Tesema

Ou Te Iloa o le a Toe Afio Mai Iesu Keriso

“Aua ua ou iloa, o loo soifua le na te togiolaina au, o aso amuli foi e tulai mai ai o ia i luga o le eleele” (Iopu 19:25).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: Sa valoia e perofeta le toe afio mai o Iesu Keriso i le lalolagi.

Uunaia le [agaga] malamalama (faitauina o mau): Faaali atu ni ata o Isaia, Nifae, Tupu o Peniamina, Apinati, Alema, ma Samuelu le Sa Lamana mai le Tusi Ata o le Talalelei ma le pepa ata a le Peraimeri 4. Vaevae tamaiti i ni vaega, ma tuu atu i vaega taitasi e sue se mau e tasi o mau nei: (1) Isaia 7:14; 9:6; (2) 1 Nifae 11:14–15, 20–21; (3) Mosaea 3:5–8; (4) Mosaea 15:1; (5) Alema 7:10–12; ma le (6) Helamana 14:1–3. Fai atu i tamaiti e vaai po o ai le perofeta lea o loo saunoa mai ma po o ai o loo ia valoiaina. Fai atu i vaega taitasi e faaali mai le ata o le perofeta ma fesili atu i isi tamaiti po o ai o ia ma po o ai foi o loo ia saunoa atu i ai. (Mo tamaiti laiti, fesoasoani e fai ni teuga faigofie a ni tamaiti se toaono e faailoa mai ai perofeta ia e toaono. Fai atu ni faamatalaga pupuu e uiga i perofeta taitasi ma mea sa latou ta’u maia e uiga i le fanau mai ma le misiona a Iesu Keriso.) Faamatala atu sa valoia e nei perofeta taitasi le afio mai o Iesu Keriso i le lalolagi. Usu le pese “Samuel Tells of the Baby Jesus” (CS, 36). Molimau atu sa afio mai Iesu Keriso i le lalolagi e pei ona valoia e perofeta.

Molimau: Ao musuia ai oe, tuu atu lau molimau e uiga i le aoaoga faavae sa e aoaoina atu. E mafai ona molimau atu le Agaga Paia i tamaiti taitasi e uiga i le moni o mea sa e tauina atu. O le tuuina atu o lau molimau o le a fesoasoani lea i tamaiti ina ia lagonaina le Agaga ma musuia ai i latou ina ia faamalolosia a latou molimau.

Vaiaso 2: O le a toe afio mai Iesu Keriso i le lalolagi.

Faailoa atu le aoaoga faavae: Faaali atu se ata o le Afio Mai Faalua (TAT, nu. 66). Faamanatu i tamaiti sa afio mai muamua Iesu Keriso i le lalolagi ao pepe i Peteleema. Faailoa atu ua tatou aoaoina i tusitusiga paia o le a toe afio mai o Ia i le lalolagi.

Uunaia le [agaga] malamalama (taaalo i se taaloga faatusatusa): Fai ni seti tutusa se lua o mau faasino nei, ia tofu mau faasino ma se fasi pepa: Mataio 16:27; Mataio 24:30, 36, 42; Galuega 1:9–11; MF&F 36:8; MF&F 45:57–59; MF&F 88:95–98. Faapipii faau i tua ia pepa i luga o le laupapa. Tuu atu i tamaiti latou te auauai i le filifiliina o ni fasi pepa se lua. Liliu ia fasi pepa seia iloa pe e tutusa. Afai e le tutusa, toe faafao. Afai e tutusa, faaali pea le mau ae fai atu i tamaiti e sue le mau faasino ina ia iloa po o le a se mea o loo aoao mai e uiga i le toe afio mai o Keriso. Toe fai seia tutusa uma.

Fetuunai ia gaoioiga: Fetuunai ia gaoioiga e tusa ma punaoa o loo e maua ma mo tamaiti o lau Peraimeri. Mo se faataitaiga, mo le gaoioiga faatino i le vaiaso 3, e mafai ona e valaauliaina ia tamaiti e tuu i luga se tamatamailima se tasi mo mea taitasi e mafai ona latou faia e sauniuni ai nai lo le tusiina o o latou manatu i luga o se fasi pepa.

Vaiaso 3: O le a ou saunia ma te toe nonofo faatasi ma le Tama Faalelagi ma Iesu Keriso.

Faailoa atu le aoaoga faavae (taaalo i se taaloga taumatemate): Valaaulia ni tamaiti se toalua pe toatolu e faatino mai i taga le sauniuni e alu e moe, i le lotu, po o le alu i se malaga umi. Tuu atu i isi tamaiti e mate mai le mea o loo latou faia. Talanoa faatasi ma tamaiti po o le a le mea e tupu pe afai tatou te le o saunia e fai nei mea. Faamatala atu o se tasi o mea taua e tatau ona tatou sauniuni ai o le toe nonofo faatasi lea ma le Tama Faalelagi ma Iesu Keriso.

faatino e se tamaitiiti le alu e moe

O gaoioiga faatosina, e pei o le faatino o ni taga, e mafai ona faaaoga e fausia ai le naunau mai ma fesoasoani ai i tamaiti ina ia taulai atu o latou mafaufau i le autu o le lesona. O i latou e le o auai o le a auai a o latou matamata i isi tamaiti.

