« ការរៀបចំខ្លួនធ្វើជាអ្នកផ្សព្វផ្សាយសាសនាផ្នែកសេវាកម្ម » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម ៖ កូនសៀវភៅធនធាន ( ឆ្នាំ ២០២០ )

« ការរៀបចំខ្លួនធ្វើជាអ្នកផ្សព្វផ្សាយសាសនាផ្នែកសេវាកម្ម » ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម

ការរៀបចំខ្លួនធ្វើជាអ្នកផ្សព្វផ្សាយសាសនាផ្នែកសេវាកម្ម

ការសម្របខ្លួនទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្ម

ជាទូទៅសម្រាប់ពួកអ្នកផ្សព្វផ្សាយសាសនាថ្មី ដែលត្រូវជួបនឹងភាពតានតឹង ឬមិនស្រណុកចិត្តនោះ ។ អ្នកនឹងត្រូវរៀនភារកិច្ចថ្មី ជួបមនុស្សថ្មី និងធ្វើការជាមួយមនុស្សដទៃ ។ កាលអ្នករៀនធ្វើកិច្ចការទាំងនេះ សូមមានចិត្តអត់ធ្មត់ ។ អ្នកនឹងរៀនស្គាល់ពរជ័យនៃការលះបង់ជីវិតរបស់អ្នកដើម្បីព្រះអង្គសង្គ្រោះ ។ សូមចាំថា ព្រះវិញ្ញាណបរិសុទ្ធនឹងគង់នៅជាមួយអ្នក ។ ទ្រង់នឹងជួយអ្នកឲ្យធ្វើការផ្លាស់ប្តូរនេះ ។ ទ្រង់នឹងជួយអ្នកក្នុងការសម្របខ្លួន ក្នុងការទទួលខុសត្រូវជាអ្នកផ្សព្វផ្សាយសាសនាផ្នែកសេវាកម្មថ្មីរបស់អ្នក ។

ការសម្របខ្លួនទៅនឹងបទពិសោធន៍ថ្មីៗ

ពួកអ្នកផ្សព្វផ្សាយសាសនាផ្នែកសេវាកម្មគឺដូចជាមនុស្សជាច្រើនដែលឈានចូលក្នុងស្ថានភាពថ្មីដែរ ។ មនុស្សជាច្រើនឆ្លងកាត់ដំណាក់កាលនៃការសម្របសតិអារម្មណ៍ផ្សេងៗគ្នា នៅពេលពួកគេចាប់ផ្តើមការបម្រើរបស់ពួកគេ ៖

ការរំពឹងទុកជាមុន
- អ្នកប្រហែលជាមានអារម្មណ៍អន្ទះសាចំពោះបញ្ហាប្រឈមនោះ ( សូមមើល នីហ្វៃទី១ ៣:៧ ) ។
- អ្នកប្រហែលជាមានអារម្មណ៍ថាមានគោលបំណង និងភក្ដីភាពចំពោះព្រះកាន់តែខ្លាំងឡើង ( សូមមើល នីហ្វៃទី៣ ៥:១៣ ) ។
- អ្នកប្រហែលជាមានអារម្មណ៍រីករាយ ហើយទន្ទឹងរង់ចាំជួបមនុស្សថ្មី និងទីកន្លែងថ្មី ។
ការស្វែងយល់ពីអ្វីដែលមិនបានរំពឹងទុក
- អ្នកប្រហែលជាចាប់ផ្តើមមានចម្ងល់អំពីការសម្រេចចិត្តធ្វើការបម្រើរបស់អ្នក ( សូមមើល អាលម៉ា ២៦:២៧ ) ។
- អ្នកប្រហែលជាសម្គាល់ឃើញអាការៈនៃភាពតានតឹងខាងរូបកាយ ដូចជាការគេងមិនលក់ របបអាហារប្រែប្រួល ឬឆាប់ខឹង ។
- អ្នកប្រហែលជានឹកស្មានមិនដល់ថា ខ្លួនឯងរិះគន់ច្បាប់ និងការរំពឹងទុកនានារបស់បេសកកម្មផ្នែកសេវាកម្មដោយមិនដឹងខ្លួន ។ អ្នកប្រហែលជាមិនចង់ធ្វើតាមច្បាប់ទាំងនោះទាំងស្រុងទេ ។
« ខ្ញុំអាចធ្វើបាន »
- អ្នកនឹងរៀនគោរពតាមច្បាប់ និងការរំពឹងទុកនានារបស់បេសកកម្មផ្នែកសេវាកម្មដោយស្ម័គ្រចិត្ត ។
- អ្នករៀនមានភាពអត់ធ្មត់ ( សូមមើល អេសាយ ២៨:១០; ម៉ូសាយ ៤:២៧ ) ។
- ប្រសិនបើអ្នកមានអាការៈនៃភាពតានតឹងខាងរូបកាយ វាក៏ចាប់ផ្តើមធូរស្បើយហើយដែរ ។
ភាពខ្លួនទីពឹងខ្លួនផ្នែកសតិអារម្មណ៍
- អ្នកមានអារម្មណ៍ថាងាយស្រួលក្នុងការធ្វើតាមទម្លាប់ប្រចាំថ្ងៃ ។
- អ្នកស្គាល់ពីកម្លាំង និងការរីកចម្រើនផ្ទាល់ខ្លួនរបស់អ្នក ។
- អ្នកយល់ពីអត្ថន័យនៃការដើរមួយជំហានម្តងៗក្នុងជីវិត ( សូមមើលគោលលទ្ធិ និង សេចក្ដីសញ្ញា ៩៨:១២ ) ។
- អ្នកអភិវឌ្ឍទំនុកចិត្តលើខ្លួនឯង ហើយបង្កើនបំណងប្រាថ្នាដើម្បីបម្រើឲ្យបានកាន់តែប្រសើរជាងមុន ។

