleagaga i lo’u olaga e fesoasoani ai ia te au ia faalolotoina lo’u taua faaletagata lava ia ma tatalo ia maua tali iina.
I se tasi po i le konafesi, na mapuna a’e ai moge i o’u lima ina ua amata ona talanoa mai le failauga o le faeasaite e uiga i le auala na sauāina ai o ia a o laitiiti. Sa ia saunoa e uiga i le auala na ia lagonaina ai i se tasi taimi le lē agavaa ma le lē vaaia. Sa vave lava ona amata ona ou tagi.
Sa ia faamatalaina le mea tonu lava na ou oo i ai.
Sa faaauau pea le failauga ma faasoa mai le upumoni sa ia taofimau i ai i le taimi o ona luitau—o se upumoni sa leiloa atu ma a’u.
“O a’u o se atalii/afafine o le Atua.”
Taliaina o Lo’u Faasinomaga Paia
Ina ua uma le faeasaite, sa tafe ifo pea o’u loimata i o’u foliga. Sa matauina e le failauga ma sa sau ma fusi a’u. Sa ia ta’u mai e masani lava e lē sau o ia e lauga i faeasaite ae sa ia lagonaina le uunaiga e faapea, e i ai se tagata e toatasi e manaomia ona faalogo sa’o i lana sāvali.
O a’u o lena tagata.
O lenei aafiaga na faaali mai ai ia te au le silafia atoatoa o le Tama Faalelagi o Ana fanau ma ua Ia silafia lelei le ala e aapa mai ai ia i tatou ina ia mafai ona tatou lagonaina ua na o sina aliali o Lona alofa atoatoa faamatua. Sa ia iloa e tatau ona ou faalogo i le sāvali a lenei failauga ma sa faatonuina au ia ou i ai i le nofoaga sa’o i le taimi sa’o.
Sa ou iloa le fasifuaitau, “O a’u o se atalii o le Atua” i lo’u olaga atoa, ae o le moni o lena mea sa tatagi atoa mai i lo’u agaga i lena taimi. Sa ou iloaina moni lava le uiga o le avea ma se atalii/afafine o se Atua atoatoa o lē e alofa tele ia i tatou, o lea sa Ia finagalo ai e ositaulaga Lona lava Alo ina ia mafai ai ona tatou toe ola ma togiolaina mai a tatou agasala. O Lē e alofa tele ia te au, e ui e lē mafai ona Ia puipuia a’u mai le tiga i taimi uma, ae o loo faatasi mai o Ia ia te au ma mafai ona fesoasoani ia te au e tulai a’e i luga a’e, tuputupu a’e mai ai, ma toe foi atu ia te Ia.
E alofa o Ia ia te a’u i le taimi nei, ma sa alofa o Ia ia te a’u i le tele o tausaga o lo’u sauāina lea na ou lagonaina e leai se tasi na alofa mai. Ua ou iloa nei ona sa ou iloa loloto lenei upumoni o lea na ou filifili ai e faaauau pea.
Sa aoao lata mai nei Peresitene Russell M. Nelson e uiga i le mana o le iloaina o lo tatou faasinomaga paia. Na ia saunoa mai: “A’u uo pele, o outou moni lava o fanau agaga a le Atua. Ae pe ua tusia ea lena upumoni e faavavau i lou loto?…
“Aua ne’i e sasi ai: O lou gafatia e paia. Faatasi ai ma lau sailiga filiga, o le a avatu e le Atua ia te oe nai vaaiga o le tagata e mafai ona e avea ai.”1
O le taimi nei pe a ou fesiligia lo’u taua, ou te faamanatu pea ia te a’u lava ia le mea moni o a’u o se atalii/afafine o le Atua ma o lo’u olaga o se meaalofa mai ia te Ia.
Manatua o oe o se atalii/afafine o le Atua. Ma aua lava nei galo le mana faaleagaga lagolagosua, suia o le olaga, ma le tulaga ese lea e sau mai le taliaina o lena upumoni.
E nofo le tusitala i Szeged, Hanikeri.