Lēsoni 6

Fakafeʻiloaki ki he Ngaahi Tefito ʻo e Ongoongoleleí: Faikehekehe mo e Uouangataha ʻi he Siasí

ʻE ʻoatu ʻe he lēsoni ko ʻení ha sīpinga ʻo e founga ke maʻu ai ha aʻusia mahuʻingamālie mo langaki ʻo e tuí ʻo fakaʻaongaʻi ʻa e ngaahi maʻuʻanga tokoni ʻoku maʻu ʻi he konga ʻo e Ngaahi Tefito ʻo e Ongoongoleleí ʻi he Gospel Library. Lolotonga ʻa e lēsoní, fakamanatu ki he kau akó ʻoku tau kau ki ha siasi fakavahaʻapuleʻanga ʻokú ne fālute ha ngaahi anga fakafonua, matakali, fonua, mo ha ngaahi lea fakafonua kehekehe. ʻE maʻu ʻe he kau akó ʻa e faingamālie ke akoako fakahoko ʻa e sīpinga ko ʻení ʻi heʻenau aleaʻi ʻa e tefito ʻo e faikehekehe mo e uouangataha ʻi he Siasí: (1) aleaʻi ʻa e mahuʻinga ʻo e tefitó, (2) fakaloloto ʻa e mahinó, (3) fakamatala ke mahino, pea (4) fakakaukauloto mo lekooti.

Ngaahi Fokotuʻu ki Hono Akoʻí

Fili ʻa e Ngaahi Tefitó

ʻE fakatefito elēsoni 7–14 ʻi he ngaahi tefito ʻoku fili ʻe hoʻo kalasí ke nau ako lahi ange ki aí. Fakakaukau ke tukuange ha ako konga iiki pe ʻekitivitī “Ko e Hā ʻOku Foʻoú” ʻi he kalasi ʻo e ʻaho ní koeʻuhí ke maʻu ʻe he kau akó ha taimi lahi ke fili e ngaahi tefito ki he ngaahi lēsoni ka hokó.

Kapau ʻokú ke ongoʻi ʻoku fie maʻu ʻe hoʻo kalasí ha taimi ke fakakaukau ki he mahuʻinga ʻo hono aleaʻi ʻa e ngaahi tefito ʻoku nau filí, te ke lava ʻo vahevahe ʻa e kalasí ki ha fanga kiʻi kulupu iiki pea tuku ki ha ngaahi kulupu ʻe niʻihi ke nau aleaʻi ʻa e laʻipepa tufa 7 pea aleaʻi ʻe he ngaahi kulupu kehé ʻa e laʻipepa tufa 8 mei he fakamatala fakalahi E. ʻOange ha taimi ki he kau akó ke nau vahevahe ʻa e meʻa ne nau akó. Tuku leva ke feinga e kalasí ke nau ʻiloʻi e ngaahi tefito ʻoku fie maʻu lahi taha ʻe he kau akó ke aleaʻi lolotonga ʻi he toenga ʻo e ngaahi lēsoni ʻo e kalasí.

Aleaʻi ʻa e Mahuʻinga ʻo e Tefitó

Lau ʻa e fakamatala ko ʻeni ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá:

Naʻe fakahā ʻe he Kau Palesitenisī ʻUluakí [kimuʻa atu]: “Ko ʻemau pōpoakí … ko ha taha ia ʻo e ʻofa makehe mo e tokanga ki he lelei taʻengata ʻo e tangata mo e fefine kotoa pē, neongo pe ko e hā ʻa e tui fakalotú, matakalí pe fonuá, ʻi hono ʻiloʻi ko e ngaahi foha mo e ngaahi ʻofefine moʻoni kitautolu ʻo e Tamai Taʻengata tatau” (fakamatala ʻa e Kau Palesitenisī ʻUluakí, 15 Fēpueli, 1978).

Ko ʻetau tokāteliné ia—ko ha tokāteline ʻo hono fakakau maí. Ko e meʻa ia ʻoku tau tui ki aí. Ko e meʻa ia kuo akoʻi mai kiate kitautolú. ʻOku totonu ke tau hoko ko e kakai ʻofa, angalelei, pea mo kātaki lahi taha ʻi he kakai kotoa pē ʻo e māmani ko ʻení, koeʻuhí ko e tokāteline ko iá. (“Doctrine of Inclusion,” Ensign, Nov. 2001, 37)

• Ko e hā ʻoku mahuʻinga ai ke tau takitaha ongoʻi ʻoku ʻi ai ha potu ʻi he Siasí maʻatautolu?

