“Ara Taura i nanon te Rereua,” Riaona, Tianuare 2024.
Ara Taura i nanon te Rereua
Naake a wawareware ni koaua n ana Boki Moomon, maiuakini reirei mai iai, ao n tataro ibukin koauana raoi a na bon namakina te Tamnei ae Raoiroi ao ni kakorakoraki riki aia onimaki, ma aia koaua iroun, te Tia Kamaiu.
Tamnein tarin Iareta ma atiibu aika a raneanea iroun Normandy Poulter
Ngke te kairake n ataeimwaane ngai, Iai au koaua n ana Boki Moomon. I namakina riki nanona ae onoti ni karakinan tarin Iareta ma ana botanaomata ngke a borau nakon te “aba ni berita” (Ita 2:9).
Ngke e kaaitara ae e na borau i nanon bwaati aika a rotongitong, e taetae tarin Iareta, “Nooria, O te Uea, ko kona ni kariaia bwa ti na riaon te ran ae korakora i nanon te roo?” N te kaeka, e taku te Uea, “Tera ae ko tangiria bwa N na karaoia bwa e aonga n ae e reke te oota i nanon ami kaibuke?” (Ita 2:22, 23).
E ataia tarin Iareta bwa e korakora man mwaaka te Uea. E ataia bwa te Uea bon ngaia otan bwaai nako. E ataia bwa te Uea e tua n taainako nakoia ana botanaomata bwa a na Weteia i nanon aia tai ni kainnano. Ngaia, are e kamwakura ana onimaki iroun te Uea, tarin Iareta ekatauraoi 16 atiibu aika a uarereke. Ko uringa are e a tia ni bubutia te Uea bwa e na riingi atiibu n tabonibaina, “bwa aonga n oota nako i nanon te roo” (Ita 3:4).
Tamnein te Uea ngke riingi atiibu aikanne e bon katika au iango ngke i moan wareka te rongorongo. I kona n noori bwaai aika riki n ae kangaa i a bon nooria ni koaua i matau. Eng tao ibukina bwa tamnein te rootongitong are mauna nako n te oota e bon rangi n taraa ni koaua irou.
Ngkana akea namakinan te Tamnei ae Raoiroi, ngkana I a manga raroanako ma Tamnein te Uea, I namakina te rootongitong. Ma ngkana I wareka ana Boki Moomon, e tabe n okirai te oota anne. Ana Boki Moomon e a tia n riki bwa te atiibu are riingaki iroun te Uea ao man takia otana. E a tia ni kaota kawaiu i nanon au tai ni mwananga n te maiu aei.
Te Oota ae Akea Tokina
Ai aroia naake a kairaki nako n bain te Uea n taai akekei n nako Amerika, Ti na bon bane ni kaaitara ma te rootongitong ao te angibuaka ae bati i nanon ara tai ni borauakina te aba ni berita ao te karietataaki. Ma te Uea e na karaoa nakoira te bwai are e a tia ni karaoia nakoia Iaretaite ao Nibwaite. E na bon kairiira ao man kaotai kawaira—ti ngkana ti ongeaba Irouna, kamwakura ara onimaki Irouna, ao ni bubuti Ana ibuobuoki.
E tua te Uea nakon Nibwaai, “N na riki naba bwa am taura i nanon te rereua; ao N na katauraoa te kawai imwaaimi, ngkana kam kaawakin au tua; mangaia ae, ngkana kam kaawakin au tua ao kam na kairaki nakon te aba ni berita; ao kam na ataia bwa kam kairaki irou” (1 Nibwaai 17:13).
E taetae te Uea nakon tarin Nibwaai ae Iakoba, “N na riki bwa te oota ae akea tokina, nakoia ake a ongo n au taeka”(2 Nibwaai 10:14).
“Ibukin te Tia Kamaiu, e anga ana kakoaua te burabeti ae Abinataai, “Boni ngaia ootan ao maiun te aonaaba; eng, ae te oota ae aki totoki, ae aki kona ni karooaki” (Motiaea 16:9).
