Setema

O Le a Ou Auauna atu i le Atua ma Lou Loto Atoa, ma Lou Manatu Atoa, Mafaufau, ma le Malosi

“Ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu Keriso” (MF&F 59:5).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: Na aoao mai i tatou e Iesu Keriso i le auala e auauna atu ai i isi.

Faailoa atu le aoaoga faavae (matamata i ata): Faaali atu ni nai ata o Iesu Keriso o loo auauna atu i isi. Mo se faataitaiga, faaaoga le TAT ata 41, 42, 46, 47, ma le 55. Fai atu i tamaiti e faamatala mai le mea o loo tupu i ata taitasi. Faailoa atu o loo auauna atu Iesu i isi i ata taitasi. Tusi i luga o le laupapa, “Na aoao mai i tatou e Iesu Keriso i le auala e auauna atu ai i isi.”

Uunaia le [agaga] malamalama (faitauina o mau ma tala faatino): Fai atu i tamaiti e auauai e faatino se tasi o manaoga o loo faamatalaina i le Mataio 25:35–36. Mo se faataitaiga, o se tamaitiiti o loo taumafai e foliga e fiaai, fiainu, o se tagata ese, pe mai. Fai atu i isi tamaiti e mate mai le manaoga ona faatino lea pe faapefea ona latou auauna atu i se tasi e i ai lena manaoga. Faitau faatasi le Mataio 25:35–40, ma fai atu i tamaiti e vaai po o ai na fetalai mai Iesu Keriso o loo tatou auauna atu i ai pe a tatou auauna atu i isi.

faatino e se tamaitiiti le taga o le fiaai

Uunaia le faaaogaaga: Tuu atu i tamaiti se fasi pepa ma fai atu ia i latou e lisi i lalo igoa pe tusi se ata o tagata e mafai ona latou auauna atu i ai ma galuega fesoasoani e mafai ona latou faatinoina mo na tagata. Fai atu i ai e faasoa atu a latou pepa ma o latou aiga i le fale.

Vaiaso 2: Ua faaali mai ia i tatou e perofeta ma aposetolo le auala e auauna atu ai.

Faailoa atu le aoaoga faavae: Faaali ata o Mose, Tupu o Peniamina, Iosefa Samita, ma Thomas S. Monson. Ta’u atu i tamaiti na faaali mai ia i tatou e nei perofeta, e pei lava o perofeta ma aposetolo uma, le auala e auauna atu ai i isi.

Uunaia le [agaga] malamalama (taaalo i se taaloga taumatemate): Sauni ni faaataataga e uiga i le auala na faaali mai ai ia i tatou e Mose, Tupu o Peniamina, Iosefa Samita, ma Thomas S. Monson le auala e auauna atu ai. Mo se faataitaiga, o nisi o faaataataga e faatatau ia Peresitene Monson o le “Sa ou asiasi soo i fafine ua oti a latou tane mai lau uarota,” “Ao ou laitiiti sa ou tuuina atu i se isi tama se tasi o au meataalo e sili ona ou fiafia i ai,” ma le “E masani ona ou asiasi i tagata o i le falemai.” Atonu e te fia faaaogaina mau faasino nei e saunia ai ni au faaataataga. Mose: Esoto 2:16–17; 1 Nifae 17:24–29. Tupu o Peniamina: Mosaea 2:12–19. Iosefa Samita: Iosefa Samita—Talafaasolopito 1:62, 67; MF&F 135:3. Thomas S. Monson: Ensign, Sete. 1994, 12–17; Tes. 1995, 2–4; Nov. 2006, 56–59.

Filifili ni tamaiti se toa fa e sui i perofeta nei, ma fai atu i se tasi o i latou e faitau ia faaataataga ia na e saunia. Fai i isi tamaiti e sii o latou lima pe a latou manatu ua latou iloa po o ai lea perofeta. Ona tuu atu lea latou te sueina le ata o lena perofeta. Toe fai mo isi perofeta.

o tamaiti o loo ofuina ni ofu e faafoliga i perofeta — O ofu faigofie e pei o ofu talaloa ma pulou e mafai ona faamanaia atili ai le faatinoga o tala. O le a fesoasoani ia faatinoga o tala e atili malamalama ai tamaiti i mataupu faavae o le talalelei faapea ma tala mai tusitusiga paia.

