Oketopa
O Le A Ou Faasoaina atu le Talalelei i Fanau Uma a le Atua
“Ia pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” (Mataio 5:16).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: O le ola ai i le talalelei ua fesoasoani lea ia te au ia avea ma se faifeautalai i le taimi nei.
Faailoa atu le aoaoga faavae ma uunaia le [agaga] malamalama (faalogologo i se tala): Faaali atu se ata o faifeautalai. Fesili atu i tamaiti po o a mea a faifeautalai e fai. Faasoa atu le tala lenei po o se tasi mai le Friend po o le Liahona: “I se tasi aso sa tuitui ai e faifeautalai se toalua le faitotoa o se fale. Sa tatalaina le faitotoa e se tina e igoa ia Mrs. James. Sa ta’u atu ia te ia e faifeautalai la te o mai mai Le Ekalesia a Iesu Keriso o le Au Paia o Aso e Gata Ai. Sa valaaulia e Mrs. James faifeautalai i totonu ma fai atu ia i laua na te fia aoao atili e uiga i le Ekalesia. … Sa ta’u atu e Mrs. James i faifeautalai sa sosoo lona fale ma se aiga e auai i le Ekalesia. Fai mai a ia o tamaiti e matua faaaloalo ma agalelei i taimi uma. Sa latou faamaoni i tagata uma ma tausia ma le faaaloalo meatotino a isi tagata. Fai mai Mrs. James e na te fia aoao e uiga i le ekalesia lea na aoaoina na fanau e avea ma ni tuaoi lelei” (Peraimeri 2, 52). Fesili atu: “Na faapefea ona avea ia tamaiti ia na nonofo i le fale na sosoo ma Mrs. James ma faifeautalai?” Faamatala atu, soo se taimi lava tatou te ola ai i le talalelei ua avea i tatou ma faifeautalai. Fai atu i tamaiti tou te fai faatasi mai “O le ola ai i le talalelei ua fesoasoani lea ia te au ia avea ma se faifeautalai i le taimi nei,” faamamafa atu le upu nei.
Vaiaso 2: O le ola ai i le talalelei ua fesoasoani lea ia te au ia avea ma se faifeautalai i le taimi nei.
Uunaia le [agaga] malamalama (usuina o se pese ma talanoaina ia tulaga faatonuina o le talalelei): Fai ni kata se 13, ia tofu kata ma le faaupuga “O Ou Tulaga Faatalalelei” o tusia ai i luga (tagai i le “Sharing Time: Keep the Commandments,” Friend, Iuni 2006, 36). Tufa atu i tamaiti ni kata, ma fai atu i ai e fepasiai ia kata i isi ao usuina e tagata uma le pese “Ou Te Fia Avea Nei Ma Faifeautalai” (TT, 90). A uma le pese, fai atu i tamaiti taitasi o loo uuina se kata e faitau leotele mai ia tulaga faatonuina ona faasoa mai lea pe faapefea ona fesoasoani le ola ai i na tulaga faatonuina ina ia avea ai o ia ma faifeautalai i le taimi nei. Toe fai, ae faaaoga ni kata ese i taimi taitasi.
O le usuina o se pese e uiga i se aoaoga faavae o le a fesoasoani lea i tamaiti e aoao ma manatua ai. O le a sili atu foi ona aoaoina e tamaiti pe a vaai i se mea faitino pe fai se gaoioiga e o faatasi ma se musika.
Uunaia le faaaogaaga (faatuina ni sini): Fai atu i tamaiti taitasi e filifili se tasi o tulaga faatonuina o le talalelei o le a latou taumafai i le vaiaso a sau e ola ai. Fai atu i ai e tusi se faamatalaga pe tusi foi se ata o le tulaga faatonuina i se fasi pepa ma vaavaai i ai i aso uma e avea o se faamanatu. Valaaulia i latou e lipoti mai a latou aafiaga i le vaiaso a sau i le Peraimeri.
Vaiaso 3: E mafai ona ou faasoaina atu le talalelei i lo’u aiga ma uo.
