Ako Konga Iiki 7

Founga ke Poupouʻi ʻa e Tui kia Sīsū Kalaisí ʻaki Hono Fakahoko ʻo e Fakamoʻoní

Fakamatalaʻi

Fakamatalaʻi ange ʻi he taimi ʻoku tau fakamoʻoni aí, ʻoku tau fakaafeʻi ʻa e Laumālie Māʻoniʻoní pea tohoakiʻi mai ʻa e niʻihi kehé kia Sīsū Kalaisi. Fakaʻaliʻali pea lau ʻa e lea ko ʻeni ʻa Palesiteni M. Lāsolo Pālati mo ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

Palesiteni M. Lāsolo Pālati

‘Oku mahinongofua pē ʻa e hanga ʻe he fakamoʻoní—ʻa e fakamoʻoni ʻoku fai fakamoʻomoʻoní, ʻa ia ʻoku tupu ʻi he Laumālié mo fakapapauʻi ʻi he Laumālie Māʻoniʻoní—ʻo liliu ʻa e ngaahi moʻuí. (M. Russell Ballard, “Pure Testimony,” Liahona, Nov. 2004, 40)

ʻEletā Keuli E. Sitīvenisoni

ʻI he taimi ʻoku tau vahevahe ai ʻetau ʻilo fakalaumālié pe ko ʻetau fakamoʻoni fakalaumālié ki he niʻihi kehé, ʻoku tau “fakahoko ʻetau fakamoʻoní.” Ko e meʻa tatau pē, ʻi he vakai ʻa e niʻihi kehé ki hotau ʻulungaanga māʻoniʻoní, ngaahi tōʻongá, pe ngaahi ngāué, ko ha founga foki ʻeni ʻoku tau “fakahoko ai ʻetau fakamoʻoní.” Ko hono fakahoko ko ia ʻetau fakamoʻoní ʻi he lea pe ngāué ko ha founga ia hono vahevahe ʻo e ngaahi moʻoni mahinongofua mo mahuʻinga ʻo e ongoongoleleí mo e niʻihi kehé. Ko ha fakaafe ia ki he niʻihi kehé ke nau “haʻu kia Kalaisí.” … ʻOku lahi ha ngaahi faingamālie ke fakahoko ai ha fakamoʻoni ʻi he feituʻu kotoa pē. (Gary E. Stevenson, “Testimony: Sharing in Word and Deed,” New Era, Mar. 2019, 4, 5)

ʻOange ha tatau ʻo e laʻipepa tufa ko ʻení ki he kau akó.

Ko Hono Vahevahe Faingofua mo Fakanatula Hoʻo Fakamoʻoní

Ko Hono Tali ʻEku Ngaahi Fehuʻi ʻi he Ongoongoleleí—Ako Konga Iiki 7: Founga ke Poupouʻi ʻa e Tui kia Sīsū Kalaisí ʻaki Hono Fakahoko ʻo e Fakamoʻoní

ʻAi pē ke mahinongofua. ʻOku ʻikai fie maʻu ʻa e fakamoʻoní ke kamata ʻaki ʻa e kupuʻi lea, “ʻOku ou loto ke fakahoko ʻeku fakamoʻoní,” pea ʻoku ʻikai fie maʻu ia ke fakaʻosi ʻaki ʻa e, “ʻI he huafa ʻo Sīsū Kalaisí, ʻēmeni.” Ko e fakamoʻoní ko hano fakahaaʻi ia ʻo e meʻa ʻoku tau tui mo ʻilo ʻoku moʻoní ʻo fakafou ʻi he fakamoʻoni ʻa e Laumālie Māʻoniʻoní.

Fakahoko ia ʻi he fepōtalanoaʻaki angamahení. Kapau ʻoku tau loto fiemālie ke vahevahe (ʻetau fakamoʻoní), ʻoku tau maʻu ha ngaahi faingamālie lahi ke fakakau ʻetau fakamoʻoní ʻi heʻetau ngaahi fepōtalanoaʻaki fakaʻahó. Hangē ko ʻení, ʻi he taimi ʻoku fehuʻi atu ai ʻe ha taha pe ko e hā ʻoku ʻikai ke ke inu kava mālohi aí, te ke lava ʻo vahevahe ʻa e founga kuo faitāpuekina ai hoʻo moʻuí ʻi hoʻo moʻui ʻaki ʻa e Lea ʻo e Potó.

