Founga hono Fakaʻaongaʻi ʻo e Mūsiká ʻi he Palaimelí

Ko e taumuʻa ʻo e mūsiká ʻi he houalotu ʻa e Palaimelí ke akoʻi ki he fānaú ʻa e ongoongolelei ʻo Sīsū Kalaisí pea tokoniʻi kinautolu ke nau moʻui ʻaki ia. ʻOku hanga ʻe he ngaahi hiva ʻa e Palaimelí ʻo ngaohi ʻa e akó ke toe fakafiefia ange, tokoniʻi ʻa e fānaú ke nau ako pea mo manatuʻi ʻa e ngaahi moʻoni ʻo e ongoongoleleí pea fakaafeʻi ʻa e Laumālié.

Ko e ngaahi pōtoʻi ngāue ʻeni ʻe lava ke ke ngāue ʻaki ke akoʻi ʻaki ha foʻi hiva ki he fānaú. ʻE tokoniʻi koe ʻe he ngaahi sīpinga ko ʻení mo e ngaahi hiva kuo fokotuʻu atu ʻi he fokotuʻutuʻu ko ʻení. Vakai ki he konga “Founga hono Fakaʻaongaʻi ʻo e Mūsiká ʻi he Palaimelí” ʻi he 2015 ki ha ngaahi fakakaukau ke tānaki atu.

Tohoakiʻi e Tokanga ʻa e Fanaú

Kimuʻa pea kamata hoʻomou hivá, fakapapauʻi kuó ke maʻu e tokanga ʻa e fanaú. Te ke lava ʻo maʻu ʻenau tokangá ʻi haʻo ngāue ʻaki ʻa e ngaahi nāunau tokoni ki he sió, hangē ko e ngaahi fakatātā, fanga kiʻi meʻa faingofua pē, pe ko e fānaú pē. ʻE lava pē ke ke liliu ʻa e tō ho leʻó. ʻOku totonu ke nounou pē ʻa e ngaahi ʻekitivitií pea tataki hangatonu ki he foʻi hivá ke ne tohoakiʻi ʻaki ʻa ʻenau tokangá. Hangē ko ʻení:

Kimuʻa pea hivaʻi ʻa e “ ʻOku Ou Fie Sio he Temipalé” (THF, 99), fehuʻi ki he fānaú ke hiki ki ʻolunga honau nimá kapau kuo nau ʻosi sio ʻi ha temipale. Fakaafeʻi kinautolu ke nau fakakaukau ki he ongo ʻi he taimi te nau sio ai ki ha temipale lolotonga ʻenau hivá.
ʻE lava pē ke hoko e fānaú ko hoʻo nāunau tokoni lelei taha ia ki he sió. Fakaafeʻi kinautolu ke nau ngāue ʻaki ʻa e fanga kiʻi meʻa maʻamaʻa pē hangē ko e hēkesí, pe ngaahi folofolá ke ne fakafofongaʻi ʻa e kau faifekaú ʻi heʻenau hivaʻi ʻa e “ ʻOmi Ki Māmani ʻEne Moʻoní” (THF, 92–93).

A woman leading music in Primary. A girl is standing at her side holding a copy of the Book of Mormon. — ʻAi ʻa e ngaahi nāunau tokoni ki he sió ke faingofua. ʻOku faingofua leva heni ki he fānaú ke tukutaha ʻenau tokangá ki he pōpoaki ʻo e foʻi hivá, pea ʻokú ne toe fakangofua e Laumālié ke fakamoʻoni ko e meʻa ʻoku nau hivá ʻoku moʻoni.

Taki e Fanongo ʻa e Fanaú

Kole ki he fānaú ke nau fakafanongo ki ha tali ʻo ha fehuʻi te ne tokoniʻi kinautolu ke ako ʻa e ngaahi lea mo e pōpoaki ʻo e foʻi hivá. ʻE lava ke ke kole ange ke nau fakafanongo ki he ngaahi tali ko ia ki he ngaahi fehuʻi hangē ko e “ko hai?”, “ko e hā?”, “ko e fē?” “ko e hā e taimí?” pe “ko e hā e ʻuhingá?” ʻE toe lava pē foki ke ke kole ange ki he fānaú ke na fakafanongo ki he ngaahi lea mahuʻingá pe ngaahi lea ongo tatau pe lau honau tuhú pe ʻoku tuʻo fiha ʻenau hivaʻi ha foʻi lea pau.

ʻI hoʻo akoʻi ʻa e “Fanongo ʻAki Hoku Lotó” (peesi 28 ʻi he kiʻi tohí ni), tohiʻi ʻa e taha ʻo e ngaahi fehuʻi ko ʻení ʻi he palakipoé: “Ko e fē ʻa e feituʻu ʻe lava ke u fanongo ai ki he leʻo ʻo e Fakamoʻuí?” “Ko hai ʻokú ne akoʻi kitautolu ke tau moʻui māʻoniʻoní?” “Ko hai ʻoku lea leʻosiʻi mai kiate kitautolu?” Fakaafeʻi ʻa e fānaú ke nau fanongo ki he talí lolotonga ʻenau hivá pea fakaʻilongaʻi (ʻaki ʻenau kūnima, tuʻu ki ʻolunga pē te nau ala ki honau ngaahi telingá) ʻi heʻenau hivaʻi mai ko ia ʻa e talí. Tuku ki he fānaú ke nau toutou hivaʻi fakataha mo koe ʻa e talí. Tohi ʻi he palakipoé ha fehuʻi ʻe taha pea toutou fai pehē pe.

