O La Tatou Soa Tumau
Ua ia te oe ma a’u le avanoa e maua ai le Agaga Paia e avea ma a tatou soa tumau.
O’u uso e ma tuafafine pele, ua faamanuiaina i tatou i se liligi tele mai o faaaliga i lenei konafesi. Ua saunoa auauna a le Alii o Iesu Keriso ma o le a saunoa i upu o mea moni, faamalosiauga, ma le taitaiga.
Ua ootia lava a’u i molimau na tuuina mai i lenei konafesi lea e fetalai patino mai ai le Alii ia i tatou e ala mai i le Agaga Paia. A o tatou tatalo ona faalogo lea i uunaiga a le Agaga, tatou te maua ni malamalamaaga sili atu ma faamanuiaga e taiala ai i tatou i aso faigata ua faateteleina o i luma atu.
Na aoao mai Peresitene Russell M. Nelson, “i aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”1
O lena lapataiga faaperofeta ua taitai atu ai au e mafaufau loloto i mea e mafai ona ou aoao atu i la’u fanau, fanau a fanau, ma fanau a fanau a fanau e uiga i le auala e maua ai lena taitaiga taua i aso faigata o i luma atu mo i latou.
O lenei savali la i le asō, o se tusi puupuu i o’u tupuaga e ono fesoasoani ia i latou pe a ou lē faatasi ma i latou i aso fiafia o i luma atu. Ou te manao ia latou iloa le mea ua ou iloa e mafai ona fesoasoani ia i latou.
Ua oo ina sili atu lo’u malamalama i le mea latou te manaomia ina ia i ai pea e le aunoa le tosinaga a le Agaga Paia i aso latou te ola ai. Ua uunaia foi a’u ou te tautala atu i le asō e uiga i lo’u aafiaga patino i le valaauliaina o le Agaga Paia, i le mea ou te mafaia, e avea ma a’u soa tumau. O la’u tatalo ina ia mafai ona ou faamalosiauina i latou.
O le a amata ona latou mafaufau ma tatalo e uiga i atalii o Helamana, o Nifae ma Liae, ma isi auauna a le Alii o loo galulue faatasi ma i latou. Sa latou feagai ma le ‘a’asa o faiga tete’e. Sa galulue i latou i se nofoaga amioleaga ma sa latou taulimaina ni taufaasese matautia. Ua ou maua le lototoa, ma e mafai foi e oe ona maua, mai le fuaiupu lea e tasi mai le tusi a Helamana:
“Ma i le tausaga e fitusefulu ma le iva sa amata ona i ai o finauga e tele. Peitai o Nifae ma Liae, ma le toatele o o laua uso o e sa malamalama e uiga i matautu moni o le mataupu faavae, ona sa latou maua faaaliga e tele i aso taitasi, sa oo ina latou talai atu i le nuu, ma o lea na oo ai ina latou faaumaina lo latou finau i lena lava tausaga.”2
O lenei tala e faamalosiauina ai a’u, ma e mafai ona faamalosiauina ai oe. Na aoaoina atalii o Helamana ma taiala e se aula’iga o aafiaga ma le Agaga Paia. O lea mea ua faamautinoa ai a’u faapea, e mafai ona aoaoina i tatou e le Agaga Paia ma aoao mai ai i lea fuaiupu ma lea fuaiupu, ma maua ai mea tatou te manaomia, ona afai loa ua tatou saunia, o le a tatou toe maua isi mea.
Ua faamalosiauina foi au i le ala lava lea e tasi i le tala a Nifae ina ua talosagaina e toe foi i Ierusalema mo papatusi a Lapana. Tou te manatua le filifiliga na ia faia. Nai lo lena sa ia faapea atu, “O le a ou alu ma fai mea ua poloaiina e le Alii.”3
O le aafiaga o Nifae faatasi ma le Agaga Paia i lena fe’au ua faatele ai ona ou maua le lototele i taimi sa ou āga atu ai i tiute sa ou iloa o ni tofiga mai le Alii ae sa foliga e le’i oo i ai lo’u poto masani ma e lē oo foi i ai le mea na ou iloa e o’o i ai lo’u gafatia.
Tou te manatua le tala a Nifae e uiga i lona aafiaga: “Ma o le po na faia ai; ma sa ou faatonu [o’u uso] ia latou lalafi i tuapa. Ma ina ua uma ona latou lalafi, o aʼu, o Nifae, sa ou tolotolo atu i le aai ma ou alu atu agai i le fale o Lapana.”
