Molimau Atu ia Iesu Keriso i le Upu ma Faatinoga
A o tatou taumafai e faaogatusa o tatou olaga ma le talalelei a Iesu Keriso, o a tatou amioga o le a avea ma se molimau ola o lo tatou Togiola.
I le papatisoga, o se tasi o folafolaga tatou te faia e faapea ua tatou loto e tauave i o tatou luga le suafa o Iesu Keriso. O lo’u faamoemoega i le asō o le faamanatu atu lea ia i tatou e mafai ona tatou faaali atu i le Atua ua tatou tauaveina i o tatou luga le suafa o Lona Alo e ala i le tuuina atu o le molimau i le upu ma galuega, ma i le tele e mafai ai, o Iesu o le Keriso.
A o auauna atu ma aoao atu tagata i Amerika ina ua mavae Lona Toetu, sa tautino atu e le Faaola:
“Latou te lei faitau ea i tusitusiga paia, ia ua fai mai e ao ina outou ave i o outou luga le suafa o Keriso, o lo‘u igoa lea? Ona o le igoa lea o le a valaau ai outou i le aso gataaga;
“Ma o soo se tasi na te ave i ona luga lo’u igoa, ma tumau seia oo i le iuga, o ia lava lea o le a faaolaina i le aso gataaga.”1
Na aoao mai i tatou e Peresitene Russell M. Nelson faapea “o le aveina o le suafa o le Faaola i o tatou luga e aofia ai le tautino atu ma le molimau atu i isi—e ala i a tatou amioga ma a tatou upu—o Iesu o le Keriso.”2
I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua tatou maua le faamanuiaga ma le avanoa e tutu atu ai o ni molimau a le Alii ma Lona suafa i soo se mea o tatou i ai.3 A o tatou taumafai e faaogatusa o tatou olaga ma le talalelei a Iesu Keriso, o a tatou amioga o le a avea ma se molimau ola o lo tatou Togiola ma Lona suafa. E le gata i lea, tatou te molimau atu ia Keriso i upu e ala i le faasoa atu i isi mea tatou te talitonu, lagona, pe ua iloa e uiga ia Iesu Keriso.
A tatou faasoa atu ma le lotomaualalo a tatou molimau i le Alii e ala i a tatou upu ma faatinoga, e faamautu e le Agaga Paia4 ia i latou e i ai le manatu moni, loto matala, ma mafaufau naunautai o Iesu o le Keriso moni lava.5
Ou te fia faasoa atu ni faataitaiga lata mai nei ma musuia o tagata o le ekalesia o e faaali atu i le Atua latou te tauaveina le suafa o Iesu Keriso i o latou luga e ala i le talanoa e uiga ia te Ia ma tuuina atu se molimau mama a’ia’i e uiga i le Alii i sauniga a le Ekalesia.
Faataitaiga muamua: Ina ua ma o atu ma lo’u toalua o Elaine i Sepania i le 2022, sa ma auai i sauniga o le Aso Sa i se iunite laitiiti o le Ekalesia iina. A o ou nofo i luga o le tulaga ae nofo lo’u toalua i le aofia, sa ou matauina lona nofo i talaane o se tamaitai matua. Ina ua uma le sauniga faamanatuga, sa ou savali atu ia Elaine ma fai atu ia te ia e faailoa atu a’u i lana uo fou. Sa ia faia ma faailoa mai o lenei tamaitai, e le o se tagata o le Ekalesia, sa asiasi mai i le Ekalesia pe ua tusa ma le lua tausaga. Ina ua ou faalogo i lena mea, sa ou fesili atu i lenei tamaitai e mata’u i le Atua, po o le a le mea na toe foi mai ai o ia ma auai i a matou sauniga mo se vaitaimi faaumiumi. Sa tali mai ma le alofa lea tamaitai, “Ou te fia sau iinei ona tou te talanoa e uiga ia Iesu Keriso i a outou sauniga.”
E manino lava, sa talanoa, aoao, ma molimau atu tagata o le Ekalesia i lena iunite i Sepania e uiga ia Keriso ia latou sauniga.
Faataitaiga lona lua: Ina ua uma ona auauna atu i le Eria o Pasila, sa ou maua se tofiga fou e auauna atu i le laumua o le Ekalesia. Ina ua matou siitia mai i le Aai o Sate Leki, i le faaiuga o Iulai o lenei tausaga, sa matou auai i sauniga o le Aso Sa i la matou uarota fou ma le matagofie. O se tasi o nei sauniga o se sauniga anapogi ma molimau. Ina ua uma ona taumamafa ma le migao i le faamanatuga, sa taitasi ma tutulai i luga tagata o le uarota ma tuuina atu ni molimau mai loto e uiga i le Faaola. Sa faatotonugalemu le sauniga ia Iesu Keriso, ma sa mafai ona matou lagonaina le Agaga. Sa faagaeetiaina i matou ma sa faamalolosia lo matou faatuatua. Afai sa i ai ni uo a le Ekalesia, na sailia ma le faamaoni le upumoni i lena sauniga, atonu na latou iloaina o le Ekalesia lenei a Iesu Keriso.
