« ការយល់ដឹងពីភាពតានតឹង » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម ៖ កូនសៀវភៅធនធាន ( ឆ្នាំ ២០២០ )

« ការយល់ដឹងពីភាពតានតឹង » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម

ការយល់ដឹងពីភាពតានតឹង

ការអភិវឌ្ឍភាពធន់នៅក្រោមភាពតានតឹង

បទពិសោធន៍ថ្មី ( ដូចជាការចូលរួមសាសនាចក្រ ឬការចូលរៀននៅសាលាថ្មី ) គឺជារឿងរំភើបណាស់ ។ ប៉ុន្តែវាក៏អាចធ្វើឲ្យអ្នកភ័យខ្លាចផងដែរ ។ អ្នកមិនដឹងពិតប្រាកដពីអ្វីដែលត្រូវរំពឹងទុកនោះទេ ។ ពេលវេលានឹងកន្លងទៅ អ្នកនឹងរៀនពីបញ្ហាប្រឈមទាំងនេះ ហើយអ្នកនឹងរីកចម្រើននៅក្នុងដំណើរការនេះ ។ ការសម្របខ្លួនទៅនឹងភាពតានតឹងដោយវិធីវិជ្ជមានគឺជារបៀបអភិវឌ្ឍភាពធន់ខាងសតិអារម្មណ៍ ។

បេសកកម្មផ្នែកសេវាកម្មមិនមានភាពខុសប្លែកគ្នានោះទេ ។ ពេលខ្លះ បេសកកម្មផ្នែកសេវាកម្មមានអារម្មណ៍ហាក់ដូចដំណើរផ្សងព្រេងខាងវិញ្ញាណមួយដ៏អស្ចារ្យ ។ វាហាក់ដូចជាបញ្ហាប្រឈមដែលអ្នកអាចដោះស្រាយបាន ។ អ្នកអាចដើរឆ្ពោះទៅមុខយ៉ាងស្ងប់ស្ងាត់ដោយសេចក្ដីជំនឿ ។ អ្នកដឹងថា ការភ័យខ្លាច ឬការព្រួយបារម្ភជាច្រើនដែលអ្នកជួបប្រទះគឺជារឿងបណ្ដោះអាសន្នតែប៉ុណ្ណោះ ។ អ្នកមានសេចក្តីក្លាហានដោយដឹងថា អ្នកនឹងអាចសម្របខ្លួនបានទៅតាមពេលវេលា ។ អ្នករីកចម្រើនខាងវិញ្ញាណ ហើយមានឱកាសដើម្បីអភិវឌ្ឍជំនាញថ្មីៗ ។ ជាញឹកញាប់ បទពិសោធន៍ទាំងឡាយដែលអ្នកធ្លាប់តែខ្លាច ក្លាយទៅជារឿងដែលកាន់តែអាចគ្រប់គ្រងបាន ។ អ្នកថែមទាំងស្រឡាញ់ទស្សនវិស័យនៃការបម្រើបេសកកម្មទៀតផង ដែលគ្រាមួយអ្នកធ្លាប់មានអារម្មណ៍ធុញទ្រាន់ ។ អ្នកពឹងផ្អែកលើព្រះវិញ្ញាណ ។ អ្នកមានទំនុកចិត្តកាន់តែខ្លាំង ហើយរកឃើញអំណរនៅក្នុងការបម្រើរបស់អ្នក ។

ទោះជាយ៉ាងណា នៅពេលខ្លះអ្នកអាចប្រឈមនឹងបញ្ហាដែលមិនបានរំពឹងទុកផងដែរ ។ បទពិសោធន៍ខ្លះវាកាន់តែពិបាក ឬកាន់តែមិនពេញចិត្ត ជាងការរំពឹងទុកទៅទៀត ។ អ្នកអាចងឿងឆ្ងល់ថា តើអ្នកអាចទទួលបានជោគជ័យដោយរបៀបណា ។ ជំនួសឲ្យអារម្មណ៍លើកទឹកចិត្តឲ្យព្យាយាម នោះអ្នកអាចបែរទៅជាមានអារម្មណ៍អន្ទះសា ឆាប់ខឹង នឿយហត់ ឬស្មុគស្មាញ ។ អ្នកអាចមានអាការផ្លូវកាយដូចជា ការឈឺចាប់ ឈឺក្រពះ ការដេកបានតិច ឬមានជំងឺ ។ អ្នកអាចមានបញ្ហាជាមួយនឹងការរៀនសូត្រ ឬការប្រាស្រ័យទាក់ទងនឹងមនុស្សទូទៅ ។ អ្នកអាចមានអារម្មណ៍បាក់ទឹកចិត្ត ឬចង់បោះបង់ចោល ។

