Iuni
O Le a Ou Mulimuli i le Fuafuaga a le Tama Faalelagi e ala i le Papatisoina ma Faamauina
“O mai ia te au, ma ia papatisoina i lou igoa, ina ia mafai ona outou maua o se faamagaloga o a outou agasala, ma faatumuina i le Agaga Paia” (3 Nifae 30:2).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: O le a ou mulimuli ia Iesu Keriso e ala i le papatisoina ma faamauina ma le tausia o au feagaiga o le papatisoga.
Ao lei amataina le Peraimeri, oti ni tulagavae lapopoa se lua mai ni pepa lanu eseese. Tusi i luga o le tasi [tulagavae] “ia papatisoina ma faamauina” ao luga o le isi “ma tausia au feagaiga o le papatisoga.” Saunia nisi tamai tulagavae i na lanu e lua. Tusi se tasi o mea nei i luga o tulagavae taitasi o le lanu muamua: 8 tausaga, salamo, faatalanoaga ma le epikopo, faatofu, pule o le perisitua, feagaiga, ofu papae, Agaga Paia. I luga o tulagavae laiti taitasi o le lanu lona lua, tusi ai se tasi o tulaga faatonuina mai le “O Ou Tulaga Faatalalelei.” Faapipii uma i soo se faasologa i totonu o le potu ia tulagavae laiti.
Faailoa atu le aoaoga faavae: Tusi i luga o le laupapa “O le a ou mulimuli ia Iesu Keriso e ala i le …” Faapipii auauai ia tulagavae lapopoa i luga o le laupapa, ma faitau faatasi. Faamalamalama atu e manaomia ia laasaga nei i le fuafuaga a le Tama Faalelagi. Afai e manaomia, fesoasoani i tamaiti ia malamalama i le mea e ta’u o le feagaiga o le papatisoga.
E maua tulagavae i le sharingtime.lds.org
Uunaia le [agaga] malamalama ma le faaaogaaga (taaalo i se taaloga faatutusa): Fai atu i se tamaitiiti e saili se tasi o tulagavae o le lanu muamua. Fai atu i ai e faitau mai upu po o le fuaiupu o le tulagavae ma faapipii i luga o le laupapa i lalo o le tulagavae lapoa e tutusa. Fesili atu i tamaiti po o le a le faia o lenei mea ma le papatisoga ma le faamauga. Toe fai mo tulagavae uma o le lanu muamua.
Fai atu i se tamaitiiti e saili se tulagavae o le lanu lona lua. Fai atu i ai e faitau mai upu po o le fuaiupu o le tulagavae ma faapipii i luga o le laupapa i lalo o le tulagavae lapoa e tutusa. Ia talanoaina pe mafai faapefea ona fesoasoani i tamaiti le ola ai i tulaga faatonuina o le talalelei latou te tausia ai o latou feagaiga o le papatisoga. Toe fai mo isi tulagavae.
Vaiaso 2: Afai ou te ola agavaa, o le a fesoasoani mai le Agaga Paia ia te au e filifili le mea sao.
Faailoa atu le aoaoga faavae (usuina o se pese): Fesili atu i tamaiti po o le a le meaalofa lea e tuuina mai ia i tatou pe a uma ona papatisoina i tatou. Usu le fuaiupu lona lua o le pese “O Le Agaga Paia” (TT, 56). Ae e te lei pese, fai atu i tamaiti e faalogo mo le tali o le fesili lenei: O le a le mea e fesoasoani le Agaga Paia ia i tatou e fai? Fesoasoani i tamaiti ia malamalama o le leo filemu ma le itiiti o le Agaga Paia lea ma e fesoasoani ia i tatou e filifili le mea sao.
Uunaia le [agaga] malamalama (vaaia o se lesona faatino): Faamalamalama atu e tatau ona tatou aoao e faalogo i musumusuga a le Agaga Paia e ala i le gauai atu i manatu o o tatou mafaufau ma lagona i totonu o tatou loto (tagai i le MF&F 8:2). Fai atu i se tamaitiiti e tuu se tupe siliva i totonu o se fagu ona lulu lea. Tuu atu i tamaiti latou te ta’u maia po o le a le manino e mafai ona latou faalogoina ai le leo. Fai i tamaiti e faaopoopo i ai i totonu o le fagu ni sipuni palapala, araisa, oneone, po o ni vavae. O taimi uma lava e uma ai ona tuu i ai se sipuni e tumu i mea nei, fai atu i se tamaitiiti e toe lulu le fagu, ma tuu atu i tamaiti e fai mai ni o latou manatu faaalia pe na faapefea ona aafia le pa’o i mea nei. Faaauau pea ona faaopoopo i ai ni sipuni tutumu i mea nei seia le toe mafai e tamaiti ona faalogoina le pa’o o le tupe siliva. Faatusa lenei mea i le faigata ona faalogoina o le Agaga Paia pe afai ua tumu o tatou olaga i mea faasalavei po o le agasala. Sasaa le fagu ma faailoa atu le auala manino e mafai ai ona toe faalogoina le pa’o o le tupe siliva. Molimau atu o le tausia o poloaiga ma le salamo i a tatou agasala e fesoasoani tatou te lagona ai le Agaga Paia.
