Sepitema

ʻE Malangaʻaki ʻa e Ongoongoleleí ʻi he Māmaní Kotoa

“ ʻE malanga ʻaki ʻa e ongoongoleleí ni ki he puleʻanga kotoa pē, mo e faʻahinga, mo e lea, mo e kakai” (T&F 133:37).

Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻa e ngaahi founga ke ʻiloʻi ai ʻa e tokāteliné ʻe he fānaú pea tokoni ke mahino ia pea nau moʻuiʻaki foki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”

Uike 1: ʻOku akoʻi mai ʻe he folofolá ʻe malanga ʻaki ʻa e ongoongolelei ki māmani kotoa.

Fakamahinoʻi ʻa e tokāteliné: Fakaafeʻi ha taha ʻo e fānau lalahi angé ke lau leʻo lahi ʻa e Tokāteline mo e Ngaahi Fuakava 133:37. Talaange ki he fānaú ʻoku malanga ʻaki ʻe he kau faifekaú ʻa e ongoongoleleí ʻi he ngaahi feituʻu lahi ʻo e māmaní pea ʻi ha ngaahi lea kehekehe. ʻAi e fānaú ke nau toe lau fakataha ʻa e potufolofolá.

Poupouʻi e maʻu ʻa e mahinó: Fakaʻaliʻali ki he fānaú ha mape ʻo māmaní pe tā ha kiʻi mape faingofua ʻi he palakipoé. Kole ke nau vahevahe mai ha ngaahi feituʻu ʻoku nau ʻiloʻi naʻe ngāue fakafaifekau ki ai ha kakai ʻoku nau ʻiloʻi. Fakaʻilongaʻi ʻa e ngaahi feituʻu ko ʻení ʻi he mapé. Fakaafeʻi ʻa e fānaú ke nau vahevahe mai pē ko e fē ʻa e feituʻu te nau fie ngāue fakafaifekau ki aí, pea ʻai ke nau fakaʻilongaʻi ʻa e ngaahi feituʻu ko iá ʻi he mapé. Fakamatalaʻi ange ko e ngaahi uiuiʻí ʻoku haʻu ia mei he ʻEikí ʻo fakafou mai ʻi he palōfitá pea ʻoku ngāue ʻa e kau faifekau ko iá ki he feituʻu pē ʻoku ui ki ai ʻe he ʻEikí. Tokoniʻi ʻa e fānaú ke nau ako lea ʻaki ʻa e hingoa ʻo e Siasí ʻi ha ngaahi lea fakafonua kehekehe. Aleaʻi mo e fānaú ʻoku ʻi ai e ngaahi feituʻu ʻoku teʻeki ke fakangofua ʻa e kau faifekaú ke nau aʻu ki ai ʻo malanga. Fakamatalaʻi ange ne kole mai ʻa Palesiteni Tōmasi S. Monisoni ke tau “ke mou lotua ke fakaava mai e ngaahi feituʻu ko ʻení, ke tau lava ʻo vahevahe atu kiate kinautolu ʻa e fiefia ʻo e Ongoongoleleí. (ʻi he Conference Report, Oct. 2008, 4; pe Liahona, Nōvema 2008, 6).

Tā fakatātā: ʻE malava pē ke tā, paaki, pe ʻomai mei ʻapi ʻa e mapé ʻi he uike 1. Kapau te ke palani ke tā ʻi he palakipoé, toutou ʻahiʻahi tā ʻa e fakatātaá kimuʻa. ʻOua te ke kole fakamolemole koeʻuhí ko e ʻikai ʻi ai hao taukei fakaʻaatí. ʻI hoʻo kole fakamolemolé ʻe ʻalu leva ʻenau tokangá ki he natula hoʻo tā valivalí. Kapau ʻokú ke faingataʻaʻia he tā valivali, kole tokoni ki ha taha. (vakai IUMF, 199–200).

Poupouʻi ke nau moʻui ʻaki: Fakaafeʻi ʻa e fānaú ke nau fai tohi ki ha faifekau ʻi homou uōtí pe ko e kau faifekau ʻoku nau ngāue ʻi homou feituʻú. ʻAve ʻa e ngaahi tohí ki he taki ngāue fakafaifekau homou uōtí ke ne ʻave ki he kau faifekaú.