Sa faaauau lana tala: “Sa taitai aʼu e le Agaga, ona sa ou lē muaʼi iloa muamua mea e tatau ona ou faia.”4
Na faamalosiauina au i le iloa sa taiala ia Nifae e le Agaga i lea minute ma lea minute i le po atoa i le fe’au a le Alii.
Matou te manaomia, ma o le a outou manaomia, le mafutaga faifai pea ma le Agaga Paia. Ia, tatou te mananao i ai, ae ua tatou iloa mai aafiaga e le faigofie ona ausia. Tatou te taufai mafaufau ma tautatala ma faia mea i o tatou olaga i aso taitasi e mafai ona faatiga ai i le Agaga.
A oo ina tupu lena mea, aua o le a tupu, atonu tatou lagonaina le lē faamaonia mai le Alii. E ono faaosoosoina foi i tatou ia lagona ua tuua na o i tatou. E taua le manatua o le folafolaga mautu tatou te mauaina i vaiaso taitasi pe a tatou salamo ma aai ma feinu i le faamanatuga: “Ina ia latou maua pea lona Agaga e faatasi ma i latou.”5
Afai ua e lagonaina le aafiaga a le Agaga Paia i le aso nei, atonu e avea lena mea o se faamaoniga matagofie faapea ua galue le Togiola i lou olaga.
E pei ona saunoa Elder Jeffrey R. Holland: “Pe a o’o mai taimi ua uma ai lo tatou gafatia, e le tatau ona tatou faalolololo i le fefe faapea ua tuulafoaiina i tatou e le Atua, pe faapea foi e le o faafofogaina e Ia a tatou tatalo. E faafofoga mai o Ia ia i tatou. E silafia e Ia i tatou. E alofa o Ia ia i tatou.”6
Ua fesoasoani lena faamautinoaga ia te au. Pe a ou lagona lo’u taumamao mai le Alii, pe a foliga ua tuai mai tali o a’u tatalo, ua ou aoaoina e mulimuli i le fautuaga a Peresitene Nelson e toe iloilo lo’u olaga mo avanoa e salamo ai. Ua ia faamanatu mai ia i tatou, “O le salamo i aso taitasi o le ala lea i le mamā, ma o le mamā na te aumaia le mana.”7
Afai ua faigata ia te oe ona lagonaina le Agaga Paia, atonu e manaomia lou mafaufau loloto pe i ai lava se mea e tatau ai ona e salamo ma mauaina le faamagaloga.8 E mafai ona e tatalo ma le faatuatua ina ia iloa le mea e tatau ona faia ina ia faamamaina ai ma ia atili agavaa ai mo le mafutaga faifai pea ma le Agaga Paia.
Afai e te manao e maua le mafutaga ma le Agaga Paia, e tatau ona e manao i ai mo mafuaaga tonu. E tatau ona avea ou faamoemoega ma faamoemoega o le Alii. Afai e manatu faapito tele ou faanaunauga, o le a faigata ia te oe ona mauaina ma lagonaina uunaiga a le Agaga.
O le ki mo a’u ma mo oe o le manao lea i mea e finagalo ai le Faaola. O o tatou faanaunauga e tatau ona faaosofia e le alofa mama o Keriso. O a tatou tatalo e tatau ona faapea “Na pau le mea ou te manao ai o le mea e te finagalo i ai. Ia fai Lou finagalo.”
Ou te taumafai e manatua le taulaga a le Faaola ma Lona alofa mo a’u. Ona, a oo la ina ou tatalo i le Tama Faalelagi e faafetai i ai, ou te lagonaina le alofa ma le faamautinoaga o loo faafofogaina a’u tatalo ma o le a ou maua le mea e sili mo a’u ma i latou ou te alofa i ai. E faamalosia ai la’u molimau.
