Tala Fou o le Ekalesia

Ua Auauna Atu Aposetolo ma Perofeta i Au Paia i le salafa o le Lalolagi

I le Aso o le Faamagaloga i le Lalolagi ia Iulai, sa faasoa atu ai e Peresitene Russell M. Nelson se savali o le faamagaloga i luga o ala o faasalalauga faaagafesootai. “O le faamagalo atu e le na o se faatinoga e tasi le taimi ae o se faagasologa faifai pea e manaomia ai le onosai, agaalofa, ma le malamalama,” na ia saunoa ai. “E le faigofie i taimi uma ona faamagalo i latou o e na faatiga ia te oe. E mafai ona e maua le malosi mai ia Iesu Keriso.”

Ua uunaia e Peresitene Dallin H. Oaks Fesoasoani Muamua i le Au Peresitene Sili, talavou matutua i le lalolagi atoa i se faigalotu i le aso 21 o Me e tausisia se vaaiga e faavavau a o latou folau ai i “taimi faigata” o aso nei.

“Po o a lava o tatou lava tulaga i eseesega o foafoaga a lo tatou Tama o i le Lagi, e alofa lava o Ia ia i tatou uma, ma o loo i ai se nofoaga o Lana fuafuaga atoatoa o le fiafia mo tagata uma, na saunoa ai Peresitene Oaks. “Tatou te faaalia lo tatou alolofa mo Ia e ala i le tausia o Ana poloaiga, e aofia ai ma le alolofa mo Ana fanau.”

Ua fautuaina e Peresitene Henry B. Eyring Fesoasoani Lua i le Au Peresitene Sili, le Au Paia o Aso e Gata Ai na auai i le faapaiaga o le Malumalu o Saratoga Springs Iuta i le aso 13 Aokuso e tali atu ma le faatuatua ma le malosi i le maota fou o le Alii.

O tagata o le Ekalesia “ua tuuina atu i ai lenei malumalu o se faailoga o le faatuatuaga o le Alii … ma Lona talitonuga o le a [latou] tali atu ma le faatuatua ma le malosi sili atu,” na saunoa ai Peresitene Eyring. “O lenei malumalu o le nofoaga lea e mafai ona e utuvai soo ai i mana o feagaiga o le malumalu. Na te silafia o outou loto. Na te silafia lou manao ina ia siitia ma avea ma se nuu e sili atu ona amiotonu—e pei lava ona atili fefinauai ma pau le lalolagi.

A o talanoa tagata o le ekalesia ma faasoa atu le savali o le Toefuataiga, o le a lagona e isi le moni o a latou upu, na saunoa ai Peresitene M. Russell Ballard, Sui Peresitene o le Korama a Aposetolo e Toasefululua. “O le mea aupito sili ona ofoofogia i le talafaasolopito o le lalolagi na tupu i le Vao Paia i le 1820,” na ia saunoa ai. “Sa matala mai le lagi.”

A o saunoa atu i tagata o le ekalesia ma faifeautalai i Toronto, Ontario, ia Aperila, sa tuuina atu ai e Peresitene Ballard le molimau e uiga i le valaauga faaperofeta o Iosefa Samita. “Masalo o se mea na tuia ai lona tagata—mai le palealii o lona ulu e oo atu i ona aao—ina ua ia faalogo ua ta’ua e lo tatou Tama Faalelagi lona suafa, ‘Iosefa, o Lo’u Atalii Pele lenei. Faalogo ia te Ia!’ [tagai i le Iosefa Samita — Talafaasolopito 1:17]. O le tatou savali lena,” sa ia ta’u atu ai i faifeautalai.

Ia Aperila, sa asiasi atu ai Elder Dieter F. Uchtdorf i Farani, Aikupito, ma Isaraelu. Sa auai o ia i sauniga faamanatuga i Aikupito, saunoa atu i tamaiti aoga i le Nofoaga Autu o le Iunivesite o Polika Iaga i Ierusalema, ma asiasi atu i nofoaga paia.

“O se lagona fiafia i talaatu o upu ua tuuina mai e le Alii ia te au e avea ma se tasi o Ona soo i lenei taimi,” na ia saunoa ai. “Ioe, e tatau ia i tatou uma ona avea ma soo, ma e tatau ona tatou ola e tusa ai ma feagaiga ua tatou osia.

