« ២. ការអភិវឌ្ឍភាពធន់ខាងរូបកាយ » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម ៖ កូនសៀវភៅធនធាន ( ឆ្នាំ ២០២០ )
« ២. ការអភិវឌ្ឍភាពធន់ខាងរូបកាយ » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម
២. ការអភិវឌ្ឍភាពធន់ខាងរូបកាយ
ការមានភាពតានតឹងខ្លាំងពេកអាចប៉ះពាល់ដល់សុខភាព លទ្ធភាពក្នុងការចូលដំណេក និងលទ្ធភាពដើម្បីតតាំងនឹងការល្បួងរបស់យើង ។ របបអាហារត្រឹមត្រូវ និងលំហាត់ប្រាណជួយយើងឲ្យគ្រប់គ្រងភាពតានតឹងបានកាន់តែប្រសើរ ។ ប្រសិនបើអ្នកមានបញ្ហាខាងរូបកាយ សូមអធិស្ឋានពីបញ្ហានោះ ។ បន្ទាប់មក សូមជ្រើសរើសយោបល់មួយឬពីរ ដែលអ្នកគិតថាត្រឹមត្រូវសម្រាប់អ្នក ។ មិនមែនគ្រប់មតិយោបល់នឹងដំណើរការទៅបានល្អចំពោះមនុស្សគ្រប់គ្នានោះទេ ។ គំនិតភាគច្រើនត្រូវការការអនុវត្តយ៉ាងតិចណាស់ពីរទៅបីសប្តាហ៍ មុនពេលវាចាប់ផ្តើមមានប្រយោជន៍ ។ សូមមើលនៅក្នុងវគ្គទី « ១. ការអភិវឌ្ឍភាពធន់នៅក្រោមភាពតានតឹង » សម្រាប់យោបល់បន្ថែម ។
ក. ការរៀនខិតខំធ្វើការ
-
សូមបំបែកកិច្ចការធំៗ ឬលំបាកៗទៅជាកិច្ចការតូចៗ ។ ប្រសិនបើការងារនោះនៅតែមានអារម្មណ៍ថាពិបាកពេក សូមបំបែកវាបន្ថែមទៀត ។ បន្ទាប់មក សូមចាប់ផ្តើមធ្វើកិច្ចការនោះម្តងមួយៗ ។ ប្រសិនបើអ្នករង់ចាំរហូតដល់អ្នក « មានអារម្មណ៍ » ថាចង់ធ្វើការទើបចាប់ផ្ដើម នោះអ្នកអាចត្រូវរង់ចាំរយៈពេលយូរ ។ ចាប់ផ្ដើម ហើយការជំរុញចិត្តនឹងទទួលបានក្រោយពីនោះ ។
-
កំណត់ល្បឿនរបស់អ្នក ។ ផ្លាស់ប្ដូរការងារដែលអ្នកធ្វើ ហើយកុំធ្វើសកម្មភាពតែមួយយូរពេក ។ រំឭកខ្លួនឯងថា « អ្វីៗដែលខ្ញុំត្រូវធ្វើនៅពេលឥឡូវនេះគឺ » ។
-
សម្រាន្ដឲ្យបានគ្រប់គ្រាន់ អាហារល្អៗ ទឹក និងការធ្វើលំហាត់ប្រាណដើម្បីឲ្យមានកម្លាំងដែលអ្នកត្រូវការ ។
-
សូមស្វែងរក ហើយស្វាគមន៍ការគ្រាំទ្រមតិយោបល់ និងការលើកទឹកចិត្តនានាពីអ្នកដទៃទៀត ។ សូមគាំទ្រ ហើយលើកទឹកចិត្តដល់អ្នកដទៃផងដែរ ។
