Ako Konga Iiki 6

Founga ke Akoʻi Faingofua mo Mahino ʻa e Moʻoní

Fakamatalaʻi

Fakamatalaʻi ange ko hono akoʻi faingofua mo mahino ʻo e moʻoní ko ha founga mālohi ia ke tali ʻaki e ngaahi fehuʻí mo tokangaekina e ngaahi hohaʻá. Fakaʻaliʻali mo lau e fakamatala ko ʻeni ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá mo Palesiteni Sione Teila:

Ko e kole angamaheni taha ʻoku tau fanongo ki aí ko ha kiʻi meʻa faingofua hangē ko ʻení: “Talamai angé ha kiʻi meʻa fekauʻaki mo homou Siasí.” Ko e foʻi lea mahuʻinga hení ko e “kiʻi.” ʻOku ʻikai ke nau pehē mai, “Talamai ʻa e meʻa kotoa pē ʻokú ke ʻiló pea fekauʻi mai ʻa e niʻihi kehé ke nau talamai ʻa e meʻa kehe kotoa pē.” …

… ʻOku ʻi ai ha fiemaʻu vivili ke ʻi ai ha ngaahi fakamatala mahino mo faingofua ʻoku ʻomi kiate kinautolu ʻoku fie ʻilo ki he ngaahi tefitoʻi meʻa fekauʻaki mo e Siasí ʻo hangē ko ia ʻi he ʻaho ní. (M. Russell Ballard, “Faith, Family, Facts, and Fruits,” Ensign pe Liahona, Nov. 2007, 25)

Ko e poto moʻoní, ʻa e tangata ko ia ʻokú ne lava ke toʻo ha kaveinga fakamisiteli ʻo ne veteki ia ke mahinongofua, fakamatalaʻi fakaʻāuliliki pea fakamahinoʻi ia ke lava ʻo mahino ki ha taha kei siʻi. (John Taylor, “Discourse,” Deseret News, Sept. 30, 1857, 238.)

Fakatātaaʻi

Vahevahe mo e kau akó ʻa e ngaahi sīpinga ko ʻeni ʻo ha ngaahi fakamatala faingofua mo mahino naʻe fai ʻe Palesiteni Pālati (vakai, “Faith, Family, Facts, and Fruits,” 26):

• Fakafoki Mai ʻo e Ongoongoleleí: “ʻOku mau tui naʻe mole ʻa e fuofua siasi naʻe fokotuʻu ʻe Sīsuú pea kuo fakafoki mai ia ʻi hotau kuongá. Kuo fakafoki mai ʻa e lakanga fakataulaʻeikí, ʻa e mafai kuo foaki ki he tangatá ke ngāue ʻi he huafa ʻo e ʻOtuá, fakataha mo e kau ʻaposetoló mo e palōfitá ke tataki kitautolu, ʻo hangē ko ia kuo fakafoki mai ʻo tatau mo e ngaahi ouau kotoa pē ʻoku fie maʻu ki he fakamoʻuí.”

• Folofola: “ʻOku mau tui ki he Tohi ʻa Molomoná mo e ngaahi tohi folofola kehe ʻoku nau poupouʻi mo fakamoʻoniʻi ʻa e Tohi Tapú pea fakamoʻoniʻi ʻa e ngāue mo e faka-ʻOtua ʻo Kalaisí pea mo e hokohoko atu ʻo e fakahā ʻa e ʻOtuá ki he tangatá. ʻOku moʻoni, ko e Tohi ʻa Molomoná ko ha Fakamoʻoni ia ʻe Taha ʻo Sīsū Kalaisi.”

• Ko e hā naʻá ke saiʻia ai ʻi he ngaahi sīpinga ko ʻeni ʻo ha ngaahi fakamatala faingofua mo mahino?

• Te ke tāpuekina fēfē ʻa e niʻihi kehé ʻaki hono fakatupulaki hoʻo malava ke vahevahe ha ngaahi fakamatala faingofua mo mahinó?

Fakaʻaongaʻi

Fakaʻaliʻali e ngaahi fehuʻi ko ʻení. Fakaafeʻi e kau akó ke nau ngāue mo ha hoa pea taufetongi ʻi hono tali ʻa e ngaahi fehuʻi ko ʻení. Poupouʻi kinautolu ke tali ʻa e fehuʻi takitaha ʻi ha sekoni ʻe 30–60.

• ʻOku tui nai ʻa e Kāingalotu ʻo e Siasí kia Sīsū?

• Ko e hā ka u ka fie maʻu ai ʻa e Tohi ʻa Molomoná, kapau kuó u ʻosi maʻu ʻa e Tohi Tapú?

• ʻOku fakahoko nai ʻe he kāingalotu homou Siasí ʻa e mali tokolahí?

• Ko e hā ʻoku ou fie maʻu ai ha tui fakalotu kuo ʻosi fokotuʻutuʻú?

Ke fakaʻosi ʻa e ngāué, fakaafeʻi ha toko taha pe toko ua ʻo e kau akó ke vahevahe ʻa e meʻa ne nau ako ʻi he aʻusia ko ʻení.