E Te Manao Ia E Fiafia?
Tumau i luga o le ala o feagaiga. O le a faigofie atu, fiafia atu, ma faatumulia o outou olaga i le olioli.
E te manao ia e fiafia? O le a se mea e ala ai ona e le fiafia? Na saunoa Peresitene Nelson: “Afai e te manao e faanoanoa, soli poloaiga—ma aua lava ne’i salamo. Afai e te manao e fiafia, tumau i le ala o feagaiga.”1 Pe le faigofie ea ona fiafia? Tau lava o le osia ma tausia feagaiga i o outou olaga. Se’i o tatou toe faamanatuina ni isi o mea e mafai ona fesoasoani ia i tatou e tumau ai i luga o le ala o feagaiga ma tatou maua ai le fiafia.
1. O Le A le Ala o Feagaiga?
E tusa ai ma le saunoaga a Elder Dale G. Renlund: “O le faaupuga ala o feagaiga e faasino i se soloa’iga o feagaiga, lea tatou te o mai ai ia Keriso ma faafesootai ai ma Ia. E ala i lenei noataga i feagaiga, tatou te maua ai Lona mana faavavau. E amata le ala i le faatuatua ia Iesu Keriso ma le salamo, sosoo ai ma le papatisoga ma le mauaina o le Agaga Paia.”2 Tatou te faafouina nei feagaiga i soo se taimi tatou te aai ma feinu ai i le faamanatuga.
E amata atu i le feagaiga o le papatisoga, tatou te osia ai nisi feagaiga i o tatou olaga atoa. Na saunoa foi Elder Renlund: “O le ala o feagaiga e tau atu i sauniga o le malumalu, e pei o le faaeega paia i le malumalu. O le faaeega paia o le meaalofa lea a le Atua o feagaiga paia ia e faafesootai atoatoa atu ai i tatou ia te Ia.”3
2. O E I Ai i le Ala o Feagaiga?
O ni isi taimi pe a tatou osia feagaiga, tatou te le tausia ai. A tupu lenei mea, e mafai faapefea ona e toe foi mai i le ala o feagaiga? Sei ou faasoa atu nisi o faataitaiga o le toe foi mai i le ala o feagaiga.
E le’i mamao atu ma se masina talu ai, na ou maua ai se savali mai se faifeautalai ua toe taliu mai i le fale o lē sa matou galulue faatasi. Fai mai o ia: “Sa faigata lava se taimi ua tuanai atu. O le tauivi ai ma le popolevale ma le atuatuvale i aso uma sa fai ma avega mamafa ia te au, ma e matuai faigata lava. Ou te lagona le tuuatoatasi ma le le fiafia. Sa ou tatalo mo le taitaiga a lo tatou Tama Faalelagi mo le filemu ma le faamafanafanaga i se mea e mafai ona ou faia e faafetauia ai le faafitauli. … A o ou tatalo, na ou lagonaina le uunaiga a le Agaga ua ta’u mai ia te a’u e tatau ona totogi atoa la’u sefuluai. … Sa ou lagonaina malosi le Agaga, o lea sa ou lagona ai i le taimi lava lea le uunaiga e fai loa. Faatasi ai ma le manao e faia o lea, sa ou lagonaina le uunaiga e faapea, ‘afai e totogi lau sefuluai, o le a LELEI mea uma.’ O loo o’u tauivi pea ia maua le filemu, ae e i ai sa’u molimau i lo tatou Faaola ma e ala i lo’u usiusitai, e mafai ai ona ou lagona ma maua le filemu o loo ou sailia i lo’u loto ma lo’u mafaufau. Na ou filifili talu ai nei e toe foi mai i le ekalesia ma ia saili le agaga i mea uma ou te faia.”
I le taimi nei o loo manuia o ia. E mafai foi ona e ole atu i le Tama Faalelagi mo le filemu, peitai atonu e ese le tali nai lo le mea o loo e manatu i ai. Afai lava o loo e saili ia iloa e uiga i le Faaola ma tatalo i le Tama Faalelagi, o le a Ia tuu atu se tali e talafeagai mo oe.
Na aoao mai Peresitene Thomas S. Monson:
“O le lesona aupito sili e mafai ona tatou aoaoina i le olaga faaletino e faapea, a fetalai mai le Atua ma tatou usiusitai i ai, o le a tatou sa’o pea i taimi uma.”4
“A tatou tausia poloaiga, o le a fiafia atu o tatou olaga, faamalieina atili, ma faaitiitia le lavelave. O le a faigofie atu ona onosaia o tatou luitau ma faafitauli, ma o le a tatou maua faamanuiaga folafolaina [a le Atua].”5
Ina ua tofia a’u e avea o se epikopo, sa o le vaitaimi aupito faigata lea o lo’u olaga. Sa avea a’u o se tamā talavou i le faatoa 30 ma ona tupu o o’u tausaga, ae sa i ai ni o’u faafitauli tautupe ona o luitau o lo’u aiga. Na ou le mafai ona maua se ituaiga o fofo, ma sa ou manatu o le a le uma lava nei luitau. Sa matuai ou vaivai faaletupe ma faalelagona. Sa amata foi ona ou masalomia lo’u malosi faaleagaga. Sa o le taimi faigata lena na tuuina mai ai e lo’u peresitene o le siteki le valaauga ia te au. Ae sa ou taliaina lava le valaau, e ui ina sa faigata.
