Sānuali
Ko e Ngaahi Folofolá ko e Folofola ia ʻa e ʻOtuá
Hiva: “Fanongoʻaki hoku Lotó”
(peesi 28 ʻi he fokotuʻutuʻu ko ʻení)
“Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí” (2 Nīfai 32:3).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻa e ngaahi founga ke ʻiloʻi ai ʻa e tokāteliné ʻe he fānaú pea tokoni ke mahino ia pea nau moʻuiʻaki foki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: Ko e ngaahi folofolá ko e folofola ia ʻa e ʻOtuá.
Fakamahinoʻi ʻa e tokāteliné: ʻOmai ha ngaahi tohi kehekehe (hangē ko ha tohi feimeʻatokoni, tohi talanoa pea mo ha tohi ako) ki he Palaimelí, pea fakaafeʻi ha niʻihi ʻo e fānaú ke nau fakaʻaliʻali ʻa e ngaahi tohí ni pea mo e ngaahi folofolá ki he Palaimelí. Fakaafeʻi ʻa e fānaú ke nau aleaʻi ʻa e ngaahi meʻa ʻoku faitatau pea faikehekehe ai ʻa e ngaahi tohí ni, ʻo fakakau atu ki ai mo kinautolu ne nau faʻú. Fakamahino kiate kinautolu ʻoku makehe ʻa e ngaahi folofolá, koe ʻuhí naʻe hiki kinautolu ʻe he kau palōfita ʻa e ʻOtuá pea ko e ngaahi folofola ia ʻa e ʻOtuá.
Poupouʻi e maʻu ʻo e mahinó: Talaange ki he fānaú ʻoku ʻi ai ʻa e ngaahi tohi folofola ʻe fā ʻoku ngāue ʻaki ʻi he Siasí: ko e Tohi Tapu Kātoá, Tohi ʻa Molomoná, Tokāteline mo e Ngaahi Fuakava, pea mo e Mataʻitofe Mahuʻingá. Fakamatalaʻi ange ʻoku tau ui eni ko e “ngaahi folofola.” Akoʻi ʻa e fānaú fekauʻaki mo e tohi takitaha. Fakakau atu ha niʻihi ʻo e ngaahi talanoa pe ngaahi akonaki ʻoku maʻu ʻi he tohi takitaha. Fakahoko ha vaʻinga fakatauhoa (vakai ki he IUMF, 207) mo e ngaahi hingoa ʻo e ngaahi folofolá pea mo e ngaahi fakatātā ʻokú ne fakafofongaʻi ha foʻi talanoa pe ko ha akonaki ʻoku maʻu ʻi he tohi takitaha.
Poupouʻi ke nau moʻui ʻaki: Fakaafeʻi ha konga ʻo e fānaú ke nau vahevahe ʻa e folofola ʻoku nau manako taha aí pe ko ha talanoa he folofolá. Fakalotolahiʻi kinautolu ke nau vahevahe ʻa e meʻa kuo nau ako mei hono lau ʻo e folofolá. Fakahoko hoʻo fakamoʻoni fekauʻaki mo e folofolá.
Uike 2: ʻOku fie maʻu ke tau keinanga ʻi he folofola ʻa Kalaisí.