Vahevahe hoʻo ngaahi aʻusiá. ʻOku tau faʻa talanoa mo ha niʻihi kehe fekauʻaki mo hotau ngaahi faingataʻaʻiá. ʻI he taimi ʻoku talanoa atu ai ʻe ha taha ʻa e meʻa ʻoku fekuki mo iá, ʻe lava ke ke vahevahe ange ha taimi naʻe tokoniʻi ai koe ʻe he ʻOtuá ʻi hoʻo ngaahi faingataʻaʻiá mo fakamoʻoni ange ʻokú ke ʻilo te Ne lava foki ʻo tokoniʻi mo kinautolu.

Nofo taha kia Sīsū Kalaisi mo ʻEne tokāteliné. Naʻe fakamamafaʻi ʻe Palesiteni M. Lāsolo Pālati, “he ʻikai lava ke taʻofi ʻa e Laumālié ʻi he taimi ʻoku fai ai ha fakamoʻoni haohaoa kia Kalaisí” (“Pure Testimony,” Liahona, Nov. 2004, 41; vakai foki, “Founga ke Vahevahe Lelei Ange Ai ʻa e Fakamoʻoní,” Liahona, Māʻasi 2019, 8–11).

© 2022 ʻe he Intellectual Reserve, Inc. All rights reserved.

Ko Hono Vahevahe Faingofua mo Fakanatula Hoʻo Fakamoʻoní

laʻipepa tufa ʻa e faiakó

Fakatātaaʻi

Vahevahe ha sīpinga ʻo ha taimi naʻá ke vahevahe ai pe ko ha taha ʻokú ke ʻilo ʻa hoʻo fakamoʻoní ʻi ha founga faingofua mo fakanatula pea ne tokonia ai ke fakamālohia ha tui ʻa ha tokotaha.      

Fakaʻaongaʻi

Fakaafeʻi e kau akó ke nau ngāue mo hanau hoa pea fakaʻaongaʻi e ngaahi tefitoʻi moʻoni ʻi he laʻipepa tufa “Ko Hono Vahevahe Faingofua mo Fakanatula Hoʻo Fakamoʻoní” ke tali e ngaahi tūkunga ko ʻení (pe fili ha ngaahi tūkunga ʻokú ke tui ʻe mahuʻinga ange ki hoʻo kau akó):

• ʻOku ʻeke atu ʻe ha kaungā-ngāue ʻa e meʻa naʻá ke fai ʻi he fakaʻosinga ʻo e uiké. ʻOkú ke tali ange …

• ʻOku vahevahe ʻe ha kaungāmeʻa ne mālōlō ha mēmipa hono fāmilí ʻi ha fakatuʻutāmaki ʻi he uike kuo ʻosí. ʻOkú ke tali ange …

• ʻOku fehuʻi atu ʻe haʻo kāinga, “Ko e hā ʻokú ke fakatuʻamelie maʻu ai pē ki he moʻuí?” ʻOkú ke tali ange …

• ʻOku puputuʻu ha kaungā-ngāue fekauʻaki mo e ʻuhinga ʻokú ke loto-fiemālie ai ke tukuange hoʻo ngāué ka ke ngāue fakafaifekau ʻo ke totongi pē ʻe koe. ʻOkú ke tali ange …

Kapau ʻe ʻi ai ha taimi ʻi he fakaʻosinga ʻo e ngāue ko ʻení, fakaafeʻi ha toko taha pe toko ua ʻo e kau akó ke vahevahe ʻa e meʻa ne na ako mei he aʻusia ko ʻení mo e founga te na ala fakaʻaongaʻi ai e taukei ko ʻeni ʻo hono vahevahe faingofua mo mālohi ʻenau fakamoʻoní ʻi ha tūkunga ʻe hoko mai ʻi he kahaʻú.