ʻI he ʻekitivitī ko ʻení, ko e niʻihi pē ʻo e fānaú ʻoku fie maʻu ke nau omi ki muʻa ʻi he lokí. Ke fakangofua ki he fānaú ke nau kau kotoa maí, fakaafeʻi kinautolu ke nau fanafana ki he tokotaha honau tafaʻakí pe ko e fē ʻa e feituʻu ʻoku nau fie ngāue fakafaifekau aí.

ʻOku maʻu atu ʻa e mapé ʻi he sharingtime.lds.org

Uike 2: ʻOku tāpuakiʻi ʻe he ngāue fakafaifekaú ʻa e tokotaha kotoa pē.

Poupouʻi ʻa e mahinó: Fakaafeʻi ha taha ne toki foki mai mei he ngāue fakafaifekaú ke haʻu ki he houalotu ʻo e Palaimelí pea talaange ki he fānaú ʻa e ngaahi tāpuaki kuó ne maʻu mei hono fakahoko ʻo e ngāue fakafaifekaú. Fakaafeʻi ha niʻihi kehe (kau papi ului, fānau pe ngaahi fāmili) ke nau vahevahe ʻa e ngaahi aʻusia he ngāue fakafaifekaú pe ko ha sīpinga kuo tāpuekina ai ʻe he ngaue fakafaifekaú ʻenau moʻuí. Fakaafeʻi ʻa e fānaú ke nau hivaʻi ʻa e “ ʻOmi ki Māmani ʻEne Moʻoni” (THF, 92–93) ki he kau fakaafé.

Fakahaaʻi ʻa e ʻofá: Fakasio ʻa e faingamālie ke fakahaaʻi ai hoʻo ʻofá ki he fānau takitaha. ʻI hoʻo fakahā hoʻo ʻofá kiate kinautolu ʻokú ke akoʻí, te nau fie fanongo ange leva ki he Laumālié pea toe vēkeveke ange he ako (vakai IUMF, 33).

Uike 3: Te u lava ʻo teuteu he taimí ni ke ngāue fakafaifekau.

Poupouʻi e maʻu ʻa e mahinó: Fakaʻaliʻali ha fakatātā ʻo ʻAmoni pea talaange ki he fānaú ko ha faifekau lelei ʻeni naʻá ne akoʻi ʻa e ongoongoleleí ki he kau Leimaná. Fakamatalaʻi ange naʻá ne teuteu ke ʻalu ʻo ngāue fakafaifekau kimuʻa peá ne toki ʻalu ʻo ngāué. Lau leʻo lahi ʻa e (pe kole ki ha taha ʻo e fānaú ʻoku lalahi angé ke ne lau) ʻAlamā 17:2–3. Kole ki he fānau kehé ke nau fakafanongo pea hiki honau nimá ki ʻolunga ʻi heʻenau fanongo ki he ngaahi founga naʻe teuteu ai ʻa ʻAmoni ke ne hoko ko ha faifekaú. Kole ki ha taha ʻo e fānaú ke ne hiki ʻenau ngaahi talí ʻi he palakipoé. Talaange ki he fānaú te nau lava ʻo fai ʻa e ngaahi meʻa tatau ʻi heʻenau teuteu ko ia ke hoko ko ha faifekaú. Hivaʻi ʻa e “ ʻOku ou Fie Hoko Leva ko ha Faifekau” (THF, 90). Lolotonga ʻenau hivá, fakaafeʻi e fānaú ke nau fakatātaaʻi ha fanga kiʻi meʻa faingofua ʻe ala fai ʻe he kau faifekaú, hangē koe tukituki ʻi he ngaahi matapaá, lau ʻo e ngaahi folofolá pe ko e heka pasikalá.

