Alofa i Lou Tuaoi
O le mutimuti alofa o se uiga faaleatua o Keriso. E afua mai i le alofa mo isi ma e leai se tuaoi.
O le taeao nei, ou te valaaulia outou ia tatou auai faatasi i se malaga i Aferika. O le a outou le vaaia ni leona, zebra, po o elefane, ae atonu, i le iuga o le faigamalaga, o le a outou tagai ai i le ala o loo tali mai ai le fiaafe o tagata O Le Ekalesia a Iesu Keriso o le Au Paia o Aso e Gata Ai i se ala tulaga ese i le poloaiga sili lona lua a Keriso ia “alofa i lou tuaoi” (Mareko 12:31).
Vaai faalemafaufau mo sina taimi, i le palapala mūmū, o nuu i tua o Aferika. Tou te vaai mai le eleele mago ma le naumati ua tele naua tausaga e le o toulu ni timuga i se tele e le mafuatiaina. O nai povi e kolosia lo tou ala ua na o ponaivi ma o loo ta’ita’i atu e se tausimanu Karamajong o puluta’ai se palanikete, ma vae ua faaseeina, ma savavali atu ma le faamoemoe ia maua se vao ma se vai.
A o outou savalia le auala ma’ā ma le gaoā, tou te vaaia ni vaega o tamaiti aulelei ma manatunatu ai pe aisea ua le aooga ai. E soisoi mai tamaiti ma talotalo mai, ma tou te toe talotalo atu foi i ai ma se loimata ma se ataata. E ivasefulu ma le lua pasene o tamaiti laiti tou te vaaia i lenei malaga e le lava ni meaai e ola ai, ma e ātu ma mafatia o outou loto.
I luma atu, tou te vaaia ai se tina o loo aveina i luga o lona ulu se koneteina e lima-kalone vai (19 L) ma faapaleniina ma le faaeteete, ma se isi i lona lima. O ia o se tasi o aiga ta’ilua uma i le eria lenei, e savavali ai fafine, talavou ma olomatutua, i le silia ma le 30 minute i le alu ma le foi mai, i aso taitasi, i se punavai o vai mo o latou aiga. E lofia oe i se galu o le faanoanoa.
E mavae le lua itula ona outou taunuu lea i se laugatasi tuma’oti, paolo. O le nofoaga e feiloai ai e le o se fale talaloa po o se faleie foi ae o lalo o nai laau tetele e maua ai le malutaga mai le la mutigitigi. I le nofoaga lea, tou te matauina ai e leai ni paipa, leai se eletise, po o ni fale lē ta’ua faaona po nei. Tagataga’i solo ma silafia o outou o nisi o tagata e alolofa i le Atua ma e vave ona outou lagonaina le alofa o le Atua mo i latou. Ua latou potopoto ina ia maua le fesoasoani ma le faamoemoe, ma ua outou taunuu e faasoa atu.
O le ma malaga lena ma Sister Ardern, faatasi ai ma Sister Camille Johnson, lo tatou Peresitene Aoao o le Aualofa ma lona alii o Doug ma Sister Sharon Eubank, le faatonusili o Auaunaga o Galuega Alofa a le Ekalesia, a o matou malaga ai i Uganda, o se atunuu e 47 miliona o tagata i le Eria o Aferika Tutotonu a le Ekalesia. I le aso lena, i lalo o le paolo o laau, sa matou asiasia ai se poloketi faalesoifua maloloina a le nuu, lea sa faatupeina faatasi e Auaunaga o Galuega Alofa a le Ekalesia, UNICEF, ma le Minisita o le Soifua Maloloina o le malo o Uganda. O ni faalapotopotoga faatuatuaina nei, na filifilia ma le faaeteete ia mautinoa ai o faaaogaina ma le faautauta tupe o foai mo galuega alofa e tagata o le Ekalesia.
E ui ina ootia lagona i le vaai atu i fanau na o ivi ma aafiaga o le mamapala, mumu, ma le manava tata faateteleina, ae na oo mai ia i matou taitoatasi se faatelega o le faamoemoe mo se lumanai sili atu mo i latou na matou feiloai.
