Ua Aoaoina i Tatou e Perofeta ina ia Ola i le Talalelei Toefuataiina

“E le faia lava se mea e le Alii o Ieova, ae faaalia Lona finagalo i Ana auauna o perofeta” (Amosa 3:7).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1 ma le 2: O loo taitaia le Ekalesia e le perofeta soifua i lalo o le taitaiga a Iesu Keriso.

Faailoa atu le aoaoga faavae (vaaia o ata ma taaalo i se taaloga): Faaali atu se ata o le perofeta soifua. Fai atu i tamaiti e auauai i le taitaiina o le Peraimeri i ni taga faigofie e pei o le osooso po o le patipati o o latou lima. Faasino i le ata o le perofeta ma faamatala atu o ia o le Peresitene o le Ekalesia ma e tatau ona tatou mulimuli i mea ua ia fai mai ia i tatou e fai. Fesili atu: “O ai e mulimuli i ai le perofeta?” Faaali atu se ata o Iesu Keriso, ma faamatala atu o le perofeta e galue i lalo o Lana taitaiga.

Uunaia le [agaga] malamalama (talatalanoa i aoaoga a le perofeta): Faaali atu i tamaiti se lomiga lata mai o le konafesi i le Ensign po o le Liahona. Faamatala atu o le taimi o le konafesi aoao, e aoao ai i tatou e le perofeta i mea e finagalo Iesu Keriso tatou te faia. Filifili ni fuaiupu mai lauga a le perofeta, ma valaaulia tamaiti e faitau leotele mai. Fai faatasi se lisi o mea e mafai ona fai e tamaiti e mulimuli ai i le perofeta.

Uunaia le faaaogaaga (tusiina o se ata): Tuu atu i tamaiti taitasi se fasi pepa. Fai atu i ai e gaugau faaafa. Fai atu i ai e tusi se ata o le perofeta i le isi afa o le pepa ae tusi i le isi afa se auala se tasi o le a latou mulimuli ai i le perofeta. Valaaulia tamaiti e tutu ma uu a latou ata ao latou usuina le tali o le pese “Mulimuli i le Perofeta” (TT, 58).

Mo le vaiaso 2, aoao atu i tamaiti se mea na aoaoina mai e le perofeta i se konafesi aoao lata mai. Ao e fuafuaina gaoioiga o le a faaaogaina, mafaufau e uiga i le auala o le a e faailoa atu ai le aoaoga a le perofeta ma fesoasoani i tamaiti ia malamalama i ai ma faaaogaina i o latou olaga.

Vaiaso 3: Ua aoaoina au e perofeta e totogi le sefuluai.

Faailoa atu le aoaoga faavae (faitauina o se mau ma faalogologo i se tala): Faamalamalama atu o Malaki o se perofeta o le Feagaiga Tuai o lē na aoaoina tagata e totogi a latou sefuluai. Fai atu i se tamaitiiti e faitau le Malaki 3:10 ao faalogologo isi tamaiti i mea na folafola mai e le Alii ia i tatou pe a tatou totogiina le sefuluai. Faamatala atu o le “toina o pupuni o le lagi” e faatatau lea i faamanuiaga tatou te maua pe a tatou totogiina le sefuluai.

Uunaia le [agaga] malamalama (vaaia o se lesona faatino): Valaaulia ni tamaiti se toa 10 i luma o le potu. Ia tofu i latou ma se apu se tasi (po o se isi fualaau aina suamalie) ma fai i ai e uu i luga a latou apu ma faafoliga o i latou o ni laau o le apu. Fai atu i se isi tamaitiiti e “tau” ia apu ma tuu i totonu o se ato. Faamatala atu o le sefuluai o le tasi vae-sefulu o mea tatou te maua ma e masani ona totogi i tupe, ae sa i ai ni taimi sa totogi ai e tagata i soo se mea sa latou mauaina. Fesili atu pe fia ni apu e avatu e le tamaitiiti i le epikopo mo le sefuluai.

Uunaia le faaaogaaga (talatalanoa i le sefuluai): Faaali atu se lisiti o le sefuluai ma se teutusi. Talanoa i le faagasologa o le totogiina o le sefuluai. Valaaulia ia tamaiti e faasoa mai pe na faapefea ona faamanuiaina o latou aiga e ala i le totogiina o le sefuluai. Molimau atu i faamanuiaga e oo mai ona o le usiusitai i fautuaga a perofeta e totogi le sefuluai.

Vaiaso 4: Ua aoaoina au e perofeta ia ola i le Upu o le Poto.

