Ianuari

O Au o se Atalii o le Atua, ma e I Ai Lana Fuafuaga mo Au

“O loo molimau mai lea lava Agaga i o tatou agaga, o fanau i tatou a le Atua” (Roma 8:16).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava ia, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

**Gaoioiga o le Tausaga Atoa:** Faasoa puupuu atu se auala na e iloa ai e alofa le Atua ia te oe. Tuu se mea faitino laitiiti (e pei o se polo vavae, se fatupi, po o se tamai maa) i totonu o se fagu po o se konateina manino. I le faagasologa o le tausaga, tuu atu i tamaiti e faasoa mai ni auala sa latou iloa ai e silafia ma alofa le Atua ia i latou. O taimi uma lava e faasoa mai ai e se tamaitiiti se mea, fai i ai e faaopoopo se mea faitino i totonu o le fagu. Ia taulai soo atu i le fagu, ma faasino i le mau auala o faaalia ai e le Tama Faalelagi Lona alofa mo i tatou.

Vaiaso 1: O le Atua o lo’u Tama Faalelagi. Na te silafia ma alofa ia te au.

Faailoa atu le aoaoga faavae(taaalo i se taaloga taumatemate): Fai atu i tamaiti o loo e mafaufau i se tagata e alofa ia i tatou, e iloa i tatou taitoatasi, fesoasoani ia i tatou, ma e mamao le mea o nofo ai. Fai atu i ai e mate atu po o ai o loo e mafaufau i ai (Tama Faalelagi). Talanoa i le tatou faiā ma le Tama Faalelagi. Valaaulia ia tamaiti e toe fai faatasi “O lou Tama Faalelagi o le Atua. Na te silafia ma alofa ia te au.”

Uunaia le [agaga] malamalama (faitauina o tusitusiga paia): Vaevae tamaiti i ni vaega. Fai atu i vaega taitasi e faitau le Enosa 1:5, Mose 1:6, ma le Iosefa Samita—Talafaasolopito 1:17 ma talanoa pe na faapefea ona fetalai atu le Alii i perofeta taitasi. Fesili atu i tamaiti: “Afai e asiasi mai le Tama Faalelagi ia te oe, o le a se igoa e valaau ai o Ia ia te oe?” Molimau atu e silafia i tatou taitoatasi e le Atua i o tatou igoa.

Uunaia le faaaogaaga(usuina o ni pese): Fai atu i tamaiti e tutu i se lio ma pasi faasolo ni nai aitema ia e faaalia ai le alofa o le Atua mo Lana fanau a o latou usuina le pese “O Au o se Atalii o le Atua” (TT, 2–3) po o le pese “Ua Ou Iloa o Soifua Lo’u Tama” (TT, 8). O aitema e mafai ona aofia ai ia tusitusiga paia, se ata o le faamanatuga, se fasi fualaau suamalie, po o se ata o se aiga. Taofi i soo se taimi le pese ma fai atu i tamaiti o loo uuina se aitema e faasoa mai se auala e tasi latou te iloa ai le alofa o le Atua ia i latou. Ia toe fai pe a lava le taimi.

Vaiaso 2 ma le 3: O le fuafuaga a le Tama Faalelagi o se fuafuaga o le fiafia.

Ata

meaalofa

O le fuafuaga a le Tama Faalelagi o se fuafuaga o le fiafia

Faailoa atu le aoaoga faavae: Tusi i luga o se fasi pepa “o le fuafuaga a le Tama Faalelagi o se fuafuaga o le fiafia”. Tuu le pepa i totonu o se konateina ma afīfī ia foliga o se meaalofa. Sii i luga le meaalofa ma fai atu i tamaiti o loo i ai i totonu se mea o le a aumaia ia i latou le fiafia. Tuu atu ia i latou e mate mai po o le a lea mea. Ona tatala lea o le meaalofa ma fai atu i se tamaitiiti e faitau le fuaiupu i le vasega. Faamatala atu e i ai se fuafuaga a le Tama Faalelagi ina ia tatou maua ai le fiafia ma toe nonofo faatasi ma Ia.

Uunaia le [agaga] malamalama(usuina o se pese ma tali ia fesili): Tuu atu i vasega taitasi se uputusi ua tusia ai i luga se tasi o fesili nei:

O le a se mea o i ai i lo’u olaga, ma o fea na amata mai ai?
O le a la’u filifiliga sa i ai, ma o le a se mea e ao ona ou sailia?
O le a se mea e tatau ona ou mulimuli i ai, ma o le a se mea e tatau ona ou pipiimau i ai?
O le a sou lagona pe a ou mulimuli i le fuafuaga a le Atua?

Usu laina muamua e lua o le pese “O Le a Ou Mulimuli i le Fuafuaga a le Atua” (TT, 86–87), ma talanoa i le tali o le fesili muamua. Toe fai mo vaega atoa o le pese ma isi fesili.

