Sefuluai: Toina Mai o Pupuni o le Lagi

Saunia e Elder Neil L. Andersen

O Le Korama a Aposetolo e Toasefululua

E tele ala e toina ai pupuni o le lagi. Talitonu i le taimi a le Alii; e oo mai lava e le aunoa faamanuiaga.

A o ou i ai talu ai i Amerika i Saute, sa faasoa mai ia te a’u e Brother Roger Parra mai Venesuela le aafiaga lenei:

“I le 2019, sa luluina ai Venesuela e faafitauli na mafua ai ona pe le paoa mo aso e lima.

“Sa faatumulia magaala i le fenumia’i ma le faanunununu, ma sa toatele tagata atuatuvale sa le’i lava ni meaai.

“Sa amata e nisi ni pisinisi o meaai gaoi, ma faatama’ia mea uma i lo latou ala.

“O le avea ai o a’u ma pule o si falefalaoa laitiiti, sa ou matua popole i le matou pisinisi. Sa tonu i lo matou aiga, e foai uma meaai o le matou falefalaoa i tagata lē tagolima.

“I se tasi po pogisa na tupu ai ni vevesi i nofoaga uma. Na pau lo’u popolega o le saogalemu o lo’u toalua pele ma le fanau.

“I le tafa o ata sa ou alu ai i le matou falefalaoa. O le mea e faanoanoa ai, o pisinisi meaai uma e latalata mai na faatamaia e le au faatupu faalavelave, ae i lou ofo tele, sa lei afaina lo matou falefalaoa. E leai se mea na faaleagaina. Sa ou faafetai ma le lotomaualalo i lo’u Tama Faalelagi.

“Ina ua ou taunuu i le fale, sa ou faamatala i lo’u aiga faamanuiaga ma le puipuiga a le Atua.

“Sa matuai faafetai lava i latou.

“Na fai mai lo’u atalii matua, o Rogelio, na o le 12 tausaga le matua, ‘Papa! Ou te iloa le mea na puipuia ai lo tatou faleoloa. E totogi e oulua ma Mama e le aunoa a lua sefuluai.’”

Sa faaiu le tala a Brother Parra: “Sa ou manatua ai upu a Malaki. ‘Ou te aoai atu ona o outou, le na te ‘aina mea; na te le faaumatia le fua o lo outou laueleele’ [Malaki 3:11]. Sa matou tootutuli ma faafetai atu ma le agaga faafetai i lo matou Tama Faalelagi mo Lana vavega.”¹

Tofotofo Mai Nei Ia Te Au

O a tatou mea uma o i ai ma o tatou tagata uma, e mai le Atua. I le avea ai ma soo o Keriso, tatou te fefaasoaa’i ma le naunauta’i ma i latou o siomia ai i tatou.

O mea uma e tuuina mai e le Alii ia i tatou, ua Ia poloaiina i tatou e toe faafoi atu ia te Ia ma Lona malo i le lalolagi le 10 pasene o a tatou mea faasili. Ua Ia folafola mai ia i tatou pe a tatou faamaoni i a tatou sefuluai, o le a Ia “toina … pupuni o le lagi, … ma sasaa atu le manuia mo outou.”² Ua Ia folafola mai ia i tatou o le a Ia puipuia i tatou mai le leaga.³ O nei folafolaga ua matua mautinoa lava,⁴ ua fetalai mai le Alii, “Ia outou tofotofo mai ia te au i lenei mea,”⁵ o se fasifuaitau e leai se isi mea o maua ai i tusitusiga paia ae na sii mai e Malaki.

E tele ala e toina ai pupuni o le lagi. O ni isi e faaletino, ae o le tele e faaleagaga. O nisi e ma’ale’ale ma faigofie ona sopoloa ai le vaai. Talitonu i le taimi a le Alii; e oo mai lava e le aunoa faamanuiaga.