Faailoa atu le aoaoga faavae (faalogologo i se tala): Ao lei amataina le Peraimeri, faitau i le lauga o le konafesi a Elder Robert C. Oaks ia Oketopa 2000, “Fetufaiina O Le Talalelei” (tagai i le Liahona, Ian. 2001, 95–97). Faamatala atu i tamaiti le tala o le vai moli. Faamalamalama atu e sili mamao atu ona suamalie le talalelei nai lo le vai moli ma e tatau ona tatou faasoaina atu i isi. Fai atu i tamaiti e fai mai, “E mafai ona ou faasoaina atu le talalelei i lo’u aiga ma uo.”
Uunaia le [agaga] malamalama (faalogologo i se failauga faapitoa): Valaaulia se faifeautalai po o se faifeautalai ua maea lana misiona e talanoa atu i ni auala e mafai ai e tamaiti ona faasoa atu le talalelei i isi (e pei o le avea ma ni faataitaiga lelei, valaaulia o ni uo i le Peraimeri, ma le faasoaina atu o a latou molimau) ma le auala o loo fesoasoani ai i le Tama Faalelagi ma faifeautalai a latou taumafaiga i le faasoaina atu o le talalelei.
Uunaia le faaaogaaga (faalogologo i se tala ma fetufaai atu manatu): Faamanatu atu i tamaiti e mafai ona avea i latou ma faifeautalai i le taimi nei. Faamatala atu se taimi sa e faasoaina atu ai le talalelei po o se tasi foi lua te masani. Fai atu i tamaiti e tutu auauai ma fai mai upu taitasi o le fuaiupu “E mafai ona ou faasoa atu le talalelei.” Fai atu i le tamaitiiti na fai mai “talalelei” e mafaufau i se auala e mafai ona ia faasoa atu ai le talalelei i aiga po o uo. Ia toe fai pe a lava le taimi.
Vaiaso 4: E faamalosia lau molimau pe a ou faasoaina atu le talalelei.
O lesona faatino e faaosofiaina le fiafia ma taulai atu ai mafaufau o tamaiti i mataupu faavae o le talalelei.
Faailoa atu le aoaoga faavae (vaaia o se lesona faatino): Faatumu i vai se konateina manino. Faamatala atu o soo se taimi lava tatou te faasoa atu ai le talalelei, o le a faamalosia atili a tatou molimau. Faatulutulu i totonu o le konateina se mataua o le vailanu faimeaai. Ta’u atu ni nai faataitaiga o le auala tatou te faasoaina atu ai le talalelei, ma faaopoopo atu se isi mataua o le vailanu mo faataitaiga taitasi. Faailoa atu e pei lava foi ona amata ona malosi le lanu o le vai ona o mataua taitasi, e faapena foi ona tuputupu ae malosi a tatou molimau i taimi uma lava tatou te faasoaina atu ai le talalelei.
Uunaia le [agaga] malamalama (talanoaina o molimau): Tuu mea nei i totonu o se taga: o se ata o Iesu Keriso, o se ata o Iosefa Samita, o se ata o le perofeta o loo i ai nei, o se Tusi a Mamona, ma upu “Ekalesia moni.” Tusi le upu molimau i luga o le laupapa, ma fesili atu i tamaiti po o le a le molimau. Talanoa i a latou tali. Faamatala le tala lenei: “Sa fefe se teine talavou e tuu atu lana molimau ona sa lagona lona le mautonu. Peitai sa ia iloa e taua, i se tasi aso sa tu ai ma le lototoa ma tuu atu lana molimau, ma lisiina ni mea se lima sa ia talitonu ai. Ina ua maea lana molimau, sa lelei ona lagona ma sa ia iloa ua tuputupu ae malosi lana molimau.” Fai atu i tamaiti e saili po o a mea e lima ia sa ia molimau i ai e ala i le aumai i fafo o aitema mai le taga lea sa e saunia. Talanoa e uiga i aitema taitasi, ma faaali atu i luma o le potu.
Uunaia le faaaogaaga (fetufaai ni faataitaiga): Tuu atu i tamaiti taitasi e faasoa mai se faataitaiga e mafai ona ia faasoaina atu ai le talalelei. O taimi uma lava e ta’u mai ai e se tamaitiiti se mea, faaopoopo se mataua o le vailanu i totonu o le konateina vai e faailoa atu ai e mafai ona faamalolosia molimau pe a faasoa atu le talalelei. (Afai e toatele lau Peraimeri, atonu e te manao e fai lenei mea i ni vaega ina ia tofu maua uma e tamaiti se avanoa e faasoa ai manatu.)