Etin Raoi te Rain n Taetae n te Mitiin

Iroun Raúl Fabrizio García, Baja California, Mexico

I aki raoi oota bwa bukin tera te bwairati are e bua kawaina e aki waekoa n reitaki nakoira.

te waanikiba ae uarereke ma te taua ni kataetai wanikiba mai buki

Teuana te bwakantaai inanon au tai ni mwakuri ni kataneiai n te tabo n taui mwiin kibakiba n ana marae ni waanikiba Tijuana, Mexico, ngai ma au tia reireinai aron te mwakuri ti kaai n nooria bwa te bubu n nang e a kaona nanon te marae ni waanikiba ao mwakoron te kaawa ae bubura. Te itiaki n te taratara, n aron anne, e bon rinanon te kainibaire ni kariaia wanikibwa ni kona n ruo ao ni kibanako.

N te tai ae aki maan, ao tia noora te waanikiba ae te Cessna 172 ni kaoti iaon ara ureitaa, ao n roko mai maiakin mataniwin te aba, ao ni kiba ni kaineti ma te tua ni kibakiba (VFR). Iaan te VFR, a riai bwairati ni kaota aia tabo ake a mena iai bwa a nooraki mai nano irouia taan taua mwiia.

Ma, te bwairati aio e bon aki noora kawaina ribuakon te mabubu. E kiba ao n katobibia mataniwin te aba, e kataia ni kakaea te marae ni waanikiba are e na titiku iai, ma tao e a bon rang buakaka ana taratara n te mabubu. I titirakina au tia reireinai aron te mwakuri bwa tera ae ti na karaoia bwa ti na kona ni buoka iai te bwairati aei.

“E riai n katoma rainin ana bwai n taetae ma ara taua n tau mwiin kibakiba bwa e aonga ni kona n reitaki ma ngaira,” e kaeka. “Ngkana e aki karaoia, ao akea te bwai ae ti kona n karaoia ibukina.”

I aki raoi oota bwa bukin tera te bwairati are e bua kawaina e aki waekoa n reitaki nakoira. Tao iai ana kangaanga n ana reerio? Ke tao e bon bwaati arona n otinako man te kangaanga i bon irouna?

E a nako te miniti. Tokin te tai, ao te bwairati aei e a toma ana reerio ma ara tabo ni mwakuri. E bubuti buokana, Ma te bwanaa ae raraomwa. Ti waekoa n tuangnga kawaina are e na kairia ni karokoa n te marae ni waanikiba. Te bwai ae na karaoia e na bon ti onimakin taian kaetieti ake ti anganna ao bwaai ni mwakuri ake i aon ana waanikiba.

Ngke ti noora te waanikiba ae e a tabe n otinako man te mabubu tabeua te miniti imwiina ao ruo rikaaki ao ni mano raoi e bon anganiira te kimwareirei ae aki kona ni kabwarabwaraaki.

I aon kawaiu n okira mweengau, I karaurau n iangoia i nanou te reirei ae e a tia ni karekea te bwairati aei. Ngke reitaki nakoira iaon te rain ae eti e bon karekea te buoka mairoura ao n roko n te aba nakon ae tiku ni katobibi i aan karawa—kee tao e nang uotia riki nakon te kangaanga ae bati.

Ai aron te bwairati aio, E na roko te tai are N na bua iai “ribuakon te rootongitong” (1 Nibwaai 8:23). Ngkana I kainnanoa ana kairi te Atua, E teimatoa n tataninga bwanaau.

Kanga ai aron are ngke I noora te waanikiba ae bua iaon te ureitaa, Tamara are i Karawa e noorira ao noori ara kangaanga ni kabane. I kakataitau bwa E teimatoa ni kairiirai. E katauraoi kawai n ibuobuoki rinanon te tataro, koroboki aika tabu, ara burabeti aika maiu, ao ana bwaintiuaraoi are te Tamnei ae Raoiroi. E na kairiira n tokanikai i aon kangaanga n te maiu n rabwata ao te maiu n tamnei ti ngkana ti katoma ara reerio ma te rain ae eti, bubutia bwa e na kairiko, ao n ongo nakon bwanaana.