Ngaahi Fakahinohino ki he Taimi Feʻinasiʻakí mo e Polokalama ʻa e Fānaú ʻi he Houalotu Sākalamēnití
Ki he Kau Palesitenisī ʻo e Palaimelí mo e Kau Fai Hivá,
Ko e ngaahi folofolá ko e ngaahi folofola ia ʻa e ʻOtuá. ʻI hoʻo faʻa lotu mo lau ʻa e ngaahi folofolá pea moʻui ʻaki ʻa e ngaahi tefitoʻi moʻoni ʻa ia ʻokú ne akoʻi maí pea mo e fokotuʻutuʻu ko ʻení, ʻe tokoniʻi fakalaumālie koe ke ke akoʻi ʻa e ongoongoleleí ʻo Sīsū Kalaisí ki he fānau ʻi hoʻo Palaimelí. Te ke toe lava foki ke ngāue ʻaki ʻa e folofolá ke tokoni ke mahino ki he fānaú e ngaahi tefitoʻi moʻoni ʻo e ongoongoleleí ʻa ia te ke akoʻi he taʻu ní, hangē ko e Palani ʻa e Tamai Hēvaní, Misiona ʻo Sīsū Kalaisí, ko e fatongia ʻo e kau palōfitá, ko hono toe Fakafoki mai ʻo e Siasí, pea mo e ngaahi tāpuaki ʻo e temipalé. ʻE tokoniʻi foki koe ʻe he ngaahi folofolá ke fakaafeʻi mai ʻa e Laumālié ki hoʻo Palaimelí pea fokotuʻu ha ʻātakai ʻe ongoʻi ai ʻe he fānaú ʻa e ivi tākiekina ʻo e Laumālie Māʻoniʻoní. Ko e ivi tākiekina ko iá te ne tokoniʻi e fānau Palaimeli kotoa pē ke ne lava ʻo pehē, “ ʻOku ou ʻilo ʻoku moʻoni ʻa e ngaahi folofolá.”
ʻOku mau lotua kimoutolu pea ʻoku mau maʻu ha loto falala te mou malava ke ʻofaʻi e fānaú pea akoʻi kiate kinautolu ʻa e ongoongolelei ʻo Sīsū Kalaisí.
Ko e Kau Palesitenisī Lahi ʻo e Palaimelí
Ngaahi Fakahinohino ki he Taimi Feʻinasiʻakí
Fakahinohino ʻo e Ongoongoleleí
Fakaʻaongaʻi ʻi he uike takitaha ʻa e kiʻi tohi ko ʻení ʻi hoʻo teuteu ke faiako ʻi he taimi feʻinasiʻakí ʻi ha miniti ʻe 15. Te ke lava ʻo fetongi e ngaahi lēsoni fakauiké ʻaki e ngaahi nāunau kuo fakangofua ʻe he Siasí, hangē ko e Friend pe ko e Liahoná. ʻE tokoni ʻa e ngaahi fakahinohino ko ʻení ki hoʻo palani mo hono fakahoko ʻo e ngaahi lēsoní.
ʻOfa ʻIate Kinautolu ʻOkú ke Akoʻí. Fakahaaʻi hoʻo ʻofa ki he fānaú ʻaki hono ako honau hingoá pea ʻilo e ngaahi meʻa ʻoku nau manako aí, ngaahi talēnití mo ʻenau ngaahi fie maʻú.
Akoʻi e Tokāteliné ʻaki ʻa e Laumālié. ʻI hoʻo teuteu hoʻo ngaahi lēsoní, lotu ke maʻu ha fakahinohino pea feinga ke fakamālohia hoʻo fakamoʻoni ki he ngaahi tefitoʻi moʻoni te ke akoʻí. ʻE tokoni ʻeni ke ke faiako ʻaki ʻa e Laumālié.
Fakaafeʻi ke ako. Kuo teuteuʻi ʻa e kiʻi tohí ni ke ne tokoniʻi koe ʻo ʻikai ngata pē pe ko e hā ʻe akoʻí ka ke toe ʻilo e founga ki hono akoʻi mo hono fakaafeʻi ʻo e akó. Te ke toe akoʻi lelei ange ʻa e tokāteliné ʻi hoʻo fakahoko ʻa e ngaahi meʻa ko ʻení ʻe tolu ʻi hoʻo lēsoni kotoa pē:
-
Fakamahinoʻi ʻa e tokāteliné. Fakafeʻiloaki he founga mahino ʻa e tokāteline ʻoku ʻamanaki ke ako ʻe he fānaú. Fakakaukau ki ha ngaahi founga ke fakahoko ai ʻeni ʻi he lea mo e fakatātā. (Ki ha ngaahi sīpinga, vakai ki he ngaahi lēsoni ʻi he uike ʻuluaki ʻo Māʻasí pea mo e uike ʻuluaki ʻo Siulaí.)
