Faasaoina o le Leo o le Nuu o le Folafolaga i le Tupulaga Faia’e

Saunia e Brother Jan E. Newman

Fesoasoani Lua i le Au Peresitene Aoao o le Aoga Sa

O se tasi o o tatou tiutetauave sili ona paia o le fesoasoani i a tatou fanau e o mai ia loloto le iloa ma patino faapea o Iesu o le Keriso.

O se tasi o taimi faamomoiloto i le Tusi a Mamona o le asiasiga a le Faaola i tagata i le malumalu i le laueleele o Nuumau. Ina ua mavae se aso o aoaoga, faamalologa, ma le fausia o le faatuatua, sa tata’i e Iesu le gauai a tagata i le tupulaga faia’e: “Na ia poloai atu ia aumai o latou tamaiti.”¹ Sa Ia tatalo mo i latou ma faamanuia taitoatasi i latou. O le faamomoiloto tele o le aafiaga na tutulu faafia ai le Faaola lava Ia.

Ona, ia fetalai atu lea i le motu o tagata, na fetalai ai Iesu:

“Vaai ia i o outou tamaiti.

“Ma a o latou vaai atu … , sa latou vaai ua avanoa le lagi, ma sa latou vaai i agelu ua afifio ifo mai le lagi,” ua auauna atu ia latou fanau.²

Sa tele ina ou mafaufau i lenei aafiaga. Atonu na liusuavai ai loto o tagata uma! Sa latou vaai i le Faaola. Sa latou pa’i atu ia te Ia. Sa latou silafia o Ia. Sa Ia aoao atu i latou. Sa Ia faamanuia ia i latou. Ma Ia alofa ia i latou. E leitioa ina ua mavae lenei gaoioiga paia, sa ola a’e nei tamaiti e fesoasoani e faavae se sosaiete o le filemu, manuia, ma le alofa faaKeriso e tumau mo augatupulaga.³

Pe le matagofie ea pe a mafai ona maua e a tatou fanau ni aafiaga e faapei o lea faatasi ma Iesu Keriso—se mea e fusia ai o latou loto ia te Ia! Ua Ia valaaulia i tatou, e pei ona Ia valaaulia na matua i le Tusi a Mamona, e aumai tamaiti ia te Ia. E mafai ona tatou fesoasoani ia latou iloa lo latou Faaola ma le Togiola i le ala na faia ai e nei tamaiti. E mafai ona tatou faaali atu ia te i latou le ala e maua ai le Faaola i tusitusiga paia ma fausia lo latou faavae ia te Ia.⁴

Talu ai nei, sa aoao mai ai e se uo lelei se mea ia te a’u sa ou le’i iloaina muamua e uiga i le faataoto i le tagata poto, o le na fausia lona fale i luga o se papa. E tusa ai ma le tala a Luka, a o faataatia e le tagata poto le faavae mo lona fale, sa ia “eli maulalo.”⁵ E le o se mea faasamasamanoa pe faigofie—sa fai ai se taumafaiga!

Ina ia fausia o tatou olaga i luga o le Papa o lo tatou Togiola, o Iesu Keriso, e manaomia ona tatou ‘eli maulalo. Tatou te aveesea soo se mea e oneonea pe le tatau ai i o tatou olaga. Tatou te eliina pea seia oo ina tatou maua o Ia. Tatou te aoao foi a tatou fanau ia fusia i latou lava ia te Ia e ala i sauniga paia ma feagaiga, a o’o ai ina oo mai afa ma lologa faafeagai, aua o le a oo mai lava, o le a le tele so latou aafiaga i o latou luga “ona o le papa o loo atia’e ai [i latou].”⁶

E le te’i ua tupu mai lea ituaiga o malosiaga. E le pasi atua i le isi tupulaga e faapei o se tofi faaleagaga. E tatau i tagata taitoatasi ona ‘eli maulalo ina ia maua le Papa.

