« សេចក្តីផ្តើម » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម ៖ កូនសៀវភៅធនធាន ( ឆ្នាំ ២០២០ )
« សេចក្តីផ្តើម » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម
ព៌ត័មានលម្អិតមកពី ចូរមកតាមខ្ញុំ ដោយ ជេមស៍ ធី ហាវូដ
សេចក្តីផ្តើម
អ្នកអាចទទួលបានជោគជ័យដោយមានជំនួយពីព្រះអម្ចាស់
ក្នុងនាមជាអ្នកផ្សព្វផ្សាយសាសនាផ្នែកសេវាកម្ម អ្នកត្រូវបានហៅឲ្យធ្វើជាតំណាងរបស់ព្រះយេស៊ូវគ្រីស្ទ ។ អ្នកកំពុងផ្ដល់ការងារបម្រើដល់បុត្រាបុត្រីរបស់ព្រះវរបិតាសួគ៌ ។ ព្រះអង្គសង្គ្រោះស្រឡាញ់អ្នក ហើយទ្រង់នឹងជួយអ្នកឲ្យឆ្ពោះទៅមុខ ។ ទ្រង់បានសន្យា ៖ « យើងនឹងទៅពីមុខអ្នក ។ យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើងនៅព័ទ្ធជុំវិញអ្នក ដើម្បីទ្រអ្នកឡើង » ( គោលលទ្ធិ និង សេចក្តីសញ្ញា ៨៤:៨៨ ) ។
សូមអនុវត្តសេចក្តីជំនឿរបស់អ្នក ហើយធ្វើសកម្មភាពតាមការសម្រេចចិត្តដែលអ្នកបានធ្វើដើម្បីធ្វើកិច្ចការរបស់ព្រះអម្ចាស់ ។ តាមរយៈការបន្តមានសេចក្តីជំនឿ និងកិច្ចខិតខំដ៏ល្អបំផុតរបស់អ្នក នោះអ្នកនឹងអភិវឌ្ឍជំនាញ អំណោយទាន និងភាពរឹងមាំដែលអ្នកត្រូវការបានយ៉ាងឆាប់បំផុត ។ អ្នកនឹងទទួលអារម្មណ៍ថាមានជំនួយពីព្រះអម្ចាស់ ។ អ្នកនឹងមានទំនុកចិត្តកាន់តែខ្លាំងឡើងលើសមត្ថភាពរបស់អ្នកក្នុងការបម្រើទ្រង់ ។
ព្រះអម្ចាស់បានសន្យាថានឹងជួយដល់ពួកអ្នកផ្សព្វផ្សាយសាសនា ។ ប៉ុន្តែនៅក្នុងប្រវត្តិសាស្រ្ត ពួកអ្នកផ្សព្វផ្សាយសាសនាដ៏អស្ចារ្យជាច្រើនបានរងទុក្ខ និងពុះពារក្នុងការងារផ្សព្វផ្សាយសាសនារបស់ពួកគេផងដែរ ។ អាំម៉ូន និងបងប្អូនប្រុសរបស់លោក « [ បាន ] រងទុក្ខជាច្រើន ទាំងផ្លូវកាយ និងផ្លូវចិត្ត ដូចជាការអត់ឃ្លាន ការស្រេក និងការនឿយហត់ ព្រមទាំងការនឿយហត់ខាងផ្លូវវិញ្ញាណផង » ( អាលម៉ា ១៧:៥ ) ។ ជួនកាល ពួកលោកមានអារម្មណ៍សន្ធប់ខ្លាំង ។ « ឥឡូវនេះ កាលណាយើងនឿយណាយក្នុងចិត្ត ហើយយើងសឹងតែត្រឡប់ទៅវិញ មើលចុះ ព្រះអម្ចាស់ទ្រង់បានកម្សាន្តចិត្តយើង ហើយមានព្រះបន្ទូលថា ៖ ចូរទៅក្នុងចំណោមបងប្អូនអ្នក គឺពួកសាសន៍លេមិន ហើយចូរទ្រាំដោយសេចក្ដីអត់ធ្មត់នូវការទុក្ខវេទនាទាំងឡាយរបស់អ្នកចុះ ហើយយើងនឹងប្រទានដល់អ្នកនូវជ័យជម្នះ » ( អាលម៉ា ២៦:២៧ ) ។
ការសន្យានេះអនុវត្តចំពោះអ្នកនៅក្នុងការបម្រើដែលបានចាត់តាំងរបស់អ្នកចំពោះក្រុមគ្រួសាររបស់ព្រះផងដែរ ។ អ្នកអាចធ្វើជាអ្នកបម្រើដ៏មានប្រយោជន៍របស់ព្រះអម្ចាស់ ។