-
សូមសម្ដែងការដឹងគុណ ។ មានអំណរគុណមិនត្រឹមតែចំពោះពរជ័យរបស់អ្នកប៉ុណ្ណោះទេ ប៉ុន្តែក៏មានអំណរចំពោះបញ្ហាប្រឈម និងទុក្ខលំបាករបស់អ្នកផងដែរ ។ អ្នកអាចរៀនពីអ្វីៗទាំងនោះបាន ។ ការសម្តែងនូវការដឹងគុណនឹងបើកទ្វារឲ្យព្រះអម្ចាស់ប្រទានពរ ហើយជួយដល់អ្នក ។
ខ .ការបន្តមានសុខភាពល្អ និងមានថាមពល
-
សិក្សា ហើយអនុវត្តតាម គោលលទ្ធិ និង សេចក្ដីសញ្ញា ៨៩ ។
-
ពង្រឹងប្រព័ន្ធការពាររបស់អ្នក ។
-
ព្យាយាមទទួលដំណេកឲ្យបានប្រាំបីទៅប្រាំបួនម៉ោង ។
-
សូមផឹកទឹកស្អាត ៦–១២ កែវ ក្នុងមួយថ្ងៃ អាស្រ័យទៅលើអាកាសធាតុ ។
-
លើកលែងតែពេលតមអាហារចេញ សូមកុំខកខានក្នុងការបរិភោគអាហារ ជាពិសេសអាហារពេលព្រឹក ។
-
ចៀសវាងជាតិស្ករ ។
-
លេបថ្នាំវីតាមីនចម្រុះរាល់ថ្ងៃ ។
-
សូមបរិភោគអាហារដែលមានប្រូតេអ៊ីនរាល់ថ្ងៃ ( ឧទាហរណ៍ សណ្តែកដី សណ្តែកខៀវ តៅហ៊ូ ស៊ុត ទឹកដោះគោ ទឹកដោះគោជូរ ហ្វ្រូម៉ា ត្រី សាច់មាន់ សាច់គោ និងសាច់ជ្រូកជាដើម ) ។
-
សូមលាងដៃរបស់អ្នកឲ្យបានញឹកញាប់ ឬប្រើទឹកសម្លាប់មេរោគសម្រាប់លាងដៃ ជាពិសេសប្រសិនបើមនុស្សជុំវិញអ្នកឈឺ ។
-
កុំទុកអាហារដែលត្រូវទុកក្នុងទូរទឹកកកចោលនៅខាងក្រៅទូរទឹកកក ។ នៅពេលដែលសង្ស័យថាវាហួសកំណត់ សូមបោះវាចោល ។
-
-
ហាត់ប្រាណឲ្យបានទៀងទាត់ ។ លំហាត់ប្រាណគឺជាការចាំបាច់សម្រាប់សុខុមាលភាពខាងរូបកាយ ។ សូមហាត់ធ្វើទាំងលំហាត់ប្រាណដែលបញ្ចេញកម្លាំង និងការចេះទ្រាំ ដែលជាមធ្យម ត្រូវហាត់ ៣០ នាទីក្នុងមួយថ្ងៃ ប្រាំដងក្នុងមួយសប្តាហ៍ ។ លំហាត់ប្រាណជួយបង្កើនថាមពលរបស់អ្នក និងធ្វើឲ្យអារម្មណ៍របស់អ្នកមានភាពនឹងនរ ។
-
សូមស្លៀកពាក់ស្របតាមអាកាសធាតុ ។ ប្រសិនបើអ្នកធ្វើការនៅខាងក្រៅក្រោមកម្តៅថ្ងៃ ត្រូវប្រាកដថាត្រូវប្រើឡេការពារកម្តៅថ្ងៃ និងសម្លៀកបំពាក់ដែលមានពណ៌ស្រាលៗ ។ ប្រសិនបើអ្នកក្តៅពេក សូមចាក់ទឹកត្រជាក់លើ កដៃរបស់អ្នក ។ ក្នុងអាកាសធាតុត្រជាក់ សូមស្លៀកសម្លៀកបំពាក់ដែលមានច្រើនជាន់រួមទាំងស្រោមដៃ និងមួកផងដែរ ។