A woman leading the singing in Primary. — ʻE ongoʻi ʻe he fānaú hoʻomou ʻofá pea mo hoʻomou faivelenga ʻi he ongoongoleleí ʻi hoʻo hiva fakataha mo kinautolú. ʻI hoʻo vahevahe hoʻo fakamoʻoní fekauʻaki mo e Fakamoʻuí, te nau lava pē ke ongoʻi ʻEne ʻofa kiate kinautolú.

Fakakau ʻa e Fānaú

Fakakau e fānaú ʻi ha ngaahi founga kehekehe ʻi hoʻomou hivá. Hangē ko ʻení:

Fakaafeʻi ʻa e fānaú ke nau fakakaukau ki ha fakatātā faingofua ʻaki honau nimá ke ne tokoniʻi kinautolu ke nau manatuʻi ʻa e ngaahi lea mo e pōpoaki ʻo ha foʻi hiva (vakai “Ngaahi tokoni maʻá e fai hivá” ʻi he peesi 7).
Fakaafeʻi ʻa e fānaú ke nau pehē pē ko e kau faifekau kinautolu ʻi heʻenau hiva “ ʻOmi Ki Māmani ʻene Moʻoní” Kole kiate kinautolu ke nau laka tuʻu maʻu pe te nau laka takai ʻi he lokí pea puke ʻenau folofolá lolotonga ʻenau hivá.
Ki muʻa pea hivaʻi ʻa e “Fanongo ʻaki Hoku Lotó,” ʻoange ki he fānaú takitaha ha laʻi pepa ko e foʻi haati pea kole ange ke nau tohi ai “Fanongo” ʻi he tafaʻaki ʻe tahá pea “Fakafanongo” ʻi he tafaʻaki ʻe tahá. Fakamatalaʻi ange ko e ngaahi foʻilea ko ʻení ʻoku toutou leaʻaki ʻi he foʻi hivá. Kole leva ki he fānaú ke fakaʻaliʻali ʻa e faʻahi totonu ʻo e foʻi haatí ʻi heʻenau hivaʻi ʻa e foʻi lea ko iá.

2016 Outline for Sharing Time/Children's Sacrament Meeting Program — Fanongo

Hiva, Hiva, Hiva

ʻOku ako lelei ange ʻe he fānaú ʻa e ngaahi hivá ʻi heʻenau fanongo ki ai pea toutou hivaʻi iá.

Toe vakaiʻi pea hivaʻi ʻa e ngaahi hivá ʻi ha ngaahi founga ʻoku fakamānako. Hangē ko ʻení:

Fakaafeʻi ʻa e fānaú ke nau kamata ako ʻa e foʻi fasi ʻo ha hiva foʻou ʻaki haʻanau fakafanongo ki ai pe ngūnguuʻi he lolotonga e taimi talitalí.
ʻI hono toe vakaiʻi ʻo e “Te u Muimui he Palani ʻa e ʻOtuá” (THF, 86–87), ngaohi ha ngaahi fakahinohino hala. Tohiʻi ha foʻi lea kehekehe mei he hivá ʻi he fakahinohino hala takitaha. Puke hake ha fakahinohino, pea talaange ki he fānaú lolotonga ʻenau hiva ʻa e foʻi hivá ke ʻoua te nau hivaʻi ʻa e foʻi lea ko iá. Fai pe ʻa e meʻa tatau ki he ngaahi fakahinohino hala kehé.
Ngaohi ha kiupi mei ha pepa pe pepa fefeka pea ʻi he tafaʻaki takitaha ʻo e kiupí, tohi ai ha founga kehe ke hivaʻi ai (hangē ko ʻeni, pasipasiʻi ʻa e fasí, fai e hiva fakatātā, hiva leʻosiʻi, hiva pē tamaiki tangatá, hiva pē tamaiki fefiné, pe ngūnguuʻi ʻa e fasí). ʻI ha foʻi kiupi ʻe taha tohi ai ʻa e hingoa ʻo e niʻihi ʻo e ngaahi hiva ʻa e Palaimelí ʻa ia ʻoku ako ʻe he fānaú. Fakaafeʻi leva ha taha ʻo e fānaú ke ne vilohi ʻa e ʻuluaki kiupí ke nau fili pe ko e hā e founga te nau hivaʻi ai ʻa e foʻi hivá, pea fakaafeʻi leva ha taha kehe ʻo e fānaú ke ne vilohi ʻa e foʻi kiupi ʻe tahá pē ko e hā e foʻi hiva te nau hivaʻí.

Two young girls standing by a table in Primary. There are song cubes on the table.