“Kunean ae Ko Bwanin rinanon Iesu Kristo,” Riaona, Tianuare. 2024.
Rikirake ni Kara ma te Kakaonimaki
Kunean ae Ko Bwanin rinanon Iesu Kristo
Man karekean te maiu n inaomata, taai aika reke, ao neweabakin bwaai aika a roko ngkai akea katabeau irouia au utu, bukin tera I aki namakina te kukurei? Tera te bwai ae bua?
Kamataata n te tamnei iroun Dilleen Marsh
A baro ranin matau ngkai I tataro ibukin te rau ngke natiu te mwaane e kanoa ana booma ibukin nakona ni mitinare. I rang tangiria bwa e na nako ni mitinare. Anne ae I tangiria. I kataia n kakoaua raoi aei i nanou.
I tangira au Tia Kamaiu ao n tangira natiu bwa e na reke ana tai n tibwa te kimwareirei are ti kunea rinanon Iesu Kristo. Ma au namakin inanou I rangi ni maaku ngkana e na kitanai natiu. I ataia bwa e na bon aki okira raoi mwengana ngkana e oki man ana mition. E ngae ngkana e maeka ni mweengara, e na bon tiaki aron are mai imwaaina.
A tuangai raoraou bwa n te roro are a otinako ni kitana iai mweengara natira anne e bon rang tamaroa. Ngai ao kainnabau ti bon rangi n ingainga nakon inaomatara ao te tai are ti aki karekea i nanon aratai ngke ti kaikawaiia natira.
Man kuneakin te inaomatai ae boou aei, I a moanna n irekereke ma kakaraoan waaki ni kakukurei aika a mwaiti. I mwamwananga ma kainnabau, reiakina aron katangan te aokan ibukin weteakiu, takakaro ma tibura, ao ni karaoi mwakuri n te tembora ao rongorongon te utu.
I kunea bwa e rangi ni kaunga ao man kakukurei. I kunea bwa I tabe ni karekea te rikirake. I kunei bwaai aika a rang tamaroa.
Ma eng iai te bwai ae e aki toki ni bua mairou. Iai te bwai ae I tuai man roko iai. Ngke e kitanai natiu te mwaane, e uotanako nanou ae bwanin n te aro bwa I aki kona ni manga kanoaia.
Tabeua te ririki i mwiin kitanau iroun natiu te mwaane, e a reke irou te aoraki ae te kakai unuun kanga aroia natiu ngke a uarereke. E taraai kainnabau man taku, “Michelle, ko riai ni beku.” I anga arau ibukin taian beku aika mwaawa.
E teimatoa n tuai toki, te kakaii are i nanou. E a kanganga irou ae n a kabane nanou nakon au beku ke waaki riki ake a tei imwaaiu. Man akeaia natiu ni kabane, I namakinna bwa maiu are mai imwaaina e na bon aki bwanin.
N te tairiki teuana ngke I tataro ibukin buokau, e tuangai te Tamnei bwa I a rinanon ngkai te maroaa ae roko man te bwai ae bua—buan te kaantaninga. I taku i nanou bwa I a tia ni kakea te nanokaawaki anne man karaoan waaki ni kakukurei i nanon maiu.
Ukoukora te Kaeka
Ngke I tabe ni kakaea te kaeka nakon au kangaanga, I a kunea teuana te mwakoro n taeka n Rongorongon te Burabeti Iotebwa Timiti: “Ngkana ti kabuaa [te bwai ke raora] aika a mamate nanora iaoia a na kona n riki bwa bwaai ni kauring nakoira. … Ara namakin ni kabane a riai ni mena i aon te Atua ao ana mwakuri ao tiaki i aon ara bwai ke raora aika a tangiraki.”1
Te oota ae bakarere e kamaunanakoa te nangiroo are mena i nanou. I kataia ni kaona te mwaawa n rawawata are inanou ni bwaai, waaki ni kakukurei, ao taneiai— ni beku, tatangira, ao ni kaoti au taarena. Ni bwaai ni kabane aika raraoi, ma a bon aki kaona te mwaawa ake inanou. Aki kamaoa te ikuaki n aron are I kantaningaia.
I ataia bwa te aeka n rau ao ni karau nano anne e bon ti reke rinanon ara Tia Kamaiu, Iesu Kristo. E reirei Iesu, “Boni ngai te kawai, ao te koaua, ao te maiu” (Ioane 14:6). Bon tii mai Irouna ae ti kona iai ni karekea te kimwareirei ao namakinan ae ko bwaninin ao te rau ma te torabaki n nano. Taian Areru 16:11 e taku, “Ane ko na kaota nako iu te kawai ni kamaiu: bon iai te kimwareirei ae bati i matau.”
I Kanga ni Bitaki
E kangaanga ni bitaki te maiu n te tai ae waekoa. E aki kamaoaki nanou n te tai ae waekoa. Ma I ataia bwa e na mena iia ae I kabotoa au taratara iaona bwa e angoa ni mwakuri.
I a bita mwanewen au tataro. I moanna man butian Tamau are i Karawa bwa e na buokai ni kakorakora au reitaki ma au Tia Kamaiu. Ngkana e roko irou te bwara n nano, I kauringai ae Iesu Kristo e mena irarikiu n taainako, ao rinanon mwaakan Ana akoi ni kamaiu, E na bon buokai. Au kamatebwai ni booki aika tabu e a rikirake ni boboto riki n au reitaki ma Ngaia. E anaa te tai, ma I aki toki ni kabotoa au namakin, korakorau, ao au kaantaninga nakon Iesu Kristo.
Ngkai I karaoa aei, te nangiroo are e korakora e na tabe ni mauna. I kunea te ungannano ni karaoan mwakuri n ibuobuoki aika a uarereke ao ni bwaina te tangira ni katoa bong. Te Oota ao te kaantaninga e kaota kawaiu ao ni kaona are e mwaawa i nanou. Karimoaan moa te Tia Kamaiu e anganai te namakin ae nano n te kimwareirei nakon waakin nako maiu, man te beku ni kabanean te tai ma au utu, man mwanangau nakon karikirakean au taarena. A nakoraoi bwaai ni kabane ngkana Iesu bon boton bwaai ni kabane.
Aia borau aomata ni kabane ibukin karekean te bitaki ni maiuia e bon rang n onoti. E nage n anne, te kaeka nakon rawawatara bon ti man kaekaan ana wewete Kristo are E kangai, “Kawarai ma nanoiami ni kabane, ao N na katoka [aorakimi]” (3 Nibwaai 18:32). Bon tii mai Irouna are ti kona iai ni karekea te kamarurungaki ni koaua, te rau, te tangira, ao te kimwareirei.
E maeka te tia korokaraki i Utah, USA.