Novema
E Tatau ona Tatou Faafetai i le Atua i Mea Uma
“Ma sa ia poloaiina i latou ia … latou avatu foi i aso uma le faafetai i le Alii lo latou Atua” (Mosaea 18:23).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Ou te faafetai mo lo’u tino, ma ou te iloa o se malumalu.
Faailoa atu le aoaoga faavae (vaaia o ni ata ma le faitauina o se mau): Faaali atu se ata o se tamaitiiti ma se ata o se malumalu. Faitau faatasi leotele le 1 Korinito 3:16. Fesili atu: “O le a se mea ua tatou aoaoina mai lenei mau e uiga i o tatou tino?” Tusi i luga o le laupapa “O lo’u tino o se malumalu”.
Uunaia le [agaga] malamalama (faitauga mau): Talatalanoa i ni auala tatou te faaali atu ai i le Tama Faalelagi la tatou faafetai mo o tatou tino; mo se faataitaiga, tatou te tausiaina ma faamamaina. Faamatala atu ua fautuaina i tatou e perofeta ina ia tausia o tatou tino e ala i le aua le ulaula, faaaoga le alakaholo po o ni fuaalau po o ni vailaau faasaina, po o le taina ai o pe’a. Vaevae tamaiti i ni vaega, ma fai atu i vaega taitasi e faitau ma talanoa i se tasi po o le sili atu foi o mau nei: Mataupu Faavae ma Feagaiga 88:124; 89:7, 8, 9, 10–11, 12, 16–17. Fai atu i vaega taitasi e faasoa mai ni mea sa latou aoaoina mai nei mau e faatatau i auala e mafai ona latou tausia ai o latou tino.
Uunaia le faaaogaaga (faatuina o se sini): Fai atu i tamaiti e tusi se faamatalaga pe tusi foi se ata o se mea o le a latou faia i le aluga o le vaiaso e tausia ai o latou tino.
Vaiaso 2: Ou te faafetai mo faamanuiaga faaletino.
Faailoa atu le aoaoga faavae: Tusi i luga o le laupapa, “Ou te faafetai mo faamanuiaga faaletino.” Fai atu i tamaiti e toe fai mai le fuaiupu. Faamatala atu o faamanuiaga faaletino o faamanuiaga ia e mafai ona tatou vaai i ai, pa’i i ai, faalogo, tofo, po o le sogisogi i ai.
Uunaia le [agaga] malamalama (taaalo i se taaloga taumatemate): Faaali atu ni mea faitino po o ni ata e faailoa ai nisi o a tatou faamanuiaga faaletino (mo se faataitaiga, tino, fale, meaai, vai, lavalava, soifua maloloina, le la, le masina, fetu, le lalolagi, manu, laau, aiga, uo, meataalo, tusi, ma le aoga). Tuu atu ni faaataataga o loo faamatalaina ai se tasi o faamanuiaga, ma fai atu i tamaiti e mate mai po o fea o faamanuiaga o loo e faamatalaina atu. Mo tamaiti matutua, ia tofu fasi pepa ma se faamanuiaga o tusia ai ona tuu lea o fasi pepa i totonu o se konateina. Valaaulia se tamaitiiti e filifili se [faamanuiaga] se tasi ma tuu atu i isi tamaiti ni faaataataga e uiga i ai. Afai e mateia e tamaiti se faamanuiaga, tusi i luga o le laupapa, ona fesili lea i le tamaitiiti pe aisea ua ia faafetai ai mo lea [faamanuiaga].
Uunaia le faaaogaaga (fetufaai o manatu): Fai atu i tamaiti e mafaufau i mea e mafai ona latou faia e faaali atu ai le agaga faafetai mo se tasi o faamanuiaga na tou talanoaina. Fai atu i ni nai tamaiti e faasoa mai ni o latou manatu.
O le a sili atu ona lelei le aoaoina o tamaiti pe afai e faaaogaina ni metotia faafaiaoga eseese. Filifili ni metotia faalegaoioiga ma faaleaoaoga e mafai ona auai tamaiti uma.
Vaiaso 3: Ou te faafetai mo faamanuiaga faaleagaga.
Faailoa atu le aoaoga faavae ma uunaia le [agaga] malamalama (faitauina o mau): Saunia se meaalofa i se ata o le Faaola ma mau faasino nei i totonu: Moronae 10:8–17. Tusi i luga o le laupapa, “Ou te faafetai mo faamanuiaga faaleagaga.” Faamatala atu e tele ni faamanuiaga faaleagaga e ono aumai e le Alii ia i tatou; Na te aumaia ia i tatou nei faamanuiaga e ala i le mana o le Agaga Paia. Fai atu i se tamaitiiti e tatala le meaalofa ma faaali atu mea o i ai i totonu. Fai atu i tamaiti e sue le mau ma vaai po o a faamanuiaga faaleagaga lea e mafai ona aumai e le Alii ia i tatou, ma tusi i luga o le laupapa. Talatalanoa i nisi o nei faamanuiaga, ma faamatala atu e tatau ona tatou faaaogaina e fesoasoani atu ai i isi.
Vaiaso 4: E tatau ona tatou faafetai i le Tama Faalelagi mo o tatou faamanuiaga uma.
Faailoa atu le aoaoga faavae: Faaali atu i tamaiti se aitema se tasi pe lua sa tuuina atu e se tasi ia te oe. Faamatala atu e taua ia te oe nei meaalofa ma sa e fai atu “Faafetai” mo na mea. Fai atu i tamaiti e faasoa mai nisi auala e mafai ai ona faaalia lo tatou agaga faafetai mo meaalofa ua tatou maua. Fesili i tamaiti po o ai e tatau ona tatou faafetai i ai mo a tatou faamanuiaga uma. Talatalanoa i mafuaaga e tatau ai ona tatou faafetai i le Tama Faalelagi mo a tatou faamanuiaga uma.
O le valaauliaina o tamaiti e fetufaai i vaega toalaiti e tuuina atu ai i tamaiti e toatele le avanoa e auai ai. O faiaoga o vasega e mafai ona fesoasoani atu ia mautinoa e auai uma tamaiti ma faatumauina le faaaloalo.
Uunaia le [agaga] malamalama (faia ni lisi): I ni taga eseese se lima, tuu i ai i totonu se fasi pepa, se peni, ma se tasi o mea nei: o se ata o se falelotu a le Ekalesia, se fasi ofu, tusitusiga paia, se ata o se aiga, ma se ata o le Faaola. Vaevae tamaiti i ni vaega, ma ia tofu vaega uma ma se taga. Fai atu i vaega taitasi e tilotilo i mea o loo i totonu o a latou taga ma tusi i luga o le pepa se auala se tasi e mafai ona latou faailoa atu ai le agaga faafetai mo ia mea. Ona fai atu lea ia i latou e toe tuu i totonu le aitema, pepa, ma le peni i totonu o le taga ma pasi i le isi vaega. Ia tofu maua uma e vaega taitasi ia taga taitasi, ona valaaulia lea o vaega taitasi e faasoa mai se mea o loo tusiina i luga o le lisi i le latou taga.
Uunaia le faaaogaaga (fetufaai o manatu): Fai atu i nai tamaiti e faasoa mai ni mea sa latou aoaoina mai lenei gaoioiga ma po o a ni mea latou te faia e faaaoga ai i o latou olaga.