Talateu

ʻOku fakataumuʻa ʻa e Ko Hono Tali ʻEku Ngaahi Fehuʻi ʻi he Ongoongoleleí (Lēsoni Fakalotu 280) ke ʻoange ki he kau akó ʻa e faingamālie ke nau maʻu ha ngaahi fealēleaʻaki felāveʻi, tauʻatāina, faitotonu, mo fakamaama fekauʻaki mo e ngaahi tefito ‘oku fekauʻaki mo e ongoongoleleí ʻoku nau filí. ‘O hangē ko ia ko e ngaahi kalasi ʻinisititiuti kotoa pē, ko ʻemau tefitoʻi taumuʻá ke “tokoni ke mahino mo falala ʻa e toʻu tupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, mo teuteuʻi kinautolu, honau fāmilí, mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], 1).

Ke tokoni ke fokotuʻutuʻu ʻe he kau faiakó mo e kau akó e ngaahi fealēleaʻaki fakakalasí ʻi ha founga ʻe fakatupulaki ai ʻa e tui kia Sīsū Kalaisi mo Hono Siasi kuo fakafoki maí, ʻoku fokotuʻutuʻu peheni leva ʻa e naunau fakalēsoní:

• Konga 1: Ko e Ako ʻi he Tuí Kuo poupouʻi kitautolu ʻe he ʻEikí ke “fekumi ki he ʻiló, ʻio, ʻi he ako pea ʻi he tui foki” (Tokāteline mo e Ngaahi Fuakava 88:118). ʻOku maʻu ʻe he kau faiakó mo e kau akó ha faingamālie ʻi he lēsoni 1–3 ke nau ʻiloʻi pea aleaʻi ai ʻa e ngaahi tefitoʻi moʻoni ʻoku mahuʻinga ki he ʻilo ʻi he akó pea ʻi he tuí.

• Konga 2: Ko Hono Fakaʻaongaʻi ʻo e Ngaahi Maʻuʻanga Tokoni ʻOkú ne Fakafaingofuaʻi ʻa e Ako ʻOku Ueʻi ʻe he Tuí mo e Ngaahi Fealēleaʻaki Langaki Moʻuí. ʻOku ʻomi ʻe helēsoni 4–6 ha sīpinga ʻo e founga ke fakahoko ʻaki ha ngaahi fealēleaʻaki ʻoku fakatefito ʻia Kalaisi, ʻaonga, tauʻatāina, faitotonu, mo fakamaama mo e kau mēmipa ʻo e kalasí mo e niʻihi kehé.

• Konga 3: Aleaʻi ʻo e Ngaahi Tefito Kuo Fili ʻe he Tokotaha Akó. ʻOku fakaʻatā ʻe helēsoni 7–14 ʻa e kau akó ke nau fili e ngaahi tefito ʻoku nau fie aleaʻí. ʻOku tataki ʻe he ngaahi tefitoʻi moʻoni mo e sīpinga kuo fokotuʻu ʻi he lēsoni 1–6 ʻa e ngaahi aʻusia fakaako ʻa e kalasí ki he lēsoni 7–14.

ʻE ʻoange ʻe he kalasi ko ʻení ha faingamālie ki he kau akó ke nau fakaʻaongaʻi ha ngaahi maʻuʻanga tokoni lahi ʻoku maʻu ʻi he Gospel Library (ʻi he polokalamá pe ʻi he ʻinitanetí) pea mo e Newsroom (Loki Ongoongo) ʻa e Siasí ke tali ʻenau ngaahi fehuʻí. (Fakatokangaʻi ange: ʻOku kei hokohoko atu pē ʻa e Siasí ʻi hono tuku atu ʻa e ngaahi maʻuʻanga tokoní, fakaleleiʻi ʻa e ngāué, mo liliu ha ngaahi fakamatala lahi ange maʻá e Gospel Library. Liliu hoʻo fakaʻaongaʻi ʻo e naunau fakafaiakó ke ʻasi ai ʻa e ngaahi liliu ko ʻení.) ʻI he taimi ʻe niʻihi ʻe malava pē ke fakangatangata ʻa e ngaahi fakamoʻoni ki he ngaahi folofolá pe ngaahi lea ʻa e kau ʻaposetolo mo e kau palōfita ʻo onopōní. ʻI he ngaahi meʻa peheé, ʻe lava ke fai ʻe he kau faiakó mo e kau akó ʻenau fekumi pē ʻanautolu ke maʻu ha ngaahi potufolofola mo ha ngaahi fakamatala mahuʻinga mei he kau taki ʻo e Siasí.

ʻOku kau ʻi he naunau fakalēsoni ko ʻení ha ngaahi ako konga iiki ʻe hiva ke tokoni ki he kau akó ke fakatupulaki ʻenau malava ke ako mo aleaʻi e ngaahi tefito fekauʻaki mo e ongoongoleleí (vakai, fakamatala fakalahi A). ʻE lava ke fili ʻe he kau faiakó pe ko e ngaahi ako konga iiki fē ʻe fakaʻaongaʻi lolotonga ʻa e kalasí mo e taimi ke fakaʻaongaʻi ai kinautolú. ʻOku fakafuofua ʻe meimei miniti ʻe 15 ʻa e ako takitaha.

