Aokuso

E Faafofoga ma Tali mai le Tama Faalelagi i A’u Tatalo

“Ia e loto maulalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (MF&F 112:10).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Pese: “O Le Tatalo a le Tamaitiiti”

(TT, 6–7)

Vaiaso 1: Ua aoaoina au e tusitusiga paia i le auala e tatalo ai.

Faailoa atu le aoaoga faavae: Uu i luga tusitusiga paia ma fai atu i tamaiti e ta’u atu ia te oe nisi o mea ua tatou aoaoina mai tusitusiga paia. Ta’u atu i tamaiti o se tasi o mea e mafai ona tatou aoao mai tusitusiga paia o le auala lea e tatalo ai.

tamaiti o loo tatalo

O tamaiti lava foi e mafai ona avea o ni fesoasoani mataalia ma aoga. O lenei gaoioiga, ua maua ai e tamaiti le avanoa e faaalia ai le auala sao e tatalo ai.

Uunaia le [agaga] malamalama ma le faaaogaaga (faalogologo i se tala faatusipaia): Faamatala atu le tala ia Alema ma Amoleka o loo aoaoina atu le au sa Sorama (tagai i le Alema 31; 33–34). Valaaulia ia tamaiti e faatino mai ni taga o le auala sao e tatalo ai. Fesili atu i tamaiti po o le a le mea o loo aoao mai e le tala e uiga i le tatalo. Tusi se lisi o tali a tamaiti i luga o le laupapa. Valaaulia tamaiti e talatalanoa i le auala e faatatau ai le tala ia i latou.

Faaaloalo: O tamaiti e aoao e ala i faatinoga ma gaoioiga. Fuafua ni auala e aumai ai ma le faaaloalo se gaoioiga e aofia ai se faatinoga ia faaiuina e fesoasoani ai i tamaiti ia saunia mo le isi gaoioiga. Mafaufau e usu se pese faaaloalo.

Vaiaso 2: E finagalo le Tama Faalelagi ia ou tatalo soo atu ia te Ia—i soo se taimi, i soo se nofoaga.

Faailoa atu le aoaoga faavae ma uunaia le [agaga] malamalama (faitauina o tusitusiga paia): Ta’u atu i tamaiti e mafai ona latou tatalo atu i le Tama Faalelagi i soo se taimi, i soo se nofoaga. Fai atu ia i latou e sue le Alema 33:3–9. Faitau faatasi ia fuaiupu ma fai atu i tamaiti e sii o latou lima i taimi taitasi latou te faalogo ai i se nofoaga na tatalo ai Senosa. Tusi nofoaga nei i luga o le laupapa. Fesoasoani i tamaiti ia malamalama po o a ni uiga o nei nofoaga ia i latou i aso nei e ala i le mamanuina o ni uputusi mo ni mea faanei ona po e tutusa ma na mea (mo se faataitaiga, o se nofoaga lea sa e lagona ai le leiloa po o le tuua toatasi mo le “togavao”; lotoa, malae taalo, po o le paka mo le “fanua”; ma a tatou vasega ma sauniga i le lotu mo le “aulotu”). Fai atu i tamaiti e faafetaui ia uputusi i upu o loo i luga o le laupapa.

taliina e tamaiti ia fesili

Uunaia le faaaogaaga (talanoaina le tatalo): Vaevae tamaiti i ni vaega ma fai atu ia i latou e faasoa mai ni aafiaga i ni taimi na latou tatalo ai i nofoaga sa taua e Senosa.

o loo matamata tamaiti i le laupapa

Ia faailoa atu ma le manino le aoaoga faavae o le a aoaoina e tamaiti i vaiaso taitasi. Mafaufau e valaaulia i latou tou te ta’uina faatasi i le amataga o le taimi o le fetufaaiga.

Vaiaso 3 ma le 4: O tali i tatalo e sau mai le Tama Faalelagi i le tele o auala.

Faailoa atu le aoaoga faavae (taaalo i se taaloga): Ao lei amataina le Peraimeri, tusi i luga o le laupapa, “o tali i tatalo e sau mai le Tama Faalelagi i le tele o auala,” ma ufiufi ia upu taitasi i se isi fasi pepa. Fai atu i se tamaitiiti e aveese se fasi pepa e tasi, ma fai atu i tamaiti e mate mai po o le a le fesili. Toe fai seia iloa e tamaiti le fesili, ma fai atu ia i latou e faitau faatasi mai.