Tatou te faanoanoa faatasi ma i latou o e tauivi ia maua mea e tatau ai mo le olaga. Na foai atu talu ai nei e le Ekalesia le 54 miliona tala Amerika e saunia ai toomaga mo tamaiti ma tina mafatia i le lalolagi atoa.⁶ Ma o taulaga anapogi mai a outou anapogi faalemasina, ua fesoasoani atu ai o tatou epikopo lelei i le faitau afe i vaiaso taitasi o loo manaomia mo se taimi lē tumau meaai i luga o a latou laulau, o lavalava e ufiufi ai o latou papatua, ma malutaga i o latou ulu. Na pau lava le vaifofo tumau i le mativa o lenei lalolagi o le talalelei a Iesu Keriso.⁷

O Se Mataupu o le Faatuatua

Na aoao mai le Aposetolo o Paulo e faapea, o le poto o tagata e malamalama i mea a tagata, ae e faigata ona malamalama i mea a le Atua.⁸ E talanoa le lalolagi i le sefuluai e faatatau i a tatou tupe, ae o le tulafono paia o le sefuluai i se tulaga autu o se mataupu o lo tatou faatuatua. O le faamaoni i a tatou sefuluai o se tasi lea o auala e faaalia ai lo tatou naunautaiga e faamuamua le Alii i o tatou olaga, i luga atu o o tatou lava naunauga ma fiafiaga. Ou te folafola atu a outou talitonu i le Alii, o e a mulimuli mai faamanuiaga o le lagi.

Na fetalai Iesu e ave “mea a Kaisara ia Kaisara; ma mea a le Atua i le Atua.”⁹ Na poloaiina e le Faaola toetu ia sa Nifae e tusi i a latou faamaumauga Ana folafolaga o loo maua i le Malaki.¹⁰ I o tatou aso, sa toefaamautu mai ai e le Alii le tulafono faalelagi o le sefuluai: “O le a avea lenei ma amataga o le sefuluai a lo’u nuu. Ma ia [latou] totogi atu le tasi vae sefulu o a latou faasiliga uma i tausaga taitasi; ma ia avea lenei ma tulafono tumau ia te i latou e faavavau.”¹¹

Na faatonu mai e le Alii le ala e tatau ona faasoasoa ai le sefuluai, ma fetalai mai, “Ina aumaia mea e sefulu a’i a tou mea uma lava i le fale e teu ai mea,”¹² o lona uiga ia aumai sefuluai i le malo ua toefuata’i mai, O Le Ekalesia a Iesu Keriso o le Au Paia o Aso e Gata Ai.¹³ Na Ia faatonu mai e faapea o le faaaogaina o nei sefuluai paia o le a fuafuaina ma le agaga tatalo e se aufono o le Au Peresitene Sili, le Koama a Aposetolo e Toasefululua, le Au Epikopo Pulefaamalumalu, “ma i lo’u lava leo ia i latou, ua fetalai mai ai le Alii.”¹⁴

O Tupe Paia a le Alii

O nei tupe paia e le o ni tupe a taitai o le Ekalesia. E ō le Alii. Ua matua nofouta Ana auauna i le natura paia o lo latou tausimea.

Na toe ta’ua e Peresitene Gordon B. Hinckley lona aafiaga a o tamaitiiti: “A o o’u laitiiti sa ou faia se fesili i lo’u tama … e faatatau i le faaaluina o tupe a le Ekalesia. Sa ia faamanatu mai ia te au, o la’u matafaioi na tuuina mai e le Atua e totogi a’u sefuluai ma taulaga. A ou faia, [sa fai mai ai lo’u tama,] o mea ou te foai atu e le toe ta’ua o ni a’u mea. E ō le Alii lea ou te tuuto i ai.” Sa faaopoopo mai lona tama: “O mea e faia i ai e i latou ua i ai le pule a le Ekalesia, e le tatau ona toe popole i ai [oe, Gordon]. O i latou e tali atu i le Alii, i latou ia e manaomia mai ai se auiliiliga i o latou lima.”¹⁵

Tatou te lagonaina le mamafa o le “tali atu i le Alii.”