កម្រិតទាំងបួននៃភាពតានតឹង

រោគសញ្ញានៃភាពតានតឹងគឺដូចជាសញ្ញាដែលបង្ហាញនៅលើផ្ទាំងគ្រប់គ្រងរបស់រថយន្តដែរ ។ វារំព្ញកអ្នកឲ្យបន្ថយល្បឿន ចាក់ប្រេងឥន្ធនៈ ឬត្រួតពិនិត្យមើលម៉ាស៊ីន ។ វារំព្ញកអ្នកឲ្យចាក់បំពេញ « ធុង » ខាងវិញ្ញាណរបស់អ្នក ហើយស្វែងរកដំណោះស្រាយថ្មី ។ យោងតាមតារាងខាងក្រោមនេះ ពេលពួកអ្នកផ្សព្វផ្សាយសាសនាកំពុងសម្របខ្លួនទៅនឹងភាពតានតឹងបានល្អ នោះពួកគេស្ថិតក្នុងកម្រិត « ពណ៌បៃតង » ។ នៅពេលពួកគេថប់បារម្ភ ឬមានបញ្ហា នោះពួកគេស្ថិតក្នុងកម្រិត « ពណ៌លឿង » ។ ប្រសិនបើពួកគេបន្តមានអារម្មណ៍តានតឹង នោះពួកគេស្ថិតក្នុងកម្រិត « ពណ៌ទឹកក្រូច »។ ហើយនៅពេលពួកគេមានអារម្មណ៍ថាមិនអាចបំពេញមុខងារដូចប្រក្រតីវិញបាន ពីព្រោះតែភាពតានតឹង នោះពួកគេស្ថិតក្នុងកម្រិត « ពណ៌ក្រហម » ។

នៅក្នុងដំណើរនៃបេសកកម្មរបស់អ្នក អ្នកប្រហែលជាជួបនឹងកម្រិតនៃភាពតានតឹងខុសៗគ្នា នៅពេលផ្សេងៗពីគ្នា ។ អ្នកប្រហែលជាមានអារម្មណ៍ « ពណ៌ទឹកក្រូច » នៅថ្ងៃនេះ ហើយត្រឡប់ទៅ « ពណ៌បៃតង » វិញនៅថ្ងៃស្អែក ។ កូនសៀវភៅនេះមាននូវមតិយោបល់ និងឧបករណ៍ដែលអាចជួយអ្នកឲ្យបន្ត—ឬត្រឡប់ទៅកម្រិតពណ៌បៃតងវិញបាន ។