-
សូមរក្សាកន្លែងរស់នៅរបស់អ្នកឲ្យស្អាតបាត ហើយគ្មានធូលី ។ បន្ទប់ដែលស្អាតក៏នឹងលើកកម្ពស់វិញ្ញាណរបស់អ្នកផងដែរ ។ សូមសហការជាមួយឪពុកម្តាយរបស់អ្នក ហើយត្រូវគិតគូរពីគ្រួសាររបស់អ្នក ។ សូមជួយពួកគេឲ្យថែរក្សាកន្លែងរួម ។ ការថែរក្សាកន្លែងរស់នៅរបស់អ្នកឲ្យស្អាតបាតគឺសំខាន់ណាស់ ជាពិសេសប្រសិនបើអ្នកមានជំងឺផ្តាសាយញឹកញាប់ ឬមានប្រតិកម្មនោះ ។ សូមបោកកន្សែង និងកម្រាលពូកឲ្យបានទៀងទាត់ដើម្បីកាត់បន្ថយបាក់តេរីដែលនាំឲ្យមានប្រតិកម្មអាឡែកស៊ី ។
គ. ការគ្រប់គ្រងការឈឺក្បាល ឈឺពោះ ឬឈឺសាច់ដុំ
-
សូមរៀនធ្វើការសម្រាកខាងរូបកាយ ។ ការសម្រាកអាចជួយកាត់បន្ថយរោគសញ្ញាលើរាងកាយដូចជា ការឈឺក្បាល ឈឺពោះ ឬឈឺខ្នង ។ វាក៏អាចជួយដល់ជំងឺរាគ ឈឺសន្លាក់ ឬបេះដូងលោតញាប់ ឬពិបាកដកដង្ហើមផងដែរ ។ វាអាចកាត់បន្ថយអារម្មណ៍ការភ័យស្លន់ស្លោបាន ។ ហ្វឹកហាត់រាងកាយរបស់អ្នកឲ្យចេះសម្រាកដោយការអនុវត្តតាម លំហាត់ប្រាណសម្រាកតាមលំដាប់កើនឡើង ។ ឬព្យាយាមធ្វើ លំហាត់ប្រាណផ្លូវដង្ហើម ជារៀងរាល់ថ្ងៃយ៉ាងតិចណាស់បីសប្តាហ៍ ។ នៅពេលអ្នកមានរោគសញ្ញាលើរាងកាយ ឬមានអារម្មណ៍តានតឹងខ្លាំងពេក សូមប្រើលំហាត់ប្រាណទាំងនេះ ដើម្បីកាត់បន្ថយភាពតានតឹង ។ វានឹងជួយអ្នកឲ្យស្ងប់អារម្មណ៍ ។ ពេលអ្នកសម្រាក សូមផ្ដោតលើការទុកចិត្តថា ព្រះអម្ចាស់នឹងជួយអ្នកឲ្យប្រឈមនឹងឧបសគ្គរបស់អ្នក ។ តាមវិធីនេះ ការរៀនសម្រាកអាចជាទម្រង់នៃការចុះចូលនឹងព្រះទ័យរបស់ព្រះ ។ វាក៏អាចបង្ហាញពីឆន្ទៈក្នុងការធ្វើតាមព្រះអង្គសង្គ្រោះផងដែរ ដូចដែលទ្រង់បានមានព្រះបន្ទូលថា « កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ » ( លូកា ២២:៤២ ) ។
-