Tatou te aoaoina lenei lesona mai se isi tala i le Tusi a Mamona. Ina ua tuu atu e le Tupu o Peniamina lana lauga faaiu i lona nuu, sa latou potopoto o ni aiga e faalogologo i ana upu.⁷ Sa tuu atu e le Tupu o Peniamina se molimau mamana ia Iesu Keriso, ma sa matua’i o’oo’o le tuia o loto o tagata i lana molimau. Sa latou tautino atu:

“O le Agaga … lea ua faia se liuga tele i totonu ia i matou, po o i totonu o o matou loto. …

Ma ua matou malilie e ulu atu i se feagaiga ma lo matou Atua e fai lona finagalo … i o matou aso uma o totoe.”⁸

E ono faamoemoe se tasi faapea o tamaiti ua matua’i liua loloto o latou matua, o le a i’u ina liua foi i latou lava ma osia feagaiga. Ae, atonu e i ai se mafuaaga ua le o ta’ua ai i le tala, o le feagaiga na osia e matua e le’i i ai sina naunau o nisi o a latou fanau e lagolagoina. I le tele o tausaga mulimuli ane, “sa oo ina sa toatele tupulaga faiaʼe sa lē mafai ona malamalama i upu a le tupu o Peniamina, ona o ni fanau laiti i latou i le taimi na saunoa mai ai o ia i lona nuu; ma sa latou lē talitonu i uputuu a o latou tamā.

“Sa latou lē talitonu i mea sa tautalagia e uiga i le toetutu mai o e ua oti, pe sa latou talitonu foi e uiga i le afio mai o Keriso. …

“Ma sa latou lē fia papatiso; pe sa latou fia auai foi i le ekalesia. Ma sa avea i latou o ni tagata ese e tusa ma lo latou faatuatuaga.”⁹

Se manatu ina a ma’eu! Mo le tupulaga faia’e, e le lava le faatuatua ia Iesu Keriso e talitonu ai i “uputuu a o latou tama.” E manaomia le i ai o lo latou lava faatuatua ia Iesu Keriso mo i latou lava. I le avea ai ma nuu o le Atua, e mafai faapefea ona tatou totōina i totonu o loto o a tatou fanau se mana’o e osia ma tausia feagaiga ma Ia?

E mafai ona tatou amata i le mulimuli i le faataitaiga a Nifae: “Ma ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”¹⁰ O upu a Nifae o loo ta’u mai ai se taumafaiga faifai pea e aoao a tatou fanau e uiga ia Keriso. E mafai ona tatou faamautinoaina e faaleo ma faasoa atu molimau a tagata o le feagaiga i tupulaga faia’e i aso uma aua o Iesu e le na o se autu mo na o le Aso Sa.¹¹

O le leo o tagata o le feagaiga e maua i a tatou lava upu o molimau. O loo maua i upu a perofeta soifua. Ma o loo teumaluina ma le mamana i tusitusiga paia. O iina o le a iloa ai e a tatou fanau Iesu ma maua ai tali i a latou fesili. O iina o le a latou aoaoina ai mo i latou lava le aoaoga faavae a Keriso. O iina o le a latou maua ai le faamoemoe. O lena mea o le a saunia ai i latou mo le sailiga o le upumoni i le olaga atoa ma ola ai i luga o le ala o feagaiga.

Ou te fiafia i le apoapoaiga lenei mai ia Peresitene Russell M. Nelson:

O fea e mafai ona tatou o i ai e lagona ai o Ia?

E mafai ona tatou ō i tusitusiga paia. Latou te a’oa’o mai i tatou e uiga ia Iesu Keriso ma Lana talalelei, le silisili ese o Lana Togiola, ma le fuafuaga sili a lo tatou Tama o le fiafia ma le togiolaina. O le faatofuina i aso taitasi i le afioga a le Atua e taua tele mo le ola faaleagaga, aemaise lava i nei aso o le faatupulaia o suiga faigata. Pe a tatou taumamafa i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i.”¹²

O a la foliga o le taumamafa i afioga a Keriso ma faalogo ia te Ia? Ia, e foliga e pei o a lava mea e sili ona aoga mo oe! Atonu o le faapotopoto ma lou aiga ma talanoa e uiga i mea na aoao atu e le Agaga Paia ia te oe i au suesuega o tusitusiga paia e faaaoga ai le Sau, Mulimuli Mai ia te A’u. Atonu o le faapotopoto i aso taitasi ma lau fanau e faitau ni nai fuaiupu mai tusitusiga paia ona vaavaai lea o avanoa e talanoa ai i mea sa outou aoao a o faaalu faatasi lo outou taimi. Na ona su’e lava o le mea e aoga mo oe ma lou aiga; ona taumafai lea e fai ia sili teisi atu i aso taitasi.