Kapau ʻe fakaʻau ke fakamahamahalo pe fakakikihi ha fealēleaʻaki fakakalasi, tataki e kau akó ke nau foki ki he meʻa ʻoku paú mo e ʻulungaanga faka-Kalaisí ʻo fakaʻaongaʻi ʻa e ngaahi tefitoʻi moʻoni mo e sīpinga ne ako ʻi he lēsoni 1–6. ʻOua naʻa teitei ngalo ʻa e foʻi moʻoni ko ʻetau taumuʻá ke langaki ʻa e tui kia Sīsū Kalaisí mo maʻu e ngaahi tāpuaki ʻo ʻEne ongoongoleleí (vakai, Ko Hono Akoʻi mo Ako ʻo e Ongoongoleleí, 1).

Koeʻuhí ʻoku fakafalala ʻa e kalasi ko ʻení ki he ngaahi maʻuʻanga tokoni ʻa e Siasí ʻoku maʻu ʻi he ʻinitanetí, fakakaukau ki he meʻa te ke lava ʻo fai ke fakapapauʻi ha fehokotaki ʻinitaneti falalaʻangá. Fakakaukau foki ki he meʻa te ke lava ʻo fai ke tokoniʻi e kau ako ʻoku ʻikai ke ʻi ai haʻanau meʻangāue [fakaʻilekitulōnika] ke hū ai ki he ʻinitanetí, ke nau kei maʻu pē ha aʻusia ako mahuʻinga ʻi he lolotonga ʻo e kalasi ko ʻení.

Ngaahi Fiemaʻu ki he Māká (Credit)

Ke maʻu ha maaka ke ʻosi mei he ʻinisititiutí ʻi he kalasi ko ʻení, ʻoku fie maʻu ʻa e kau akó ke aʻu ʻo peseti ʻe 75 ʻenau maʻu kalasí. ʻOku totonu foki ke nau fakakakato ha ʻekitivitī ako moʻoni mo mahuʻingamālie ʻoku hāsino ai ʻa e meʻa ʻoku nau loto ke maʻu mei he kalasi ko ʻení. ʻOku totonu ke fealēleaʻaki fakataha ʻa e kau akó mo e kau faiakó pea aleaʻi ha ngaahi founga ke fili mei ai. Ke tokoni ke maʻu ha ngaahi fakakaukau, te ke lava ʻo vahevahe ha niʻihi ʻo e ngaahi sīpinga ko ʻení:

• Fakakakato e ngaahi fehuʻi fakalūkufua ʻo e kalasi filí ʻi he Hikiʻi Hake e Aʻusia ʻi he Ako ʻInisititiutí.

• Tauhi ha tohinoa ako ʻo e kalasi.

• Feinga ke ʻiloʻi ha fehuʻi pe hohaʻa pau fekauʻaki mo e Siasí, pea fakaʻaongaʻi ʻa e ngaahi tefitoʻi moʻoni mo e ngaahi taukei ne ako ʻi he kalasi ko ʻení ke fakamatalaʻi ia.

• Aleaʻi fakauike ʻa e meʻa ʻokú ke akó mo ha taha ʻoku ʻikai kau ʻi he kalasi ko ʻení.

• ʻAʻahi fakauike ki he Loki Ongoongó ke tokoni atu ke ke ʻiloʻi maʻu pē ʻa e meʻa ʻoku hoko ʻi he Siasí.

• Fili ha tefito ʻi he Tokoni ʻo e Moʻuí pe Ngaahi Tefito ʻo e Ongoongoleleí ʻoku mahuʻinga kiate koé, pea ako kotoa ʻa e ngaahi naunau mo e maʻuʻanga tokoni ʻoku fakafehokotakí.

ʻOku totonu ke lekooti ʻe he kau akó ʻa e meʻa te nau faí pea vahevahe ʻenau ngaahi palaní mo ʻenau faiakó. ʻI he fakaʻosinga ʻo e semesitaá, ʻoku totonu ke fakahoko ʻe he kau akó ha lipooti mahinongofua, ʻi he tohi pe ʻi he lea, ʻo fakahaaʻi ai pe kuo nau fakakakato ʻa e (ngaahi) fiemaʻu ne nau fokotuʻú. ʻOku totonu ke ʻoange ʻe he kau faiakó ha nofoʻanga feʻunga maʻá e fānau ako ʻoku faingataʻaʻia fakaesinó (vakai, “Ko e Ngaahi Tokoni Makehe maʻá e Fānau Ako ʻoku Faingataʻaʻia Fakaesinó,” ChurchofJesusChrist.org).