Viia le Na Fetaiai ma Ieova
E maeu le tele o o tatou faamanuiaga lo tatou iloaina mea uma e tatau ona tatou iloa ona ua ia i tatou Iosefa Samita, le perofeta o le tisipenisione mulimuli.
Uso e ma tuafafine pele, ua faamamaluina a’u e faatasi ai ma outou i lenei taeao. Ou te tatalo ia faamanuia a’u e le Alii.
Ua le o toe tutusa o’u mata e pei ona masani ai. Sa ou alu e vaai le foma’i mata, ma sa ou fai atu i ai, Ua le mafai ona ou vaai i le teleprompter [masini e faaali mai ai lauga a failauga].”
Ma sa ia faapea mai, “Ia, ua matutua ou mata. O le a le toe suia.”
O lea o le a ou faia le mea sili ou te mafaia.
Ou te fia faasoa atu ia te outou nisi o mea sa i lo’u mafaufau. Sa foliga mai na i ai le Perofeta o Iosefa i lo’u mafaufau i nai masina ua tuanai atu. Sa ou saofai ma mafaufau i lona tiutetauave mamalu i le avea ai ma perofeta o lenei tisipenisione o le atoaga o taimi.
Ou te mafaufau i le maeu o lo tatou agaga faafetai i le avea ma ni tagata o Le Ekalesia a Iesu Keriso o le Au Paia o Aso e Gata Ai faapea, o Iosefa Samita, o se tama na manao e iloa le mea e tatau ona ia fai ina ia faamagalo ai ana agasala, na mauaina le lototoa e alu ai i se pupu la’au i tala ane o lona fale i Palamaira, Niu Ioka, ma o iina sa ia tootuli ai e tatalo, ma—i lana lava tala—na tatalo leotele ai mo le uluai taimi (tagai i le Iosefa Samita—Talafaasolopito 1:14).
I lena taimi, a o tootuli Iosefa i ona tulivae i le mea ua tatou ta’ua o le Vao Paia, sa matala mai ai le lagi. Na faaali mai ai ia te ia ni tagata e toalua, e sili atu le pupula nai lo le la i le aoauli. Sa fetalai atu le tasi o i laua ia te ia, [Iosefa,] o Lo’u Atalii Pele lenei. Faalogo ia te Ia!” (Iosefa Samita—Talafaasolopito 1:17). O lea na amata ai le Toefuata’iga o le atoatoaga o le talalelei e faavavau a Iesu Keriso
Ona o Iesu, lo tatou Faaola ma lo tatou Togiola, na fetalai i le taulealea o Iosefa ma tatala mai ai lenei tisipenisione o taimi ua tatou ola ai nei, ua tatou pepese ai, “Ia viia le na fetaia’i ma Ieova!” (“Viia Le Na Fetaiai ma Ieova,” Viiga, nu. 15). Tatou te faafetai i le Alii mo Iosefa Samita ma mo lona lototoa e alu i lena pupu o la’au i le 1820, i talaane o lona fale i Palmaira, Niu Ioka.
Sa ou mafaufau e uiga i mea ofoofogia uma ua tatou iloa, ma mea uma ua tatou maua. O’u uso e ma tuafafine pele, o la’u molimau ia te outou i lenei taeao o le, e maeu le matua’i faamanuiaina o i tatou i le iloa ai o mea uma ua tatou iloa, ona ua ia i tatou Iosefa Samita, le perofeta o lenei tisipenisione mulimuli o taimi.
Ua i ai so tatou malamalama i le faamoemoega o le olaga, pe o ai i tatou.
Ua tatou iloa pe o ai le Atua; ua tatou iloa pe o ai le Faaola, ona ua ia i tatou Iosefa, o lē sa alu i le pupu o laau o se tamaitiiti, e sailia le faamagaloga mo ana agasala.
Ou te manatu o se tasi o mea aupito mamalu ma le ofoofogia e mafai ona iloa e soo se tasi i lenei lalolagi—ua faaalia lo tatou Tama Faalelagi ma le Alii o Iesu Keriso i La’ua lava i lenei aso amulī ma na tula’i a’e Iosefa e toefutai mai le atoaga o le talalelei e faavavau a Iesu Keriso.
