Sune
‘Oku lava ‘e he Ngaahi Tefitoʻi Moʻoni mo e ngaahi Ouau ‘o e Ongoongoleleí ‘o ‘omi ha Faingamālie Kiate Au Keu toe Nofo Fakataha ai mo e ʻOtuá
Fili pē ʻe koe ha hiva mei he Tohi Hiva ʻa e Fānaú
“ ʻOku mau tui ko e ngaahi ʻuluaki tefitoʻi moʻoni mo e ngaahi ouau ʻo e Ongoongoleleí ko e: ʻuluakí, Tui ki he ʻEiki ko Sīsū Kalaisí; uá: Fakatomalá; tolú, Papitaiso ʻi he fakauku ke fakamolemoleʻi ʻa e ngaahi angahalá, faá, Hilifaki ʻo e nimá ke maʻu ʻa e meʻa-foaki ʻo e Laumālie Māʻoniʻoní” (Ngaahi Tefito ʻo e Tuí 1:4).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻa e ngaahi founga ke ʻiloʻi ai ʻa e tokāteliné ʻe he fānaú pea tokoni ke mahino ia pea nau moʻuiʻaki foki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: ‘Oku tataki kitautolu ‘e he tui kia Sīsū Kalaisí ke tau ‘ofa ‘iate Ia, falala kiate Ia pea tauhi ‘Ene ngaahi fekaú.
Fakamahinoʻi ʻa e tokāteliné pea poupouʻi e maʻu ʻa e mahinó: Tohiʻi ʻi he palakipoé “ ʻOku tataki kitautolu ‘e he Tui kia Sīsū Kalaisí ke tau ‘ofa ʻiate Ia, falala kiate Ia, pea tauhi ‘Ene ngaahi fekaú”. Fakaʻaliʻali ange ki he fānaú ha fanga kiʻi tengaʻi ‘akau. Fehuʻi ange: “Ko e hā e meʻa ʻe hoko ki he fanga kiʻi tengaʻi ʻakau ko ʻení?” “ ʻE anga fēfē hoʻomou ʻiloʻi ʻe tupu ʻa e fanga kiʻi tenga ko ʻení?” “Ko e hā ʻa e meʻa kuo pau ke tau fai kae lava ke nau tupú?” Fakamatalaʻi ange ko ʻetau tui kia Sīsū Kalaisí, ʻoku hangē pē ia ha tengaʻi ʻakaú, ʻe lava ke tupu ʻo kapau te tau fafanga ia. Aleaʻi ha ngaahi meʻa te tau lava ʻo fai ke tokoni ai ke tupulaki ʻetau tuí, pea fakamatalaʻi ange ʻa e founga ʻe tataki ai kitautolu ʻe he ngaahi meʻá ni ke tau ʻofa mo falala kia Sīsū Kalaisi pea tauhi ʻEne ngaahi fekaú. Hivaʻi ʻa e “Ko e Tuí” (THF, 50–51). Fai ha kiʻi fakatātā faingofua ʻaki ho nimá ke ʻalu fakataha pea mo e veesi ʻuluakí.
ʻOku maʻu atu ʻa e tā valivali ʻi he sharingtime.lds.org
Uike 2: ʻOku ʻomi ʻe he Fakatomalá ʻa e fakamolemolé.
Fakamahinoʻi ʻa e tokāteliné: Fakaafeʻi ʻa e fānaú ke fakaava ʻenau folofolá pea lau ʻa e Tokāteline mo e Ngaahi Fuakava 58:42–43. Fehuʻi ange kiate kinautolu ke nau talamai pē ko e ha e meʻa ʻoku hoko ʻi he taimi ʻoku tau fakatomala ai mei heʻetau ngaahi angahalá. (Kapau ʻe lava, fakaafeʻi e fānaú ke nau fakaʻilongaʻi ʻa e ngaahi veesí ʻi heʻenau ngaahi folofolá.) Fakamatalaʻi nounou ki he fānaú ʻo kau kia ʻĪnosi (vakai ʻĪnosi 1:1–4), pea ʻai ha taha ʻo e fanaú ke ne lau ʻa e ʻĪnosi 1:5–8. Fakamoʻoniʻi ʻoku hanga ʻe he Fakalelei ʻa Kalaisí ʻo ʻomai ʻa e faingamālie kiate kitautolu ke fakamolemoleʻi ai ʻetau ngaahi angahalá.
