Fepuari
Sa Foafoaina le Lalolagi mo Fanau a le Tama Faalelagi
“O le a tatou faia se lalolagi e nonofo ai i latou nei; ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:24–25).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Na foafoaina e Iesu Keriso le lalolagi i lalo o le taitaiga a le Tama Faalelagi.
Faailoa atu le aoaoga faavae (vaaia o ni ata): Faaali atu se ata o le lalolagi ma fesili i tamaiti po o ai na faia le lalolagi. Faamatala atu o Iesu Keriso na foafoaina le lalolagi i lalo o le taitaiga a le Tama Faalelagi. Ona faaali atu lea o se ata o Iesu Keriso ma valaaulia i latou e fai mai, “O Iesu Keriso na foafoaina le lalolagi.”
Uunaia le [agaga] malamalama (tusiina o ni ata): Ta’u i tamaiti o le vaega o le fuafuaga o le fiafia a le Tama Faalelagi o le foafoaina lea o le lalolagi ina ia tatou maua se tino ma tatou tuputupu ae ma malamalama. Tusi ni lio se ono ma faanumera i luga o le laupapa. Vaevae tamaiti i ni vaega se ono, ma fai atu i vaega taitasi e faitau se mau faasino se tasi e faatatau i aso e ono o le Foafoaga: Kenese 1:1–5 (aso 1); Kenese 1:6–8 (aso 2); Kenese 1:9–13 (aso 3); Kenese 1:14–19 (aso 4); Kenese 1:20–23 (aso 5); Kenese 1:24–31 (aso 6). Valaaulia vaega taitasi e auauai mai i luma o le potu, ta’u atu le mea sa tupu i le aso sa latou faitau i ai, ma tusi se ata e faatatau i lena aso i totonu o le lio. Faitau faatasi le Kenese 2:1–3. Toe talanoaina faatasi ma tamaiti mea na tutupu i aso taitasi o le Foafoaga.
Vaiaso 2: O Le Pau o se vaega o le fuafuaga a le Atua.
Faailoa atu le aoaoga faavae (vaaia o se ata): Faaali atu se ata o Atamu ma Eva. Ta’u atu i tamaiti o Atamu ma Eva o uluai tagata ia na o mai i le lalolagi ma maua ni tino; sa tuuina i laua i le faatoaga na taua o Etena. Faamatala atu ina ua la o ese mai le faatoaga, sa mafai ai loa ona tatou o mai i le lalolagi; o le la o ese mai le faatoaga ua taua o le Pau. Tusi i luga o le laupapa “O Le Pau o se vaega o le fuafuaga a le Atua”, ma fai atu i tamaiti tou te faitauina faatasi.
Uunaia le [agaga] malamalama (talanoaina o le aoaoga faavae): Tusi ni lio se lua i luga o le laupapa, ma faailoga le tasi lalolagi o agaga ma le isi lalolagi. Faamatala atu ao i ai Atamu ma Eva i le Faatoaga o Etena, sa tatou i ai i le lalolagi o agaga. Faaali atu se ata o ni tamaiti, ma faapipii i luga o le laupapa i totonu o le lio “lalolagi o agaga”. Faamatala atu ina ua mavae le o ese mai o Atamu ma Eva mai le faatoaga, ona tatou o mai loa lea i le lalolagi. Valaaulia se tamaitiiti e ave le ata o tamaiti i totonu o le lio o le “lalolagi”. Fai atu i tamaiti e tuu i luga o latou limamatua pe afai latou te iloa e lelei le Pau, ma valaaulia se tamaitiiti e faamatala mai pe aisea.
Uunaia le faaaogaaga (taaalo i se taaloga faatutusa): Saunia ni nai fuaiupu tutusa e fai paga e faatatau i faamanuiaga ua tatou maua i le olaga faitino (mo se faataitaiga, o se tino, aiga, filifiliga i le va o le lelei ma le leaga, avanoa e aoao ai, malosi ma le ma’i, fiafia ma le faanoanoa, olioli ma le tiga). Faapipii pepa i luga o le laupapa ae faau mai pito i tua. Valaaulia tamaiti e auauai e filifili ni pepa se ta’i lua e vaai pe tutusa ia fuaiupu. Afai e maua ni fuaiupu tutusa, talanoa pe aisea e avea ai o se faamanuiaga.
Vaiaso 3: Ua auina mai au i le lalolagi ina ia maua se tino ma ia tofotofoina.
E mafai ona avea tamaiti ma au fesoasoani vaaia sili.
Ua auina mai au i le lalolagi ina ia maua se ________ ma ia tofotofoina.