Mai mea uma e molimau mai ai le Agaga Paia, o le mea aupito taua mo i tatou atonu o lea, o Iesu o le Keriso, le Alo soifua o le Atua. Na folafola mai e le Faaola, “A maliu mai le Fesoasoani, o lē ou te auina mai ia te outou mai le Tama, o le Agaga lea e tupu mai ai le upumoni, o lē maliu mai mai le Tama, o ia lava e molimau ia te au.”9
I tausaga e tele ua mavae, sa ou maua ai se valaau i le telefoni mai se tina mafatia. Sa ia faamatala mai ua mamao le mea ua masi’i i ai lana tama teine. Sa ia lagonaina mai le ‘uti’uti o a la’ua fesootaiga ma lana tama, o loo i ai se mea se mea ua matuā sese lava. Sa augani mai o ia ia te a’u e fesoasoani atu.
Sa ou mauaina le faiaoga o aiga o lana tama. E mafai ona e iloa i lena igoa ua leva lava. Sa ou viliina o ia. E talavou. Ae na ia fai mai, sa taufai fagua i la’ua ma lana soa i le po e lē gata i se popolega mo le afafine, ae faatasi ai ma se musumusuga faapea ua lata ina ona faia ni filifiliga o le a aumaia ai le faanoanoa ma le faavauvau. Ma le na o lena musumusuga a le Agaga, sa la o ai e vaai le afafine.
Muamua, sa lei manao o ia e faamatala mai le tulaga sa i ai o ia. I lalo o musumusuga, sa la ‘aioi atu ia te ia e salamo ma filifili le ala a le Alii mo ia. Sa ia iloa ai, ou te talitonu na ala i le Agaga, e na o le pau le ala na mafai ai ona la iloaina le mea sa la iloa e uiga i lona olaga, sa mai le Atua. Sa liliu atu e se tina ona popolega alofa i le Tama Faalelagi ma le Faaola. Sa auina atu le Agaga Paia i na faiaoga o aiga aua sa naunau i la’ua e auauna atu i le Alii. Sa mulimuli i la’ua i le fautuaga ma le folafolaga o loo maua i le Mataupu Faavae ma Feagaiga:
“Ia tuu foi lou loto ia tumu i le alofa mama i tagata uma, ma i le auaiga o le faatuatua, ma ia tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua; ma o le a to ifo i luga o lou agaga le mataupu faavae o le perisitua e pei o le sau mai le lagi.
“O le a avea le Agaga Paia ma āu soa e lē aunoa, ma o lou tootoo o le a avea ma se tootoo lē feliuliuaʼi o le amiotonu ma le upumoni; ma o lau puleaga o le a avea ma se puleaga tumau-faavavau, ma e aunoa ma ni ala faamalosia, o le a tafe mai ia te oe e faavavau ma faavavau lava.”10
Ou te molimau atu na tausia e le Alii Ana folafolaga. E auina atu le Agaga Paia i tagata o le Ekalesia a Iesu Keriso e faamaoni i feagaiga. Ia, o le a tulaga ese ou aafiaga, ma o le a taialaina e le Agaga i le ala e sili ona fetaui lelei i lou faatuatua ma le gafatia e maua ai faaaliga mo oe ma mo i latou e te alofa ma auauna i ai. Ou te tatalo ma lo’u loto atoa ina ia faatupulaia lou talitonuga mautu.
Ou te tuuina atu la’u molimau o loo soifua le Atua le Tama. E alofa o Ia ia te oe. Na te faafofogaina au tatalo uma. Na tatalo Iesu Keriso i le Tama e auina mai le Agaga Paia e taiala, faamafanafana, ma molimau mai ia i tatou i le upumoni. Na faaali mai le Atua le Tama ma Lona Alo Pele ia Iosefa Samita i le togavao. Na faaliliuina e le Perofeta o Iosefa Samita le Tusi a Mamona e ala i le meaalofa ma le mana o le Atua.
Na toefuatai mai e avefeau faalelagi ki o le perisitua. O Peresitene Russell M. Nelson o le perofeta a le Atua mo le lalolagi uma.
I le avea ai o se molimau a Iesu Keriso, ua ou iloa o loo soifua o Ia ma o loo Ia ta’ita’ia Lana Ekalesia. Ua maua e oe ma a’u le avanoa e maua ai le Agaga Paia e fai ma a tatou soa tumau ma ia faamautuina mai na upumoni a o tatou manatua ma alolofa i le Faaola, salamo, ma ole atu mo Lona alofa ia i ai i o tatou loto. Ou te tatalo ia tatou maua lena faamanuiaga ma le mafutaga a le Agaga Paia i le asō ma i aso uma o o tatou olaga. Ou te alofa ia te outou. I le suafa paia o Iesu Keriso, amene.