Poupouʻi e maʻu ʻa e mahinó: Fakamatalaʻi ange ko e kakai ko ia kuo nau fakatomala pea kuo fakamolemoleʻi ʻenau ngaahi angahalá, ʻoku nau maʻu ha holi ke ngāue maʻá e ʻOtuá. Vahevahe ʻa e fānaú ki he kulupu ʻe tolu, pea ʻoange ki he kulupu takitaha ha taha ʻo e ngaahi fakatātā pea mo e ngaahi veesi folofola ko ʻení: Fai papitaiso ʻa ʻAlamā ʻi he Vai ʻo Molomoná (Mōsaia 17:2–4; 18:1–17); Siona (Siona 1–3); ko e kau ʻAnitai-Nīfai-Lihaí ʻi heʻenau tanu ʻenau ngaahi meʻataú (ʻAlamā 23:4–18; 24:6–19). Fakamatalaʻi ange ʻoku fakamatala ʻa e ngaahi talanoa ko ʻení fekauʻaki mo e kakai naʻa nau fakatomala mei heʻenau ngaahi angahalá pea nau ngāue leva maʻá e ʻEikí. Kole ange ki he kulupu takitaha ke nau vakaiʻi e ngaahi veesi folofolá pea teuteu ke fakafaivaʻi ʻa e founga naʻe fakatomala ai ʻa e kakai ko ʻení pea nau ngāue maʻá e ʻEikí (ʻaki ʻenau akoʻi e ongoongoleleí, fakahoko ʻa e ngāue fakafaifekaú, pea fakafisi ke toe tau).
Uike 3: ʻI he taimi ʻoku papitaiso ai aú ʻoku ou fai ha fuakava mo e ʻOtuá.
Poupouʻi e maʻu ʻa e mahinó: Kole ki ha taha ʻo e fānaú ke haʻu kimuʻa ʻi he lokí pea fakamafao hono ongo nimá. Tuku leva kimuʻa ha tohi ʻi he nima takitaha. Lau leva ʻa e Mōsaia 18:7–11. Fakamatalaʻi ange leva ko e taha ʻo e ngaahi fuakava ʻoku tau fai ʻi he taimi ʻoku tau papitaiso aí ke tau “fefuaʻaki ʻetau ngaahi kavenga, koeʻuhí ke maʻamaʻa”. ʻEke ange ki he tokotaha ʻokú ne pukepuke ʻa e ʻū tohí pe ʻoku kamata helaʻia. ʻAi ha toko ua ʻo e fānaú ke na tokoni hono pukepuke hono nimá. Aleaʻi ha ngaahi kavenga ʻoku fehangahangai mo e fānaú, hangē ko hono fakamataliliʻí, ongoʻi puke, ongoʻi taʻelata pe faingataʻaʻia ʻi he akó. Fehuʻi ange ki he fānaú pē ko e hā e founga te nau fetokoniʻaki ai mo e niʻihi kehé ke maʻamaʻa ange ʻenau ngaahi kavengá.
ʻI hono fakaʻaongaʻi e fānaú ki hono fakatātaaʻi ha meʻá, ʻe tohoakiʻi mai ai ʻenau tokangá pea teuteuʻi kinautolu ke ako. Hangē ko ʻení, ko e ʻekitivitī ko ʻení ʻokú ne fakaʻaliʻali mai ʻa hono fakatātaaʻi ʻe he foʻi fakakaukau ko iá ʻa e fefuaʻaki ʻenau ngaahi kavengá.
Poupouʻi ke nau moʻui ʻaki: Talaange ki he fānaú ko e papitaisó ʻa e matapā ʻokú ne taki ki he hala ʻo e moʻui taʻengatá (vakai, 2 Nīfai 31:17). Fokotuʻu ʻi he tafaʻaki ʻe taha ʻo e lokí ha fakatātā ʻo ha fānau ʻoku papitaiso. ʻI he tafaʻaki leva ʻe taha ʻo e lokí, fokotuʻu ai ha fakatātā ʻo e Fakamoʻuí, pea fakamatalaʻi ange ʻoku fakafofongaʻi ʻe he fakatātā ʻi he ʻekitivitī ko ʻení ʻa e moʻui taʻengatá. Talaange ki he fānaú ʻoku tau nofo maʻu ʻi he hala ki he moʻui taʻengatá ʻi he taimi ʻoku tau tauhi ai ʻetau ngaahi fuakava ʻo e papitaisó. Toe vakaiʻi nounou ʻa e ngaahi fuakava ko ʻení (manatuʻi ʻa Sīsū Kalaisi, talangofua ki he ngaahi fekaú, pea tokoni ki he niʻihi kehé). ʻOange ki he fānaú takitaha ha laʻipepa kuo tā ki ai ʻa e sila ʻo e “FKT”. Tuku ki he fānaú ke nau hiki ʻi heʻenau lauʻi pepa ha fekau te ne tokoniʻi kinautolu ke tauhi ʻenau fuakava ʻo e papitaisó (ʻe lava pē ke nau tā ha ngaahi fakatātā ke ne fakafofongaʻi ʻa e fekau kuo nau filí). Fakaafeʻi leva ha taha ʻo e fānaú ke tuku ʻene laʻipepá ʻi he falikí ʻi he vahaʻa ʻo e ongo fakatātaá. Kapau ʻe lava, pea tokoniʻi e fānaú ke nau kumi ʻenau fekaú ʻi heʻenau ngaahi folofolá pea lau fakataha ia. Toe fai pehē pē kae ʻoua kuo faʻu ʻe he fānaú ha foʻi hala ʻi he vahaʻa ʻo e ngaahi fakatātaá.
