“Kaubwaiu aika moan te Korakora”, Riaona, Tianuare 2024.
Bwanaaia Aika Itiaki ni Boong aika Kaitira
Kaubwaiu aika moan te Korakora
Te baka n riki bwa Aika Itiaki ni Boong aika Kaitira e kaira temanna te mwaane nakon te bwabetito ao ni karekea te maiu ae boou n ana euangkerio Iesu Kristo.
Kamataata n te tamnei iroun Ben Simonsen
Au mwakuri ae te tia kuuka bon ngaia maiu. I mwamwananga nakon taabo aika a kakaokoro ao ni kuuka n taian utero aika a tamaroa ao i aon kaibuke ni bwatintia. I a tia ni kaina teuana te tiim ae kaainaki irouia taan kuuka aika a tia n tokanikai n te kauaaba n te kuuka n te aonaaba.
N te taina, ao I a kiitana mweengau inanon te maan ae teniua te ririki. E aki toki n tatarebooniai tinau ma ranin matana ao n tuangai bwa N nang oki.
Te bong teuana i Milan, Italy, te tabo are I karekea te kaonturaeki bwa N na kuuka n te outero, I kaitiboo ma mitinare ni kawain te turein. A tuangai taekan ana Ekaretia Iesu Kristo ibukiia Aika Itiaki ni Boong aika Kaitira ao n tibwauai tabeua reirei man te euangkerio. I bon rangi n unga n te bwai are a reirei i aona riki ibukin te utu.
A anganai kaobiin ana Boki Moomon mitinare ao n tuangai bwa N na tataro ibukina. A anganai naba te boki ae uaraoi ae kanoana bon te kaetieti i aon aron karaoan te tataro.
I okirikaaki nakon au utero, ao n nakon au ruu, n tataro, ao ni moana au wareware. Mwaitin au tai ni wareka ana Boki Moomon, bon buburan naba nanou ni kan wawaware iai. Te kananokawaki, au mwakuri ae ngaia e katei raroaai ma kaitiboou ma mitinare. Ngke e a bane au kaonturaeki man te utero, I oki nakon mweengau i Bari, ao ni manga reitaanko au mwakuri ae te kuuka n te utero teuana.
N te taina n ana tabo n amwarake te utero, te tia kuuka temanna, e tangiria, ni kan iraorao ma taian touati n te utero. E bon rangi n un ibukina bwa aine ake touati, ake bom kain ana Ekaretia Iesu Kristo ibukia Aika Itiaki ni Boong aika Kaitira, a bon aki kariaia bwa a na iri nako mangaia ni kukurei.
I uringia mitinare are I kaitiboo ma ngaiia i Milan, ao I taetae nakon te tia kuuka arei bwa aine ake touati iai inaomataia n aki kariaia.
“Ngaia, ngkoe naba kain te Moomon ke” e kaeka.
Ibukina bwa I rang n tatangiri moan tuan reirei ake I reireiaki mairouia mitinare ao ibukina naba bwa e bon eti te bwai ae I tei iai ibukiia aine ake touati n te utero, ngaia are I a kaeka, “Eng.”
N te tai are i mwiina ngke te tia kuuka e kaitibo ma aine ake touati , ao e a tuangiia ae ngai naba kain ana Ekaretia Iesu Kristo ibukia Aika Itiaki ni Boong aika Kaitira. A bon rangi ni kukurei. Ngke ti a ikotaki bwa ti nang katawanou, a moanna n nako aia titiraki ibukin te Ekaretia i Milan. I karakina nakoia rongorongon te kaawa ae bubura are i kaitiboo iai ma mitinare. Ngke e a roko kanara, I a keerake naba ao n anaa te kiraati ni wain iaon te taibora.
“Tera ae ko karaoia ngkai ko nang mooi wain?” e titiraki temanna te touati.
“Auu iai naba te kaairua n anne?” I kaeka.
“Ko bon koaua bwa ko kakaonimaki” e a manga titiraki are temanna.
“Ni kanga iai?” I kaeka.
“Aekakira tein oneam n te bong are ko nang bwabetitoaki iai?” a titiraki.
“I aki kona n uringa,” I kaekaia. “Ai tibwa teuana au namwakaina n te tai anne.”
A bon rangi n un irou bwa irouia i bwainingareia. Ma I tuangiia bwa I aki. I a kaotia nakoia ae tiaki ngai kain te Ekaretia, ao n tuangiia bwa I rang tatangira ana Boki Moomon ao taian reirei n te euangkerio ake I a tia n reiakin. I mwiina ao I a titirakiniia bwa N na kanga n reiakina riki ae mwaiti man aia Ekaretia.
A waekoa touati aikai n reitaki ma mitinare ibukiu. A rangi n aki kakoaua ae ngke e bane naba ngkekei au reirei ao I a bon bwabetitooaki naba.
Tamnein te Utu man ana kariaia te tia koro karaki
I karekea te bitaki, n au bwabetito. I reiakinna bwa ko bon aki kona ni katuka waem teuana ni bwain aon te aba ao teuana n te euangkerio. I reiakinna bwa te mwakuri bon tiaki raoi te bwai ae rangi ni bongana n te maiu aei. I reiakinna bwa e riai ni moanibwai moa au Uea ao au utu. Ao kabaneana, I a mataata raoi n te nanokawaki are e a tia n namakinna tinau ngke akea ngai irarikina, ao ni bubutia kabwaraakin au bure.
I a toki man te mwamwananga nako aba nako, I mare n te Bern Switzerland Tembora, moana barongaan au utu, ao n mwakuri bwa te tia kuuka ngai n te onaoraki n au tabo, ni kabongana au tarena ni buokiia aoraki bwa a na marurung. Ao ngkai I a katabeaki bwa N nang tarai bwaai n kabane are a kainnanoaki man te onaoraki. Te Mwakuri n oin am tabo e karekea au tai ae kakawaki ma au utu ao te wewete n te Ekaretia.
Man te tai are I nako iai n te tembora bwa N na karaoa au entaumente uoua te ririki imwiin bwabetitooakiu, e bwaka nanou n tamaroan ao mimitongin te tembora ao te mwakuri i nanona. Ngke e motirawa tamau aua te ririki imwiina, I bon rootaki n te rawawata. Bon ngaia te banna are I iriiria. I karabwarabwa nakon ana euangkerio Iesu Kristo, bwa I ataia e bon mena irarikiu.
Ngke I a rin n te kabanea n rietaata n ruu n te tembora i mwiin karaoan te mwakuri ibukin tamau, I namakinna bwa e koonai ao n iinga ma ngai. N te aoa anne, I ataia bwa e a tia ni butimwaea tamau te euangkerio ao rin i nanon ana tangira ara Uea are e a tia ni katauaraoia ibukia Natina.
Ngiara kain Ana Ekaretia Iesu Kristo Ibukia Aka Itiaki ni Boong aika Kaitira ti kakabwaiaki bwa ti karekea te euangkerio ae koaua. I kakaitau bwa e tia n ibitaki maiu. Te euangkerio bon te tabo are I kunea iai te kukurei. Te euangkerio ao au utu bon ngaiia kaubwaiu aika moan te Korakora.