Sa faia foi se faatalanoaga a lo’u toalua ma le peresitene o le siteki, peitai sa le mafai ona ia fai atu ioe, ma e na te le’i fai atu foi e leai, ae sa na o le tagi lava. Sa tagi o ia mo le vaiaso atoa, ma fesili atu i le Tama Faalelagi, “Aisea lava i le taimi nei?” ma “E te silafia moni ea tagata taitoatasi?” Na te le’i maua se tali, ae sa lagolagoina au o se epikopo i le Aso Sa na sosoo ai. Sa le’i toe fesili atu o ia i le Tama Faalelagi i na fesili, ae lagolagoina au i lo’u valaauga mo le ono tausaga.
I le Aso Sa na faamaloloina ai au, sa faalogoina e lo’u toalua se leo ao ia tagofia le faamanatuga. Sa musumusu mai le leo ia te ia, “Ona sa faigata tele ona oulua savavali, na ou valaauina ai o ia o se epikopo ina ia mafai ona tapotapo oulua ma savali mo oulua.” O le toe tepa i tua i le ono tausaga ua mavae, na ia iloaina ai o le tele o luitau uma na foliga mai e le iu, ua uma nei ona foiaina i le aluga o le ala.
Na ma aoaoina e faapea, i taimi tatou te manatu ai e le o se taimi lelei lea mo i tatou e maua ai se valaauga, atonu o le taimi lea ua sili ona tatou manaomia ai lena valaauga. Soo se taimi lava e fesili mai ai le Alii ia i tatou e auauna atu i soo se valaauga, pe o se valaauga māmā pe faigata, o loo Ia silafia o tatou manaoga. Na te tuuina mai le malosi tatou te manaomia ma ua i ai ni faamanuiaga ua sauni e liligi mai i o tatou luga pe a tatou auauna atu ma le faamaoni.
E tele isi mea lea e faalavefau ia i tatou mai le tumau ai i le ala o feagaiga. E tusa lava po o le a, e le o tuai lava ona liliu atu o tatou loto i le Tama Faalelagi mo se fesoasoani. Na aoao mai Elder Paul V. Johnson ia i tatou: “A tatou mulimuli ia Satani, ua tatou tuu atu ia te ia le mana. Pe a tatou mulimuli i le Atua, Na te tuuina mai ia i tatou le mana.”6
Ua molimau mai le Tupu o Peniamina i le Tusi a Mamona: “Ou te manao ia outou manatunatu i le tulaga manuia ma le fiafia o i latou o ē e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata.”7
3. E Mafai Faapefea E Le Tausia o Feagaiga ma le Atua ona Faafiafiaina Oe?
Fai mai lo’u toalua o le ma faaipoipoga ua fusia faatasi ai ma’ua, ma ona o lena mea, ua mafai ai ona ia faia mea sa le’i mafai ona ia faia muamua. Mo se faataitaiga, talu mai lava lona laitiiti, sa faigata ia te ia ona alu i fafo i le pogisa, ae ua le toe faigata nei ona ou te alu faatasi ma ia. E puupuu o ia ma e le mafai ona ‘āu i fata maualuluga seiloga na te faaaogaina se nofoa po o se apefa’i, ae e mafai ona ou ‘āu i mea mai fata maualuluga mo ia ona ou te umi atu nai lo ia. E faapena le tauaveina o le amo a lo tatou Faaola i o tatou luga. A o tatou fusia faatasi i tatou lava ia te Ia, e mafai ona tatou faia mea e le mafai ona tatou faia na o i tatou, aua e mafai ona Ia faia mea e le mafai ona tatou faia mo i tatou lava.
Na saunoa Elder David A. Bednar: “O le osia ma le tausia o feagaiga paia e fusia faatasi ai i tatou ma le Alii o Iesu Keriso. O le mea moni lava, o loo augani mai le Faaola ia i tatou ina ia faalagolago atu ma tatou galulue faatasi ma Ia, e ui lava o a tatou taumafaiga silisili e le tutusa ma e le mafai ona faatusalia ia te Ia. A o tatou faalagolago atu ma toso faatasi a tatou avega ma Ia i le malaga o le olaga nei, e moni lava e avegofie Lana amo o Lana avega foi e māmā ia.”8
Na aoao mai foi Peresitene Nelson:
“O lou mulimuli o oe lava ia i le Faaola o lona uiga e te mauaina Lona mana faamalosiau ma togiola.”9
“O le taui mo le tausiga o feagaiga ma le Atua, o le mana faalelagi—mana e faamalolosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu.”10
“O le tausiga o feagaiga e faafaigofie moni ai le olaga! O tagata taitoatasi e osia feagaiga i vai papatiso ma i totonu o malumalu—ma tausi i ai—ua faateleina le avanoa e maua ai le mana o Iesu Keriso.”11
O’u uso e ma tuafafine pele, tou te mananao ia fiafia? Tumau i le ala o feagaiga. O le a faigofie atu, fiafia atu, ma faatumulia o outou olaga i le olioli. Ua valaaulia i tatou e lo tatou Faaola, “Ia outou o mai ia te au outou uma o e tigaina ma mafatia i avega o au foi e malolo ai outou.”12 O Ia o le Keriso soifua. Ua Ia tauavea a tatou avega ma faafaigofieina o tatou olaga. I le suafa o Iesu Keriso, amene.