O A Outou Sefuluai ma Taulaga Lima Foai

Mai sefuluai ma taulaga limafoa’i na outou faapaia atu i le Alii, o le tausaga talu ai e silia ma se piliona Tala Amerika sa faaaoga e faamanuiaina ai i latou e le tagolima.¹⁶

I lo tatou tiutetauave taua tele e avatu le talalelei toefuatai i le lalolagi atoa, e silia ma le 71,000 a tatou faifeautalai o loo galulue i misiona e 414.¹⁷ Ona o a outou sefuluai ma taulaga, ua mafai ai e faifeautalai ona auauna atu, tusa lava po o a tulaga tautupe o o latou aiga.

Ua fauina malumalu i le salafa o le lalolagi i le aofai e le mafaatusalia. O le taimi nei, e 177 malumalu o loo faaaoga, 59 o loo fau pe toe faafou, ma le isi 79 o loo fuafua ma mamanuina.¹⁸ O a outou sefuluai ua mafai ai ona maua faamanuiaga o le malumalu i nofoaga e na o le Alii e mafai ona muai silafia.

Ua silia ma le 30,000 aulotu ua faapotopoto i le faitau afe o falesa ma isi fale i atunuu ma teritori e 195.¹⁹ Ona o a outou sefuluai faamaoni, ua faavaeina le Ekalesia i nofoaga tumamao atonu o le a outou le asia lava ua i ai le Au Paia amiotonu atonu o le a outou le iloa lava.

O loo lagolago nei e le Ekalesia ni a’oga se lima o aoaoga maualuluga atu.²⁰ O nei a’oga o loo tautuaina ai le silia ma le 145,000 tamaiti aoga. E selau sefulu afe vasega e aoao ai i vaiaso taitasi i a tatou seminare ma inisitituti.²¹

O nei faamanuiaga ma le isi anoano e maua mai i se fuataga tele mai talavou ma e matutua o soo se tulaga faaletamaoaiga e totogia se sefuluai faamaoni.

O le mana faaleagaga o le tulafono o le sefuluai e le fuaina i le aofai o tupe e saofagā i ai, aua ua poloaiina le e mauoa ma le e mativa e le Alii ia totogi atu le 10 pasene o a latou tupe maua.²² E maua le mana mai le tuuina o lo tatou faatuatuaga i le Alii.²³

O le tamaoaiga faaopoopo o le Alii e aumaia e ala i a outou sefuluai limafoai ua faamalolosia ai tupe faaagaga a le Ekalesia, e maua ai avanoa e faalautele ai le galuega a le Alii e sili atu i lo se isi mea ua tatou iloa. E silafia mea uma e le Alii, ma e oo mai le taimi, o le a tatou vaai ai ua faataunuuina Ona faamoemoega paia uma.²⁴

E Tele Auala e O’o Mai Ai Faamanuiaga

E tele ala e oo mai ai faamanuiaga o le sefuluai. I le 1988 sa ma malaga ai ma Elder Henry B. Eyring i se sauniga tele a le Ekalesia i le eria o Iuta, lea ua ta’ua nei o Silicon Slopes, o se nuu ua maoae le faama’ite i mea tau tekinolosi. O se taimi ua faatupula’ia ai le tamaoaiga, ma sa lapata’ia e Elder Eyring le Au Paia e uiga i le faatusatusa o mea sa latou maua i mea a isi, ma le mana’olasi. O le a ou manatua pea lana folafolaga e faapea a latou totogia se sefuluai faamaoni, o le a faaitiitia lo latou mana’o mo nisi ‘oa faalelalolagi. I totonu o le lua tausaga, sa faafuase’i ona pa’ū maualalo maketi o fefaataua’iga faatekinolosi. E toatele na leai ni galuega, ma sa tautevateva kamupani i le taimi lea o fetuunaiga tautupe. O i latou na mulimuli i le fautuaga a Elder Eyring na faamanuiaina.