“Ae ina ia i ai iinei ma molimau atu o se soo, e pei ona sa faia e Aposetolo i aso anamua, o se mea e faamafanafanaina ai lo’u loto ma siitia ai a’u i fola e lei mafaufauina. Ma faatasi ai ma se lagona maoae o le lotomaualalo, ou te lagona ua faatuatuaina au e le Alii e avea ma se molimau mo Ia ma Lona suafa. E maeu le olioli i le savali i le mea sa nonofo ma savavali ai o tatou uso a Aposetolo.”

Sa faapaiaina e Elder David A. Bednar le fale na toefuata’i o Iosefa ma Ema Samita i Katelani, Ohaio, i le aso 26 o Aokuso. Sa ta’u atu e Elder Bednar i se vaega pe tusa ma le 300 tagata, e aofia ai malo faaaloalogia o nuu ma taitai faalelotu: “O lenei fale e sili atu nai lo se fale e fausia o se mataaga o le talafaasolopito. O lenei fale o se fale moni lava o Iosefa ma Ema Samita—o le nofoaga sa la nonofo faatasi ai mo le vaitaimi aupito umi a o lei maliu Iosefa.”

Sa saunoa Elder Quentin L. Cook i le konafesi faaletausaga a le Iunivesite o Polika Iaga ia Aokuso. Sa ia matauina o tagata tomai faapitoa i le matua faalemafaufau ua fautuaina mai o le auauna atu i se misiona e maua ai se faagasologa o le faatagata matua mo le aoaoina lea e avea o se sauniuniga mo aoaoga maualuluga atu.

E silia ma le lua-vaetolu o tamaiti aoga o le BYU na auauna atu i ni misiona, na saunoa ai Elder Cook. “E faalagolago i le semesa, e silia ma le 21,000 faifeautalai ua maea misiona. Mafaufau i le malosi na tauaveina e nei tamaiti aoga BYU i le salafa o le lalolagi. O le taunuuga, mafaufau pe faapefea e o latou aafiaga i le misiona ona faamalosia le siosiomaga e aoao ai i lenei lotoa.”

I le taimi o se asiasiga i Niu Sila ma Ausetalia ia Me, sa valaaulia ai e Elder D. Todd Christofferson le Au Paia o Aso e Gata Ai i Niu Sila e sauniuni mo le faapaiaga o le Malumalu o Aukilani i le 2024 e ala i le paia atili ma le faaKeriso.

Sa ia valaaulia i latou e fesili ifo ia i latou lava, “O le a se mea e mafai ona ou faia o le a avea ai a’u ma se tagata e sili atu le paia, o se taulaga ma se meaalofa sili atu o a’u lava e tuuina atu i le Alii i lena aso o le faapaiaga?”

Sa molimau atu Elder Neil L. Andersen e uiga ia Iesu Keriso i le taimi o se tofiga ia Setema i Asia. “O o’u aafiaga o se Aposetolo a le Alii ua tuuina mai ai ia te au se molimau o Iesu o le Keriso ma o loo Ia taialaina Lana galuega i lenei lalolagi e ala i Lana perofeta ma e ala mai i Ana Aposetolo,” na ia saunoa ai. Sa i ai Elder Andersen i le Eria a le Ekalesia i Asia i Matu e feiloai ma auauna atu i le Au Paia o Aso e Gata Ai i Korea, Monokolia, ma Iapani.

I le aso 22 o Aperila, sa feiloai ai Elder Ronald A. Rasband ma le peresitene lagolago o Aferika i Saute, o Paul Mashatile, e lona lua i le peresitene o Aferika i Saute. Ua faailogaina i lenei mea le taimi muamua na feiloai ai se taitai o le Ekalesia ma se taitai faalemalo o lenei tulaga sinia i Aferika i Saute.

Sa tomanatu taitai i nisi o auala na fesoasoani ai le Ekalesia e tuumamaina mafatiaga o tagata ma faamalolosia tagata o Aferika i Saute, aofaiga i le R240 miliona (e silia ma le $13 miliona Amerika) le tele o le fesoasoani talu mai le 2018. O foai ua mai le toomaga mo faalavelave matautia e lagolago ai gaoioiga a le autalavou mo galuega, polokalama faifaatoaga o oloa, ma faalavefau e faatatau i itupa.

Fai mai Elder Rasband sa ia faamoemoe o nei taumafaiga na faaalia ai o le Ekalesia ua “i ai iinei mo le taimi umi. Ua tatou faia lenei mea e mulimuli ai i poloaiga sili e lua a le Alii: ia alolofa i le Atua ma alolofa i o tatou uso a tagata.”

