Ara anga Karea ae Tamaroa

Iroun Dean Cooper, Washington, D.C., USA

Ngkana e katabuaki te tembora, ao aio te bwai ae ti tataekinna nakon te Uea, “Aikai ara karea. Ao e rang tamaroa riki ngkana ti bon kakaraoia.”

E nakon uoua te wiiki i mwain manga katabuan riki kaua te Washington D.C. Tembora n Aokati 2022, ngai ma au bwaoti ti nooria bwa teuana mai ibuakon aroka ae te European hornbeam ake a kaitaraa te tembora e taraa ni mamate. E a rang mareare nuukana ao ni mangaongao mwaangana.

Ngkai I mwakuri bwa te tia tararuaa tinanikun te tembora, ao e korakora au raraoma bwa aroka ni kabane itinanikun te tembora a bon rang tamaroa ma bon n te tabo are e tei iai te aroka aio e bon tarabuaka. Te aroka aei e tei raoi ni uakaan ma te mataroa n rin n te tembora.

Iai aroka aika maiureirei ao ni kona n onea mwiin te aroka aei aika bon mena ikai, ao n iangoia bwa ti nang kaibibita te aroka are taraa riki ni maiureirei arei nakon are e a kaan mate. Ma ti riai moa ni kamwainga te tabo n nakonako ae irarikina ao taura ma uteute ao mwiina te iti are biri rinanon te aono. I rangi ni maaku bwa N na kouta te aroka are e a kaan mate arei, ao n unika te aroka teuana bwa onean mwiina, ao riki e a bon aki reke te tai ibukin manga karaoan te katamaroa nako iai bwa e a kaan te tai ibukin katabuan te tembora.

Ngke I a kaongoa kainabau ae, Carolyn, are ti nang riai ni kouta te aroka, ao e tuangai: bwa N na ti korei ni kaboraoi mwaanga ake a mangaongao ni kataraaraoia, ao N na kaongoiia naba tariu ni kamatebwaian booki aika tabu n taabo nako bwa a na tataro ibukina. Bon ana bwai te Uea Tinanikun te Tembora. E bon kakabwaia te aroka aei.”

Iai raoraon nako Carolyn are e araraniia bwa tarina ni kamatebwaian koroboki aika tabu—membwa n te Ekaretia aika a maeka i nanon teuana te uoote. A uaia ni kamatebwaia Nakomai, Iriirai ni karokoa e bane, ao ni manga kakaei riki aia taobiki. Ngkana iai ae kainnanoa buokana n te tataro, ao a kaongoiia raoia ake tabemwaang n te tareboon.

Ngke Carolyn e kaongoiia taekan te aroka are e a kaan mate, ao a manga kabuta te rongorongo nakoia natiia ao nakoia utu tabeua. E aki ataia Carolyn bwa mwaitira aika a tataro ibukin te aroka, ma iai ana onimaki iroun Tamara are i Karawa e kona n ongo aia tataro.

I nanon ti iraua te bong, ao a riki tabeua baan te aroka aika boou, ao ni kaona te tabo are e mareare. “E koaua ae e a taraa n tamaroa riki,” e taku Carolyn. E rawea tamnein te aroka ao n kanakoa nakoia tarina ni kamatebwai booki aika tabu, ao n tuangiia, “Noora bwa e kanga te Uea ni kaekai ara tataro!”

I ataia bwa a tataro aomata ibukin te aroka, ngaia are I aki kubanako n te bwai ae riki. I ataia naba bwa ae e nang kakabwaia te tembora ao aontano Beretitenti Russell M. Nelson i nanon ana tataro ni kakabwaia. E na bon Marurung te aroka.

Ti rangi ni kakaitau bwa e karinei ara karea ma a ara onimaki te Uea.