Ako Konga Iiki 1

Founga ke Taʻeloto kae ʻikai Hoko ʻo Taʻefieauná.

Fakamatalaʻi

Fakaʻaliʻali pea lau ʻa e lea ko ʻeni ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ilifia pea feʻitangaki ha tokolahi. Neongo e ngaahi ongo ko ʻení, ka ʻoku fie maʻu ke anga fakamatāpule ʻetau leá mo fakaʻapaʻapa ʻetau fengāueʻakí. Tautautefito ki he taimi ʻoku ʻikai ke tau loto taha aí. Ne ako mai e Fakamoʻuí ke tau ʻofa ʻi hotau ngaahi filí. … ʻOku ou fakaafeʻi ʻa kitautolu ke tau ʻiloʻi ko e founga ko ia ʻoku tau fakahaaʻi ʻaki ʻetau loto kehekehé, ko e meʻafua totonu pē ia ʻo kitautolú pe ʻoku tau muimui moʻoni koā ki he Fakamoʻuí. ʻOku sai pē ke loto-kehekehe ka ʻoku ʻikai sai ke taʻe-fie-ʻulu-tukua. … Ka tau fakahaaʻi e ʻofá mo e fakaʻapaʻapá, ʻo aʻu ki he ngaahi tūkunga faingataʻá, te tau hoko ange ai ʻo tatau mo Kalaisi. (Quentin L. Cook, “ʻOku Tau Muimui ʻia Sīsū Kalaisi,” Liahona, Mē 2010, 84–85)

Fakamatalaʻi ange ko e founga ʻe taha ʻe lava ke tau taʻeloto kae ʻikai hoko ʻo taʻefieauná ko hono ʻoange ha ngaahi tali ʻokú ne poupouʻi ʻa e anga fakaʻapaʻapá kae ʻikai ko e fakakikihí.

Fakatātaaʻi

Fakaʻaliʻali ʻa e saati ko ʻení, pea aleaʻi fakakalasi ʻa e ngaahi faikehekehe ʻi he ongo kōlomú.

Ngaahi Tali ʻOkú ne Fakaafeʻi ʻa e Fakakikihí	Ngaahi Tali ʻOkú ne Fakaafeʻi ʻa e Anga Fakaʻapaʻapá
Ngaahi Tali ʻOkú ne Fakaafeʻi ʻa e Fakakikihí ʻOku ʻikai ke u tui tatau mo koe koeʻuhí he ʻoku mahino pē hoʻo fehalākí.	Ngaahi Tali ʻOkú ne Fakaafeʻi ʻa e Anga Fakaʻapaʻapá Fakamālō atu ʻi hono vahevahe mai hoʻo ngaahi fakakaukaú. Neongo ʻoku kehekehe ʻeta tuí, ka ʻoku ou houngaʻia ʻokú ta fakatou ongoʻi fiemālie pē ke vahevahe …
Ngaahi Tali ʻOkú ne Fakaafeʻi ʻa e Fakakikihí ʻOkú ke feinga pē koe ke hangē ʻokú ke potó ke fakapuliki ʻaki hoʻo taʻe ʻiloʻi ʻa e meʻa ʻokú ke talanoa ki aí.	Ngaahi Tali ʻOkú ne Fakaafeʻi ʻa e Anga Fakaʻapaʻapá Te ke lava ʻo tokoni mai ke mahino lelei ange kiate au hoʻo fakakaukau ki he …
Ngaahi Tali ʻOkú ne Fakaafeʻi ʻa e Fakakikihí ʻOku ou maʻu ʻa e moʻoní. Ko e meʻa ʻoku ou tui ki aí ʻoku totonú.	Ngaahi Tali ʻOkú ne Fakaafeʻi ʻa e Anga Fakaʻapaʻapá ʻOku ou fakaʻapaʻapaʻi hoʻo ngaahi tuí pea ʻoku ou lava ʻo sio ki heʻenau mahuʻinga kiate koé. Tuku muʻa ke u vahevahe atu ʻa e ʻuhinga ʻoku mahuʻinga ai kiate au ʻeku ngaahi tuí.
Ngaahi Tali ʻOkú ne Fakaafeʻi ʻa e Fakakikihí Ko e tokotaha tāufehiʻa koe.	Ngaahi Tali ʻOkú ne Fakaafeʻi ʻa e Anga Fakaʻapaʻapá ʻOku ʻikai ke u fiemālie ʻi he meʻa naʻá ke toki lea ʻakí. ʻOku mahino nai kiate au ko e meʻa ʻeni naʻá ke ʻuhinga ki aí, ʻa ia ʻoku …

Fakaʻaongaʻi

Fakaafeʻi ʻa e kau akó ke nau ngāue mo ha hoa pea akoako taufetongi ʻi hono faʻu ha ngaahi tali fakaʻapaʻapa ki he ngaahi tūkunga ko ʻení:

1. ʻOku lau Tohi Molomona ʻa ʻAlofonisō ʻi ha vakapuna. ʻOku fakatokangaʻi atu ʻe he tokotaha ʻi hono tafaʻakí ʻa e tohi ʻoku lau ʻe ʻAlofonisoó peá ne pehē atu, “ʻOku ou fakaʻamu pē ʻokú ke ʻilo ʻoku ʻo e tēvoló ʻa e Tohi ʻa Molomoná. ʻOku taha pē ʻa e tohi folofola moʻoní—ko e Tohi Tapu Māʻoniʻoní!” ʻOku tali ange ʻe ʻAlofonisō …

2. ʻOku talanoa ʻa e kalasi ʻinisititiuti ʻa Sulí fekauʻaki mo e ngaahi fatongia ʻo e houʻeiki tangatá mo fafiné. ʻOku pehē ʻe ha talavou ʻe taha, ko Lōkani, ʻi ha leʻolahi mo ongo tukuhifo, “Koeʻuhí ʻoku maʻu ʻe he tangatá ʻa e lakanga fakataulaʻeikí, ko ia ʻokú ne aofangatuku e ngaahi meʻa ʻoku hoko ʻi hono ʻapí.” ʻOku ongoʻi ʻe Suli ʻoku filifilimānako mo fakatupu ʻita ʻa e lea ʻa Lōkaní. ʻOkú ne hiki hake hono nimá mo pehē, …

3. Kuo fakaangaʻi ʻe he kaungā loki ʻo Matá e ngaahi tuʻunga moʻui ʻa e Siasí. ʻOku ongoʻi fakaʻaluma ʻa Mata ki he fakakaukau ʻa hono kaungā lokí, he ʻoku lahi ʻa e ngaahi palopalema ʻa hono kaungā lokí ko e tupu mei heʻene ngaahi fili ki heʻene tōʻonga moʻuí. ʻI ha ʻaho ʻe taha ʻoku pehē ʻe he kaungā loki ʻo Matá, “ʻOku taʻofi koe ʻe homou siasí mei he fiefiá. ʻOkú ke hangē ha pōpulá ki he ngaahi fakakaukau kuo ʻosi honau kuongá.” ʻOku tali ange ʻe Mata, …

Fakaʻosi ʻaki haʻo kole ange ki ha tokotaha ako ʻe taha pe ua ke vahevahe ʻa e meʻa kuo nau ako mei he ʻekitivitī ko ʻení.