Iulai
O Aiga o se Vaega o le Fuafuaga a le Tama Faalelagi
“O Le aiga ua faauuina e le Atua” (“O Le Aiga: O Se Folafolaga i le Lalolagi” parakalafa 7).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Na fuafuaina e le Tama Faalelagi ou te sau i se aiga.
Faailoa atu le aoaoga faavae: Faaali atu i tamaiti le “O Le Aiga: O Se Folafolaga i le Lalolagi,” ma faamatala atu o loo aoao mai ai le fuafuaga a le Tama Faalelagi mo Ana fanau ina ia o mai i le lalolagi i ni aiga.
Uunaia le [agaga] malamalama (matamata i ata): Vaevae tamaiti i ni vaega ma ia tofu vaega ma se ata o se aiga (mo se faataitaiga, o Atamu ma Eva o loo aoaoina le la fanau [TAT, nu. 5], o Keriso o loo faatuina le afafine o Iairo [TAT, nu. 41], taunuu le aiga o Liae i le nuu o le folafolaga [ TAT, nu. 71], ma se aiga o loo tatalo [ TAT, nu. 112]). Valaaulia vaega taitasi e saili tagata o le aiga i o latou ata. Fai atu i vaega taitasi e faaali a latou ata i le vasega atoa ma tusi i le tamā, tina, ma le fanau. Fai atu i tamaiti e faailoa mai i o latou tamatamailima pe toafia tagata o o latou lava aiga. Ta’u atu ia i latou o o latou aiga o se vaega o le fuafuaga a le Tama Faalelagi.
Uunaia le faaaogaaga: Fai atu i tama e tutu i luga. Faamalamalama atu e mafai ona avea i latou ma se tamā o se aiga amiotonu i se aso. Valaaulia ni nai tama e ta’u mai se mea atonu latou te faia e avea ai ma se tamā lelei. Fai atu i tamaitai e tutu i luga, ma faamalamalama atu e mafai foi ona avea i latou ma se tina o se aiga amiotonu. Fai atu i nisi o i latou e ta’u mai se mea atonu latou te faia e avea ai ma se tina lelei. Valaaulia tamaiti uma e faasoa mai se mea e mafai ona latou faia e aumaia ai le fiafia i o latou aiga o i ai nei.
O le a sili atu ona aoao ma manatua umi e tamaiti pe a e tuuina atu ni manatu e faaaoga ai ata ma isi mea faitino vaaia.
Vaiaso 2: O tatalo faaleaiga, suesuega o tusitusiga paia faaleaiga, ma afiafi faaleaiga e mafai ona faamalosia ai lou aiga.
O lesona faitino e mafai ona faaaoga e faaosofia ai le fiafia, taulai atu ai mafaufauga o tamaiti, pe folasia atu ai se mataupu faavae o le talalelei.
Faailoa atu le aoaoga faavae ma uunaia le [agaga] malamalama (vaaia o se lesona faatino): Fai atu i se tamaitiiti e uu se fusi o fasilaau. Faamatala atu o fasilaau e faatusa i tagata o se aiga. Tusi i luga o ni fasi pepa se tolu le “tatalo faaleaiga,” “suesuega o tusitusiga paia faaleaiga,” ma le “afiafi faaleaiga”. Fesili atu i tamaiti pe faapefea ona faamalosia pe fesoasoani nei gaoioiga e fusia ai faatasi aiga. Valaaulia ia tamaiti e afifi fasilaau i pepa. Faamatala atu o nei gaoioiga e valaaulia ai le Agaga i totonu o o tatou aiga ma olaga ma tatou latalata atili atu ai i le Tama Faalelagi ma Iesu Keriso, lea e faamalosia ai o tatou aiga.
Uunaia le faaaogaaga (tusiina o ata): Avatu i tamaiti ni fasi pepa, ma valaaulia i latou e tusi ni ata o ni gaoioiga sa latou faia faatasi ma o latou aiga lea na faamalosia ai i latou. Valaaulia i latou e faasoa atu ata sa latou tusia i o latou aiga i le fale.
Vaiaso 3: E mafai ona faamanuiaina ma faamalosia lo’u aiga e le perisitua.
Faailoa atu le aoaoga faavae (taaalo i se taaloga taumatemate): Ta’u atu i tamaiti o le a e tuuina atu ia i latou ni faaataataga e uiga i se mea e faamanuiaina ma faamalosia ai aiga. Fai atu ia i latou e sii i luga o latou lima pe a latou iloaina le tali. Tuu atu ni faaataataga e uiga i le perisitua, e pei o le “e mafai e Tama o i ai lenei mea ona faamanuia o latou aiga” ma le “E mafai ona maua e alii ua 12 tausaga lenei mea.” A sa’o loa le mate a tamaiti, ona fai faatasi lea, “E mafai ona faamanuiaina ma faamalosia lo’u aiga e le perisitua.”
Uunaia le [agaga] malamalama (talanoaina o le perisitua): Fai atu i tamaiti e ta’u mai nisi o mea e mafai ona fai e i latou o umia le perisitua (mo se faataitaiga, papatiso, tuu atu le meaalofa o le Agaga Paia, faamanuia i e mamai, ma tufa le faamanatuga). Faaali atu ni ata o sauniga ma faamanuiaga a o e talanoa i ai, ma fesoasoani i tamaiti ia malamalama i le auala ua faamanuiaina ai ma faamalosia ai aiga. Faaali atu se ata o se malumalu. Faamatala atu o se tasi o faamanuiaga sili o le perisitua o le mafai lea ona o i le malumalu ma faamauina faatasi o se aiga e faavavau.
Uunaia le faaaogaaga (fetufaai o manatu): Valaaulia ni tamaiti e tutu i luga ma faasoa atu se auala se tasi pe lua ua faamanuia ai ma faamalosia ai o latou aiga e le perisitua. Uunaia i latou e faasoa atu o latou manatu i o latou aiga i le fale.
Vaiaso 4: E finagalo le Tama Faalelagi ia ou faaipoipo i le malumalu ma maua se aiga e faavavau.
Faailoa atu le aoaoga faavae (vaaia o se ata): Faaali atu se ata o se ulugalii i o laua ofu faaipoipo o loo tutu i luma o le malumalu. Fesili atu i tamaiti pe aisea e finagalo ai le Tama Faalelagi ia tatou faaipoipo i le malumalu. Faamalamalama atu afai tatou te faaipoipo i le malumalu, o le a mafai ona faavavau o tatou aiga.
Uunaia le [agaga] malamalama (faalogologo i molimau): Valaaulia ni nai faiaoga, e aofia ai ni ulugalii, e faasoa mai ni faamanuiaga sa latou mauaina ona o le malumalu ma le faaipoipoga faalemalumalu. Fai atu i tamaiti e faalogo mo ni faamanuiaga faapitoa ao faasoa mai e faiaoga o latou manatu. Fai se lisi o ia faamanuiaga i luga o le laupapa.
Uunaia le faaaogaaga: Fai atu i ni nai tamaiti e tutu i luga ma faasoa mai pe aisea latou te fia faaipoipo ai i le malumalu ma o le a se mea e mafai ona latou faia i le taimi nei e saunia ai mo lena faamanuiaga.