	សញ្ញាដែលបញ្ជាក់ថាអ្នកស្ថិតនៅកម្រិតនេះ	អ្វីដែលត្រូវធ្វើ
ពណ៌បៃតង	សញ្ញាដែលបញ្ជាក់ថាអ្នកស្ថិតនៅកម្រិតនេះ ភាពជឿជាក់ ភាពរីករាយ ត្រៀមខ្លួនជាស្រេចដើម្បីប្រឈមមុខនឹងឧបសគ្គទាំងឡាយ ក្រោកឡើងពីការបរាជ័យបានយ៉ាងឆាប់រហ័ស ចុះសម្រុងជាមួយនឹងថ្នាក់ដឹកនាំរបស់អ្នក ទទួលអារម្មណ៍ពីព្រះវិញ្ញាណ	អ្វីដែលត្រូវធ្វើ នេះគឺជាការល្អបំផុត ។ នៅកម្រិតនេះ អ្នកកំពុងដោះស្រាយភាពតានតឹងប្រចាំថ្ងៃនៃការផ្សព្វផ្សាយសាសនាផ្នែកសេវាកម្មបានល្អ ។ អ្នកកំពុងរៀនសូត្រ និងកំពុងរីកចម្រើន ។ សូមបន្តខិតខំធ្វើកិច្ចការ ហើយទុកចិត្តលើព្រះអម្ចាស់ ។
ពណ៌លឿង	សញ្ញាដែលបញ្ជាក់ថាអ្នកស្ថិតនៅកម្រិតនេះ តឹងតែង ព្រួយបារម្ភ គ្មានសុវត្ថិភាព ថប់បារម្ភ មិនបានត្រៀមខ្លួន ដេកមិនលក់ ពិបាកចុះសម្រុងនឹងអ្នកដទៃ មានការពិបាកក្នុងការទទួលអារម្មណ៍ពីព្រះវិញ្ញាណ	អ្វីដែលត្រូវធ្វើ នៅពេលខ្លះ វាជារឿងធម្មតាទេដែលចំណាយពេលមួយរយៈនៅកម្រិតពណ៌លឿង ។ សូមមានចិត្តល្អចំពោះខ្លួនឯង ពេលអ្នកប្រឈមនឹងឧបសគ្គនានា ។ សូមមានចិត្តអត់ធ្មត់នៅពេលអ្នករៀនជំនាញថ្មីៗ ដូចជាការចេះយកចិត្តទុកដាក់ជាដើម ។ ជំនាញទាំងនេះនឹងជួយអ្នកឲ្យកាន់តែរឹងមាំ និងបង្កើនសមត្ថភាពរបស់អ្នកក្នុងការបម្រើ ។ សូមបន្តអធិស្ឋាន ហើយបម្រើដោយសេចក្ដីជំនឿ ។ សូមរកមើលជំនួយពីក្នុងបទគម្ពីរ និងសុន្ទរកថាសន្និសីទ ថ្នាក់ដឹកនាំបេសកកម្មផ្នែកសេវាកម្មរបស់អ្នក ព្រមទាំងកូនសៀវភៅនេះ ។
ពណ៌ទឹកក្រូច	សញ្ញាដែលបញ្ជាក់ថាអ្នកស្ថិតនៅកម្រិតនេះ អស់កម្លាំង ( ទាំងផ្លូវកាយ និងផ្លូវចិត្ត ) ឈឺ ( ឈឺក្រពះ ឬរោគសញ្ញាផ្សេងទៀត ) ឆាប់ខឹង បាក់ទឹកចិត្តយ៉ាងខ្លាំង ពុំអាចទទួលអារម្មណ៍ពីព្រះវិញ្ញាណបាន	អ្វីដែលត្រូវធ្វើ គ្មាននរណាម្នាក់ចង់នៅក្នុងកម្រិតនៃភាពតានតឹងពណ៌ទឹកក្រូចនោះទេ ប៉ុន្តែវាមិនមែនជាស្ថានភាពអចិន្ត្រៃយ៍ឡើយ ។ សូមអធិស្ឋានសម្រាប់ការដឹកនាំ នៅពេលអ្នកសិក្សាព្រះគម្ពីរ ហើយអនុវត្តតាមសេចក្ដីណែនាំទាំងឡាយនៅក្នុងកូនសៀវភៅនេះ ។ សូមទាក់ទងទៅថ្នាក់ដឹកនាំបេសកកម្មផ្នែកសេវាកម្មរបស់អ្នក ប្រសិនបើអ្នកស្ថិតនៅក្នុងកម្រិតពណ៌ទឹកក្រូចលើសពីបីថ្ងៃ ។ ពួកគាត់នឹងជួយអ្នក ។
ពណ៌ក្រហម	សញ្ញាដែលបញ្ជាក់ថាអ្នកស្ថិតនៅកម្រិតនេះ មានអារម្មណ៍ប្រឹងពុះពារ ហើយមានជំងឺធ្លាក់ទឹកចិត្តយ៉ាងខ្លាំង តក់ស្លុត ឬអន្ទះសា មានអារម្មណ៍អស់សង្ឈឹម ពិបាកបរិភោគអាហារ ឬសម្រាន្ដ ( អាចនាំឲ្យឈឺ ) មានអារម្មណ៍ធុញទ្រាន់ និងមិនអាចបន្តទៅមុខបានទេ មានអារម្មណ៍ដូចជាព្រះបានបោះបង់អ្នកចោល	អ្វីដែលត្រូវធ្វើ ប្រសិនបើអ្នកស្ថិតក្នុងកម្រិតនេះ សូមទាក់ទងទៅថ្នាក់ដឹកនាំបេសកកម្មផ្នែកសេវាកម្មរបស់អ្នក សមាជិកគ្រួសារ ឬប្រធានស្តេកឲ្យជួយអ្នក ។ សូមសុំការប្រសិទ្ធពរបព្វជិតភាព ។ សូមចំណាយពេលខ្លះដើម្បីសរសេរនៅក្នុងសៀវភៅកំណត់ហេតុការសិក្សារបស់អ្នក ឬពិចារណាពីសេចក្ដីណែនាំទាំងឡាយនៅក្នុងកូនសៀវភៅនេះ ។ សូមអធិស្ឋានអំពីវា ។ អ្នកអាចស្នើសុំសម្រាកពីកិច្ចការចាត់តាំងរបស់អ្នកដែលអ្នកគិតថាវាពិបាកបំផុត ។ សូមនិយាយជាមួយថ្នាក់ដឹកនាំបេសកកម្មផ្នែកសេវាកម្មរបស់អ្នក ដើម្បីជួយស្វែងរកការផ្លាស់ប្តូរការបម្រើដែលស័ក្តិសមសម្រាប់អ្នក ។

