Ua Maua Nei le Lomiga Lona Lua o le Tala’i La’u Talalelei

Toeitiiti atoa le lua sefulu tausaga talu ona uma le lolomiga o le Tala’i La’u Talalelei: O Se Taiala mo le Galuega Faafaifeautalai, ua lolomiina ai e le Ekalesia se lomiga lona lua (lea e tauaveina le soaautu O Se Taiala i le Faasoaina Atu o le Talalelei a Iesu Keriso).

Sa fofogaina mai e Peresitene Russell M. Nelson le lomiga lona lua i le semina a le Ekalesia mo taitai fou o misiona ia Iuni. “O lenei lomiga fou e oo mai i se taimi ua vave ai ona suia le lalolagi,” na ia saunoa ai. “[E] atagia mai ai se lagona maaleale i le tele o na suiga. O loo i ai nisi o faatonuga sili ua ou vaai i ai e fesoasoani ai i tagata e talia le valaaulia a le Alii e o mai ia te Ia.”

O le lomiga ua toe faafouina e aofia ai aoaoga mai taitai o le Ekalesia na tuuina mai talu mai le lomiga muamua na lolomiina i le 2004. E ogatusa ma le Tusitaulima Aoao ua faafouina ma isi aiaiga faavae fou. O loo aofia ai foi malupuipuiga ma taiala mo le faaaogaina o tekinolosi i le faasoaina atu o le talalelei.

Na saunoa le Peresitene Aoao o Tamaitai Talavou, o Bonnie H. Cordon e faapea: “O le mea na matagofie ai o le tofu manatu o le Toasefululua i lenei mea. Ua faitauina atoa e le Au Peresitene Sili. Ma o le tusi moni lenei ua tuuina i ai e le Faaola Lana faailoga tusi.”

O le lomiga lona lua o le Tala’i La’u Talalelei o loo maua i le polokalama o le Gospel Library ma i luga o le initoneti i le gagana Peretania, Farani, Potukale, ma le Sipaniolo. O le a maua lomiga ua lolomiina i le faaiuga o le 2023. O le a maua isi gagana faaopoopo e amata atu ia Ianuari 2024.