Tīsema
ʻOku Akoʻi Au ʻe he Ngaahi Folofolá fekauʻaki mo e ʻAloʻi ʻo e Fakamoʻuí pea mo e Hāʻele ʻAngauá
“He ko e Foha ʻo e tangatá ʻe haʻu ia ʻi he nāunau ʻo ʻene Tamaí mo ʻene kau ʻāngeló; pea te ne toki totongi ai ki he tangata kotoa pē ʻo fakatatau ki heʻene ngaahi ngāue” (Mātiu 16:27).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻa e ngaahi founga ke ʻiloʻi ai ʻa e tokāteliné ʻe he fānaú pea tokoni ke mahino ia pea nau moʻuiʻaki foki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: Naʻe kikite ʻa e kau palōfitá fekauʻaki mo hono ʻaloʻi ʻo Sīsū Kalaisí.
Poupouʻi e maʻu ʻa e mahinó: Vahevahe ʻa e fānaú ki ha ngaahi kulupu ʻe nima. ʻOange ki he kulupu takitaha ʻa e ngaahi potufolofola ko ʻení, pe teunga faiva faingofua ke ne fakafofongaʻi ʻa e palōfita ʻoku nau fehokotaki: ʻĪsaia 7:14; 9:6 (ʻĪsaia); 1 Nīfai 11:14–21 (Nīfai); Mōsaia 3:5, 8 (Tuʻi ko Penisimaní); ʻAlamā 7:9–10 (ʻAlamā); Hilamani 14:2–6 (Samuela). Fakaafeʻi ʻa e kulupu takitaha ke nau lau pea aleaʻi ʻa e meʻa ne leaʻaki ʻe he palōfitá fekauʻaki mo e ʻaloʻi ʻo Sīsū Kalaisí. ʻAi ha taha ʻo e fānaú mei he kulupu takitaha ke nau ngāue ʻaki ʻa e meʻa teketeké pe ko e teunga faivá ke fakafofongaʻi ʻaki ʻa e palōfitá pea talaange ki he toenga ʻo e fānaú pē ko hai e palōfita ʻokú ne fakafofongaʻí pea lau pe ko ʻene talamai e lau ʻa e palōfita ko iá fekauʻaki mo e ʻaloʻi ʻo Sīsū Kalaisí. Hivaʻi ʻa e “Naʻá ne Fekau Hono ʻAló” (THF, 21–21) pe ko e “Samuel Tells of the Baby Jesus” (THF, 36).
Uike 2: Naʻe ʻosi ʻaloʻi mai ʻa Sīsū Kalaisi.
Poupouʻi e maʻu ʻa e mahinó: Hivaʻi fakataha ʻa e veesi ʻuluaki ʻo e “Ko e Hiva ʻAloʻí” (THF, 32–33). Vahevahe ʻa e fānaú ki he kulupu ʻe fā, pea vahe ki he kulupu takitaha ʻa e toenga ʻo e ngaahi vēsí (2–5). Kole ki he fānaú ke tā ha ngaahi fakatātā ʻo fakatatau ki heʻenau veesi. Hivaʻi kakato ʻa e foʻi hivá, pea tuku ki he fānaú ke hiki ki ʻolunga ʻenau ngaahi fakatātaá ʻi he aʻu ki heʻenau konga ʻi he hivá.
Uike 3: ʻE ʻi ai e ʻaho ʻe toe foki mai ki he māmaní ʻa Sīsū Kalaisi.
Fakamahinoʻi ʻa e tokāteliné: Tohi ʻa e ngaahi kupuʻi lea ko ʻení takitaha ʻi ha ngaahi kaati lea: Pea ki he, Foha ʻo e tangatá, ʻe hāʻele mai ia, ʻi he nāunau, ʻo ʻEne Tamaí. (ʻOku maʻu atu ʻa e ngaahi kaati leá ʻi he sharingtime.lds.org.) Fakaʻaliʻali fakamovetevete ʻa e fanga kiʻi kaati leá ʻi he palakipoé, pea fakaafeʻi ʻa e fānaú ke nau tokoni atu ki hono fokotuʻutuʻu totonu kinautolú. (Mahalo pē te ke fie maʻu ke toe ʻi ai mo ha ngaahi seti ʻo ha ngaahi kaati foʻilea pea tuku ange ki he fānaú ke nau ngāue fakataha ʻi heʻenau ngaahi kulupú.) ʻI hono fakahokohoko lelei ʻe he fānaú ʻa e ngaahi kupuʻi leá, tuku leva ke nau fakatonutonu ʻenau talí ʻi hono lau ʻo e Mātiu 16:27.
Poupouʻi e maʻu ʻa e mahinó: Kole ki ha fānaú ʻe toko fā ke nau haʻu kimuʻa ʻi he lokí pea pukepuke ʻa e fakatātā ʻo Samuela ko e Leimaná, ʻaloʻi ʻo Sīsuú, ko Sīsū ʻi heʻene faiakó, pea mo e toe Hāʻele ʻAngauá. Aleaʻi mo e fānaú ʻa e fakatātā takitaha. Kole ange ki he fānau ʻoku nau pukepuke ʻa e ngaahi fakatātaá ke nau tuʻu ʻo ʻikai ʻi he hokohoko totonú. Fakaafeʻi leva ʻa e Palaimelí ke nau talaange ki he fānaú ʻa e feituʻu ke nau ʻunu ki aí koeʻuhí kae hokohoko totonu ʻa e ngaahi fakatātaá.