បំបែកការងាររបស់អ្នកទៅជាកិច្ចការតូចៗ ។ បន្ទាប់មក សូមធ្វើកិច្ចការនោះម្តងមួយៗ ។ នៅជំហាននីមួយៗ សូមរំឭកខ្លួនឯងថា « អ្វីទាំងអស់ដែលខ្ញុំត្រូវធ្វើនៅពេលឥឡូវនេះគឺ » ។ ឧទាហរណ៍ អ្នកអាចនិយាយថា « អ្វីៗទាំងអស់ដែលខ្ញុំត្រូវធ្វើនៅពេលឥឡូវនេះគឺទូរសព្ទទៅអ្នកដឹកនាំបេសកកម្មផ្នែកសេវាកម្ម » ឬ « អ្វីៗទាំងអស់ដែលខ្ញុំត្រូវធ្វើនៅពេលឥឡូវនេះគឺស្លៀកពាក់សម្រាប់ថ្ងៃនេះ » ។
-
សូមរក្សាកំណត់ហេតុមួយសម្រាប់រយៈពេលមួយសប្ដាហ៍ ។ ការណ៍នេះនឹងជួយអ្នកឲ្យមើលឃើញពីពេលដែលរោគសញ្ញាខាងរាងកាយរបស់អ្នកកើតមាន ។ សូមរកមើលលំនាំ ។ ឧទាហរណ៍ រោគសញ្ញារបស់អ្នកអាចនឹងកើតឡើង ៖
-
នៅក្រោមកាលៈទេសៈមួយចំនួនដូចជានៅថ្ងៃអាទិត្យ ។ អ្នកក៏ប្រហែលជាមានអារម្មណ៍ថាឈឺពេលនៅក្បែរថ្នាក់ដឹកនាំ ។ ជារឿយៗ អ្នកអាចមានអារម្មណ៍ថាឈឺ ពេលអ្នកមិនបានបរិភោគអាហារច្រើនម៉ោង ។
-
នៅពេលអ្នករិះគិតពីវិធីជាក់លាក់មួយ ។ ឧទាហរណ៍ នៅពេលដែលអ្នកគិតថាអ្នកគួរតែធ្វើអ្វីមួយ ដែលប្រសើរជាងនេះ ។
-
នៅពេលដែលអ្នកមានអារម្មណ៍មួយចំនួនដែលមិនចង់និយាយអំពី ដូចជាការថប់បារម្ភ ឬកំហឹងជាដើម ។
-
-
សូមរិះរកវិធីដើម្បីផ្លាស់ប្តូរស្ថានភាពនេះ ។ ឧទាហរណ៍ អ្នកអាចខ្ចប់អាហារសម្រន់ដែលមានសុខភាពល្អទៅជាមួយ ឬព្យាយាមផ្លាស់ប្តូរគំនិតរបស់អ្នក ( សូមមើល « ការតតាំងនឹងការគិតអវិជ្ជមាន » ) ។ អ្នកក៏អាចព្យាយាមរម្ងាប់អារម្មណ៍ផងដែរ ( សូមមើល « ការឆ្លើយតបដោយវិជ្ជមានចំពោះភាពតានតឹង » ) ។ ស្វែងរកយោបល់បន្ថែមនៅក្រោម « ៣. ការអភិវឌ្ឍភាពធន់ខាងសតិអារម្មណ៍ » ។
-
សូមស្វែងរកការព្យាបាលខាងវេជ្ជសាស្ត្រ ។ ប្រសិនបើរោគសញ្ញានៅបន្តមាន ឬអ្នកមានរបួស សូមប្រឹក្សាជាមួយឪពុកម្តាយរបស់អ្នកដើម្បីទទួលបានជំនួយខាងវេជ្ជសាស្ត្រ ។
-
សូមបំភ្លេចខ្លួនឯង ។ អ្នកប្រហែលជាសង្កេតឃើញការគិតដែលគួរឲ្យព្រួយបារម្ភដូចជា « ខ្ញុំនឹងភ្លេចអ្វីដែលត្រូវនិយាយ » ។ ឬអ្នកប្រហែលជាគិតថា « ខ្ញុំកំពុងធ្វើរឿងល្ងីល្ងើ » ។ សូមរំព្ញកខ្លួនអ្នកថា មនុស្សគ្រប់គ្នាធ្វើខុស ។ សូមចងចាំថា ព្រះអម្ចាស់ជ្រើសរើសធ្វើការតាមរយៈមនុស្សទន់ខ្សោយ និងសាមញ្ញ ( សូមមើល គោលលទ្ធិ និង សេចក្ដីសញ្ញា ១:២៤–២៨ ) ។