Na oo mai lena faamoemoe, i se vaega, e ala i le agalelei o tagata o le Ekalesia mai le lalolagi atoa o e na ofo mai o latou taimi ma tupe i taumafaiga o galuega alofa a le Ekalesia. A o ou vaaia le fesoasoani o tuuina atu i e mama’i ma puapuagatia ma ua siitia, sa punou ifo lo’u ulu i le lotofaafetai. I lena taimi, sa sili atu ona ou malamalama i le uiga o le fetalaiga a le Tupu o tupu, o le na faapea mai:
“O mai ia, o outou ua faamanuiaina e lo’u Tama, ia fai mo outou tofi le malo ua saunia mo outou … :
“Aua na ou fia ai, ona outou avane ai lea ni mea ou te ‘ai ai, na ou fia inu, ona outou avane ai lea ni vai ou te inu ai; sa fai a’u ma tagata ese, ona outou talia lea o a’u” (Mataio 25:34–35).
O le olega a lo tatou Faaola o le “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16; tagai foi i fuaiupu 14–15). I lena pa’usisi mamao o le lalolagi, o a outou galuega lelei na faasusuluina ai olaga ma tu’umāmāina ai avega a se nuu na matuā manaomia le fesoasoani, ma sa faamamaluina le Atua.
I lena aso vevela ma le pefu, ou te moomoo maimau pe ana mafai ona outou faafofogaina a latou tatalo o viiga ma le lotofaafetai i le Atua. Semanu latou te fai mai ou te fai atu i la latou gagana Karamajong, “Alakara.” Faafetai.
Ua ou manatua ai i la tatou malaga le faataoto i le Samaria agalelei, na alu malaga i se auala pefua, e le pei o le auala lea na ou faamatalaina, o se auala na ui atu mai Ierusalema i Ieriko. Ua aoao mai e lenei Samaria na auauna atu, le uiga o le “alofa i lou tuaoi.”
Na ia vaaia “se tasi tagata na … maua o ia e tagata fao mea, ua latou toeseina ona ofu, ma fasi ia te ia, ua latou o, ua tuua ia ua tali oti” (Luka 10:30). Na “mutimutivale le alofa” o le Samaria ia te ia” (Luka 10:33).
O le mutimuti alofa o se uiga faaleatua o Keriso. E afua mai i le alofa mo isi ma e leai se tuaoi. O Iesu, le Faaola o le lalolagi, o le faaa’oa’o o le mutimuti alofa. A tatou faitau faapea “na tagi Iesu” (Ioane 11:35), o i tatou o molimau, e faapei o Maria ma Mareta, o Lona mutimuti alofa na afua ai ona Ia tiga tele i le agaga ma ua ātu (tagai Ioane 11:33). I se faataitaiga o le agaalofa o Keriso i le Tusi a Mamona, sa faaali atu ai Iesu i se motu o tagata ma fetalai atu:
“E i ai ea ni isi o outou ua pipili, pe ua tauaso, pe ua setu, pe ua manua, … pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou. …
“… Ma na Ia faamaloloina i latou taitoatasi” (3 Nifae 17:7, 9).
E ui i a tatou taumafaiga uma, o le a le faamaloloina lava e oe ma a’u tagata uma, ae e mafai e i tatou taitoatasi ona avea ma sē e mafai ona faia se eseesega mo le lelei o le olaga o se tasi. Sa na o se talavou e toatasi, se tamaitiiti, sa ofoina atu areto e lima ma i’a e lua lea na fafagaina ai le lima afe. E ono talosagaina a tatou foai, e pei ona sa faia e Anetere’a le soo i karite areto ma i’a, “E aumā ea ia mea ia i latou e toatele?” (Ioane 6:9). Ou te faamautinoa atu ia te outou; e lava le foai atu o mea e te mafaia, ona tuu atu lea ia Keriso e faaatoa mea o totoe.