Faailoa atu le aoaoga faavae (faitauina o se mau): Fai atu i tamaiti e ta’u mai se taimi na lapataia ai i latou e o latou matua e uiga i se tulaga matautia. Fesili atu ia i latou pe aisea na lapataia ai i latou e o latou matua. Faamatala atu e alofa le Tama Faalelagi ia i tatou ma e lapataia i tatou i tulaga matautia e ala mai i Ana perofeta. Fai atu i se tamaitiiti e faitau le Mataupu Faavae ma Feagaiga 89:4, ma fai atu i tamaiti e faalogo po o le a le igoa o lenei lapataiga. Faamatala atu na maua e le Perofeta o Iosefa Samita lenei lapataiga, o le Upu o le Poto, o se faaaliga mai le Atua.

Uunaia le [agaga] malamalama (faitauina o tusitusiga paia): Ao lei amata le Peraimeri, faapipii ia mau faasino nei i lalo o ni nofoa eseese: MF&F 89:7, MF&F 89:8, MF&F 89:9, MF&F 89:10, MF&F 89:12, MF&F 89:16. Faamatala atu na tuuina mai ia i tatou e le Tama Faalelagi o tatou tino faaletino ma e finagalo o Ia ina ia tatou tausiaina; ua Ia tuuina mai ia i tatou le Upu o le Poto e fesoasoani tatou te iloa ai mea o le a fesoasoani i o tatou tino ma mea foi o le a faaleagaina ai. Fai atu i tamaiti e vaai i lalo o o latou nofoa e saili ai ia mau faasino. Valaaulia tamaiti taitasi e na mauaina se mau faasino e faitau leotele mai le mau. Talatalanoa faatasi po o le a le uiga o mau taitasi. Faamalamalama atu o “meainu malolosi” o alakaholo ao “meainu vevela” o le kofe ma le lauti.

Uunaia le faaaogaaga (taaalo i se taaloga): Tuu i totonu o se taga ni ata o ni meaai eseese, vaiinu, ma nisi mea e lelei pe leaga foi mo le tino. Valaaulia se tamaitiiti e filifili se ata mai le taga ma faaali atu i isi tamaiti. Fai atu i tamaiti e tatala o latou gutu pe afai e lelei lea mea po o le ufiufi foi pe afai e leaga. Faitau le Mataupu Faavae ma Feagaiga 89:18–21 ma talanoa i faamanuiaga tatou te maua pe a tatou mulimuli i le fautuaga a le perofeta e ola i le Upu o le Poto.

tamaiti o loo matamata i ata — E mafai e tamaiti ona aoao e ala i gaoioiga ma faatinoga malie ma tausisia pea se uiga o le faaaloalo.

Fesoasoaniga mo le taitai musika

O le pese mo le masina lenei o le “Ia Viia Oe Le Atua” (Viiga, nu. 10). O nisi nei o aitia e mafai ona faaaoga e aoao atu ai soo se pese. E ui o loo faaaoga ia uputusi i le faataitaiga lenei, ae o nisi o pese e mafai ona faaaoga ai ata e aoao ai tamaiti laiti.

Tusi fuaiupu taitasi o le pese i se uputusi lanu ese (po o le tusi o fuaiupu taitasi i lanu eseese). Vaevae fuaiupu taitasi i ni vaega se lua. Faaaoga soo se metotia nei e aoao atu ai le pese:

Faapipii solo i soo se faasologa ia uputusi uma i totonu o le potu. Tuu atu i nai tamaiti e faapipii ni fuaiupu i le faasologa sao ao outou usuina pea lava pea faatasi ma tamaiti le pese. Usu ma talanoa i fuaiupu taitasi, ona usu lea o le pese atoa.
Amata i uputusi ia o loo i luga o le laupapa. Usu faatasi le pese ma tamaiti. Fai atu i se tamaitiiti e aveese se uputusi se tasi, ona toe usu lea o le pese. Toe usu seia maea ona aveese uma ia uputusi.
Faapipii le vaega muamua o fuaiupu taitasi i luga o le laupapa i le faasologa sao ae faapipii ia vaega lona lua i luga o le laupapa i soo se faasologa. Usu le vaega muamua o le fuaiupu ma fai atu i tamaiti e sue le vaega lona lua o le fuaiupu ma faamatala mai po o le a le uiga o le fuaiupu.
Vaevae tamaiti i ni vaega se lua. Tuu atu i se vaega e tasi e usuina le vaega muamua o fuaiupu taitasi ma le isi vaega e usuina le vaega lona lua. Fesuiai vaega ma toe fai.