Faailoa atu le aoaoga faavae (vaaia o se mea faitino): Tusi i luga o le laupapa, “Ua auina mai au i le lalolagi ina ia maua se ________ ma ia tofotofoina.” Valaaulia se tamaitiiti e sau i luma o le potu ma tusi le ata o lona tino i luga o le laupapa po o luga o se fasi pepa tele. Fesili i tamaiti e ta’u mai po o le a lea ata (o se tino). Faatumu le avanoa ma fai atu i tamaiti e faitau faatasi mai le fuaiupu.
Uunaia le [agaga] malamalama ma le faaaogaaga (auai i se gaoioiga faaletino): Fai se mea e faataavili e faaali ai ni ata o le tele o vaega o le tino (tagai i le faataitaiga o i lalo). Talanoa e uiga i le tele o mea e mafai ona fai e o tatou tino, ma valaaulia ia tamaiti tou te faia faatasi (mo se faataitaiga, faaminoi ou tamatamai lima, tutu ou vae, ma liliu faataamilo). Faamatala atu o se tasi o mafuaaga na tatou o mai ai i le lalolagi ina ia tofotofoina i tatou ma iloa ai pe mafai ona tatou faaaogaina o tatou tino e usitaia ai aoaoga a le Tama Faalelagi. Ia valaaulia tamaiti e auauai i le viliina o le mea faataavili ma ta’u mai pe faapefea ona faaaoga le vaega o le tino o loo faaalia e usitaia ai ia aoaoga a le Tama Faalelagi. (Afai e le mafai ona e faia se mea faataavili, tusi i vaega eseese o lou tino ma fesili i tamaiti e ta’u atu ia te oe auala e mafai ai ona latou faaaogaina lena vaega o o latou tino e usiusitai ai i le Tama Faalelagi.) Fai atu i tamaiti e usu mai le pese “I Have Two Ears” (CS, 269)
O loo maua le mea faataavili i le sharingtime.lds.org
Vaiaso 4: Afai ou te tausia ia poloaiga, e mafai ona ma toe nonofo faatasi ma le Tama Faalelagi.
Faailoa atu le aoaoga faavae (usuina o se pese): Tusi i luga o le laupapa, “Afai ou te tausia ia ______________, e mafai ona ma toe nonofo faatasi ma le Tama Faalelagi.” Hamu le pese “Tausi Poloaiga” (TT, 68). Valaaulia tamaiti e tutu pe a latou iloaina le pese ma auai i le hamuina. Fesili atu: “O le a le mea e tatau ona tatou faia tatou toe nonofo ai ma le Tama Faalelagi?” Tusi le upu “poloaiga” i le avanoa i luga o le laupapa. Valaaulia ia tamaiti tou te usuina faatasi le pese.
Uunaia le [agaga] malamalama (talatalanoa i poloaiga): Valaaulia ni nai tamaiti e faasoa mai nisi o tulafono ua faia e o latou matua e puipui ai tagata o o latou aiga. Fesili atu: “O le a le mea e tupu pe a e usitai i tulafono?” Tusi o latou manatu i luga o le laupapa. Faamalamalama atu e faaalia e matua le alofa pe a latou faatulagaina ni tulafono. Fesili atu: “O le a le mea e tupu pe a tatou usiusitai i poloaiga a le Tama Faalelagi?” Tusi i luga o le laupapa nisi o manatu faaalia o tamaiti. Faamalamalama atu e pei lava foi ona puipuia i latou i le usiusitai i tulafono a o latou matua, o le a puipuia foi i latou pe a latou usiusitai i poloaiga a le Tama Faalelagi. Tuu atu lau molimau, afai tatou te usiusitai i poloaiga, o le a mafai ona tatou toe foi atu tatou te toe nonofo faatasi ma Ia.
O loo maua i le sharingtime.lds.org
Uunaia le faaaogaaga (faitauina o tusitusiga paia): Avatu i tamaiti taitasi se penitala ma se fasi pepa ua vaevaeina i ni vaega se fa, ma o loo tusia ai se tasi o mau faasino nei i vaega taitasi: MF&F 1:37, MF&F 10:5, MF&F 59:9–10, ma le MF&F 119:4. Fai atu i tamaiti e faitau faatasi o se vasega ia mau taitasi, talanoa i le poloaiga o loo faamalamalama mai ai, ma tusi se ata o lena poloaiga i luga o a latou pepa. A maea, fai atu i tamaiti e faasoa mai pe faapefea ona fesoasoani le tausia o poloaiga i le sauniaina o i latou e toe nonofo faatasi ma le Tama Faalelagi.