I lea manatu, na valaaulia ai i tatou e Elder Jeffrey R. Holland, “mauoa pe matitiva, … e ‘fai le mea ua mafai’ pe a i ai nisi e le tagolima.” Ona ia molimau mai lea, e pei ona ou faia, o le Atua “o le a fesoasoani mai ma taiala outou i [outou] galuega agaalofa faalesoo” (“Pe Le o i Tatou Uma Ea o Ni Tagata Aisi?,” Liahona, Nov. 2014, 41).
I lena nuu mamao, i lena aso e lē mafaagaloina, sa ou tu ai i lena taimi ma ou tu ai nei o se molimau o le agaalofa e faaosofia ai le agaga ma suia ai olaga o tagata o le Ekalesia, o e mauoa ma e matitiva.
O le faataoto i le Samaria agalelei o loo faaauau pea a o ia “fusifusia manu’a [o le tagata] … ma tausia o ia” (Luka 10:34). O a tatou taumafaiga o Galuega alofa a le Ekalesia e vave ai ona tatou tali atu i mala faalenatura ma fusifusia manu’aga o faama’i ua taatele i le lalolagi, fiaaai, oge, leai o ni malutaga, ma manu’aga e tele ina le vaaia o le lotovaivai, le fiafia, ma le faanoanoa.
“Ona to a’e lea e le [Samaria] o tenari e lua, ma avatu i le matai e ona le fale, ua fai atu ia te ia, Ina e tausi ia te ia” (Luka 10:35). I le avea ai o se ekalesia, tatou te faafetai i le galulue ai faatasi ma isi “au talimalo” po o faalapotopotoga e pei o Auaunaga a le Katoliko mo le Toomaga, UNICEF, ma le Koluse Mumu/Red Crescent, e lagolagoina a tatou taumafaiga mo galuega alofa. Tatou te taufai faafetai mo lau “lua sene” po o le lua euro, lua peso, po o le lua seleni, ua faafaigofie ai avega o loo tauaveina e le toatele naua i le salafa o le lalolagi. Atonu o le a e le iloaina lava i latou e tuu atu i ai lou taimi, talā, ma sisipeni, ae e le manaomia e le mutimuti alofa i tatou e iloa i latou, e na ona manaomia i tatou e alolofa atu ia i latou.
Faafetai atu Peresitene Russell M. Nelson, i lou faamanatu mai ia i matou e faapea “a tatou alolofa i le Atua ma o tatou loto atoa, Na te liliu atu o tatou loto i le soifua manuia o isi” (“O Le Poloaiga Lona Lua ma le Sili,” Liahona, Nov. 2019, 97). Ou te molimau atu o le a tofu maua e i tatou taitoatasi se faatelega o le olioli, filemu, lotomaualalo, ma le alofa pe a tatou tali atu i le valaau a Peresitene Nelson ma le augani a Iosefa Samita ina ia “fafagaina i latou e fia aai, faaofu e le lavalava, e tausi fafine ua oti a latou tane, e soloia loimata o e matuaoti, e faamafanafana i e mafatia, pe o i totonu o lenei Ekalesia, pe le auai foi i se lotu, po o fea lava [tatou te maua] ai i latou” (i le “Editor’s Reply to a Letter from Richard Savary,” Times and Seasons, Mar. 15, 1842, 732).
O na masina uma ua mavae, na matou maua ai e fia aai ma e mafatia i se laugatasi mago ma pefua ma o ni molimau i o latou mata faatauanau mai mo se fesoasoani. I la tatou lava ala, tatou te tiga i le agaga ma ātu (tagai Ioane 11:33), ae o na lagona sa faafilemuina ina ua matou vaaia le mutimuti alofa o tagata o le Ekalesia o galulue, ua fafagaina e fiaaai, sa maua mea mo tina ua oti a latou tane, sa faamafanafanaina e mafatia ma ua soloia o latou loimata.
Ina tatou vaavaai atu ia e le aunoa i le soifua manuia o isi ma faaali atu i upu ma galuega “tatou te loto e tauave avega a le tasi ma le isi” (Mosaea 18:8), e “fusifusi i e loto momomo” (Mataupu Faavae ma Feagaiga 138:42), ma tausia le poloaiga sili lona lua a Keriso ia “alofa i lou tuaoi” (Mareko 12:31). I le suafa, o Iesu Keriso, amene.