Tusitusiga paia: E taua mo tamaiti ona aoao i upumoni o le talalelei mai tusitusiga paia. Uu ia tusitusiga paia ao e aoao mai ai.

Uunaia le [agaga] malamalama (faitauina o tusitusiga paia): Ta’u atu i tamaiti sa tatalo Iosefa Samita ina ia iloa po o fea o lotu e auai. Faitau faatasi le Iosefa Samita—Talafaasolopito 1:17 e iloa ai pe na faapefea ona tali mai lana tatalo (e ala i se asiasiga mai le Tama Faalelagi ma Iesu Keriso). Ta’u atu i tamaiti sa tatalo Alema ina ia iloa e lona atalii o, Alema le Itiiti, le upumoni. Faitau faatasi le Mosaea 27:11 e iloa ai le auala na tali ai le tatalo a Alema (sa faaali se agelu ia Alema le Itiiti). Faamatala atu o le tele o tali o tatalo e oo mai i nisi o auala. Tusi i nisi fasi pepa ia mau nei e faamatala mai ai ni auala e ono tali mai ai ni tatalo: MF&F 6:22–23 (e ala i ni lagona toafilemu); MF&F 8:2 (e ala i manatu o o tatou mafaufau ma lagona i totonu o o tatou loto); Mosaea 27:36 (e ala i galuega a isi tagata); ma le 2 Nifae 32:3 (e ala i tusitusiga paia). Tuu ia fasi pepa i totonu o se konateina. Fai atu i se tamaitiiti e aumai i fafo se fasi pepa se tasi ma faitau. Sue le mau faasino, faitau faatasi ma fai atu i tamaiti po o le a le mea o loo aoao mai e mau taitasi e uiga i le auala e tali ai e le Tama Faalelagi ia tatalo.

Uunaia le faaaogaaga (faalogologo i tala): Valaaulia ni malo se toa fa e faasoa mai se tala o loo faailoa mai ai se tasi o auala o loo taliina ai ni tatalo. E mafai ona oo mai ni faataitaiga mai ni aafiaga, mekasini a le Ekalesia, po o tusitusiga paia. Valaaulia ia tamaiti e fesili atu i o latou aiga i le fale e uiga i taimi na taliina mai ai a latou tatalo.

Fesoasoaniga mo le taitai musika

Ina ia fesoasoani i tamaiti e aoao le pese “O Le Tatalo a le Tamaitiiti” (TT, 6–7), mafaufau i mea nei:

• Fai atu i tamaiti e mafaufau faapea na umi se taimi sa latou o ese mai ai o latou aiga ma ua toe foi mai; ua latou tatalaina le faitotoa ma ua siosiomia i le alofa ma le mafanafana. Faamatala atu o le tatalo e pei lava o le tatalaina atu o se faitotoa i le Tama Faalelagi; o loo i ai moni lava o Ia iina e faamafanafana ma alofa ia i tatou, ma e finagalo o Ia e faafofoga ma tali mai i tatalo a tamaiti uma lava.

• Fai atu i tamaiti e faalogo i upu “iina” ma le “tatalo” ao e usuina fuaiupu muamua e lua o le pese “O Le Tatalo a le Tamaitiiti.” Fai atu i tamaiti e fetagofi i o latou taliga pe a latou faalogo i upu. Valaaulia i latou tou te usuina faatasi fuaiupu na. Faaauau le pese atoa, fai atu i tamaiti e faalogo i upu e tutusa faaleoga i laina taitasi.

• Usu faasolosolo i fuaiupu le vaega lona lua, ma fai atu i tamaiti e toe usu fuaiupu taitasi pe a e tusi i ai. Ona vaevae lea o tamaiti i ni vaega se lua ma fai atu i se tasi o vaega e usu le vaega muamua o fuaiupu taitasi (mo se faataitaiga, “Ole”) ma le isi vaega e usu faauma le fuaiupu (“ia te Ia”). Valaaulia tamaiti uma e tutu ma pepese, “E pei o le malo, le malo o le lagi.”

o tamaiti o loo pepese