Auala e Faaaoga ai Musika i le Peraimeri

O le faamoemoega o musika i le Peraimeri o le aoao atu lea i tamaiti o le talalelei a Iesu Keriso. O pese o le Peraimeri e faaosofia ai le naunau e aoao, valaaulia le Agaga, ma fausia ai se siosiomaga faaaloalo e lelei mo aoaoga (tagai i le Tusitaulima 2: Taitaiina o le Ekalesia [2010], 11.2.4).

Pe a sauniuni e aoao atu se pese, fesili ifo ia te oe lava: E mafai faapefea ona ou faatosina mai ia mafaufau o tamaiti? O a ni fesili e mafai ona ou fesiligia e fesoasoani ai i tamaiti ia malamalama i le savali o le talalelei o loo i le pese? O a ni metotia e mafai ona faaaogaina e aoao ai lenei pese? O nisi nei o metotia e mafai ona e faataitaia. O faataitaiga o le a fesoasoani ia te oe i pese o loo fautuaina mai i lenei otootoga. Mo nisi manatu faaopoopo, tagai i le vaega o le Peraimeri o le Serve and Teach i le LDS.org ma le vaega o “Auala e Faaaoga ai Musika i le Peraimeri” i otootoga o le 2015, 2016, ma le 2017.

Fetuunai ia gaoioiga: O nisi o manatu faaleaoaoga o loo faamatalaina i i o le a sili ona aoga mo tamaiti laiti. Fetuunai au metotia faaleaoaoga mo tamaiti e eseese le matutua ina ia mafai ona faaaofia uma i latou i le aoaoga ma pesepesega.

Faamamafa atu ia mataupu faavae o le talalelei o loo i totonu o le pese.

Mafaufau i manatu nei ao e aoao atua le pese “E Mafai Ona Faavavau Aiga” (TT, 98). Fai atu i tamaiti e faalogologo mo se vaega o le fuafuaga a le Tama Faalelagi ao e usuina le laina muamua o le pese ma tutu i luga pe a latou iloaina (aiga). Valaaulia ia tamaiti tou te usuina faatasi le laina lena. Faailoa atu o le fati mo le vaega “i lalo nei” ma le “alolofa ia te au” e mulimuli i le mamanu lava e tasi, ma ia fai atu i tamaiti e usu upu na. Fai atu ia i latou e faalogologo i le isi vaega o le pese e iloa ai po o le a le umi e mafai ai ona faatasi o latou olaga ma o latou aiga. Usu le laina lona lua, ma faamamafa atu ia upu “e faavavau.” Ia valaaulia ia tamaiti tou te usuina faatasi le laina lena, ona usu faatasi lea o laina uma e lua. Fai atu i tamaiti e faalogologo mo se isi upu o lona uiga “e tumau e faavavau” o loo i le tali. Usu le, “E mafai ona faavavau aiga,” ma fai atu i ai latou te toe usuina mai ia te oe. Usu ae toe usu mai latou, “I Le Ala a le Alii.” Fesili atu po o le a le fuafuaga a le Tama Faalelagi, ma faamanatu atu i tamaiti e finagalo o Ia ina ia latou faaipoipo i le malumalu ma maua ni o latou lava aiga e faavavau. Faauma le aoaoina o le tali e ala i le usuina o fuaiupu ma valaaulia ia tamaiti e toe usu mai.

Faataitaiga:Ina ia lelei le aoaoina atu o se pese, e tatau lava ona e iloaina le pese. Fai se faataitaiga i le fale ina ia mafai ona e tilotilo sao atu i tamaiti ao e aoaoina i latou.

pese le taitai musika

Ina ia fesoasoani i tamaiti ia iloa le fati o le pese, “taofi lou lima i se tulaga faalava, ma ao usuina ia upu, ia sii lou lima i luga e faailoa ai ia vaega maualuluga, ma tuutuu i lalo e iloa ai vaega maualalalo”.

Faaaoga mea faitino e fesoasoani ai i tamati e aoao ma manatuaina upu.

aoao atu

O loo maua mea faitino i le sharingtime.lds.org

Mafaufau i manatu nei ao e aoao atu le pese “Pe ana Tu le Faaola i Ou Autafa” (itulau 28 o le otootoga lenei):

• Fai se uputusi mo fuaiupu taitasi o le pese, ma sue se ata e faatatau i uputusi taitasi. Tuu ata i le isi itu o le potu ae tuu uputusi i le isi itu. Talatalanoa faatasi ma tamaiti po o a ni o latou uiga pe ana faapea ua latou vaai atu o tu le Faaola i o latou autafa. Usu le pese, ma fai atu i tamaiti e faafetaui ia ata i upu.

• Fai i tamaiti tou te usuina faatasi le pese ao e faasino i ata.

• Tuu atu i vasega taitasi se fuaiupu se tasi e usu ao tutu i luga, ona sui lea o fuaiupu seia tofu usuina uma e vasega taitasi ia fuaiupu taitasi.

Molimau atu: Molimau puupuu atu i tamaiti e uiga i upumoni o le talalelei o loo maua i pese o le Peraimeri. Fesoasoani atu i tamaiti ia malamalama o le usuina o pese o se tasi lea o auala e mafai ai ona latou tuuina atu se molimau ma lagonaina ai le Agaga.

Faaaoga ni taga talafeagai e faaaofia mai ai tamaiti ma fesoasoani ai ia i latou ia manatua le pese.

Mafaufau i manatu nei ao e aoaoina atu le pese “E Alofa Lo’u Tama Faalelagi Ia Te A’u” (TT, 16–17). Fesili i tamaiti pe na faapefea ona faaalia lo latou alofa i tagata o le aiga. Fesili atu pe na faapefea ona faaalia e le Tama Faalelagi Lona alofa mo i latou. Faamatala atu sa Ia fausia lenei lalolagi matagofie mo i latou aua e alofa o Ia ia i latou. Usu auauai i tamaiti fuaiupu o le pese, ma fai atu i ai tou te pepese faatasi ma latou faatinoina taga o vaega taitasi: pepese manu, tilotilo i le vanimonimo, toulu timuga i o latou foliga, ma isi mea faapena. Mo le fuaiupu lona lua, fai atu ia i latou e faatino ni taga e pei o le tusi i o latou mata, fai ni taga e pei o ni lelefua, ma faaofuofu o latou lima i tua o o latou taliga. Fai atu i ai latou te opo i latou lava ao latou peseina upu nei, “Faapea ma le ola,” ona popo lea o o latou ulu (“ma le mafaufau”), tuu o latou lima i luma o latou fatu (“ma le malosi”), ona punou lea o latou ulu ma piilima o latou lima (“Ia faafetai”). Fai atu ia i latou e toe tuu o latou lima i luma o latou fatu ao latou usuina, “Ua ou iloa ai lona alofa.”

tamaiti o loo pepese

O le fai soo o le a fesoasoani lea i tamaiti e aoao ai se pese fou. Toe usu ia pese i ni auala eseese, e pei o le musumusu, hamu, patipati i le pao, fesuiai le pao, pe pepese ao saofafai ma tutu.