Uunaia le [agaga] malamalama (usu ni pese): Usu le fuaiupu lona tolu o le pese “O Au o se Atalii o le Atua” (TT, 2–3), ma fai i tamaiti e faalogologo i le auala e mafai ai ona tatou saunia e toe nonofo faatasi ma le Tama Faalelagi. Fai i tamaiti e tutu ma toe usu le fuaiupu “Ou te faatasi ma Ia i Lona maota”. Faamatala atu o nisi o pese o le Peraimeri e faamanatu maia ia i tatou mea e mafai ona tatou faia e saunia ai e toe nonofo faatasi ma le Tama Faalelagi ma Iesu Keriso (mo se faataitaiga, “O Le a Ou Mulimuli i le Fuafuaga a le Atua” [TT, 86–87], “Tausi Poloaiga” [TT, 68–69], “O Le Agalelei e Amata ia te Au” [TT, 83], ma le “Pe A Ou Papatiso” [TT, 53]). Fai atu i le ta piano e ta ni nai nota mai se tasi o pese nei, ma fai i tamaiti e mate mai po o le a le pese lea. Valaaulia tamaiti e usu le pese ma tutu i luga pe a latou ta’ua e uiga i le auala latou te saunia ai e nonofo faatasi ma le Tama Faalelagi. Toe fai mo isi pese.

Uunaia le faaaogaaga (tusiina ni ata): Fai atu i tamaiti e mafaufau i ni auala latou te saunia ai e nonofo faatasi ma le Tama Faalelagi ma Iesu Keriso. Ia tofu tamaiti ma se fasi pepa, ma fai atu ia i latou e tusi mai se auivi o latou lima. Ona fai lea i ai e tusi se faamatalaga po o se ata e tasi i luga o tamatamai lima taitasi o le auivi e uiga i se mea e mafai ona latou faia e sauniuni ai. Fai i tamaiti e filifili se mea se tasi o na mea e galue i ai i le vaiaso. Fai i ai o le a e fai atu ia i latou e faasoa mai i le Aso Sa a sau se mea sa latou faia.

faapotopoto tamaiti e siomia le piano ma pepese

Vaiaso 4: E i ai la’u molimau o au o se atalii o le Atua.

Faailoa atu le aoaoga faavae (taaalo i se taaloga taumatemate): Tusi i luga o le laupapa, “E i ai la’u ______________.” Fai i tamaiti e faalogologo i faaataataga nei ma piilima o latou lima ma tutu i luga pe a latou iloa e mafai ona latou faatumuina le avanoa:

• O lenei mea tatou te maua ai lagona lelei, fiafia, po o le mafanafana i totonu.

• E aumaia e le Agaga Paia lenei mea ia i tatou.

• E fesoasoani lenei mea e faaosofia i tatou e faia ni filifiliga sao.

• E mafai ona tatou faasoaina atu lenei mea i isi pe a fai ni a tatou lauga i le Peraimeri, i afiafi faaleaiga, ma le sauniga anapogi ma molimau.

Fesili atu: “O le a lenei mea matagofie?” Faatumu le avanoa i le upu molimau, ma fai atu i tamaiti e mafai ona maua se latou molimau faapea o i latou o ni fanau a le Atua.

O le tusiaina o se mataupu faavae o le talalelei o le a fesoasoani lea i tamaiti e manatua ai.

Uunaia le [agaga] malamalama (usuina o se pese): Valaaulia ia tamaiti e usu le pese “O Au o se Atalii o le Atua” (TT, 2–3), ma fesili atu ia i latou po o a ni o latou lagona i totonu ao latou usuina le pese. Fesili atu i nisi o tamaiti e faasoa mai ni o latou lagona. Ta’u atu i ai o lagona lelei, atonu sa latou faalogonaina sa maua mai lea mai le Agaga Paia, na tauina atu ia i latou e moni lava o i latou o fanau a le Atua. Faamatala atu o le iloaina e moni lenei mea o lona uiga o le i ai lea o se molimau. Fai atu i ai e tele ni auala e iloa ai o i tatou o ni fanau a le Atua. Fesili atu: “E faapefea ona e iloa o oe o se atalii o le Atua?”

Uunaia le faaaogaaga (faalogologo i molimau): Fesili atu i tamaiti: “Aisea e taua ai le mauaina o se molimau faapea o i tatou o ni fanau a le Atua? E faapefea ona fesoasoani le i ai o se molimau tatou te faia ai ni filifiliga sao?” Faasoa atu lau molimau ma valaaulia nisi o tamaiti ma tagata matutua e faasoa mai o latou molimau o i tatou uma o ni fanau a le Atua.