ʻOku maʻu atu ʻa e fakaʻilongá ʻi he sharingtime.lds.org
Uike 4: ʻOku fakafiemālieʻi mo tataki au ʻe he Laumālie Māʻoniʻoní.
Poupouʻi e maʻu ʻa e mahinó: Vahevahe ʻa e fānaú ki ha ngaahi kulupu, pea ʻoange ki he kulupu takitaha ha laʻipepa ʻoku ʻi ai e ngaahi folofola ko ʻení:
-
“Ko au ē, ko au ē , ʻOku ou talaatu, Te u tuku kiate kimoutolu ʻa hoku Laumalié, ʻa ia te ne fakamaama ʻa homou ʻatamaí, pea te ne fakafonu ʻa ho laumalié ʻaki (T&F 18:11–13).
-
“Kapau te mou hū mai ʻi he matapā ʻi he founga ʻo e [papitaiso], pea maʻu ʻa e Laumālie Māʻoniʻoní, te ne kiate kimoutolu ʻa e meʻa kotoa pē ʻa ia ʻoku totonu ke mou faí” (2 Nīfai 32:5).
-
“Ko e Fakafiemālie, ʻa e Laumālie Māʻoniʻoní, …ʻa ia te ne kiate kimoutolu ʻa e meʻa kotoa pē, pea ʻoatu ʻa e meʻa kotoa pē ki homou , koe hā pē ha meʻa kuo ʻosi leaʻaki kiate kimoutolu” (Sione 14:26).
-
“Tuku hoʻo falalá ki he Laumālié ʻa ia ʻokú ne tataki ke —ʻio, ke faitotonu, mo fononga fakatōkilalo, ke ; pea ko hoku Laumālié ʻeni” (T &F 11:12).
-
“Pea ʻi he mālohi ʻo e Laumālie Māʻoniʻoní te ke lava ke ʻo e meʻa kotoa pē” (Molonai 10:5).
Kole ki he fānaú ke nau sio ki heʻenau ngaahi folofolá pea fakafonu ʻa e meʻa ʻoku ʻataá. Hili iá pea aleaʻi leva pe ko e hā ʻa e akonaki ʻa e ngaahi folofola ko ʻení fekauʻaki mo e tokoni mai ʻa e Laumālie Māʻoniʻoni kiate kitautolú. Fakaafeʻi kinautolu ke vahevahe mai ʻa e ngaahi meʻa kuo aʻusia ʻi he taimi ne tokoniʻi ai kinautolu ʻe he Laumālie Māʻoniʻoní.
Poupouʻi ke nau moʻui ʻaki: Talaange ki he fānaú ʻoku tokoniʻi kitautolu ʻe he Laumālie Māʻoniʻoní ʻi ha ngaahi founga lahi. Hivaʻi ʻa e “Ko e Laumālie Māʻoniʻoní” (THF, 56). Kole ki he fānaú ke hiki hake honau nima ʻi heʻenau hiva fekauʻaki mo ha founga naʻe tokoniʻi ai kinautolu ʻe he Laumalie Māʻoniʻoni. Taʻofi ʻa e hivá pea aleaʻi pe ko e hā kuo nau ako fekauʻaki mo e Laumālie Māʻoniʻoní. Hokohoko atu ʻa e hivá mo e fealēleaʻaki. Vahevahe ki ha taimi naʻe hanga ai ʻe he Laumālie Māʻoniʻoní ʻo fakafiemālie’i koe pe naʻá ne tataki koe.
ʻOku maʻu atu ʻa e laʻipepa tufá ʻi he sharingtime.lds.org