ʻAokosi
Ko hoku Sinó ko ha Temipale ia ʻo e ʻOtuá
Hiva: “The Lord Gave Me a Temple”
(THF, 153)
“ ʻIkai ʻoku mou ʻilo ko e fale tapu ʻo e ʻOtuá ʻa kimoutolu, pea ʻoku nofoʻia ʻa kimoutolu ʻe he Laumālie ʻo e ʻOtuá? … Ko e faletapu ʻo e ʻOtuá ʻoku māʻoniʻoni, pea ko e faletapu ko iá ʻa kimoutolu” (1 Kolinitō 3:16–17).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻa e ngaahi founga ke ʻiloʻi ai ʻa e tokāteliné ʻe he fānaú pea tokoni ke mahino ia pea nau moʻuiʻaki foki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: Ko hoku sinó ko ha temipale.
Fakamahinoʻi ʻa e tokāteliné: Kimuʻa pea kamata ʻa e houalotu Palaimelí, hiki ʻa e kupuʻi lea ko ʻení “Ko e fale tapu ʻo e ʻOtuá ʻa kimoutolu” (1 Kolinitō 3:16) ʻi he palakipoé. Fakaʻaliʻali ki he fānaú ʻa e ngaahi tā ʻo ha ngaahi temipale, pea fehuʻi kiate kinautolu pe ko e hā ʻokú ne ʻai ke makehe ange ai ha temipale (ko e fale ia ʻo e ʻEikí, ʻoku maʻa, tokangaʻi lelei pea ko ha feituʻu ia ʻe lava ke hāʻele mai ki ai ʻa e Laumālie Māʻoniʻoní). Hiki ʻenau ngaahi talí ʻi he palakipoé. Fakamatalaʻi ange ko hotau sinó, ʻoku hangē ko ha ngaahi temipalé, ʻoku toputapu pea ʻoku fie maʻu ke tau fakaʻapaʻapaʻi ia pea pehē ki he niʻihi kehé.
Fakamālohia ʻa e mahinó pea moʻuiʻaki: Hiki ha tatau ʻo e fakatātā ʻi he peesi 47 ʻo e tohi lēsoni ʻa e nesilií, Vakai Ki Hoʻomou Fānaú Īkí. Kosi ʻa e ngaahi foʻi fuopotopoto ʻi he fakatātaá, pea faʻo kinautolu ki ha ʻaiʻanga meʻa. Kole ki ha taha ʻo e fānaú ke ne fili ha taha ʻo e ngaahi fuopotopotó. Fehuʻi ki he fānaú pe ʻoku fakamanatu fēfē kiate kinautolu ʻe he fakatātaá ʻa e founga ke nau tokangaʻi ʻaki honau sinó ʻo hangē pe ko e ngaahi temipalé. ʻOange ki he fānau takitaha ha tatau ʻo e fakatātaá, pea fakaafeʻi ke nau valivali ia. Fakaafeʻi ʻa e fānau lalahi angé ke nau tohi ʻi lalo ʻi he fuopotopoto takitaha ʻa e meʻa te nau fai ʻi he uiké ni ke tauhi ai honau ngaahi sinó ke hangē ko e ngaahi temipalé. Fakaafeʻi ʻa e fānaú ke nau ō mo ʻenau ngaahi fakatātaá ki honau ʻapí ke akoʻiʻaki honau ngaahi fāmilí ʻa e founga te nau lava ʻo tokangaʻi honau sinó ʻo hangē ko e ngaahi temipalé.
Poupouʻi ke nau moʻui ʻaki: Fakaʻaliʻali ha tatau ʻo e “Ko Hoku Ngaahi Tuʻunga Mahuʻinga ʻi he Ongoongoleleí.” Kole ki he fānaú ke fakamahino pe ko e fē e tuʻunga mahuʻinga ʻi he ongoongoleleí ʻokú ne akoʻi kinautolu ki he founga hono tauhi honau sinó ʻo hangē ko e ngaahi temipalé. Fakaafeʻi ʻa e fānaú ke nau tafoki ki he tokotaha honau tafaʻakí pea vahevahe ange ha founga ʻe taha te nau tokangaʻi ai honau sinó ʻo hangē ha temipalé. Hili iá pea kole ange ke nau fakakaukauʻi ha founga ʻe taha ʻe lava ke nau toe fakalakalaka ange ai. Fakaafeʻi ha niʻihi ʻo e fānaú ke vahevahe ʻenau ngaahi fakakaukaú mo e tokotaha kotoa pē.