Poupouʻi e maʻu ʻo e mahinó mo hono moʻui ʻakí: Fakamatalaʻi ʻoku ngāue ʻaki ʻe he ʻEiki ʻa e ngaahi lea ngāué ke fakamatalaʻi ʻaki ʻa e founga ke tau ako ai ʻa e ngaahi folofolá. Fakaʻaliʻali ʻa e ngaahi lea mo e ngaahi kupuʻi lea ko ʻení ʻi ha ngaahi pousitā takatakai ʻi he lokí: keinanga (vakai ki he 2 Nīfai 32:3); koloaʻaki (vakai T&F 84:85); fakatotolo faivelenga (vakai Mōsaia 1:7); piki maʻu (vakai 1 Nīfai 15:24). Palani ha ngaahi founga pe ʻaʻau ke fakahaaʻi mo fakamatalaʻi ʻa e ngaahi fakakaukaú ni ki he fānaú. Hangē ko ʻení, ʻe lava ke fakaafeʻi e fānaú ke nau fakatātaaʻi ʻa e faikehekehe ʻo e keinanga mo e kātoanga kaí ʻo e meʻakaí pea aleaʻi leva ʻene fekauʻaki mo hono ako ʻo e ngaahi folofolá. ʻE lava pē ke ke ʻeke ange ki he fānaú pe ko e hā hono ʻuhinga ʻoku nau “piki maʻu” ai ki he nima ʻo ʻenau mātuʻá ʻi ha māketi tokolahi pea fakamatalaʻi ʻa e founga te nau lava ai ʻo piki maʻu ki he ngaahi folofolá pea mo e ʻuhinga ʻoku mahuʻinga tatau ai mo e piki maʻu ki he nima ʻo ʻenau mātuʻá.
Poupouʻi ke nau moʻui ʻaki: Fakatukupaaʻi ʻa e fānaú mo e kau faiakó ke nau fokotuʻu ha ʻulungāanga ʻo e lau maʻu pē ʻo e folofolá. Fakamatalaʻi ange ko e uike takitaha, ʻe lava ʻe he fānau ko ia kuo nau lau pe fanongo ki he ngaahi folofolá ʻo tohiʻi honau hingoá ʻi ha laʻipepa pea tānaki atu ia ki ha seini pepa. Talaange kiate kinautolu ʻi he taimi ko ia ʻe lahi ai ʻa e seiní, ʻoku pehē pē ʻa e tupulaki e lahi ʻo ʻenau ʻilo ki he ngaahi folofolá. Fakakaukau ke tauhi ʻa e seiní ʻi ha puha “tauhi koloa” (ʻe lava ke ngāue ʻaki ʻa e puha ko ʻení ke akoʻi ʻaki ʻa e ʻuhinga ʻo e ʻekitivitī “mataʻikoloa ʻakí” ʻi he ʻekitivitī ʻi ʻolungá). Fakalotolahiʻi ʻa e fānaú ke nau vahevahe atu e taumuʻa ʻo ʻenau ako ʻo e ngaahi folofolá ki honau fāmilí.
ʻE lava ke hoko ʻa e seini ko ʻení ko ha fakamanatu ʻoku nau mamata ki ai ʻo e tupulaki ʻe maʻu mei he lau ʻo e ngaahi folofolá.
Nētane
Ane
Sione
ʻAnitelū
Uike 3: ʻE hanga ʻe he ngaahi folofola ʻa Kalaisí ʻo talamai ʻa e ngaahi meʻa kotoa ʻoku totonu ke tau faí.
Poupouʻi e maʻu ʻa e mahinó: Haʻi ʻa e mata ʻo ha kiʻi tamasiʻi. ʻAi ha taha ʻo e fānaú ke ne pukepuke ʻa e fakatātā ʻo Sīsū Kalaisi ʻi ha feituʻu pē ʻi he loki Palaimelí. ʻAi leva ʻa e kiʻi tamasiʻi kuo ʻosi haʻi hono matá ke ne feinga ke kumi ʻa e fakatātaá ʻo ʻikai tokoniʻi. Toe fai pē ʻa e ʻekitivitií, ka ʻi he taimi ko ʻení kole ange ki ha fānau ʻe toko ua ke na pukepuke ha vaʻakau, maea pe ha filo ke ne fakafofongaʻi ʻa e vaʻa ukameá ʻa ia ʻoku ʻalu atu mei he tamasiʻi kuo haʻi hono matá ki he fakatātā ʻo Kalaisí. Tuku leva ki he kiʻi tamasiʻí ke ne piki ʻi he maeá ki he fakatātaá. Fehuʻí: “ ʻOku anga fēfē ʻa e tatau ʻa e puke maʻu ʻo e maeá pea mo e lau ʻo e ngaahi folofolá?” (Vakai, 1 Nīfai 15:23–25.) Akoʻi ki he fānaú ʻa e tau ʻo e foʻi hiva ko ia “Ko e Vaʻa Ukamea” (Himi, fika. 172). Vahevahe ha niʻihi ʻo e ngaahi meʻa tatau ne hoko ʻi hoʻo moʻuí pea mo e hanga ʻe he folofolá ʻo akoʻi koe ki he meʻa ʻoku totonu ke ke faí. Fakamatalaʻi ange ʻa e founga hono hanga ʻe he ngaahi ako ko ʻeni ʻi he folofola ʻo tokoniʻi koe ke ke vāofi ange mo e Fakamoʻuí.