O le faafesootaia o se aoaoga faavae i se mea faitino o le a fesoasoani lea i tamaiti e manatua ai le lesona o loo aoaoina.
Uunaia le faaaogaaga (fetufaai o manatu): Vaevae tamaiti i ni vaega ma tuu atu i vaega taitasi e pasi faataamilo se mea faitino laitiiti ao e usuina po o le fai atu o upu nei “O Le Agaga Paia.” Taofi i soo se taimi ma fai atu i tamaiti taitoatasi o loo uuina se mea faitino e ta’u mai se mea e tasi e mafai ona latou faia e lagona atili ai ma le manino le Agaga Paia. Faaiu i le usuina faatasi o le pese “O Le Agaga Paia”.
Vaiaso 3: Ou te toe faafouina a’u feagaiga o le papatisoga pe a ou ‘ai ma inu i le faamanatuga.
Faailoa atu le aoaoga faavae (matamata i ata): Faaali atu se ata o se papatisoga ma se ata o le faamanatuga ma fesili atu pe o le a le faiā o nei ata e lua. Faamanatu atu i tamaiti tatou te osi feagaiga ma le Tama Faalelagi pe a tatou papatiso, ma faamatala atu afai tatou ‘aai ma feinu i le faamanatuga ua tatou faafouina a tatou feagaiga o le papatisoga.
Uunaia le [agaga] malamalama (faalogologo ma talatalanoa): Valaaulia ia tamaiti e faasino ia i latou lava po o le lagi e faailoa mai ai po o ai o faia le folafolaga ao e faitauina atu ia faamatalaga nei mai le tatalo o le faamanatuga (tagai i le MF&F 20:77): “ave i o latou luga le suafa o lou Alo”; “manatua pea o ia”; “tausi i ana poloaiga”; “maua pea lona Agaga e faatasi ma i latou.” Talatalanoa i uiga o fasi fuaitau taitasi nei.
Uunaia le faaaogaaga (faia o ni taga): Fai atu i tamaiti e mafaufau i se taga e faamanatu atu ai ia i latou ia vaega taitasi o le feagaiga lea tatou te faalogo i ai i le tatalo o le faamanatuga, e pei o le tuu o o latou lima i luma o o latou fatu (ave i o latou luga le suafa o lou Alo); tusi i o latou muaulu (manatua pea o ia); tatala o latou lima e pei o se tusi (tausi i ana poloaiga); ma le fusiina o i latou lava i o latou lima (maua pea lona Agaga). Toe fai folafolaga uma e fa faatasi ai ma taga. Uunaia tamaiti e toe faamanatu taga nei i o latou mafaufau pe a latou faalogo i tatalo o le faamanatuga.
Vaiaso 4: Pe a ou salamo, o le a faamagaloina a’u.
Faailoa atu le aoaoga faavae (faavasegaina o upu fefiloi): Fai atu i tamaiti e faamatala mai le uiga o upu salamo ma le faamagalo. Tuu atu i vasega taitasi se teutusi o i ai i totonu upu nei, i luga o se fasi pepa e ese mai: Pe a, ou, salamo, o le, a, faamagaloina, au. Valaaulia vasega taitasi e faavasega a latou upu i le faasologa sao. A maea, fai atu i tamaiti uma e toe fai mai faatasi le fuaiupu.
Uunaia le [agaga] malamalama (faatino se tala faatusipaia): Faamatala atu i au lava upu le tala i le atalii faamaumau oa (tagai i le Luka 15:11–24), ma faaaoga ai ni taga se tele pe a mafai (mo se faataitaiga, tuu i luga ni tamatamai lima se lua e faauiga i atalii e toalua, milimili lou manava e faaalia ai le fiaai). Valaaulia ia tamaiti e faalogo i le tala ma faataitai lemu au taga. Faaali atu se ata e faailoa ai le atalii faamaumau oa ma fesili atu pe faapefea ona faatusa le tamā i le tala lea i lo tatou Tama Faalelagi. Faamatala atu e pei lava foi le tamā lea, o lo tatou Tama Faalelagi e alofa ia i tatou ma e finagalo ina ia tatou toe foi atu ia te Ia; Na te faamagaloina a tatou mea sese uma pe afai tatou te salamo.
Uunaia le faaaogaaga (faitauina o se mau): Valaaulia se tamaitiiti e faitau le Mosaea 26:30. Fai atu i tamaiti e faalogo pe faafia ona faamagaloina se tagata. Valaaulia i latou e mafaufau filemu i mea latou te faia i le isi taimi latou te faia ai se mea sese.