Na faamanatu mai ia te a’u e lana folafolaga se isi aafiaga. Sa ma feiloai ma Charlotte Hlimi e 12-tausaga le matua e lata i Carcassonne, Farani i le 1990 a o avea a’u o se peresitene misiona. O le au Hlimis o se aiga faamaoni sa nonofo i se tama’i fale mautotogi ma se fanau e toavalu. Sa i ai se latou ata o le Faaola ma le perofeta i luga o le puipui. I se faatalanoaga mo lona faamanuiaga faapeteriaka, sa ou fesili ai ia Charlotte pe na te totogia se sefuluai faamaoni. Sa ia tali mai, “Ioe, Peresitene Andersen. Sa aoao mai a’u e lo’u tina faapea e i ai faamanuiaga faaletino ma faaleagaga e maua mai le totogiina o a matou sefuluai. Sa aoao mai a’u e lo’u tina faapea afai matou te totogia e le aunoa a matou sefuluai, o le a matou maua mea uma matou te manaomia. Ma Peresitene Andersen, ua i ai mea uma matou te manaomia.

I le tuuina mai ia te au o le faatagaga e faasoa atu ai lana tala, o Charlotte, lea ua 45 nei ma faamauina i le malumalu, na faapea mai: “O la’u molimau i le sefuluai sa matuai moni lava i lena taimi, ma ua sili atu ona malosi i le taimi nei. Ou te matua faafetai lava mo lenei upumoni. A o ou ola ai, e faaauau pea ona faamanuiaina a’u.”²⁵

E i ai se aso o le a ta’itasi ai ona muta la tatou malaga i le lalolagi. Luasefulu-lima tausaga talu ai, na o nai aso a o lei maliu lo’u tina faaletulafono o Mareta Williams, i le kanesa, sa ia maua ai se siaki laitiiti i le meli. Sa vave ona ia fesili i lo’u toalua, o Kathy, mo lana tusi siaki e totogi ai lana sefuluai. Talu ai ua matua vaivai tele lona tina ma sa le mafai ai ona ia tusitusi, sa fesili atu ai Kathy pe mafai ona ia tusia le siaki mo ia. Sa tali atu lona tina, “Leai, Kathy. Ou te manao ou te faia lava e a’u.” Ona ia faaopoopo ane lea, “Ou te mana’o ia ou sa’o i luma o le Alii.” O se tasi o toe mea na faia e Kathy mo lona tina o le, tuuina atu lea o lana teutusi sefuluai i lona epikopo.

Galuega Taua a le Atua

O’u uso e ma tuafafine, O Le Ekalesia a Iesu Keriso o le Au Paia o Aso e Gata Ai e “mai i le lē mailoa,”²⁶ ma aumaia ai faamanuiaga ofoofogia i le lalolagi atoa. O le a i ai i latou e patipatia i tatou agai i luma ma i latou e le faia. Ua ou mafaufau i upu a Kamalielu poto, o lē ina ua faalogo i vavega a le Aposetolo o Paulo ma Ioane, sa lapata’ia le aufono i Ierusalema:

“Faamamao ia ma nei tagata; … aua afai ua tupu … lena galuega, e faaumatia ia:

“A e afai ua tupu mai le Atua, tou te le mafai ona faaumatia; ina ne’i iloa ua outou fai taua i le Atua lava.”²⁷

O tatou o se vaega o le galuega taua a le Atua i luga o le fogaeleele. O le a le faaumatia lava ae o le a agai pea i luma i le lalolagi atoa, e saunia ai le ala mo le toe afio mai o le Faaola. Ou te molimau atu i upu a Peresitene Russell M. Nelson: “I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia … O le a Ia faae’e mai avanoa e le mafaitaulia, faamanuiaga, ma vavega i luga o e faamaoni.”²⁸

O la’u molimau lenei. O Iesu o le Keriso. O Lana galuega paia lenei. O le a toe afio mai o Ia. I le suafa o Iesu Keriso, amene.