Oka se faamanuiaga i le vaaia o a tatou sauniga Lotu o ni avanoa filifilia mo i tatou e molimau atu ai ia Keriso ma faailoa atu i le Atua tatou te olioli i le tauaveina o le suafa o Lona Alo i o tatou luga.
Ia, sei ou ta’ua se faataitaiga mamana o le tauaveina i o tatou luga o le suafa o Iesu Keriso e ala i le molimau atu ia te Ia e ala i faatinoga.
Ia Aokuso talu ai, sa ma o ai ma Elder Jonathan Schmitt i le maimoaga o le Malumalu o Feather River Kalefonia i le Aai o Yuba. O iina, sa ou maua ai le faamanuiaga e taialaina vaega i se malaga maimoa i le malumalu. O se tasi o nei vaega na aofia ai se tagata o le Ekalesia, o Virgil Atkinson, ma ni uo se toafitu o isi faatuatuaga. I le taufaaiuiuga o le maimoaga, i se potu o faamauga i le malumalu, sa ootia ai Uso Atkinson a o ia faaalia lona alofa mo ana uo o e na o mai i le malumalu i lena aso. Toetoe lava ina ua uma ona ia faia lena mea, ae tula’i se tamaitai i le vaega ma fai mai, “Matou te alolofa uma ia Virgil. Na te lei faamalosia mai lona faatuatuaga ia i matou. Ae e le matamuli foi o ia e uiga i ai. E na ona soifua ai o ia i mea na te talitonu i ai.”
I le aluga o tausaga, o le soifuaga faaKeriso o Uso Atkinson sa avea o se molimau mamana i ana uo. O lana faataitaiga o se faamaoniga malosi ua ia tauaveina i ona lava luga le suafa o Keriso.
I le faaiuga, sei ou faasoa atu le lesona sa ou aoaoina e uiga i le ala e tauave ai i o tatou luga le suafa o Keriso ma molimau atu ia te Ia e ala i le faaaogaina o le igoa sa’o o le Ekalesia.
Na saunoa Peresitene Nelson, le perofeta soifua a le Atua, i se saunoaga o le konafesi aoao i le 2018 ua faaautuina “O Le Igoa Sa’o o le Ekalesia,” e faapea: “O se faasa’oga. O se poloaiga a le Alii. Sa le’i faaigoaina e Iosefa Samita le Ekalesia toefuataiina ia te ia; po o Mamona. O le Faaola lava Ia na fetalai, ‘Aua o le a faapea ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.’ [Mataupu Faavae ma Feagaiga 115:4].”6
Sa matou tuua uma le konafesi aoao i lena aso ma tautino atu ma le naunautai e mulimuli i le perofeta ma faaaoga le igoa ua faaalia mai o le Ekalesia mai lena taimi. Sa ou matuai vaavaai lava ia te a’u lava ia ia mautinoa sa ou faaaogaina le igoa sa’o o le Ekalesia. O nai taimi muamua lava sa tatau ona ou matua mataala ma aua nei faatagaina a’u lava e toe foi atu i auala tuai. Ina ua uma taumafaiga muamua, sa ou lagonaina le toafimalie atili e uiga i le faaaogaina o le igoa ua faaalia mai o le Ekalesia. Ou te tautino atu o le tele o taimi, e vave ona ou ta’ua le igoa o le Ekalesia. Sa ou lagona le popole ne‘i le gauai tagata i le igoa atoa o le Ekalesia, ma atonu latou te manatu e umi teisi atu.
Peitai, sa ou iloaina mulimuli ane o le tautala i le igoa atoa o le Ekalesia ma le faamoemoe na ou maua ai ni avanoa taua e tautala atu ai i le suafa o Iesu Keriso ma molimau moni atu ai i le Faaola e ala i le tautino atu o Lona suafa i le igoa o Lana Ekalesia. Sa ou matauina foi ina ua ou ta’ua le igoa sa’o o le Ekalesia i isi, sa ou manatua soo Iesu Keriso ma lagonaina Lana uunaiga i lo’u olaga.
E ala i le mulimuli i le perofeta, e mafai ai e i tatou uma ona aoao e molimau atili atu e uiga ia Iesu Keriso e ala i le faaaogaina o le igoa sa’o o le Ekalesia, ma tatou tauaveina ai atoatoa i o tatou luga le suafa o le Alii.
O lenei taeao o le Sapati, ou te molimau atu ai ma le fiafia o Peresitene Nelson o le perofeta soifua a le Atua ma o Le Ekalesia a Iesu Keriso o le Au Paia o Aso e Gata Ai o le Ekalesia toefuataiina a Keriso. Ou te molimau atu ma le lotomaualalo i le Alo o le Atua ma Lona paia. O Ia o le Ulumatua a le Atua ma le Alo e Toatasi na Fanaua, o lo tatou Faaola ma le Togiola, o le Emanuelu.7 I le suafa o Iesu Keriso, amene.