ʻOku tokoniʻi ʻa e fānaú ʻe he ngaahi lēsoni fakataumuʻá ke mahino kiate kinautolu ʻa e ngaahi fakakaukaú ni ʻi ha founga mahino ngofua pea ʻi ha founga anga maheni pē. (vakai, IUMF, 201).
Tukupā
Uike 4: ʻOku lava ke u ʻiloʻi ʻoku moʻoni ʻa e ngaahi folofolá.
Poupouʻi e maʻu ʻa e mahinó: ʻOmi ha meʻa ʻe taha pe lahi ange ʻe lava ke ako ai ʻe he fānaú hono fakaʻaongaʻi honau ngaahi ongoʻanga ʻe nimá. Hangē ko ʻení, ʻe lava ke ke ʻomai ha fuaʻi ʻakau pe ko ha matalaʻiʻakau, pe te ke tā ha foʻi hiva. ʻOange ha faingamālie ki ha niʻihi ʻo e fānaú ke nau sio, fakananamu, ala, ʻahiʻahiʻi, pe fanongo ki he meʻa kuó ke ʻomaí. (Fakakaukau ke fakahoko ʻa e ʻekitivitī ko ʻení ʻi ha fanga kiʻi kulupu iiki koeʻuhí ke maʻu ʻe he kiʻi tamasiʻi kotoa pē ha faingamālie ke ne kau ai) Fakatātaaʻi ʻoku tau toe lava pē ʻo sio, ala, nanamu, pea mo fanongo ki he ngaahi folofolá, ka ke maʻu ha fakamoʻoni ʻo e ngaahi meʻa ko iá ʻoku fie maʻu ke tau maʻu ha fakamoʻoni ʻo fakafou ʻi he Laumālié. Fakaafeʻi ʻa e fānaú ke nau hivaʻi ʻa e “Fekumi, Fifili, pea mo Lotu” (THF, 66). Kole kiate kinautolu ke nau fakafanongo lolotonga ʻenau hivá, ki ha meʻa ʻe tolu ʻe lava ke tau fakahoko ke fakaafeʻi mai ai ʻa e Laumalié ke ne fakamoʻoniʻi ʻoku moʻoni ʻa e ngaahi folofolá. Fakaafeʻi ʻa e fānaú ke nau fakatātaaʻi ʻaki honau nimá ʻa e ngaahi lea ʻo e hivá kumi, fakalaulauloto, pea lotu. Toe hivaʻi ʻa e foʻi hivá, kae ngāue ʻaki ʻa e fakatātaaʻi ʻo e nimá ʻo ne fetongiʻaki e ngaahi lea ko ʻení.
Poupouʻi ke nau moʻui ʻaki: Fakaʻaliʻali ha fakatātā ʻo Molonai, pea lau ʻa e Molonai 10:4–5. Fakaafeʻi ha niʻihi ʻo e fānaú ke nau vahevahe ʻa e ngaahi meʻa ʻoku nau ongoʻi fekauʻaki mo e ngaahi folofolá ni. ʻE lava pē ke nau vahevahe ʻa e ngaahi meʻa kuo nau fai ke lau ai ʻa e folofolá ʻi ʻapi. (Tomuʻa kole ki ha niʻihi ʻo e fānaú koeʻuhí ke ʻi ai ha taimi feʻunga ke nau teuteu ai). Poupouʻi ʻa e fānaú ke vahevahe ʻenau fakamoʻoni fekauʻaki mo e folofolá pea mo ʻenau ngaahi mātuʻá ʻi ʻapi.