I bon Irouna, te Tia Kamaiu e kakoauaa ae, “bon Ngaia te oota ao maiuin te aonaaba.” E reitia n taku, “Nooria Ngai te oota; I a tia ni katea te banna ni katooto ibukimi” (3 Nibwaai 9:18; 18:16).
Namakina te Oota
I tangira ara burabeti ae, Beretitenti Russell M. Nelson. I karekei kakabwaia ngkai I mwakuri irarikina. Ngkana e mwananga i nanon te ruu, e waekoa n namakinaki te kantaninga riki ma te kukurei. E uouota Ootan Kristo ma ngaia.
Ootan Kristo e bon Koaua. Bon “te korakora ae roko mai karawa, te mwaaka, ke te kairoro are e roko mairoun te Atua rinanon Kristo ao n anga te oota ao te maiu nakon bwaai ni kabane.” Bon te bwai n tangira n tamnei are kona ni kairiia natin te Atua nakon te Tamnei ae Raoiroi ao ana euangkerio Iesu Kristo.1 Warekan ana Boki Moomon e bon kakorakoraa te Oota anne.
N tabetai ti tangiria ni manga iangoa aron maiura ngkoa ao n uringa bwa ti kangaa n tia ni buokaki i nanon mwananga. Ngkai ti tanrikaaki, ti kona ni manga namakina riki ana kairoro te Tia Kamaiu. E taekinaki ni koroboki aika tabu, “Uringnga, uringnga” (Ereman 5:12), I taku bwa a tuangira, “Tai ti uringa bwa tera ae ko a tia n ataia ke n namakinna ngkoa, ma, namakina riki te ota anne”
Ibukin tabeua, namakinan te ota n te maiu n tamnei e bon bebete n roko. Irouia Tabemwaang, karekean te ota n te maiu n tamnei e kona n rang ni kangaanga namakinana ibukin taian ikakorakora i bon irouia ke katikan nanoia ni bwain te aonaaba. Ma ngkana ti kakaonimaki, e na roko iroura te ota—n taai ke n aanga ae ti aki kaantaningaia.
Beretitenti Nelson, ereireiniira bwa ti na “tataromwaaka ao ni kamatebwaia ana Boki Moomon ni katoa bong,”2 e tibwauai tabeua kawai man ana Boki Moomon ni kona ni kaniira riki ma te Tia Kamaiu ao ni buokiira n namakina te ota man te euangkerio, kaotaira n koaua man te euangkerio, ao n maiuakini reirei man te euangkerio.
Ngkai ti wawareka ana Boki Moomon, e taku Beretitenti Nelson, ara atatai i aon, ao ara kakaitau ibukin, ana Mwakuri ni Kamaiu Iesu Kristo e na bon rikirake.
Ti na namakina nanora ni kanmanga “bungiraki kaua” (Motiaea 27:25) ngkai te boki aei e buokiira ni karekea te bitaki inanora (taraa Motiaea 5:2).
Ngkai ti wareware ao ni kamatebwaia taian reirei ibukin ikoikotakiia tibun Iteraera man ana Boki Moomon, e na roko namakin ao te nano iroura ni kan ukeriia ara mate ao ni karaoi otenanti ibukin kamaiuakiia ao te karietataakiia i nanon te tembora.
Ti na kona n namakina te ota ngkana ti karekei ni kabane kaekaan ara titiraki, kairiiri nakon ara babaire, ao te korakora n rairannano ao n tei ni kaitara te buakaka.
Ao ngkana ti wareki koaua aika a kuneaki n ana Boki Moomon, ti na bon namakina te kamarurungaki, mwengaraoi, kaokan bwaai, te tokanikai, te korakora, te rau n nano, ao te kukurei n tamneira.3
“O ngkanne, tiaki bwa e koaua aio?” E taetae Aramwa ni kaineti ma rikiraken, bwebweraken te koraa, wanawana, ao te koaua. “I kangai nakoimi, Eng, ibukina bwa e oota; ao te bwai ae e oota, e raoiroi, ibukina bwa ko kona n ataia, ngaia are ko na riai n ataia bwa e raoiroi” (Aramwa 32:35).