Uunaia le faaaogaaga (faalogologo i konafesi): Valaaulia ia tamaiti e matamata pe faalogologo i le konafesi aoao i le masina e sosoo ai. Uunaia i latou e faalogo i tala e uiga i auala e auauna atu ai i isi. Avatu ni avanoa ia i latou e faasoa mai ai ni mea sa latou aoaoina.

Vaiaso 3 ma le 4: Pe a ou auauna atu i isi, ua ou auauna atu i le Atua.

o se tamaitiiti o loo tusitusi i luga o le laupapa

Faailoa atu le aoaoga faavae (taulotoina o se mau): Fesoasoani i tamaiti i le taulotoina o le vaega mulimuli o le Mosaea 2:17 i le tusiina lea i luga o le laupapa, “Pe a outou auauna atu i o outou uso a tagata, ua nao lo outou auauna atu lava lea i lo outou Atua.” Fai atu i tamaiti e toe fai mai faalua po o le faatolu le fasifuaitau. Fai atu i se tamaitiiti e titina se upu se tasi pe lua foi, ona fai lea i tamaiti e toe fai mai le fasifuaitau. Toe fai seiloga ua leai ni upu o totoe i luga o le laupapa.

Uunaia le [agaga] malamalama (faalogo i se tulaga faatusa e aoao ai): O se sauniuniga, ia suesue ma le agaga tatalo le lauga o le konafesi a Peresitene Dieter F. Uchtdorf ia Aperila 2010, “O Outou o Ou Lima” (tagai i le Ensign po o le Liahona, Me 2010, 68–70, 75). Fesili atu i tamaiti pe faapefea ona tatou auauna atu i le Atua pe afai o tatou auauna atu ia i latou o loo siomiaina i tatou (o loo tatou faia le mea semanu Na te faia pe ana i ai o Ia iinei). Faasoa atu se tala po o se aafiaga patino e faatatau i le auauna atu, ma faamatala pe na faapefea ona faamanuiaina ai le na tuuina atu le auaunaga ma le na taliaina. (E mafai ona maua ni tala e uiga i le auaunaga i le Friend po o le Liahona.) Saunia nisi o tulaga faatusa e aoao ai e faaali mai ai le auala e mafai ai e tamaiti ona auauna atu i isi. Mo se faataitaiga: “Sa see Eni ma pau i lalo i lona foi mai i le fale mai le aoga, ma sa salalau solo ana api ma pepa i luga o le palapala. Sa tu Tavita e fesoasoani e faatu o ia i luga ma aumai i luga ana tusi.” “Sa tauivi le tuaoi a Mele e sii lana faatauga i totonu o lona fale ao tagi mai lana pepe. Sa fesoasoani Mele ia te ia e sii lana faatauga.” Fai atu i tamaiti e faatino mai se tulaga faatusa e aoao ai ma ta’u mai po o ai na auauna atu i ai (o tagata uma ia na taliaina le auaunaga faapea foi ma le Atua).

Uunaia le [agaga] malamalama ma le faaaogaaga (taaalo i se taaloga faatusatusa): Saili pe tusi ni ata o tagata e mafai ona auauna atu i ai tamaiti, e pei o se matua, o se tei, o se tamamatua po o se tinamatua, o se uo, ma se tuaoi. Fai se kopi lona lua o ata nei ma taaalo faatasi ma i latou i se taaloga faatusatusa. A mafai e se tamaitiiti ona faatutusa, valaaulia o ia e ta’u mai se auala se tasi e auauna atu ai i le tagata o loo i ai i ata. Lisi manatu o tamaiti i luga o le laupapa. Mo nisi o manatu e uiga i le auala e auauna atu ai, tagai i le Peraimeri 4, 166.