Te u tokangaʻi ʻa hoku sinó
ʻOku maʻu atu ʻa e pousitaá mo e tohi lēsoni ʻa e nesilií ʻi he sharingtime.lds.org
Uike 2: ʻOku fakahaaʻi ʻe he teuteu maaú ʻa e fakaʻapaʻapa ki he Tamai Hēvaní pea mo kita pē foki.
Fakamahinoʻi ʻa e tokāteliné: Kole ki he fānaú ke nau huke ki he 1 Kolinitō 3:16 pea lau leʻo lahi fakataha ʻa e folofolá. Talaange ki he fānaú ko e taha ʻo e founga ki hono tokangaʻi hotau sinó ʻo hangē ko e ngaahi temipalé ko e teunga tāú. Fakaʻaliʻali ʻa e “Ko Hoku Ngaahi Tuʻunga Mahuʻinga ʻi he Ongoongoleleí,” pea ʻai ʻa e fānaú ke nau lau leʻo lahi ʻa e tuʻunga mahuʻinga ʻa ia ʻoku pehē, “Te u teunga taau ke fakahaaʻi ʻaki ʻeku fakaʻapaʻapa ki he Tamai Hēvani pea mo au foki.”
Poupouʻi e maʻu ʻa e mahinó: Aleaʻi pē ko e hā ʻa e ʻuhinga ʻo e teunga tāú (vakai ki he konga ʻo e “Teunga mo e Fōtungá ʻi he Ki Hono Fakamālohia ʻo e Toʻu tupú). Teuteu ha ngaahi pousitā ʻe niʻihi pea tohiʻi ʻi ʻolunga “Te u teunga taau ʻaki ʻeku …”. Vahevahe ʻa e fānaú ki he ngaahi kulupu, pea kole ki he kulupu takitaha ke nau tohiʻi mai ʻenau tukupā ke vala taau pe tā ha fakatātā ʻo kinautolu ʻi heʻenau teunga taau ʻi he taha ʻo e ngaahi pousitaá. Fakaʻaliʻali ʻa e ngaahi pousitaá ʻi he loki ʻo e Palaimelí.
Uike 3: ʻOku fakahaaʻi ʻe he moʻui ʻaki e Lea ʻo e Potó ʻa e fakaʻapaʻapa ki hoku sinó.
Poupouʻi e maʻu ʻa e mahinó: Hiki ʻi he tafaʻaki ʻe taha ʻo e palakipoé ʻa e “Ko e Ngaahi Fekaú” pea mo e potufolofola ko ʻení: T&F 89:7–9, 12, 14, 16. ʻI he tafaʻaki ʻe tahá, hiki ai ʻa e “Ko e ngaahi Palōmesi” pea mo e potufolofola ko ʻení: T&F 89:18–21. Tuku ki he konga ʻo e fānaú ke nau lau ʻa e konga ʻuluaki ʻo e potufolofolá pea kumi e ngaahi fekau ʻa e ʻEiki ʻa ia kuó Ne tuku mai ʻi he Lea ʻo e Potó. ʻAi e toenga ʻo e fānaú ke nau lau ʻa e toenga ʻo e potufolofolá pea kumi ki he ngaahi tāpuaki kuó Ne palōmesi maí ʻo kapau te tau talangofua. Aleaʻi ʻa e ʻuhinga ʻo e ngaahi fekaú pea mo e ngaahi tāpuakí.
Poupouʻi ʻa e moʻui ʻakí: Fakaafeʻi ha taha ʻo e fānaú ke lea ʻo pehē, “Te u moʻui ʻaki ʻa e Lea ʻo e Poto ʻi heʻeku ” pea fakafonu ʻa e konga ʻoku ʻataá ʻaki ʻa e meʻa ʻe fai ʻe he tamasiʻi pe taʻahiné ke ne lava ʻo moʻui ʻaki ʻa e Lea ʻo e Potó. Hili iá pea fakaafeʻi ʻa e tokotaha kehe ke ne toe lau ʻa e kupuʻi leá pea mo e meʻa naʻe fai ʻe he tokotaha ʻi muʻa aí pea tānaki atu ki ai mo haʻane tali. Kole ki he tokotaha fika tolú ke ne toe lau e kupuʻi leá pea mo e tali ʻa e ongo tamaiki ki muʻá pea tānaki atu mo ha tali kehe. Toe fai pehē pē ʻo fakatatau ki he taimi ʻoku fakangofuá pea toe tānaki atu ai pē ʻe he fānau takitaha haʻane tali.