ឃ. ការសម្រាន្តលក់ស្រួល ហើយចូលសម្រាន្តទាន់ពេល
-
សូមសរសេរបញ្ជីមួយពីអ្វីដែលធ្វើឲ្យអ្នកសម្រាន្តមិនលក់ ។ បន្ទាប់មក សូមដាក់បញ្ជីនេះមួយឡែក ។ ការធ្វើបែបនេះនឹងធ្វើឲ្យចិត្តរបស់អ្នកសម្រាកដោយដឹងថា អ្នកនឹងមិនភ្លេចកិច្ចការសំខាន់ឡើយ ។ សូមរំឭកខ្លួនឯងថា អ្នកនឹងធ្វើផែនការជាក់លាក់នានានៅពេលព្រឹក ។ សូមផ្ដោតការអធិស្ឋានពេលយប់របស់អ្នកលើការថ្លែងអំណរគុណ និងការរាយការណ៍ពីអ្វីដែលអ្នកបានរៀននៅថ្ងៃនេះ ។
-
សូមធ្វើតាមទម្លាប់រៀងរាល់យប់ ។ ការណ៍នេះនឹងបង្វឹកដល់រាងកាយរបស់អ្នកថា ដល់ពេលចូលសម្រាន្តហើយ ។ ជាឧទាហរណ៍ សូមប្រើ លំហាត់ប្រាណសម្រាកតាមលំដាប់កើនឡើង មុនពេលចូលសម្រាន្ត ។ សូមចៀសវាងការអាន ឬបរិភោគនៅលើគ្រែ ។ អ្នកនឹងសម្រាន្តកាន់តែលក់ស្រួល ប្រសិនបើចិត្តរបស់អ្នកដឹងថា គ្រែរបស់អ្នកជាកន្លែងសម្រាប់សម្រាន្ត ។ ព្យាយាមសម្រាន្តឲ្យបានប្រាំបីទៅប្រាំបួនម៉ោងរៀងរាល់យប់ ។
-
បន្ធូរអារម្មណ៍ ហើយសម្រាកអំឡុងម៉ោងចុងក្រោយនៅថ្ងៃនោះ ។ មុនពេលចូលសម្រាន្ត សូមសរសេរក្នុងសៀវភៅកំណត់ហេតុ ឬបរិភោគអាហារសម្រន់ដូចជាទឹកដោះគោ ឬផ្លែឈើ ។ ស្តាប់តន្ត្រីដែលសមរម្យ និយាយជាមួយសមាជិកគ្រួសារ ឬអនុវត្តជំនាញបន្ធូរអារម្មណ៍ ។ ប្រសិនបើអ្នកភ្លេចចាប់ផ្តើមបន្ធូរអារម្មណ៍ក្នុងអំឡុងម៉ោងនេះ សូមដាក់ម៉ោងរោទិ៍ ៣០ នាទីមុនពេលអ្នកគួរតែចូលសម្រាន្ត ។ ពេលអ្នកឮហើយ សូមឈប់ធ្វើអ្វីដែលអ្នកកំពុងធ្វើនោះ ។ សូមចាប់ផ្ដើមបន្ធូរអារម្មណ៍ ហើយរៀបចំខ្លួនចូលសម្រាន្ត ។
-
សូមចៀសវាងអាហារមានជាតិស្ករ ឬធ្វើលំហាត់ប្រាណមួយម៉ោងពីមុនចូលសម្រាន្ត ។
-
សូមដំឡើង ឬបន្ថយកម្ដៅ ។ វានឹងកាន់តែពិបាកសម្រាន្ត ប្រសិនបើអ្នកមានអារម្មណ៍ថាក្ដៅ ឬត្រជាក់ពេក ។ សូមងូតទឹកត្រជាក់ ឬយកភួយបន្ថែមទៀត ។