Poupouʻi ke nau moʻui ʻaki: Talaange ki he fānaú ʻoku ʻi ai ʻa e ngaahi meʻa te nau lava ʻo fai he taimí ni ke nau mateuteu ke hoko ko ha kau faifekau, hangē ko e ako ʻo e ngaahi folofolá, maʻu ha fakamoʻoni, tauhi e ngaahi fekaú, totongi vahehongofulu pea mo e fakahū ha paʻanga ki he ngāue fakafaifekaú. ʻOange ki he fānaú takitaha ha laʻi foaki vahehongofulu, pea fakahinohino ange ʻa e anga hono fakafonú. Tokoniʻi ʻa e fānaú ke teuteu ha kiʻi feituʻu makehe ʻe lava ke tuku ki ai ʻenau paʻanga vahehongofulú pea mo e paʻanga ko ia ʻoku fakahaofi ki heʻenau ʻalu ʻo ngāue fakafaifekaú. ʻE lava pē ke ngāue ʻaki ha kiʻi puha, foʻi hina siʻisiʻi, pe kapa pe ko ha sila kae faʻo kehekehe pē ʻa e vahehongofulu mei he paʻanga ke fakahaofí.

ʻE ongoʻi mahuʻingaʻia e fānaú, ʻi hono fakaafeʻi ia ke tohi ʻi he palakipoé. ʻE tokoni foki ke pukepuke mo e tokanga ʻa e toenga ʻo e fānau kehé.

Uike 4: ʻE Lava pē Ke u Hoko ko ha Faifekau he Taimí ni.

Poupouʻi e maʻu ʻa e mahinó: Hiki ʻa e sētesi ko ʻení ʻi he palakipoé: “Te u lava pē ke hoko ko ha faifekau he taimí ni ʻaki .” Fakaafeʻi ʻa e fānaú ke nau fakakaukau ki ha ngaahi meʻa ʻe lava ke nau fai ke nau hoko ko ha faifekau ʻi he taimí ni. Tuku ke nau vahevahe ʻenau ngaahi fakakaukaú mo e tokotaha ʻoku tangutu ofi kiate kinautolú. Fakaafeʻi ha niʻihi ʻo e fānaú ke hiki ʻenau ngaahi talí ʻi he palakipoé.

Poupouʻi e maʻu ʻa e mahinó: Fakaafeʻi ha taha ʻo e fānau lalahi angé ke ne vahevahe ʻa e talanoa ʻo e “Uluaki Mata meʻa-hā-maí, pea fakaafeʻi ha tokotaha kehe ʻo e fānaú ke ne vahevahe ʻa ʻene ngaahi ongo fekauʻaki mo e Tohi ʻa Molomoná. (Tomuʻa kole ki he fānaú ke ʻi ai haʻanau taimi lahi ke nau teuteu ai.) Fakalotolahiʻi ʻa e fānaú kotoa ke nau vahevahe mo honau ngaahi fāmilí ʻa e talanoa ʻo e ʻUluaki Mata Meʻa-hā-maí pe ko ʻenau ngaahi ongo fekauʻaki mo e Tohi ʻa Molomoná.

Ngaahi lēsoni mahinongofua ki he fānaú ʻi he ngaahi taʻu kehekehe (vakai IUMF, 126–39). Hangē ko ʻení, ʻi he ʻekitivitī fika ua ʻo e uike 4, te ke lava ʻo ʻoange ki he fānau lalahi angé ha paaki ʻo e Tohi ʻa Molomoná pea fakalotolahiʻi kinautolu ke vahevahe ia mo ha tokotaha kehe. Ke tokoniʻi ʻa e fānau iiki angé ke toe vakaiʻi ʻa e talanoa ʻo e ʻUluaki Mata Meʻa-hā-maí, ʻe lava ke ke ngāue ʻaki ʻa e ngaahi ʻekitivitī, ngaahi nāunau tokoni ki he sió mo e fanongó pea mo e fanga kiʻi tamapua louhiʻinimá (puppets) ʻi he peesi 88–91 ʻo e Vakai ki Hoʻomou Ngaahi Fānaú Īkí.

Poupouʻi ke nau moʻui ʻaki: Kole ki he fānaú ke nau fakakaukauʻi ha foʻi ngāue te ne fakahā mai ʻa e founga ke tau hoko ai ko ha kau faifekau pea moʻui ʻaki ʻa e ongoongoleleí he taimí ni. Fili ha taha ʻo e fānaú ke haʻu ki muʻa ʻi he lokí pea vahevahe ʻene ngāué mo e toenga ʻo e houalotu Palaimelí. Fakaafeʻi ʻa e fānaú ke nau fakatātaaʻi lolotonga ʻenau hivaʻi ʻa e “Do As I’m Doing” (THF, 276). Toe fai pehē pē mo e fānau kehé ʻo fakatatau pe mo e taimí.