អ្នកអាចប្រែក្លាយជាអ្នកបម្រើដ៏មានប្រយោជន៍របស់ព្រះអម្ចាស់ មិនថាអ្នកប្រឈមនឹងបញ្ហាអ្វីខ្លះនោះទេ ។ សូមព្យាយាមប្រើគំនិតទាំងឡាយក្នុងកូនសៀវភៅនេះ ហើយឆ្ពោះទៅមុខដោយសេចក្តីជំនឿ ។ សូមពិចារណាអំពីបទពិសោធន៍របស់ស៊ីស្ទើរ សូឈីល អូថេអូ ដែលបានបម្រើក្នុងបេសកកម្មផ្នែកសេវាកម្ម សេនឌីអាហ្គូ ៖

ព្រះវិហារបរិសុទ្ធ សេនឌីអាហ្គូ រដ្ឋកាលីហ្វ័រញ៉ា

« ពេលខ្ញុំចាប់ផ្ដើមបម្រើនៅអង្គការសប្បុរសធម៌កាតូលិក ខ្ញុំមានអារម្មណ៍រំភើប ប៉ុន្តែក៏ព្រួយបារម្ភដែរ ។ គេបានសុំឲ្យយើងបង្រៀនថ្នាក់អក្ខរកម្មដល់ជនអន្តោប្រវេសន៍ និងជនភៀសខ្លួន ។ ខ្ញុំមានអារម្មណ៍ថាគ្មានសមត្ថភាពបង្រៀនថ្នាក់ភាសាអង់គ្លេសដល់មនុស្សទូទាំងពិភពលោកនោះទេ ។

« យើងមិនមានអ្នកបកប្រែនៅក្នុងថ្នាក់របស់យើងទេ ដូច្នេះការប្រាស្រ័យទាក់ទងនៅមានកម្រិត ។ ស៊ីស្ទើរ ផេនណក និងខ្ញុំនិយាយគ្នាតាមរយៈរូបភាព និងកាយវិការ ។ នៅក្នុងថ្នាក់ដំបូងរបស់ខ្ញុំ ខ្ញុំភ័យខ្លាំងណាស់ ! ខ្ញុំមិនដឹងថាត្រូវធ្វើអ្វីនោះទេ ។ ប៉ុន្តែពេលដែលខ្ញុំប្រមូលសិស្សមកជុំគ្នា ភាពស្ងប់ស្ងាត់កើតមានចំពោះខ្ញុំមួយរំពេច ។

« ខ្ញុំបានទទួលអារម្មណ៍ពីព្រះវិញ្ញាណនៃព្រះអម្ចាស់ ។ ការងាររបស់ខ្ញុំសាមញ្ញទេ—គឺបម្រើសិស្សម្នាក់ៗ ដែលបានចាកចោលអ្វីៗគ្រប់យ៉ាងដើម្បីមករស់នៅសហរដ្ឋអាមេរិក ហើយជួយពួកគេឲ្យរៀនពីរបៀបសរសេរឈ្មោះ និងព័ត៌មានទូទៅរបស់ពួកគេ និងរៀនការសន្ទនាមូលដ្ឋានជាភាសាអង់គ្លេស ។

« យើងបន្តទៅមុខជានិច្ច ។ ជាច្រើនខែក្រោយមក កាលយើងនៅក្នុងព្រះវិហារបរិសុទ្ធ សេនឌីអាហ្គូ ដែលជាផ្នែកមួយនៃការចាត់តាំងរបស់យើង ពេលនោះយើងបានឮបងប្អូនស្រីនិយាយអំពីជនភៀសខ្លួនដែលបានមកពិធីបុណ្យជ្រមុជទឹកនៅថ្ងៃនោះ ។ ខ្ញុំមានសេចក្តីរីករាយជាខ្លាំង ដែលក្នុងចំណោមអ្នកមកធ្វើពិធីបុណ្យជ្រមុជទឹកនោះមានម្នាក់គឺជាអតីតសិស្សរបស់យើង ។ យើងមិនទាំងដឹងផងថា គាត់បានចូលរួមក្នុងសាសនាចក្រ ។