Mafaufau i le malamalamaaga lenei mai le Aoao Atu i le Ala a le Faaola: “Faaletagata lava ia, o se afiafi faaleaiga se tasi, se vasega suesue o tusitusiga paia, po o se talanoaga faaletalalelei atonu e foliga mai o le a ausia ai le tele o mea. Ae o le faateleina o taumafaiga laiti, faatauvaa, e faifai pea lava pea i le aluga o taimi, e mafai ona sili atu ona mamana ma faamalosia nai lo se taimi maoae po o se lesona iloga. O lea aua le fiu, ma aua le popole i le faataunuuina o se mea maoae i taimi uma. Tau lava o le tumau pea i au taumafaiga.”¹³

O se tasi o o tatou tiutetauave sili ona paia o le fesoasoani i a tatou fanau e o mai ia loloto le iloa ma patino faapea o Iesu o le Keriso, le Alo o le Atua Soifua, lo latou Faaola ma le Togiola patino, o lē o loo faaao i ai Lana Ekalesia! E le mafai ona tatou faatagaina a tatou molimau ia lē leoa pe sāō pe a tau atu ia te Ia.

Atonu e te lagonaina sina le agavaa i lea matafaioi, ae e le tatau lava ona e manatu ua na o oe. Mo se faataitaiga, o aufono a uarota ua faatagaina e faatulaga fonotaga faaaufono a faiaoga mo matua. I nei fonotaga faalekuata, e mafai e matua ona potopoto e aoao mai aafiaga o le tasi ma le isi, talanoaina le ala o latou faamalolosia ai o latou aiga, ma aoao mataupu faavae autu o le aoao atu e faapei o Keriso. E tatau ona faia lea fonotaga i le itula lona lua o le lotu.¹⁴ E ta’ita’ia lea fono e se tasi o le uarota e filifilia e le epikopo ma mulimulita’i i le mamanu o fonotaga masani a aufono a faiaoga, e faaaoga ai le Aoao Atu i le Ala a le Faaola o le punaoa autu.¹⁵ Epikopo, afai e le o faia e la outou uarota ia fonotaga a le aufono a faiaoga mo matua, galulue ma le peresitene o la outou Aoga Sa ma le aufono a le uarota e faatulaga outou lava.¹⁶

A’u uo pele ia Keriso, o loo sili atu le lelei o mea o outou faia nai le mea o tou manatu ai. Tau lava ina faaauau pea ona galulue ai. O loo matamata atu a outou fanau, faalogologo, ma aoao. A o outou aoao atu i latou, o le a oo ina outou iloa lo latou natura moni o ni atalii ma afafine pele o le Atua. Atonu e galo ia i latou le Faaola mo se vaitaimi, ae ou te folafola atu ia te outou, Na Te le faagaloina lava i latou! O na taimi pe a talanoa atu le Agaga Paia ia i latou, o le a i ai pea i o latou loto ma mafaufau. Ma e i ai se aso o le a toe faaleo mai ai e a outou fanau le molimau a Enosa: Ua ou iloa o loʼu tamā o se tagata amiotonu o ia, “ona sa [la] aoaoina aʼu …i le aoaoga ma le apoapoaiga foi a le Alii—ma ia faamanūina lava le suafa o loʼu Atua mo lena mea.”¹⁷

Tatou talia le valaaulia a le Faaola ma aumai a tatou fanau ia te Ia. A tatou faia lena mea, o le a latou vaai ia te Ia. O le a latou pa’i atu ia te Ia. O le a latou iloa o Ia. O le a Ia aoao atu i latou. O le a Ia faamanuiaina i latou. Oi, o le a maeu Lona alofa ia i latou. Ma, oka, so’u alofa ia te Ia. I Lona suafa paia, o Iesu Keriso, amene.