|
Ko e Lea ʻo e Potó | |
|---|---|
|
Ngaahi Fekaú |
Ngaahi Palōmesí |
Uike 4: Ko e Laukongá, mamatá mo e fakafanongo ki he ngaahi meʻa kotoa ʻokú ne tauhi ʻa hoku ʻatamaí ke maʻá.
Fakamahinoʻi ʻa e tokāteliné: Fakaʻaliʻali ki he fānaú ha ongo ipu sioʻata ʻe ua, ko e vai ʻuli ʻi he tahá pea vai maʻa ʻi he ipu ʻe tahá. ʻEke ki he fānaú pe ko e fē te nau fie inu aí pea ko e hā hono ʻuhingá. Talaange ki he fānaú ʻoku hangē pē hotau ʻatamaí ko e ipu sioʻatá, pea ʻoku totonu ke tau ʻai pē ki ai ʻa e meʻa ʻoku maʻá pea mo e ngaahi meʻa leleí. Hiki ʻa e sētesi ko ʻení ʻi he palakipoé, pea tuku ki he fānaú ke nau lea fakataha mo koe: “Laukonga, mamatá mo e fakafanongo ki he ngaahi meʻa kotoa ʻokú ne tauhi hoku ʻatamaí ke maʻa.” Fakakaukauʻi ke akoʻi ʻa e fānaú ʻi he kiʻi fakatātā faingofua ʻaki honau nimá ke tokoni ke nau manatuʻi ʻa e foʻi sētesí. Hangē ko ʻení, ki he foʻi lea ko e laukonga, ʻai ho nimá ke hangē ʻokú ke puke ha tohí; ki he foʻi lea mamata, tuhu ki ho matá; ki he fakafanongó, ʻai ho nimá ʻo tāpuniʻi ho telingá; pea ki he ʻatamai tuhu ki ho foʻi laʻé. Toutou lau ʻa e foʻi sētesí kae fetongi ʻe he fakatātaá ʻa e ngaahi leá.
Fakamālohia ʻa e mahinó: Fakaʻaliʻali ki he fānaú ha fakatātā ʻo Sīsū Kalaisi mo e fānau īkí, pea kole kiate kinautolu ke nau sio ki ai ʻi ha kiʻi sekoni. ʻUfiʻufiʻi leva ʻa e fakatātaá pea kole ange ki he fānaú ke nau talaatu ha ngaahi meʻa ʻoku nau manatuʻi fekauʻaki mo ia. Tokoniʻi ʻa e fānaú ke mahino kiate kinautolu ʻoku tau manatuʻi ʻa e ngaahi meʻa ʻoku tau mamata ki aí. Fakamatalaʻi ange ko e taimi ʻoku tau fakafonu ai hotau ʻatamaí ʻaki ʻa e ngaahi meʻa leleí ʻoku tau toe fakakaukau ai ki ha ngaahi meʻa lelei. Toe fakaʻaliʻali ʻa e fakatātaá, pea tuku ki he fānaú ke nau hivaʻi ʻa e “ ʻOku Ongo ʻa e ʻOfá” (THF, 42–43). Kole ki he fānaú ke nau vahevahe ʻa e ongo ʻoku nau maʻu mei he foʻi hivá. Fakamatalaʻi ange ko e fanongo ko ia ki he ngaahi mūsika leleí ʻokú ne tokoniʻi kitautolu ke tau ongoʻi ʻa e Laumālié pea tauhi hotau ʻatamaí ke maʻa.
ʻOku toe ako lelei ange ʻa e fānaú ʻi he lahi ko ia ʻa e ngaahi founga fakafaiako ʻoku ngāue ʻakí. Hangē ko ʻení ʻi he uike 4, ʻoku fakapapauʻi ʻe he fānaú ʻa e tokāteliné ʻaki ʻenau vakai ki he lēsoni fakataumuʻá pea fakalotolahiʻi leva ke nau ngāue ʻaki ʻa e ngaahi fakatātā faingofua ʻaki honau nimá ke tokoni ke nau manatuʻi.