-
ការពារកុំឲ្យមានពន្លឺ និងសំឡេងឲ្យបានច្រើនតាមដែលអាចធ្វើទៅបាន ។ សូមបាំងពន្លឺ និងទប់សំឡេងរំខានដោយការបើកកង្ហារ ឬដាក់ប្រដាប់ញ៉ុកត្រចៀក ។ សូម្បីតែពន្លឺ ឬសំឡេងរំខានតូចមួយក៏ធ្វើឲ្យមនុស្សមួយចំនួនសម្រាន្តមិនលក់ដែរ ។
ង. ការក្រោកពីដំណេកឲ្យទាន់ពេល
-
ដំបូង សូមក្រោកពីដំណេកទាន់ពេល ។ ប្រសិនបើអ្នកសម្រាន្តមិនគ្រប់គ្រាន់ទេ សូមចូលដំណេកមុន ៣០ នាទី ។
-
ធ្វើលំហាត់ប្រាណជាទៀងទាត់ ។ បន្ទាប់ពីធ្វើលំហាត់ប្រាណ ៣០ នាទីក្នុងមួយថ្ងៃ បានបីបួនសប្តាហ៍ហើយ នោះអ្នកប្រហែលជាសង្កេតឃើញថា អ្នកត្រូវការទទួលទានដំណេកតិចជាងមុន ។ នៅពេលរាងកាយរបស់អ្នកកាន់តែរឹងមាំ វាមានកម្លាំងកាន់តែច្រើន ហើយមានការសម្រាកកាន់តែងាយស្រួល ។
-
សូមចៀសវាងបរិភោគអាហារមានជាតិស្ករពីមុនចូលដំណេក ។ ការចៀសវាងជាតិស្ករដូច្នេះប្រហែលជាជួយអ្នកឲ្យមិនសូវមានអារម្មណ៍ងងុយដេកនៅពេលព្រឹក ។
-
រៀបចំកម្មវិធីសម្រាប់ខួរក្បាលរបស់អ្នក ។ សូមប្រាប់ខ្លួនឯងកាលមួយយប់មុនថា តើអ្នកចង់ក្រោកនៅម៉ោងប៉ុន្មាន ។
-
ប្រសិនបើអាច សូមដាក់នាឡិការោទិ៍ភ្ជាប់ទៅនឹងភ្លើង ។ ដាក់ម៉ោងកំណត់ដើម្បីបើកភ្លើងរបស់អ្នកពី ១៥ ទៅ ២០ នាទីមុនពេលក្រោក ។ ពន្លឺនឹងផ្ដល់សញ្ញាទៅដល់ខួរក្បាលរបស់អ្នកឲ្យក្រោកពីដំណេក ។
ច. ការបរិភោគអាហារជាមួយគ្រួសារ
-
ចូលរួមជាមួយគ្រួសាររបស់អ្នកក្នុងការរៀបចំផែនបរិភោគអាហារ ។ ចំណាយពេលវេលាដើម្បីទិញអាហារ រៀបចំផែនការ និងរៀបចំអាហារ និងលាងសម្អាត ។
-
បរិភោគអាហារចម្រុះគ្នា ។ ព្យាយាមបរិភោគផ្លែឈើ ឬបន្លែយ៉ាងតិចប្រាំមុខក្នុងមួយថ្ងៃ ប្រសិនបើមាន ។
-
បរិភោគអាហារមានជីវជាតិប្រូតេអ៊ីនរាល់ថ្ងៃ ។ អាហារដែលមានប្រូតេអ៊ីនខ្ពស់រួមមាន សណ្តែកដី សណ្ដែកខៀវ តៅហ៊ូ ស៊ុត ទឹកដោះគោ ទឹកដោះគោជូរ ហ្រ្វម៉ា ស៊ុត ត្រី សាច់មាន់ សាច់ជ្រូក និងសាច់គោជាដើម ។
-