« ដួងចិត្តរបស់យើងក្តុកក្តួល ហើយរលីងរលោងទឹកភ្នែក កាលស៊ីស្ទើរ ផេនណក និងខ្ញុំបានដឹងថា យើងបានធ្វើផ្នែករបស់យើងក្នុងនាមជាអ្នកផ្សព្វផ្សាយសាសនាផ្នែកសេវាកម្មដើម្បីផ្តល់ពរដល់ជីវិតសិស្សរបស់យើង » ។

តម្រូវការអ្នកផ្សព្វផ្សាយសាសនាផ្នែកសេវាកម្ម

ការបម្រើ « ឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំង » ( គោលលទ្ធិ និង សេចក្តីសញ្ញា ៤:២ ) គឺជាការអញ្ជើញមកពីព្រះអម្ចាស់ដើម្បីប្រទានពរដល់ជីវិតរបស់អ្នក ។ ប៉ុន្តែកិច្ចការផ្សព្វផ្សាយសាសនាគឺពុំងាយស្រួលនោះទេ ។ តម្រូវការនៃការបម្រើជាអ្នកផ្សព្វផ្សាយសាសនា ត្រូវបានបែងចែកជាបីបួនផ្នែក ៖

ទូទៅ ( សូមមើល « ១. ការអភិវឌ្ឍភាពធន់នៅក្រោមភាពតានតឹង » ) ។ ក្នុងអំឡុងពេលការបម្រើជាអ្នកផ្សព្វផ្សាយសាសនា អ្នកអាចប្រឈមមុខនឹងឧបសគ្គ និងការផ្លាស់ប្តូរនានា ។ វិធីដែលអាចដោះស្រាយបានពីមុន ប្រហែលជាមិនដំណើរការទេនៅក្នុងបេសកកម្មរបស់អ្នក ។ ពេលខ្លះ យើងអាចមានអារម្មណ៍ថាឆ្គង ហើយស្មុគស្មាញ ។ អ្នកប្រហែលជាឆ្ងល់អំពីរបៀបដើម្បីជួយដល់ពួកអ្នកផ្សព្វផ្សាយសាសនាផ្នែកសេវាកម្មផ្សេងទៀតដែលជួបបញ្ហាស្មុគស្មាញ ។

រូបកាយ ( សូមមើល « ២. ការអភិវឌ្ឍភាពធន់ខាងរូបកាយ » ) ។ អ្នកអាចដើរច្រើនពេញមួយថ្ងៃ ។ កិច្ចការរបស់អ្នកអាចធ្វើឲ្យរាងកាយរបស់អ្នកអស់កម្លាំង ។ ស្ថានភាពថ្មីអាចធ្វើឲ្យមានការអស់កម្លាំង ។

សតិអារម្មណ៍ ( សូមមើល « ៣. ការអភិវឌ្ឍភាពធន់ខាងសតិអារម្មណ៍ » ) ។ អ្នកប្រហែលជាមានអារម្មណ៍អន្ទះសានឹងអ្វីដែលអ្នកត្រូវរៀនសូត្រ ឬធ្វើ ។ អ្នកអាចមានបញ្ហាក្នុងការបន្ធូរអារម្មណ៍ ។ អ្នកប្រហែលជាបាក់ទឹកចិត្ត ធុញទ្រាន់ ឬមានអារម្មណ៍ឯកោ ។

សង្គម ( សូមមើល « ៤. ការអភិវឌ្ឍភាពធន់ខាងសង្គម » ) ។ អ្នកប្រហែលជាត្រូវរៀនស្គាល់មនុស្សថ្មីៗឲ្យបានឆាប់ ។ អ្នកអាចនិយាយជាមួយមនុស្សចម្លែក និងប្រាស្រ័យទាក់ទងជាមួយថ្នាក់ដឹកនាំថ្មីនៅកន្លែងដែលអ្នកបម្រើ ។

ការរៀនសូត្រ និងការងារ ( សូមមើល « ៥. ការអភិវឌ្ឍភាពធន់ខាងផ្លូវចិត្ត » ) ។ អ្នកប្រហែលជាត្រូវរៀនជំនាញថ្មីៗ ដើម្បីបំពេញតាមការចាត់តាំងរបស់អ្នក ។ អ្នកនឹងត្រូវរៀបចំផែនការ និងគ្រប់គ្រងគោលដៅ ។ អ្នកក៏ត្រូវសម្របខ្លួនទៅនឹងការផ្លាស់ប្តូរ និងដោះស្រាយបញ្ហាចំពោះមុខគ្រប់យ៉ាងផងដែរ ។