Tamnein Kristo, iroun Heinrich Hofmann
Kunean te Tia Kamaiu i nanon te rootongitong
Ngke 10 ana ririki n maiu raoraou ae Kamryn, e bon reke irouna aorakin te mata are e eweka atain matana are n te angatai.4 I nanon ana tai, ngkana e a rooroko te maraki ae korakora ni matana ao n aki kona n reke angan buokana, e bon aki kona ni karekea te oota n ana taratara Kamryn. A raraoma, ana karo bwa irouia tao e na mataki, a karooa wintoon ana tabo ni matu ni kataia bwa e aonga ni mwengaraoi. Tinan Kamryn, ae Janna, e uringa:
“Tao aua te namwakaina i mwiin bwakana n aoraki, I nakonako i nanon ana ruu are rootongitong. Ngkai i tabe n tataraia, ao i noora Kamryn bwa e bon wene ao ni kauangii i aon ana kainiwene. E bon rang rootaki n te maraki n te aro are eaki kona ni kakamwakuri ke n tang ngke e ongo ae I a rin irarikina. E bon wene ma matana aika a tibutaua n aki ure.
“I katorobubua i rarikin ana kainiwene, n anaa baina, ao n koonna teniua te tai—ara kanikinaa ni karaba ibukin atongan ae ‘I tangiriko.’ N taainako ao e na riai ni kabooa n te kanikinaa ae na koona baiu aua te tai n taekana ‘I rang tangiriko riki,’ ma e aki te roko ni kaeka. E e bon rangi ni korakora te maraki irouna. Ma ranin matau aika a waanako i aon tabau, I noora natiu-are 10-ana-ririki ni maiu kanga tein ae e mwanuunu i nanon te booro. E uruaki nanou.”
Janna e tataro ni kainabaabu inanona.
“I tuanga Tamau are i karawa bwa I ataia ae E ataa riki ae tamaroa ibukina, ao I tataro, Taiaoka ma buokia.’ Ngke I tekateka ao n tataro, te namakin ae abuee ao te kabebeteaki e mena i aou. I namakina te kabebeteaki ngke e roko n au iango ae te Tia Kamaiu Iesu Kristo: ‘Bon ngaia te oota. I kunea Ngaia i nanon te rootongitong.’”
E eutarake atuuna Janna ao ni wirikirikina taningan Kamryn. “Ko riai n ukera te Tia Kamaiu i nanon te rootongitong.”
I mwiin anne, e matuunako Kamryn i nanon ana tai n ongoongora katangitang ao anene man booki aika tabu i aon te Church library app.
Ngke e a tabe n reke te oota ni matana, Kamryn e kunea te Tia Kamaiu i nanon te rootongitong.
Raweaki te tamnei ni katauraoaki ibukin ana utu Kamryn
E okioki aorakin Kamryn aio n te tai ae mwaiti, ao ngkana e korakai ibukin karekean te oota n ana taratara, Janna ao kainabana, Darrin, a kataia ni kamwengaraoia ao ni manga katekei taian burangketi i aon wintoon ana ruu ni matu. I nanon taai ni kammaraki aikanne, e taku Kamryn, “I kunea te Tia Kamaiu i nanon te rootongitong.”5
Ngkana e roko iroum “te rootongitong ao te rawawata n te rereua” (1 Nibwaai 8:4), ti bon bae n tangiria n ukera te Tia Kamaiu i nanon te rootongitong. I kakoauaa bwa ana Boki Moomon, ma taan kakoaua “ae Iesu bon te Kristo, te Atua ae Akea Tokina,”6 e na bon kairiira Nakoina. I ataia ni koaua bwa naake a wawareware ni koaua n ana Boki Moomon, maiuakini reirei mai iai, ao n tataro ibukin karekean uaana aika a raraoi a na bon namakina te Tamnei ae Raoiroi ao ni kakorakoraki riki aia onimaki, ma aia koaua iroun, te Tia Kamaiu.
Ti na kaotii nanora ni kakaitau ibukin “te kabanea n eti” n boki7 man wawarekana, kawakinna, ao man kabongana ibukin kakorakoraan ara onimaki ma aia onimaki ake tabemwaang ni Kaota iai Aonaaba.