-
Poupouʻi ʻa e mahinó. Fakapapauʻi ʻoku maʻu ʻe he fānaú ha mahino loloto ange ki he tokāteliné ʻo fakafou ʻi ha ngaahi founga kehekehe te nau kau atu ai ki he akó, ʻo hangē ko e hivaʻi ha ngaahi hiva, fakafaivaʻi mo e lau folofolá.
-
Poupouʻi ke nau moʻui ʻaki. ʻOange ha ngaahi faingamālie ki he fānaú ke nau moʻui ʻaki ʻa e tokāteliné. Fakakaukau ki ha founga te nau lava ʻo fakahaaʻi ai ʻenau ongó pe fokotuʻu ha taumuʻa ʻoku fekauʻaki mo e tokāteliné.
ʻOku ʻomai ʻe he kiʻi tohi ko ʻení ʻa e ngaahi lēsoni kakato ki he niʻihi ʻo e ngaahi uike ʻo e taʻú. ʻOku ʻoatu ha ngaahi fakakaukau ki he ngaahi uike kehé kae ʻikai ko e lēsoni kakató ia. Fakalahi ʻa e ngaahi fakakaukau ko iá ʻaki haʻo ngaahi fakakaukau pē ʻaʻau. Te ke lava ʻo maʻu ha ngaahi fakakaukau mei hoʻo lau e ngaahi lēsoni kehe ʻi he kiʻi tohi ko ʻení. ʻI he ngaahi Sāpate nimá, fakaʻaongaʻi ʻa e taimi ko ʻení ke toe fakamanatu ʻa e ngaahi lēsoni kimuʻá. ʻE lava ʻo fakahinohinoʻi koe ʻe he Laumālié ʻi hoʻo palani mo teuteuʻi ʻa e ngaahi ʻekitivitī ki he ngaahi lēsoní.
Ngāue fakataha mo e fai hivá ʻi he taimi ʻoku teuteu ai hoʻo ngaahi lēsoní. ʻE tokoni hono hivaʻi ʻo e ngaahi hivá ke toe fakamālohia ʻa e ngaahi tokāteline ʻokú ke akoʻí. ʻI he taimi ʻe niʻihi te ke lava ʻo fakaafeʻi e kau faiakó mo ʻenau kalasí ke nau tokoni atu ʻi ha ngaahi konga ʻo hono akoʻi ʻo e ongoongoleleí.
ʻOku ʻi ai e ngaahi lēsoni ʻoku fokotuʻu atu ai ke fakaafeʻi mai ha tokotaha lea ke kau ʻi he Palaimelí. ʻOku totonu ke ke maʻu ha ngofua mei hoʻo pīsopé pe palesiteni fakakoló kimuʻa pea toki fakaafeʻi mai ʻa e niʻihi ko iá ke kau maí.
ʻOku ʻoatu fakataha ʻa e ngaahi lēsoní mo e ngaahi tokoni fakafaiako ʻa ia te ne tokoniʻi koe ke fakalakalaka hoʻo taukei fakafaiakó. ʻOku ʻoatu foki mo e ngaahi fakatātā ʻa ia te ne tokoniʻi koe ke ke sio pe ʻoku anga fēfē ʻa e ʻekitivitií. Neongo ʻoku mahuʻinga ʻa e fakalakalaka hoʻo taukei fakafaiakó, ka ko hoʻo mateuteu fakalaumālie fakafoʻituituí mo e fakamoʻoní ʻa e ngaahi meʻa te nau fakaafeʻi ʻa e Laumālié ke fakamoʻoniʻi e ngaahi tokāteliné ʻi he loto ʻo e fānaú.
Taimi Hivá
ʻOku totonu ke ʻomai ʻe he Mūsika ʻi he Palaimelí ha ʻātakai ʻo e loto-ʻapasia, akoʻi ʻa e ongoongoleleí, peá ne tokoniʻi ʻa e fānaú ke nau ongoʻi ʻa e ivi tākiekina ʻo e Laumālie Māʻoniʻoní pea mo e fiefia ʻoku maʻu mei he hivá. ʻOku totonu ke tuku ha miniti ʻe 20 ʻo e taimi feʻinasiʻakí ki he hivá mo e akoʻi ʻo e hivá. ʻE lava ke fakapapauʻi mei heni ʻokú ke maʻu ha taimi feʻunga ke akoʻi ai ha hiva foʻou pea mo tokoniʻi e fānaú ke nau manako ki he hivá.
ʻOku kau atu foki ʻi he kiʻi tohí ni ha hiva foʻou ke ako ʻe he fānaú ki he taʻú ni. (vakai, peesi 28). ʻOku kau atu foki ʻa e konga ʻoku pehē “Founga hono Ngāue ʻaki ʻo e Hivá ʻi he Palaimelí.” (vakai, peesi 26–27) pea tānaki atu ki ai mo ha ngaahi fakakaukau ki hono akoʻi ʻo e ngaahi hiva ki he fānaú. (vakai, peesi 7).