ខាងវិញ្ញាណ ( សូមមើល « ៦. ការអភិវឌ្ឍភាពធន់ខាងវិញ្ញាណ » ) ។ អ្នកនឹងហាត់ពត់ដើម្បីពង្រឹងទីបន្ទាល់របស់អ្នក និងចៀសវាងការល្បួង ។ សូមព្យាយាមទទួលអារម្មណ៍ និងរៀនស្គាល់ព្រះវិញ្ញាណ ។ នៅពេលខ្លះ អ្នកនឹងត្រូវទទួលយកការកែតម្រូវ ប្រែចិត្ត ហើយត្រូវប្រឈមមុខនឹងភាពទន់ខ្សោយ និងវិប្បដិសារីរបស់អ្នក ។ សូមបន្ទាបខ្លួន ហើយពឹងផ្អែកលើព្រះអម្ចាស់ជាងពីមុន ។ នៅពេលអ្នកធ្វើរឿងទាំងនេះ នោះអ្នកនឹងលូតលាស់ ហើយ រីកចម្រើន ។

ការជួបនឹងបញ្ហាប្រឈមក្នុងបេសកកម្មផ្នែកសេវាកម្មរបស់អ្នក

បញ្ហាប្រឈមជាច្រើនក្នុងបេសកកម្មផ្នែកសេវាកម្មមិនអាចកាត់បន្ថយបានឡើយ ។ អ្នកនឹងត្រូវរៀនអ្វីដែលថ្មី ។ អ្នកត្រូវគោរពតាមច្បាប់ និងមានទំនាក់ទំងល្អជាមួយមនុស្សដទៃទៀត ។ អ្នកត្រូវធ្វើការងារដែលបានចាត់តាំងឲ្យអស់ពីសមត្ថភាព ហើយចាកចេញពីទម្លាប់ស្រួលៗរបស់អ្នកដើម្បីសាកល្បងអ្វីដែលថ្មី ។

ទោះជាយ៉ាងណាក៏ដោយ អ្នកនឹងមានធនធានជាច្រើនដែលនឹងជួយអ្នកឲ្យប្រឈមមុខនឹងបញ្ហានានាក្នុងតួនាទីបម្រើថ្មីរបស់អ្នក ។ កូនសៀវភៅនេះនឹងជួយអ្នកឲ្យស្វែងរក ហើយប្រើប្រាស់ធនធានទាំងនេះ ។ សូមចងចាំផងដែរអំពីសារៈសំខាន់នៃការអធិស្ឋាន ការសិក្សាព្រះគម្ពីរ ការណែនាំពីព្រះវិញ្ញាណបរិសុទ្ធ និងការជួយអ្នកដទៃ ។ អ្វីដែលសំខាន់បំផុតដែលអ្នកអាចធ្វើបានគឺត្រូវពឹងផ្អែកលើព្រះអង្គសង្គ្រោះ និងដង្វាយធួនរបស់ទ្រង់ ។ ទ្រង់គឺជាប្រភពដ៏សំខាន់បំផុតសម្រាប់ការប្រឈមនឹងភាពតានតឹងក្នុងជីវិតជាអ្នកផ្សព្វផ្សាយសាសនាផ្នែកសេវាកម្ម ។

តើខ្ញុំគួរធ្វើអ្វីបន្ទាប់ទៀត ?

សូមសិក្សា និងអនុវត្តតាមព័ត៌មាននៅក្នុងផ្នែកបន្ទាប់ « ការប្រើកំណត់ហេតុនៃបញ្ហាប្រឈម » ។ កាលអ្នកធ្វើដូច្នេះ អ្នកនឹងត្រូវបានដឹកនាំទៅវគ្គជាច្រើនទៀតនៅក្នុងកូនសៀវភៅនេះ ។ ផ្នែកទាំងនេះអាចជួយអ្នកឲ្យដោះស្រាយកង្វល់ជាក់លាក់របស់អ្នក ។ សូមអានវគ្គទាំងនោះឥឡូវនេះ ។ សូមត្រឡប់មកវគ្គផ្សេងទៀត ប្រសិនបើអ្នកត្រូវការវា ។