Ako Konga Iiki 3

Founga ke Fakafuofuaʻi ʻa e Falalaʻanga ʻo e Ngaahi Maʻuʻanga Tokoní

Fakamatalaʻi

Lau ‘a e lea ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí:

Palesiteni Tāleni H. ʻOakesi

ʻOku tau moʻui ʻi he kuonga ʻoku lahi fau ai hono fakalahi mo tufaki ʻo e fakamatalá. Ka ʻoku ʻikai moʻoni e fakamatala kotoa pē ko ʻení. ʻOku fie maʻu ke tau tokanga ʻi heʻetau fekumi ki he moʻoní mo fili e maʻuʻanga tokoni ki he fekumi ko iá. Palesiteni Dallin H. Oaks, “Moʻoní mo e Palaní,” Ensign pe Liahona, Nōvema 2018, 25)

Fakatātaaʻi

ʻOange ki he kau akó ʻa e laʻipepa tufa ko ʻení, pea aleaʻi ʻa e founga ʻe lava ke tokoniʻi ai kitautolu ʻe he ngaahi fehuʻi ko ʻení ke tau ʻiloʻi ʻa e ngaahi maʻuʻanga tokoni falalaʻangá.

Ngaahi Fehuʻi ki Hono Vakaiʻi ʻo e Ngaahi Maʻuʻanga Tokoní

Ko Hono Tali ʻEku Ngaahi Fehuʻi ʻi he Ongoongoleleí—Ako Konga Iiki 3: Founga ke Fakafuofuaʻi ʻa e Falalaʻanga ʻo e Ngaahi Maʻuʻanga Tokoní

1. Ko e hā e tuʻunga taukei, ngaahi taumuʻa, mo e meʻa ʻe ala fakapalataha ai e tokotaha faʻutohí?

   Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻoku totonu “ke tau tokanga fekauʻaki mo e taumuʻa ʻa e tokotaha ʻokú ne ʻomi e fakamatalá. … ʻOku totonu ke fakatefito ʻetau fili fakatāutahá, ʻi he fakamatala mei he ngaahi feituʻu ʻoku taau mo feʻunga mo e kaveinga ko iá pea ʻataʻatā mei hono mioʻí, ke iku ai ki ha ngaahi taumuʻa siokitá” (Dallin H. Oaks, “Moʻoní mo e Palaní,” Ensign pe Liahona, Nōvema 2018, 25).

2. Ko e hā e tuʻunga vāofi ʻo e tokotaha faʻutohí ki he ngaahi meʻa ʻoku hoko ʻa ia ʻoku fakamatalaʻí?

   ʻI he taimi ʻoku fakamatalaʻi ai ʻe ha maʻuʻanga tokoni ha meʻa mei he hisitōlia ʻo e Siasí, fehuʻi loto pē kiate koe pe ʻoku mamaʻo fēfē ʻa e maʻuʻanga tokoní mei he meʻa naʻe hoko ʻa ia ʻokú ne fakamatalaʻí. ʻOku faʻa siʻisiʻi ange ʻa e tuʻunga falalaʻanga ʻo e ngaahi talanoa ʻoku makatuʻunga ʻi he ngaahi fakamatala ʻa e kau fanongo talanoa mei he niʻihi kehé.

3. ʻOku taumuʻa nai e tokotaha faʻutohí ke tukunoaʻi e ngaahi fakamoʻoni ʻoku lava ke maʻú koeʻuhí ke takihalaʻi?

   ʻOku ʻi ai ha kau faʻutohi ʻe niʻihi ʻoku nau matuʻaki liʻaki ʻa e ngaahi moʻoni mahuʻingá pea tukunoaʻi mo e ngaahi fakamoʻoni mahuʻingá ke poupouʻi ʻenau fakakaukau pē ʻanautolú.

4. ʻOku ʻomi nai ʻa e ngaahi akonaki mo e meʻa naʻe hoko ʻi he maʻuʻanga tokoni ko ʻení ʻi he puipuituʻa totonu ʻo hono taimí, feituʻú, mo e tūkungá?

   ʻE lava ke fakatupu puputuʻu ha ngaahi akonaki mo e meʻa fakahisitōlia ʻe niʻihi ʻi hono fakamāvahevaheʻi kinautolu mei he puipuituʻa ʻo honau taimí mo e feituʻú. ʻOku kau foki ʻi he ngaahi puipuituʻa fakahisitōliá ha ʻū meʻa ʻoku hoko ʻi he taimi (hangē ko e tau, ngaahi palopalema fakaʻekonōmika, mo e ngaahi taukave fakasōsiale mo fakapolitikale) mo e anga fakafonua mo e kakai ʻo ha kuonga mo e feituʻu pau.

5. ʻOku poupouʻi nai ʻa e ngaahi akonakí mo e ngaahi meʻa naʻe hokó ʻe ha ngaahi maʻuʻanga tokoni falalaʻanga lahi ange?

   ʻOku tokoni e poupou mei he ngaahi maʻuʻanga tokoni falalaʻanga kehé ke fokotuʻu ʻi he tuʻunga pau ʻa e tokāteliné mo e ngaahi meʻa fakahisitōlia naʻe hokó.

© 2022 ʻe he Intellectual Reserve, Inc. All rights reserved.

Ngaahi Fehuʻi ki Hono Fakafuofuaʻi ʻo e Ngaahi Maʻuʻanga Tokoní

laʻipepa tufa ʻa e faiakó

Fakaʻaongaʻi

Kimuʻa ʻo e kalasí, te ke lava ʻo fili ha sīpinga ʻo ha maʻuʻanga tokoni falalaʻanga, naʻe ʻikai paaki ʻe he Siasí. ʻOange ki he kau akó ha taimi ke nau lau ʻa e maʻuʻanga tokoní pea fakaʻaongaʻi ʻa e ngaahi tefitoʻi moʻoni ʻi he laʻipepa tufa “Ngaahi Fehuʻi ki Hono Fakafuofuaiʻi ʻo e Ngaahi Maʻuʻanga Tokoní.” Fakaafeʻi kinautolu ke nau fakamatala ki heʻenau aofangatuku fekauʻaki mo e tuʻunga falalaʻanga ʻo e maʻuʻanga tokoni ko ʻení.