• Ko e hā te ne lava ʻo taʻofi ha niʻihi fakafoʻituituí mei heʻenau ongoʻi ʻoku nau kau ki he Siasí?

• Te tau aʻusia fēfē ʻa e uouangatahá ʻi he taimi ʻoku fakautuutu ai ʻa e faikehekehe ʻi he Siasí?

Fakaloloto ʻa e Mahinó

ʻOange ha faingamālie ki he kau akó ke nau ako lahi ange fekauʻaki mo e tefito ko ʻení ʻaki ʻenau ʻalu ki he fakamatala “Diversity and Unity in The Church of Jesus Christ of Latter-day Saints (Faikehekehe mo e Uouangataha ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní)” ʻi he Ngaahi Tefito ʻo e Ongoongoleleí pea ako ia ʻi ha ngaahi miniti siʻi.

Fakaafeʻi e kau akó ke nau aleaʻi mo ha hoa pe ʻi ha fanga kiʻi kulupu iiki ha taha ʻo e ngaahi fehuʻi ko ʻení pe lahi ange:

• Ko e hā naʻá ke ako fekauʻaki mo e faikehekehé mei he fakamatala ko ʻení? Ko e fē ʻa e ngaahi fakamoʻoni fakafolofola naʻe ʻaonga tahá? Vahevahe ha niʻihi ʻo e ngaahi sīpinga ʻo e meʻa naʻe mahuʻingamālie taha kiate koe mei he fakamatala ko ʻení.

• Ko e hā ʻoku mahuʻinga ai ke tau takitaha ʻilo mo vahevahe ʻa e meʻa ʻoku akoʻi ʻe he kau palōfita mo e kau ʻaposetolo ʻo onopōní fekauʻaki mo e faikehekehé?

• ʻE founga fēfē ha lava ʻe he ngaahi akonaki ko ʻeni ʻi he faikehekehé ʻo tokoniʻi kitautolu ke tau hoko ʻo tatau ange mo e Fakamoʻuí?

• ʻE tokoni fēfē e naunau ko ʻení ke toʻo ʻa e ngaahi fetaʻemahinoʻakí mo fakatupulaki ʻa e loto-falalá ʻi he Siasi ʻo e ʻEikí?

• ʻI hoʻo ako e fakamatala ko ʻení, ko e hā ha ngaahi ongo pe fakakaukau naʻá ke maʻu pea ko e hā ʻa e founga ne nau liliu ai koé?

Fakamatala ke Mahino

Fakahoko ha taha ʻo e ngaahi ʻekitivitī ʻoku maʻu ʻi he laʻipepa tufa 3–5 ʻi he fakamatala fakalahi E, pe faʻu haʻo ʻekitivitī pē ʻaʻau.

Fakakaukauloto mo Lekooti

ʻOange ha taimi ki he kau akó ke nau fakalaulauloto ai ki he meʻa kuo nau ako mo ongoʻi ʻi he lolotonga ʻa e kalasi ko ʻení. Te ke lava ʻo fakaʻaongaʻi e ngaahi fehuʻi ʻi he laʻipepa tufa 6, “Fakakaukauloto mo Lekooti” (ʻoku maʻu ʻi he fakamatala fakalahi E), ke tataki ʻaki ʻa e ʻekitivitī ko ʻení.

Ki he Kalasi Hokó

Fakatefito ʻi hono fili ʻe he kau akó e ngaahi tefito kimuʻa ʻi he kalasí, fakamanatu kiate kinautolu ʻa e tefito ʻe aleaʻi ʻi he kalasi hokó. Fakaafeʻi e kau akó ke tuku ha taimi ʻi he lolotonga ʻo e uiké ke fekumi ʻi he ngaahi peesi ʻo e Newsroom, Fakahinohino ki he Ngaahi Folofolá, Konifelenisi Lahí, Tokoni ʻo e Moʻuí, pe Ngaahi Tefito ʻo e Ongoongoleleí ki ha ngaahi maʻuʻanga tokoni ʻoku felāveʻi [mo e tefitó].