Ngāue ʻaki ʻa e ngaahi fakatātaá pe ko e ngaahi nāunau ki he sió ke tokoniʻi e fānaú ke nau fakafehokotaki ha tefitoʻi moʻoni pe tokāteline ki ha ʻīmisi ʻi honau ʻatamaí, ʻa ia te ne lava ʻo fakatupulaki ʻenau mahinó pea manatuʻi ʻa e meʻa kuo nau akó.
ʻOku maʻu atu ʻa e ngaahi tā valivalí ʻi he sharingtime.lds.org
Poupouʻi ke nau moʻui ʻakí: Tā ha foʻi laine ki lalo ʻi he lotomālie ʻo e palakipoé. Hiki ʻi he palakipoé “ ʻE toe hāʻele mai ʻa Sīsū Kalaisi ki māmaní ʻi ha ʻaho”. ʻI he konga ʻe taha ʻo e palakipoé tohiʻi ai ʻa e ngaahi fehuʻi ko ʻení. ʻI he konga leva ʻe tahá tohi fakamovetevete ai ʻa e ngaahi potufolofolá.
-
Ko e hā ha ngaahi meʻa fakaofo ʻe niʻihi ʻe hoko ʻi he taimi ʻe toe hāʻele mai ai ʻa Kalaisí? (Siosefa Sāmita—Mātiu 1:33, 36–37)
-
ʻE toe hāʻele mai ko ā ʻafē ʻa e Fakamoʻuí? (Siosefa Sāmita—Mātiu 1:38–40)
-
Ko e hā ʻoku totonu ai ke tau mateuteu ki he Hāʻele ʻAngauá? T&F 38:30
-
Ko e hā hono fuoloa e ʻi māmani ʻa e Fakamoʻuí? (T&F 29:11).
Kole ki he fānaú ke nau ngāue mo ʻenau faiakó ke fakatauhoa ʻa e ngaahi fehuʻí ki he ngaahi talí. Aleaʻi fakataha ʻa e ngaahi talí. Vakai foki ki he Tuʻu Maʻu ʻi he Tuí (2004), 188. Fehuʻi ki he fānaú pe te nau lava fēfē ʻo mateuteu ki he Hāʻele ʻAngauá.
Uike 4: Ke teuteu ki he Hāʻele ʻAngauá, te u muimui kia Sīsū Kalaisi.
Poupouʻi e maʻu ʻa e mahinó: Talaange ki he fānaú naʻe faʻa faiako ʻaki ʻe Sīsū ha ngaahi talanoa fakatātā, ʻo ngāue ʻaki ʻa e ngaahi taumuʻa angamaheni mo e ngaahi tūkunga ʻo e moʻuí ke akoʻi ʻaki ʻa e ngaahi moʻoni fakalaumālié. Fakamatala nounou ange ʻa e talanoa ʻo e kau tāupoʻou ʻe toko hongofulú (vakai, Mātiu 25:1–13; toe vakai foki “Ko e Talanoa Fakatātā ʻo e Kau Tāupoʻou ʻe Toko Hongofulu,” Liahona, Maʻasi 2009, 20–21). Fakamatalaʻi ko e talanoa fakatātā ko ʻení ʻoku fakafehoanaki ʻa e Hāʻele ʻAngaua mai ʻa Sīsū Kalaisí ki ha kātoanga mali. Fakaafeʻi ha niʻihi ʻo e fānaú ke nau fakatulamaʻi ʻa e talanoa fakatātaá. Fehuʻi ange ki he fānau ko ia ne nau fakatātaaʻi ʻa e kau tāupoʻou potó pe ko e hā ʻenau ongo ʻi heʻenau ʻiloʻi kuo nau mateuteú, pea aleaʻi ʻa e mahuʻinga ʻo e mateuteu ki he toe hāʻele mai ʻa e Fakamoʻuí.
Poupouʻi ke nau moʻui ʻaki: Tā ha kiʻi maama ʻi he palakipoé. Aleaʻi e founga ʻoku tau muimui ai kia Sīsū Kalaisí ʻaki hono fai e ngaahi meʻa lelei he ʻaho takitahá ʻoku tatau ia mo e ʻutu ʻo e loló ki heʻetau ngaahi māmá. Tuku ki he fānaú ke nau fakahingoa mai ha ngaahi founga te nau lava ai ʻo muimui kia Sīsū Kalaisi, hangē ko e ngāue tokoni ki he niʻihi kehé, totongi vahehongofulu, pea mo e lotu. Fakamatalaʻi ange ko e ngaahi meʻa ʻeni ʻoku fie maʻu ke nau fai fakafoʻituitui; he ʻikai lava ʻe he niʻihi kehé ʻo fai ia maʻanautolu. ʻOange ki he fānaú takitaha ha laʻi pepa kuo ʻosi kosi ʻo fakatatau mo ha foʻi tulutā ʻo ha lolo. Kole kiate kinautolu (pe ko ʻenau kau faiakó) ke tohi ʻa e “Ke mateuteu ki he Hāʻele ʻAngauá, te u muimui kia Sīsū Kalaisi ʻaki ” ʻi heʻenau ngaahi laʻipepa. Kole ange ki he fānaú ke nau fakafonu ʻi he meʻa ʻoku ʻataá pē tā ha fakatātā ʻo ha meʻa te nau lava ke fai ke mateuteu ai ki he Hāʻele ʻAngauá. Fakalotolahiʻi ʻa e fānaú ke nau ʻave ʻenau ngaahi laʻi pepá ki honau ʻapí pea vahevahe ʻa e meʻa kuo nau akó mo honau ngaahi fāmilí.
ʻOku maʻu atu ʻa e māmá mo e foʻi tulutaá ʻi he sharingtime.lds.org
Ke mateuteu ki he Hāʻele ʻAngauá, te u muimui kia Sīsū Kalaisi ʻaki