អ្នកផ្សព្វផ្សាយសាសនាផ្នែកសេវាកម្មនៅពីមុខត្រាក់ទ័រ

អ្វីៗដែលអ្នកអាចធ្វើបាននាពេលឥឡូវនេះ

សូមស្វែងរកវិធីដើម្បីបម្រើដល់មនុស្សដទៃ ។ បេសកកម្មរបស់អ្នកគឺការហៅដើម្បីបម្រើ ។ សូមផ្តោតលើការមើលទៅខាងក្រៅនៃអារម្មណ៍មិនសុខស្រួលរបស់អ្នកផ្ទាល់ ។ សូមផ្ដល់ការងារបម្រើដល់អ្នកដែលត្រូវការពាក្យសម្ដីល្អៗ សកម្មភាពសប្បុរសធម៌ ឬមិត្តភាព ។

សូមនិយាយជាមួយអ្នកដទៃអំពីការសម្របខ្លួនរបស់អ្នកទៅនឹង បេសកកម្មផ្នែកសេវាកម្មរបស់អ្នក ។ សូមទុកពេលដើម្បីពិភាក្សាប្រធានបទខាងក្រោមនេះជាមួយនឹងឪពុកម្ដាយ ថ្នាក់ដឹកនាំបព្វជិតភាព ឬមិត្តដែលត្រឡប់មកពីបេសកកម្មវិញ ៖