ថាតស៊ូ អ៊ីតូ ដែលជាអ្នកមានជំងឺស្វិតសាច់ដុំឆ្អឹងខ្នង គឺជាឧទាហរណ៍មួយពីការបំពេញសេចក្តីសន្យានេះ ។ នៅពេលដែលគ្រួសារ អ៊ីតូ បានផ្លាស់ទីលំនៅពីប្រទេសជប៉ុន ទៅ រដ្ឋ យូថាហ៍ ថាតស៊ូ បានសម្រេចចិត្តបម្រើជាអ្នកផ្សព្វផ្សាយសាសនាផ្នែកសេវាកម្ម ។ ប្អូនប្រុសរបស់ ថាតស៊ូ ឈ្មោះ ឌេន « អាចមើលឃើញពីការផ្លាស់ប្តូររបស់ថាតស៊ូ » ក្នុងអំឡុងបេសកកម្ម ហើយបានដឹងថា ថាតស៊ូ ពិតជា « កំពុងរៀបចំខ្លួនដើម្បីត្រឡប់ទៅស្ថានសួគ៌វិញ » មែន ។
នៅពេល ថាតស៊ូ ទទួលមរណភាព ឌេន ដែលមានជំងឺស្វិតសាច់ដុំឆ្អឹងខ្នងផងដែរនោះ បានទៅព្រះវិហារបរិសុទ្ធ ។ គាត់ទទួលអារម្មណ៍បំផុសគំនិតឲ្យសួរ ប្រសិនបើគាត់អាចទទួលការហៅឲ្យបំពេញការចាត់តាំងបេសកកម្មដូចគ្នានឹងបេសកកម្មដែល ថាតស៊ូ បានបម្រើពីមុនគាត់ទទួលមរណភាព ។ ឌេន មានពរជ័យដែលអាចធ្វើដូច្នេះបាន ។ គាត់បានបម្រើនៅក្នុងក្រុមឆ្លើយតប និងពិនិត្យមើល ប្រូហ្វាល « ខ្ញុំជាមរមន » នៅលើគេហទំព័រ LDS.org ជាភាសាជប៉ុន ។
ឌេន បាននិយាយថា គាត់ក៏ជា « អ្នកតំណាងរបស់ព្រះនៅក្នុងជីវិតប្រចាំថ្ងៃផងដែរ » ។ ប្រសិនបើនរណាម្នាក់មានបញ្ហានោះគាត់ « រីករាយនឹងស្តាប់ពួកគេ និងលើកទឹកចិត្តពួកគេឲ្យទៅជួបប៊ីស្សពដើម្បីទទួលការប្រសិទ្ធពរជានិច្ច » ។
ខណៈដែលបេសកកម្មរបស់អែលឌើរ អ៊ីតូ មិនមែនជាទម្រង់ការផ្នែកផ្សព្វផ្សាយ គាត់បាននិយាយថា គាត់ពិតជាមានអារម្មណ៍ថា គាត់ជាអ្នកផ្សព្វផ្សាយសាសនាមួយរូប ។ គាត់បាននិយាយថា បេសកម្មរបស់គាត់បានជួយគាត់ឲ្យ « បង្កើនឆន្ទៈកាន់តែខ្លាំងដើម្បីបម្រើជារៀងរាល់ថ្ងៃ » ។
អែលឌើរ ថាតស៊ូ អ៊ីតូ
របៀបប្រើប្រាស់កូនសៀវភៅនេះ
បេសកកម្មផ្នែកសេវាកម្មអាចមានទាំងភាពរីករាយ និងភាពតានតឹង ។ ការខិតខំធ្វើការ និងការបម្រើគឺជាឧបករណ៍ដែលបង្ហាញថាមានប្រសិទ្ធភាពនៅក្នុងការគ្រប់គ្រងការព្រួយបារម្ភ ភាពអស់សង្ឃឹម និងភាពនឿយហត់ ។ វាសំខាន់សម្រាប់មនុស្សគ្រប់រូបដែលត្រូវរួមចំណែកក្នុងកិច្ចការរបស់ព្រះអម្ចាស់ ទាំងក្នុងអំឡុងពេល និងក្រោយពេលការបម្រើជាអ្នកផ្សព្វផ្សាយសាសនា ។ ប៉ុន្តែការខិតខំធ្វើការ និងការបម្រើតែមួយមុខគឺមិនមែនជាឧបរណ៍តែម្យ៉ាងរបស់អ្នកនោះទេ ។ ធនធានផ្សេងទៀតរួមមានជំនួយផ្នែកវិជ្ជាជីវៈ ពរជ័យបព្វជិតភាព ដំបូន្មានពីមជ្ឈិមវ័យដែលមានបទពិសោធន៍ និងកូនសៀវភៅនេះជាដើម ។ ព្រះអម្ចាស់នឹងជួយអ្នកឲ្យអភិវឌ្ឍជំនាញ និងបុគ្គលិកលក្ខណៈនានា ដើម្បីជួយអ្នកឲ្យទទួលបានជោគជ័យ ។ អ្នកអាចទទួលបានការពេញចិត្ត និងភាពជោគជ័យក្នុងបេសកកម្មផ្នែកសេវាកម្មរបស់អ្នក និងនៅក្នុងជីវិតរបស់អ្នក ។
កូនសៀវភៅនេះមិនមានន័យថាត្រូវអានទាំងអស់ក្នុងពេលតែម្តងនោះទេ ។ សូមប្រើសេចក្តីណែនាំដូចខាងក្រោម ។ អ្នកនឹងទទួលបានការណែនាំទៅកាន់យោបល់សម្រាប់បញ្ហាប្រឈមដែលអ្នកជួបប្រទះ ។ គំនិតទាំងនេះក៏នឹងជួយដល់អ្នកផងដែរ នៅពេលអ្នកបម្រើ និងផ្ដល់ការងារបម្រើដល់អ្នកផ្សេងទៀត ។