Ako Konga Iiki 8

Founga ke Fakaafeʻi ʻa e Niʻihi Kehé ke Ngāue ʻi he Tuí ʻi he Taimi ʻOku Nau Fefaʻuhi ai mo e Ngaahi Fehuʻi Faingataʻá pe Veiveiuá

Fakamatalaʻi

Tokoniʻi e kau akó ke nau vakai ki he founga te nau lava ai ʻo tokoniʻi e niʻihi kehé ke maʻu ʻa e tali ki heʻenau ngaahi fehuʻi ʻi he ongoongoleleí. Fakaʻaliʻali pea lau e lea ko ʻeni ʻa Palesiteni Tieta F. ʻUkitofa naʻá ne vahevahe lolotonga ʻene ngāue ʻi he Kau Palesitenisī ʻUluakí:

ʻOku fakanatula pē ke ʻi ai ha ngaahi fehuʻi—kuo tāhuli e tenga ʻo e fekumi moʻoní ʻo hoko ko ha fuʻu ʻakau lahi ʻo e mahinó. ʻOku tokosiʻi pē ha kāingalotu ʻo e Siasí, kuo teʻeki ai ke nau fefaʻuhi mo ha ngaahi fehuʻi vivili pe pelepelengesi, ʻi ha taimi. Ko e taha e ngaahi taumuʻa ʻo e Siasí ke fafangaʻi mo tanumaki ʻa e tenga ʻo e tuí—ʻo aʻu ai pē he taimi ʻe niʻihi ki he kelekele touʻone ʻo e veiveiuá mo e taʻe-pauʻiá. (Dieter F. Uchtdorf, “Haʻu Ke Tau Kau Fakataha,” Liahona, Nōvema 2013, 23)

ʻOange ha tatau ʻo e laʻipepa tufa ko ʻení ki he kau akó.

Founga ke Tokoniʻi ʻa e Niʻihi Kehé ʻi Heʻenau Ngaahi Fehuʻi ʻi he Ongoongoleleí

Ko Hono Tali ʻEku Ngaahi Fehuʻi ʻi he Ongoongoleleí—Ako Konga Iiki 8: Founga ke Fakaafeʻi ʻa e Niʻihi Kehé ke Ngāue ʻi he Tuí ʻi he Taimi ʻOku Nau Fefaʻuhi ai mo e Ngaahi Fehuʻi Faingataʻá pe Veiveiuá

• Fakafanongo ʻaki ha loto-mahino mo ʻofa.

• Fakaafeʻi e kau akó ke nau ngāue ʻi he tui ʻaki ʻenau kole tokoni ki he Tamai Hēvaní ʻi he lotu mo e talangofua ki he ngaahi fekaú.

• Vahevahe e ngaahi moʻoní, ngaahi ongo fakalaumālié, pe ko hoʻo fakamoʻoní mo e niʻihi kehé (vakai, “Tokoniʻi e Niʻihi Kehé ke Nau Maʻu ʻa e ʻIlo Fakalaumālié,” ChurchofJesusChrist.org).

• Fakaafeʻi e niʻihi kehé ke nau ako e ngaahi folofolá, faleʻi ʻa e palōfitá, pea mo ha ngaahi maʻuʻanga tokoni langaki moʻui, kau ai e ngaahi fakamatala ʻo e Ngaahi Tefito ʻo e Ongoongoleleí ʻi he ChurchofJesusChrist.org.

• Poupouʻi e kau akó ke nau manatuʻi e ngaahi aʻusia kuo nau maʻu ʻi he taimi ne nau ongoʻi ai ʻa e Laumālie Māʻoniʻoní pea ke nau pīkitai ki he moʻoni kuo nau ongoʻi mo ʻiloʻí kae ʻoua kuo maʻu mai ha toe ʻilo lahi ange.

© 2022 ʻe he Intellectual Reserve, Inc. All rights reserved.

Founga ke Tokoniʻi ʻa e Niʻihi Kehé ʻi Heʻenau Ngaahi Fehuʻi ʻi he Ongoongoleleí

Fakatātaaʻi

Fakaʻaongaʻi

Fakaafeʻi e kau akó ke ngāue mo ha hoa ki he ʻekitivitī ko ʻení. Kole ange ke nau fakaʻaongaʻi ʻa e ngaahi tefitoʻi moʻoni ʻi he laʻipepa tufa “Founga ke Tokoniʻi ʻa e Niʻihi Kehé ʻi Heʻenau Ngaahi Fehuʻi ʻi he Ongoongoleleí” ke fakatātaaʻi e founga te nau ala tokoni ai kia Sini ʻi he tūkunga ʻoku hoko maí. (Fakamanatu ki he kau akó ke nau tokanga taha ki hono akoako fakahoko ʻa e founga ke tokoniʻi ai ʻa e niʻihi kehé koeʻuhí ke nau lava ʻo maʻu ʻa e tali ki heʻenau ngaahi fehuʻí kae ʻikai ko hono ʻoange pē ha ngaahi tali kakato maʻanautolu.)

Naʻe kau ʻa Sini ki he Siasí ʻi he taʻu ʻe taha kuohilí. Naʻá ne fakakaukau ke papitaiso he naʻá ne ongoʻi ha fakamoʻoni mālohi ki hono moʻoni ʻo e Tohi ʻa Molomoná. Kimuí ni maí, kuo veiveiua ʻene tuí koeʻuhí ko ʻene ngaahi fehuʻi fekauʻaki mo e ʻuhinga ʻoku ʻikai fakanofo ai ʻa e kakai fefiné ki he ngaahi tuʻunga ʻo e lakanga fakataulaʻeikí ʻi he Siasí. ʻOkú ne ongoʻi ʻoku fakafaikehekeheʻi ʻe he Siasí ʻa e kakai fefiné.

Hili e ʻekitivitī ko ʻení, ʻoange ki he kau akó ha faingamālie ke vahevahe ʻa e meʻa ne nau ako ʻi heʻenau akoakó.