Ua ia i tatou le Tusi a Mamona. Se meaalofa ina a ofoofogia ma matagofie o le Tusi a Mamona i tagata auai o le Ekalesia. O se tasi lea o mau, se tasi o molimau o Iesu o le Keriso. Ua tatou maua ona sa agavaa Iosefa e alu ma aumai papatusi, sa musuia e le lagi e faaliliuina e ala i le meaalofa ma le mana o le Atua ma tuuina atu le tusi i le lalolagi.
E ui ina faigofie la’u savali i lenei taeao, e loloto, ma e tumu i le alofa mo le Perofeta o Iosefa Samita ma mo i latou uma, o’u uso ma tuafafine, o ē sa lagolagoina o ia ma sa loto e lagolago o ia i lona talavou.
Ou te fia tuu atu se saafiafiga i lenei taeao i lona tina. Sa ou mafaufau pea lava pea i le matagofie o le taimi na sau ai Iosefa i le fale mai lena aafiaga i le Vao Paia ma ta’u i lona tina le mea na tupu, sa talitonu Lusi Maka Samita ia te ia.
Ou te faafetai i lona tamā ma ona uso ma ona tuafafine ma lona aiga, o ē na lagolagoina o ia i lenei tiutetauave tele na tuuina e le Alii i ona luga ia avea ma perofeta e toefuata’iina mai le atoaga o le talalelei e faavavau a Iesu Keriso i le lalolagi.
O la’u molimau la i lenei taeao o le, ua ou iloa o Iesu Keriso o le Faaola ma le Togiola o le lalolagi. Ua ou iloa foi na faaali atu lo tatou Tama Faalelagi ma le Alii o Iesu Keriso ma talanoa ia Iosefa ma saunia o ia e avea ma perofeta.
Ou te maofa lava, ma ou te mautinoa e faapena foi le toatele o outou, i le faamanuiaina o i tatou e iloa mea ua tatou iloa e uiga i lo tatou faamoemoega i le olaga, le mafuaaga ua tatou i ai iinei, o mea e tatau ona tatou taumafai e fai ma faataunuuina i o tatou olaga i aso taitasi. O loo tatou i ai i le faagasloga o le taumafai e saunia i tatou lava, o le aso ma le taimi, ia lelei teisi, agalelei teisi, saunia teisi mo lena aso, lea o le a mautinoa lava e oo mai, pe a tatou toe foi atu i luma o lo tatou Tama Faalelagi ma le Alii o Iesu Keriso.
Ua fai lava si lata tele mai mo a’u. E le o toe mamao ona atoa lea o lo’u 95. Fai mai la’u fanau ua latou manatu ua ou toeaina tele nai lo lena i nisi aso, ae e le afaina. O loo ou faia le mea sili ou te mafaia.
Ae mo le toeitiiti atoa le 50 tausaga, uso e ma tuafafine, na ou maua ai le avanoa e faasopolia ai le lalolagi i o’u tofiga o se Pulega Aoao o le Ekalesia. Sa o se faamanuiaga ofoofogia. Ou te manatu ua ou latalata atu i le toetoe lava o vaega uma o le lalolagi. Ua ou feiloai i tagata o le Ekalesia i le lalolagi uma.
Oka, so’u alofa ia te outou. Se aafiaga ina a mamalu lena mea--le vaavaai atu i outou foliga, i ai faatasi ma outou, ma lagonaina lo outou alolofa i le Alii ma mo le Toefuataiga o le talalelei a Iesu Keriso.
Talosia ia leoleo outou e lo tatou Tama Faalelagi i le taimi nei ma faamanuia taualumaga uma o le konafesi. Ma ia faatumulia o tatou loto i le Agaga o le Alii, ma ia faateleina lo tatou alolofa i le talalelei a Iesu Keriso--lo tatou Faaola pele, le Alii o Iesu Keriso--a o tatou tauivi e auauna atu ia te Ia ma tausi Ana poloaiga ma ia avea atili e faapei o Ia e avea ma taunuuga o lo tatou auai i le konafesi aoao. Po o fea lava le mea o e i ai i lenei lalolagi, ia faamanuia oe e le Atua. Ia mafuta mai le Agaga o le Alii ma i tatou. Ia tatou lagonaina le mana o le lagi a o tatou tapuai faatasi i lenei sauniga o le konafesi.
Ou te tuu atu ia te outou la’u mau ma le molimau ua ou iloa o Iesu o le Keriso. O Ia o lo tatou Faaola, o lo tatou Togiola. O ia o la tatou uo mamae. I le suafa paia o Iesu Keriso, amene.