ព្រះបានតម្រូវឲ្យមនុស្សជាច្រើនធ្វើកិច្ចការដែលពួកគេមានអារម្មណ៍ថាលើសពីសមត្ថភាពដែលអាចធ្វើបាន ។ តើអ្នកអាចរៀនអ្វីខ្លះ ចេញពីគំរូនានានៅក្នុងព្រះគម្ពីរ ? អ្នកអាចសិក្សា និក្ខមនំ ៤:១០–១២; យេរេមា ១:៦–៩; អាលម៉ា ១៧:៩–១២; អាលម៉ា ២៦:២៧; អេធើរ ១២:២៣–២៧; ម៉ូសេ ៦:៣១–៣២ ។
ហេតុអ្វីវាសំខាន់ក្នុងការចូលដំណេកទាន់ពេល និងក្រោកឡើងទាន់ពេល ? ហេតុអ្វីវាសំខាន់ដើម្បីរក្សាអាហារូបត្ថម្ភល្អ ? ហេតុអ្វីអ្នកគួរធ្វើលំហាត់ប្រាណឲ្យបានទៀងទាត់ ? ហេតុអ្វីអ្នកគួរធ្វើការអធិស្ឋានផ្ទាល់ខ្លួន ?
តើការសរសេរក្នុងទិនានុប្បវត្តិអាចជួយដល់អ្នកទាំងក្នុងគ្រាជោគជ័យ និងក្នុងគ្រាដែលមានឧបសគ្គដោយរបៀបណា ?
តើអ្នកអាចឆ្លើយតបដោយរបៀបណា នៅពេលគំនិត ឬអារម្មណ៍ដែលព្រួយបារម្ភមិនរសាយទៅណានោះ ?
សូមផ្តោតយកចិត្តទុកដាក់លើការពង្រឹងទំនាក់ទំនងរបស់អ្នកជាមួយព្រះវរបិតាសួគ៌របស់អ្នក ។ សូមស្វែងរកព្រះវិញ្ញាណតាមរយៈការអធិស្ឋាន និងការសិក្សាព្រះគម្ពីរផ្ទាល់ខ្លួន ។ សូមស្ដាប់តន្ត្រីដែលលើកស្ទួយ ហើយអានពររបស់លោកអយ្យកោរបស់អ្នក ។
សូមធ្វើល្អចំពោះខ្លួនឯង និងអ្នកដទៃ ។ សូមនិយាយមកកាន់ខ្លួនឯងនូវពាក្យលួងលោម ពាក្យសម្ដីល្អៗ ដែលអ្នកស្រមៃថាព្រះអង្គសង្គ្រោះនឹងប្រើមកកាន់អ្នកដែរ ។ សូមចងចាំថា គំនិតនៃភាពគ្មានប្រយោជន៍ ភាពអស់សង្ឃឹម ឬការកាត់ទោសយ៉ាងឃោរឃៅ គឺមិនមែនមកពីព្រះអម្ចាស់ឡើយ ។
សូមរំពឹងទុកអ្វីដែលមិនបានរំពឹងទុកជាមុន ។ បទពិសោធន៍របស់អ្នក ជាអ្នកផ្សព្វផ្សាយសាសនាផ្នែកសេវាកម្មនឹងមិនដូចជាបទពិសោធន៍របស់អ្នកផ្សេងឡើយ ។ អ្វីៗនឹងមិនដំណើរការទៅដូចអ្វីដែលអ្នកបានដាក់ផែនការទាំងស្រុងនោះទេ ។ សូមព្យាយាមបើកចិត្តឲ្យទូលាយដើម្បីផ្លាស់ប្តូរ ដើម្បីអ្នកអាចបំពេញទំនួលខុសត្រូវរបស់អ្នកក្នុងនាមជាអ្នកផ្សព្វផ្សាយសាសនាផ្នែកសេវាកម្មបាន ។

សូមចាំថា ព្រះវិញ្ញាណនឹងគង់នៅជាមួយអ្នក នៅពេលអ្នកធ្វើការផ្លាស់ប្តូរនេះ ហើយទ្រង់នឹងជួយអ្នកក្នុងការសម្របខ្លួនទៅនឹងទំនួលខុសត្រូវថ្មីៗរបស់អ្នក ៖

« ហើយអស់អ្នកណាដែលទទួលអ្នក នោះយើងក៏នឹងនៅទីនោះដែរ ដ្បិតយើងនឹងទៅពីមុខអ្នក ។ យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើងនៅព័ទ្ធជុំវិញអ្នក ដើម្បីទ្រអ្នកឡើង » ( គោលលទ្ធិ និង សេចក្តីសញ្ញា ៨៤:៨៨ ) ។

សេចក្ដីសង្ខេប

សូមចាំថា ជីវិតរបស់អ្នកក្នុងនាមជាអ្នកផ្សព្វផ្សាយសាសនាផ្នែកសេវាកម្មនឹងខុសពីជីវិតពីមុនរបស់អ្នក ។ ប៉ុន្តែព្រះអម្ចាស់នឹងប្រទានរង្វាន់ និងពរជ័យដល់អ្នក ។ សូមអភិវឌ្ឍឥរិយាបទវិជ្ជមាន ។ សូមអនុវត្តសេចក្តីជំនឿលើព្រះអម្ចាស់ ។ សូមអត់ធ្មត់ចំពោះខ្លួនឯង និងមនុស្សដទៃ ។ សូមចងចាំពីឱវាទដែលបានប្រទានដល់ព្យាការី យ៉ូសែប ស្ម៊ីធ ៖ « បុត្រយើងអើយ ចូរអ្នកដឹងថា គ្រប់ការណ៍ទាំងនេះនឹងផ្តល់ការពិសោធន៍ដល់អ្នក ហើយនឹងទៅជាការល្អដល់អ្នកទៅវិញ » ( គោលលទ្ធិ និង សេចក្តីសញ្ញា ១២២:៧ ) ។