Fēpueli

ʻOku akoʻi mai ʻe he ngaahi Folofolá ʻa e Palani ʻa e Tamai Hēvaní

Hiva: “Te u muimui he Palani ʻa e ʻOtuá”

(THF, 86–87)

“He vakai, ko ʻeku ngāué ʻeni mo hoku nāunau—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻa e ngaahi founga ke ʻiloʻi ai ʻa e tokāteliné ʻe he fānaú pea tokoni ke mahino ia pea nau moʻuiʻaki foki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”

Uike 1: ʻOku ʻi ai ha palani ʻa e Tamai Hēvaní maʻaku.

Fakamahinoʻi ʻa e tokāteliné: Fakaʻaliʻali ki he fānaú ha fakatātā ʻo ha fale. Fakamatalaʻi ange ʻoku fie maʻu ʻe he kau tufungá ke ʻuluaki ʻi ai ha palani ʻo e falé kimuʻa pea nau toki lava ʻo langa ha fale. Fehuʻi ange, “Ko e hā ʻoku mahuʻinga ai ke tau faʻu pea muimui ki he ngaahi palaní?” Puke hake ʻa e ngaahi folofolá, pea talaange ki he fānaú te tau lava ʻo maʻu ʻi he ngaahi folofolá e palani ʻa e Tamai Hēvaní maʻatautolú. Hiki ʻi he palakipoé, “ ʻOku ʻi ai e palani ʻa e Tamai Hēvaní maʻaku” Lau fakataha ʻa e sētesi.

Poupouʻi e maʻu ʻa e mahinó: Tohiʻi ʻa e ngaahi fehuʻi ko ʻení ʻi he palakipoé.

Ko hai au?
Naʻá ku haʻú mei fē?
Ko e hā e ʻuhinga ʻoku ou ʻi heni aí?
Ko e hā e meʻa ʻe hoko kiate au hili ʻeku maté?

ʻOange ki he fānaú takitaha ha kiʻi laʻipepa kuo hiki ai ha taha ʻo e ngaahi foʻilea ko ʻení: ko hai, ko e fē, ko e hā hono ʻuhingá pē ko e hā. Lau fakataha ʻa e ʻuluaki fehuʻi ʻi he palakipoé, pea kole ki he fānaú kotoa ʻoku nau puke ʻa e foʻi lea ko hai ke nau tuʻu hake. Hivaʻi ‘a e “Fānau au ‘a e ‘Otua” (THF, 2–3), pea fehuʻi ki he fānau ʻoku tuʻú pē ʻe anga fēfē ʻenau tali ʻa e fehuʻí. Toutou fai pē ʻa e fehuʻi takitaha kae ngāue ʻaki ʻa e ngaahi hiva ko ʻení: ko e fē: “I Lived in Heaven” (Liahona, ʻEpeleli, 1999, 5); Ko e hā hono ʻuhingá: “Te u Muimui he Palani ʻa e ʻOtuá” (THF, 86–87); Ko e hā ʻa e ʻuhinga: “Naʻe Toetuʻu Nai ʻa Sīsū?” (THF, 45). Fakamoʻoni ʻe ʻomai ʻe he palani ʻo e Tamai Hēvaní ʻa e fiefiá kiate kitautolu.

Uike 2: Naʻe ngaohi ʻe Sīsū Kalaisi ʻa e māmaní maʻaku.

Poupouʻi e maʻu ʻa e mahinó: Laku tavale ʻo e ngaahi fakakaukau ki he ngaahi meʻa ʻoku pehē ʻe he fānaú ʻoku ʻikai ke maau kiate kinautolú, hangē ko e haʻi ʻo e suú pe ko e teuteu ki he mohé. Fakamatalaʻi ange ʻoku tau ako ʻi he folofolá naʻe ngaohi ʻe Sīsū ʻa e māmaní ʻi he tuʻutuʻuni pau. Vahevahe ʻa e fānaú ki he ngaahi kulupu ʻe ono pea ʻoange ki he kulupu takitaha ha potufolofola ʻokú ne fakamatalaʻi ʻa e Fakatupu ʻo e ʻaho takitaha (vakai Mōsese 2). Kole ange ki he kulupu takitaha ke nau tā fakatātaaʻi ʻa ʻenau ʻaho ko iá. ʻAi ke nau fakaʻaliʻali ʻenau ngaahi fakatātaá ki he fānau kehé pea talaange ʻa e meʻa naʻe ngaohi ʻi he ʻaho ko iá. Fakaafeʻi ʻa e fānaú ke nau fokotuʻutuʻu ʻa e ngaahi fakatātaá ki honau hokohoko totonú ʻi he palakipoé.