Ngaahi Fakahinohino ki he Polokalama ʻi he Houalotu Sākalamēnití
ʻOku fakahoko e polokalama houalotu sākalamēniti ʻa e fānaú ʻi he kuata hono fā ʻo e taʻú, ʻi he fakahinohino ʻa e pīsopé pe ko e palesiteni fakakoló. Fakataha ʻi he kamataʻanga ʻo e taʻú mo e tokoni ʻi he kau pīsopelikí pe kau palesitenisī fakakoló, ʻa ia ʻokú ne tokangaʻi ʻa e Palaimelí ke fokotuʻutuʻu ʻa e ngaahi palaní. Fakapapauʻi ʻoku tali ʻe he pīsopé ʻa e palaní. Maʻu ʻa e ngofua ʻi he taimi ʻoku kakato ai ʻa e ngaahi palaní.
Palani ke fakahoko ʻe he fānaú ʻa e polokalamá ʻo fakatefito ʻi he taumuʻa ʻo e taimi feʻinasiʻakí ʻi he mahina ko iá. Lolotonga e taʻú, hiki ha lekooti ʻo e ngaahi lea ne fakahoko fakatāutaha ʻe he fānaú pea pehē ki he ngaahi meʻa ne nau aʻusiá, naʻa lava ke fakaʻaongaʻi ia ʻi he polokalamá. ʻI hoʻo palani ke vahevahe ʻe he fānaú ʻa e meʻa kuo nau ako fekauʻaki mo e taumuʻa ʻo e taʻu ní, fakakaukau ki he ngaahi founga te nau lava ai ʻo tokoni ki he kāingalotu ke tukutaha ʻenau tokangá ki he ngaahi tokāteline ʻo e ongoongoleleí ʻoku akoʻí. Tuku ki ha mēmipa ʻo e kau pīsopelikí ke ne fakaʻosi ʻa e fakatahá ʻaki ha kiʻi lea nounou.
ʻI hoʻo teuteu ʻa e polokalamá, manatuʻi ʻa e ngaahi fakahinohino ko ʻení:
-
ʻOku ʻikai totonu ke toʻo ʻe he ngaahi ako polokalamá ʻa e ngaahi taimi mahuʻinga ʻo e ngaahi kalasí pe fāmilí.
-
ʻOku ʻikai taau ke fai ha polokalama ʻi he houalotu sākalamēnití ʻoku fakaʻaongaʻi ai e ngaahi nāunau fakakomipiutá, ngaahi teunga mo e ngaahi fakamatala ʻa e mītiá.
ʻOku malava pē ke ngāue ʻaki ʻa e ngaahi hiva ʻi he polokalamá ke hivaʻi ʻe ha kulupu tokolahi pe kulupu iiki, ngaahi hiva solo pe tautau toko ua, ʻe ha fāmili, pe tokoniʻi ʻe ha meʻalea. Fakapapauʻi ʻoku ʻiloʻi lelei ʻe he fānaú ʻa e ngaahi leá pea lava ke nau hiva foki mei honau loto.
Ngaahi Maʻuʻanga Tokoni ʻOku Fakaʻaongaʻi ʻi he Tohi Ko ʻení
ʻOku fakaʻaongaʻi ʻa e ngaahi lea fakanounou ko ʻení ʻi he kotoa ʻo e kiʻi tohí:
-
THFTohi Hiva ʻa e Fānaú
-
IUMFʻOku ʻIkai Ha Ui ʻe Mahuʻinga Ange ʻi he Faiakó
Ko e ngaahi lēsoni lahi ʻoku fakakau atu ai ʻa e ngaahi fokotuʻu ki hono ngāue ʻaki ʻo e fakatātaá. Te ke lava ke maʻu ʻa e ngaahi fakatātaá ʻi he Tohi fakatātā ʻo e Ongoongoleleí, ko e tohi Fakatātā ʻo e Ongoongoleleí, ngaahi fakatātā ʻo e tohi lēsoni ʻa e Palaimelí, pea mo e ngaahi makasini ʻa e Siasí pea mo e ʻinitanetí ʻi he images.lds.org.
Nāunau Fakalēsoni ki he 2016
Nāunau Fakalēsoni Fakalūkufua
Nesilī: Vakai Ki Hoʻomou Fānau Īkí; Sanipiimi: Palaimeli 1; FKT 4–7: Palaimeli 2; Loto-toʻa 8–11: Palaimeli 4
Nāunau Fakalēsoni Angamahení
Sanipiimi: Palaimeli 1; FKT 4–7: Palaimeli 2; Loto-toʻa 8–11: Palaimeli 4