កាត់បន្ថយជាតិស្ករ ហើយចៀសវាងជាតិកាហ្វេអ៊ីន ។ សារធាតុទាំងពីរនេះនឹងធ្វើឲ្យមនុស្សឆាប់ខឹង ហើយអស់កម្លាំង ។
-
ផឹកទឹក និងភេសជ្ជៈផ្សេងទៀត ។ រក្សាជាតិទឹកដោយផឹកទឹក និងភេសជ្ជៈផ្សេងទៀតពី ៦ ទៅ ១២ កែវក្នុងមួយថ្ងៃ អាស្រ័យទៅលើអាកាសធាតុ ។
-
បើចាំបាច់ ត្រូវសម្រកទម្ងន់បន្តិចម្តងៗ ។ តើអ្នកកំពុងព្យាយាមសម្រកទម្ងន់មែនទេ ? បើដូច្នេះមែន សូមកុំព្យាយាមសម្រកលើសពីមួយទៅពីរផោន ( មួយគីឡូក្រាម ) ក្នុងមួយសប្តាហ៍ឲ្យសោះ ។ សូមផឹកទឹកបន្ថែមឲ្យបានច្រើន ។
ច. ការទទួលបានកម្លាំងចិត្តដើម្បីធ្វើលំហាត់ប្រាណ
-
សូមអធិស្ឋានឲ្យមានចិត្តចង់ធ្វើលំហាត់ប្រាណ ។ បន្ទាប់មក សូមចាប់ផ្តើមដោយប្រាប់ខ្លួនឯងថា អ្នកនឹងហាត់ប្រាណត្រឹមតែប្រាំនាទីប៉ុណ្ណោះ ។ ជាញឹកញយ អ្នកនឹងកាន់តែមានការលើកទឹកចិត្តនៅពេលដែលអ្នកបានចាប់ផ្ដើម ។
-
សូមរំឭកខ្លួនឯងពីគុណប្រយោជន៍នៃការធ្វើលំហាត់ប្រាណ ។ សូមស្រមៃថា អ្នកនឹងមានភាពស៊ាំកាន់តែប្រសើរ និងបង្កើនថាមពលកាន់តែខ្លាំង ។ សូមស្រមៃមើលផងដែរពីការគ្រប់គ្រងភាពតានតឹងបានល្អប្រសើរ ការមានសតិអារម្មណ៍កាន់តែល្អប្រសើរ និងគ្រប់គ្រងទម្ងន់របស់អ្នកបានកាន់តែប្រសើរជាងមុន ។ សូម្បីតែមនុស្សដែលមិនចូលចិត្តការហាត់ប្រាណក៏ទទួលបានអត្ថប្រយោជន៍ទាំងនេះដែរ ។
-
ធ្វើឲ្យការហាត់ប្រាណក្លាយជាល្បែងមួយ ។ ខណៈពេលដែលអ្នកហាត់ប្រាណ ចូររៀបចំផែនការសកម្មភាពសប្បាយមួយសម្រាប់ពេលក្រោយ ឬហាត់ប្រាណតាមចង្វាក់តន្ត្រីដែលមានលក្ខណៈសមរម្យ ។ ចូររក្សាតារាងពិន្ទុនៃកិច្ចខិតខំធ្វើលំហាត់ប្រាណរបស់អ្នក ហើយផ្តល់រង្វាន់ដល់ខ្លួនឯងចំពោះការសម្រេចបានគោលដៅរបស់អ្នក ។ រង្វាន់អាចជាការទៅឧទ្យាន ភោជនីយដ្ឋាន ឬហាងទំនិញ ។
-
សូមស្វែងរកប្រភេទលំហាត់ប្រាណដែលអ្នកចូលចិត្ត ( ឬមិនសូវចូលចិត្តតិចតួច ) ។ ឧទាហរណ៍ អ្នកអាចដើរ ឬរត់តាមចង្វាក់ភ្លេង ។ អ្នកអាចលោតអន្ទាក់ ពត់ខ្លួន ឬអាវ៉ង់ អង្គុយពាក់កណ្តាល ឬហាត់យូហ្គា ។