Poupouʻi ke nau moʻui ʻaki: Fehuʻi ange ki he fānau, “Ko e hā ha meʻa ʻe taha naʻe ngaohi ʻe Sīsū ʻoku mahuʻinga kiate koe?” ʻOange ki he fānau takitaha ha meʻi tou māsima (vakai IUMF, 203, ki ha founga hono ngaohi ʻo e tou māsimá). Tuku ki he fānaú ke nau ngāue ʻaki ʻa e toú ke ngaohi ʻaki ʻa e faʻahinga meʻa ʻoku mahuʻinga kiate kinautolú. (Kapau ʻoku ʻikai ke maʻu ha tou māsima, ʻe lava pē ke tā ʻe he fānaú ʻa e fakatātā ʻo e meʻa ko iá.) Tuku ki he fānaú ke nau vahevahe ʻi heʻenau kulupu he kalasí ʻa e meʻa ne nau ngaohí pe tā fakatātaaʻi pea ko e hā hono mahuʻinga kiate kinautolú. Hiva ʻa e “My Heavenly Father Loves Me” (THF, 228–29).

Uike 3: Ko e ngaahi fāmilí ʻa e uho ʻo e palani ʻa e Tamai Hēvaní.

Fakamahinoʻi ʻa e tokāteliné: Hiki ʻa e meʻa ko ʻení ʻi he palakipoé: “Ko e ngaahi fāmilí ʻa e uho ʻo e palani ʻa e Tamai Hēvaní.” Aleaʻi pē ko e hā ʻa e ʻuhinga ʻo e sētesi ko ʻení. Tāmateʻi ʻa e sētesí. Lea ʻaki ʻa e ongo ʻuluaki foʻi leá, pea kole ki he fānaú ke nau angimui atu. Peá ke lea ʻaki leva ʻa e ʻuluaki foʻi lea ʻe faá, pea kole ki he fānaú ke nau toe angimui atu pē. Hokohoko atu pē kae ʻoua kuo lava ʻe he fānaú ʻo angimui kotoa ki he foʻi sētesí.

Poupouʻi e maʻu ʻa e mahino: Tomuʻa kole ki ha niʻihi ʻo e fānaú ke nau fakafofongaʻi ha ngaahi fāmili mei he folofolá. ʻOange ha fanga kiʻi tokoni ʻo kau ki he fāmili takitaha (hangē ko ʻení, ʻAtama mo ʻIvi: “Ko homau fāmilí ʻa e ʻuluaki fāmili ʻi he māmaní”; ʻĒpalahame mo Sela: “Naʻá ma fuʻu toulekeleka peá ma toki maʻu ha fānau” pea mo Līhai mo Sēlai: “Naʻa mau kolosi ʻi he tahí ke mau aʻu ai ki he fonua ʻo e talaʻofá”), pea ʻoange ʻa e fanga kiʻi tokoní ki he fānaú. Kapau ʻe lava pea ʻoange mo ha fanga kiʻi teunga faiva maʻamaʻa pē. Kole ange ki he fānau ʻoku nau fakafofongaʻi ʻa e ngaahi fāmili mei he folofolá ke nau haʻu fakakulupu ki muʻa. Tuku ke nau lau ʻenau fanga kiʻi tokoní pea kole ange ki he fānau Palaimeli kehé ke nau mateʻi atu pē ko hai ʻoku nau fakafofongaʻí. Hili hono ʻiloʻi ʻo e fāmili takitaha, fakahā ange leva ki he fānaú pē ko e fē ʻi he folofolá te ke lava ʻo ako ai fekauʻaki mo e fāmili ko iá. Talaange ki he fānaú ʻa e founga naʻe muimui ai ʻa e fāmili takitaha ki he palani ʻa e Tamai Hēvaní maʻanautolú.