Uunaia le [agaga] malamalama (faauma se faamatalaga): Tuu ni ata e faailoa ai le muai olaga, olaga faitino, ma le olaga pe a mavae le oti i ni vaega eseese se tolu o le potu. Tusi se ata o se foliga fiafia i luga o se fasi pepa. Fai atu i tamaiti o taimi uma lava e te tuuina ai i luga le ata o le foliga fiafia, e tatau ona latou fai mai, “Fiafia.” Tu i talaane o le ata o le muai olaga ma faamatala atu le Fono i le Lagi. Soo se taimi lava e talafeagai ai, tuu atu i tamaiti e faauma mai ni au faamatalaga i le “fiafia” pe a tuuina i luga le ata o le foliga fiafia. Mo se faataitaiga: “E finagalo le Tama Faalelagi ina ia tatou fiafia. Sa Ia tauina mai ia i tatou Lana fuafuaga e auina mai i tatou i le lalolagi ma maua se tino. Fai mai o Ia e mafai ona tatou fiafia pe afai tatou te usiusitai i Ana poloaiga. Sa Ia silafia o le a tatou manaomia se Faaola e fesoasoani ina ia tatou fiafia, aua e leai se tasi o i tatou e atoatoa. Ina ua tatou faalogo i le fuafuaga a le Tama Faalelagi, sa tatou matua fiafia sa tatou alalaga i le olioli!” Faaauau le gaoioiga lenei ao e agai atu i isi vaega ma faamatala atu le fuafuaga o le fiafia: “Sa e sau i lou aiga, ma sa matua fiafia i latou i le taimi sa e fanau mai ai.” “Tatou te maua le fiafia pe a tatou faia ni filifiliga amiotonu.” “O le a tatoufiafia e faatasi ma o tatou aiga ma le Tama Faalelagi ma Iesu Keriso e faavavau i le malo selesitila.” Faaopoopo atu ni faamatalaga auiliili o le fuafuaga pe a talafeagai ai ma le matutua ma le malamalama o tamaiti.

Uunaia le faaaogaaga (tusiina o ni ata): Avatu i tamaiti taitasi se fasi pepa o loo i ai se foliga fiafia ma ua tusia ai upu “O le fuafuaga a le Tama Faalelagi o se fuafuaga o le fiafia”. Fai atu ia i latou e tusi se ata o se mea o i totonu o le fuafuaga a le Tama Faalelagi latou te lagona ai le fiafia. Molimau atu o le fuafuaga a le Tama e mo lo tatou fiafia e faavavau.

Vaiaso 4: E i ai lo’u faitalia, ma ou te tali mo a’u filifiliga.

Faailoa atu le aoaoga faavae: Sauni ni uputusi se lua, o le tasi e fai mai “E i ai lo’u faitalia” ma le isi tasi e fai mai “Ou te tali mo au filifiliga.” Vaevae tamaiti i ni vaega se lua. Fai atu i ni tamaiti se toalua e o mai i le pito i luma o le potu. Fai atu i le toatasi e sii i luga le uputusi muamua, ma fai atu i le tasi vaega e tutu ma fai mai, “E i ai lo’u faitalia.” Fai atu i le isi tamaitiiti e sii i luga le uputusi lona lua, ma fai atu i le isi vaega e tutu i luga ma fai mai, “Ou te tali mo au filifiliga.” Toe fai mo ni nai taimi, ma tuu atu i vaega taitasi e fai mai fuaiupu taitasi.

Uunaia le [agaga] malamalama (talanoaina o ni taunuuga): Fesili i tamaiti po o le a se taunuuga o le a i ai pe afai latou te filifili e aua le ‘aai, pa’i atu i se ogaumu vevela, auai i le lotu, po o le agalelei atu i isi. Faamatala atu e alofa le Tama Faalelagi ia i tatou ma e finagalo ina ia tatou faia ni filifiliga lelei ma maua ni faamanuiaga o na filifiliga.

O le faaauai punouai o tamaiti uma i se gaoioiga o le a teuina ai i o latou mafaufau ma tuuina atu ai ia i latou le avanoa e auai ai i se aafiaga faaleaoaoga.

Uunaia le faaaogaaga (taaalo i se taaloga): Tusi i luga o ni fasi pepa ni filifiliga lelei ma ni filifiliga le lelei e mafai ona faia e se tamaitiiti. Tuu fasi pepa i totonu o se konateina. Fai atu i tamaiti e fai ni laina se lua, o se laina o “filifiliga” ma se laina o “taunuuga”. Fai atu i tamaiti e pito i luma o laina taitasi e savavali i le pito i luma o le potu ao usuina e tamaiti uma le laina muamua o le pese “Filifili Tau o Mea Tonu” (Viiga, nu. 149). Tuu atu i le tamaitiiti o loo i le laina o “filifiliga” e piki se pepa ma faitau se filifiliga. Tuu atu i le isi tamaitiiti e ta’u mai se taunuuga talafeagai mo lena filifiliga. Fai atu i le vasega atoa e tusi o latou lima matua i luga pe afai o se filifiliga lelei ma tusi i lalo pe afai o se filifiliga le lelei. Ia faaauau pea pe a lava le taimi.

Fesoasoaniga mo le taitai musika

Fai atu i tamaiti tou te usuina faatasi le tali o le pese “O Au o se Atalii o le Atua” (TT, 2–3) ma faalogo i upu o loo faamatala maia se mea latou te mananao i se isi tagata e faia mo i latou. Lisi a latou tali (taitai, taiala, savali i tafatafa, fesoasoani, aoao) i luga o le laupapa. Fai atu se fesili e uiga i upu taitasi. Mo se faataitaiga, “O ai e taitaiina i tatou?” po o le “Aisea e te manao ai e savali se tasi i ou tafatafa?” Molimau atu i faamanuiaga o le i ai o ni matua, faiaoga, taitai, perofeta, tusitusiga paia, ma le Agaga Paia e fesoasoani ia i tatou ia iloa lo tatou auala e toe foi atu ai i le Tama Faalelagi.