I le taimi o se asiasiga ia Setema i Aisalani, Sikotilani, ma Egelani, sa faamamafa mai ai e Elder Gary E. Stevenson le manaomia o le Au Paia o Aso e Gata Ai ina ia “tasi le loto ma tasi le mafaufau” (Mose 7:18) ma “ola e faatotonugalemu ia Iesu Keriso,” i le faia o mea uma tatou te mafaia e mulimuli ai ia te Ia. Faatasi ai ma lona faletua, o Lesa, sa asiasi atu ai Elder Stevenson i Reykjavik, Aisalani, i le aso 7 o Setema a o lei agai atu i Edinburgh, Sikotilani, ma Northampton, Egelani, ia Setema 9–10.

I se faigalotu i le Nofoaga Autu o Marriott i le taimi o le Vaiaso o Aoga a le Iunivesite o Brigham Young i le aso 22 o Aokuso, na tuuina atu ai e Elder Dale G. Renlund se lauga loloto i le auala e galulue faatasi ai le matauga, mafuaaga, ma le faatuatua e faatautaia ai faaaliga. A na o i latou lava, o matauga, mafuaaga, ma le faatuatua e le faatuatuaina, na aoao mai ai Elder Renlund. E tatau ona galulue faatasi lenei tafatolu.

“O le faatuatua ‘e aunoa ma galuega’ [Iakopo 2:20] o le a le faalauteleina e ia lava. O le a tuputupu ae le faatuatua e ala i matauga ma mafaufauga, e o faatasi ma isi galuega faaleagaga. E le gata i lea, o matauga, mafuaaga, ma le faatuatua e tele lava ina manaomia e le gata i le mauaina o faaaliga faaletagata lava ia ae ia malamalama i lena faaaliga.”

I le aso 15 o Iuni, sa feiloai ai Elder Gerrit W. Gong ma Lana Afioga ia Sheik Osman Nuhu Sharubutu, o le National Chief Imam ma le Mufti Maoae o le Ripapelika o Kana. Sa faia le fonotaga i le maota o le Grand Mufti i Accra.

Sa faasoa atu e Elder Gong le ala e faataua ai e Le Ekalesia a Iesu Keriso o le Au Paia o Aso e Gata Ai o tatou uluai matua, o Atamu ma Eva, e pei foi o Musolemi: “O i matou foi, matou te talitonu tatou te o mai mai matua lava e tasi ma e tatau ona ola ia ogatusa o se aiga e tasi.” Na ta’ua e Elder Gong o loo taitaia i tatou e se perofeta a le Atua, o Peresitene Russell M. Nelson, o ana aoaoga e talitutusa ma aoaoga a le Imam. “Ua aoao i tatou e lo tatou perofeta ina ia faamuamua le Atua, ua ia aoao mai e tatau ia i tatou uma ona avea ma e faatupuina le filemu, ua ia aoao mai e tatau ona tatou fesoasoani i a tatou talavou ia aooga ma maua aoaoga faamasani ina ia mafai ona faamanuiaina i latou i le olaga, ma ua ia aoaoina i tatou ia faamanaina tamaitai ma la tatou tupulaga faiae. O mea uma nei ua ou faalogo i ai mai ia te outou i le asō.”

Sa faia e Elder Ulisses Soares se malaga e 10 aso i Chile, Iurukuei, ma Atenitina ia Iuni. O lona taimi i Atenitina na aofia ai se lauga i se konafesi a ekalesia soofaatasi, o se faatalanoaga ma se tusitala iloga a Atenitina, ma le auauna atu i tagata o le Ekalesia.

“O le filemu e amata i le faaaloalo mo le tulaga ese o tagata taitoatasi,” na ta’u atu ai e Elder Soares ia i latou na faapotopoto mo le Konekeresi a le Lalolagi o Talanoaga Interreligious ma Intercultural i Buenos Aires. “O le manatu faavae o le mamalu faaletagata e ono eseese mai lea aganuu i lea aganuu, ae e avea o se mea e faifai pea i se lalolagi maaleale ma fesuisuiai. O aia tatau a tagata e aveesea ai le le paleni o avanoa, tamaoaiga, ma avanoa. Ma o na aia tatau e tatau ona faaaogaina i le lalolagi atoa.”