Nakomai, Iriirai

Iteraniba ni Kabwarabwaran Ana Boki Moomon

N Riki bwa te Tia Kakoaua

Mary Whitmer ao Moronaai, iroun Robert Pack

N te Tiburing n tain bwebweraken aroka n 1829, Mary ao Peter Whitmer a butimwaea Iotebwa Timiti ao Emma Timiti ao Oliver Cowdery nakon mweengaia bwa e aonga ni bobonga aron rairan bwaatua buraati. E rangi ni korakora ana tai Mary ni bekutata. E tararuaia ruaman aomata n mweengana ao n ikotaki ma natina aika a tia n iein ake a maeka ni uakaan ma mweengaia.

Natin Mary mwaane n ikotaki ma (ake) ai natina mwaane a reke bwa taan kakoaua i aon bwaatua koora n Tuun te ririki 1829. N te namakaina naba anne, Mary e karekea iai oin ana koaua.

I tinanikun mwengana, te mwaane ae iaia-irana ma ana baeki i aon angana e kawara Mary ao e taku, “Arau Moronaai. Ko rang n taraa ni kua man rakan am mwakuri ni kabane ake ko kakaraoi.” E karuoa ana baeki are iaon angana, e reitinako Moronaai n taetae, “Ko a bon tia n rangi ni kakaonimaki ao ni botumwaaka i nanon am beku nako. E bon riai, bwa, ko na karekea te kakoaua i nanom bwa e aonga ni kakorakoraaki riki am onimaki.” I mwiina ao E a kaoti kanoan ana baeki—bwaatua koora.¹

E riki Mary bwa te tia kakoaua ibukin bwaatua koora, ai aroia taan Kakoaua ake Teniman ao ake Waniman, are e oti aia kakoaua n te iteraniba n atuun ana Boki Moomon. Ana botumwaaka ao ana tataonakinnano Mary e bon katauraoia bwa te tia kakoaua raoi ni koaua. E aki koreaki ana kakoaua i nanon te iteraniba ni kabwarabwaran ana Boki Moomon, ao akea naba arana ni koreaki iaon atiibu, bwaai ni kauring, ke e roko n aia iango Aika Itiaki ake a roko mwiina n te Ekaretia. E ngae ngke ana mwakuri korakora i nanon mweengana ao n ana utu aki rangi n ataaki irouia aika mwaiti, ma bon ti te Atua ae ataia.

E reirei Unimwaane Dieter F. Uchtdorf man te Kooram Abotoro n te Tengaun ma Uoman:

“E motiki taekara te Uea n ae tiaki n ai aron ara motikitaeka. E kukurei irouia tooro aika a etieti ni mwamwakuri, ma tiaki ma aika a bon tatabe ibukiia.

“Naake a bwaina te nanorinano i nanon bongin maiuia a na bon toka i aoia bau n uea aika mimitong i mwiina.”²

Ana rekooti Moronaai a rairaki ngkai i nanon ana Boki Moomon, ao ti kona ni karekea te kakoaua ibukin koauana ni kaineti ma ana berita Moronaai are e katikua n te kabane n iteraniba: “ I kaungai nanomi bwa kam na butiia te Atua, te Tama ae akea Tokina, n aran Kristo, e na bon kaota te koaua nakoimi, ni mwaakan te Tamnei ae Raoiroi” (Moronaai 10:4).

Ko a tia n namakina ae a korakora rawawatam ma am kekeiaki aki mwutiakinaki? Tamara are i Karawa e kinako, ao E ataai bwaai aika tamaroa ae ko karaoi. Ngkai ko tabe ni kekeiaki ni karaoa ae raoiroi (taraa Mwakuri 10:38), ni beku n aki iangoa tanoatam, ao n ukori booki aika tabu, te Tamnei ae Raoiroi e kona n anganiko te kamatoa ibukin koauan te euangkerio.

Waaki ni Kakukurei

Antai ae e a tia n riki bwa “Mary Whitmer” ni maium? Antai te aomata ae e a tia n anganiko bwaai aika a mwaiti ae a rangi ni bongana nakoim, e ngae ngke aki nooria aomata? Iangoia ao ni korea am kakaitau n te mwakuri ae rangi ni uaana aio ma mwakuri riki tabeua ni kaota te kakaitau.

Natiia Mary ao Peter Whitmer te Ikawai.

Christian Whitmer	Jacob Whitmer	John Whitmer	David Whitmer	Catherine Whitmer (Page)	Peter Whitmer	Elizabeth Ann Whitmer (Cowdery)
Temanna mai ibuakoia Taan Kakoaua ake Waniman	Temanna mai ibuakoia Taan Kakoaua ake Waniman	Temanna mai ibuakoia Taan Kakoaua ake Waniman	Temanna mai ibuakoia Taan Kakoaua ake Teniman	Mareaki ma Hiram Page, temanna mai ibuakoia Taan Kakoaua ake Waniman	Temanna mai ibuakoia Taan Kakoaua ake Waniman	E mareaki ma Oliver Cowdery, temanna mai ibuakoia Taan Kakoaua ake Teniman

Bwaai aika a na taraaki

1. Taraa Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 70–71.

2. Dieter F. Uchtdorf, “Lift Where You Stand,” Riaona, Nobembwa 2008, 55.