A woman leader standing with two children dressed in Biblical costumes in Primary sharing time.

Poupouʻi ke nau moʻui ʻaki: Kole ange ki he fānaú ke nau fakakaukau ki ha faʻahinga lelei ʻoku maʻu ʻe honau fāmilí. Fakaafeʻi kinautolu ke nau vahevahe fakakulupu pe ki he kotoa ʻo e Palaimelí ʻa e ngaahi lelei ko iá.

Uike 4 : Te u muimui ki he palani ʻa e ʻOtuá.

Poupouʻi e maʻu ʻa e mahinó: Fakaʻaliʻali ha fanga kiʻi foʻi piini pe fanga kiʻi maka iiki pea mo ha foʻi ngeʻesi hina kuo fakapipiki ki ai ha fakatātā ʻo ha fofonga malimali. Talaange ki he fānaú ʻoku ʻomai ʻe he palani ʻa e Tamai Hēvaní ʻa e tauʻatāina ke tau fili ʻa e leleí pe koví. Fakamatalaʻi ange ʻoku tataki kitautolu ʻe he ngaahi fili leleí ki he tauʻatāiná mo e fiefiá, ka ʻoku tataki kitautolu ʻe he ngaahi fili koví ki he pōpulá mo e loto mamahí (vakai, 2 Nīfai 2:27). Fehuʻi ki he fānaú, “Ko e hā ʻa e ngaahi fekau ʻokú ke tauhi ʻi hoʻo muimui ki he palani ʻa e ʻOtuá”, ʻOange ha foʻi piini ki he fānau takitaha ne nau tali ʻa e fehuʻí. Hiki ʻenau ngaahi talí he palakipoé. Fehuʻi ki he fānau takitaha ʻoku ʻi ai ha foʻi piini ke ne vahevahe atu pē ʻoku anga fēfē hono tataki ia ki he fiefiá ʻe heʻene tauhi ʻa e fekau kuó ne talamaí. Tuku leva ki he fānaú ke ne faʻo ʻene foʻi pīní ki he foʻi hiná. Fakamoʻoni kapau te tau fili ke muimui ki he palani ʻa e ʻOtuá ʻe fonu fiefia ʻetau moʻuí.

2016 Outline for Sharing Time/Children's Sacrament Meeting Program — Te u muimui ʻi he palani ʻa e ʻOtuá ʻaki:

Poupouʻi ke nau moʻui ʻaki: Teuteuʻi ha laʻi pepa lahi maʻá e kalasi takitaha ʻi ha fōtunga ʻo ha fuka. Tohi ʻi he fuka takitaha “Te u muimui ki he palani ʻa e ʻOtua ʻaki …” Fakamatalaʻi ʻoku hanga ʻe he palani ʻa e Tamai Hēvaní ʻo ʻomai kiate kitautolu ʻa e tauʻatāina ke fili ki he leleí pe koví, pea ʻoku mahuʻinga ʻetau fili ʻi he ʻaho kotoa peé ki heʻetau fiefiá. Tuku ki he fānaú ke nau ngāue fakakalasi ke nau tā valivali pe tohi ʻi heʻenau fuká ʻa e ngaahi meʻa te nau lava ʻo fai ke muimui ai ki he palani ʻa e Tamai Hēvaní, pea fakaafeʻi kinautolu ke fakamoʻoni honau hingoá. Fehuʻi ki he kalasi takitaha ke vahevahe ʻa e meʻa ne nau tā valivali pe tohi ʻi heʻenau fuká. Tuku ki he fānaú ke nau laka takai ʻi he lokí lolotonga ʻoku nau toʻo ʻenau fuká mo hiva “Te u Lototoʻa” (THF, 85). Fakaʻaliʻali ʻa e ngaahi fuká ʻi he loki Palaimelí.

Children standing in a line at the front of the Primary room. Some of them are holding banners. — Tukutaha e ivi ʻo e fanaú ke nau ngaungaue feʻunga pē ke nau kei kau longomoʻui mai.